ꓟꓲ ꓠꓯ ꓔꓯ ꓠꓵꓻ ꓠꓲ, ꓚꓵ ꓟ. ꓖꓶ ꓢꓴ (Abigail Lupi) ꓚꓱ,
ꓧꓪ. ꓧꓪ ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓟꓲ ꓠꓯ ꓙꓳ ꓢꓴ ꓐꓴ ꓚꓺ ꓟꓲꓽ ꓚꓱ, ꓗꓪ ꓐꓰ ꓞꓳ ꓡꓱ ꓞꓳ ꓡꓯ. ꓐꓴ ꓮ ꓘꓶ. ꓛꓲ ꓔꓯꓺ ꓢꓳ ꓠ, ꓟ ꓮ ꓟꓲ ꓤ ꓕꓲ ꓣꓳ ꓚꓱ, ꓔꓯ ꓚꓺ ꓟ. ꓖꓶ ꓓꓴ ꓥ ꓡꓳ꓿
ꓬꓲ ꓟꓬꓱꓺ ꓠꓬ ꓮꓐꓲꓖꓮꓲꓡ ꓡꓴꓑꓲ ꓥ ꓡꓳ꓿
ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓞꓳ ꓡꓱ ꓐꓴ ꓮ ꓟꓬ, ꓓꓴ ꓙ ꓗꓴ ꓟ ꓠꓬ ꓥꓪ ꓠꓬ ꓞꓲꓼ ꓣꓳ ꓢꓲ ꓤ ꓠꓱ ꓤ ꓡꓰ ꓙꓳ ꓢꓲ ꓥꓪ ꓮ ꓫꓵꓽ ꓡꓰ ꓬꓰ ꓟꓽ ꓗꓴ ꓐꓰ ꓓꓵꓽ ꓓꓴ ꓢꓴ ꓮ ꓟꓬ, ꓔꓬ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓮꓐꓲꓖꓮꓲꓡ ꓠꓬ ꓬꓲ ꓞꓲꓲꓼ (10) ꓘꓳꓼ ꓙꓳ ꓢꓴ ꓤ ꓠꓱ ꓤ ꓕꓲ ꓣꓳ ꓥ ꓟꓲ ꓕꓱ ꓡꓱ ꓫꓵꓽ ꓞꓳ ꓡꓱ ꓐꓴ ꓓꓵꓽ ꓚꓱ, ꓔꓯ ꓥꓳꓽ ꓔꓬ ꓡꓳ ꓐꓰ ꓟ. ꓖꓶ ꓗꓷ ꓟ ꓥ ꓡꓳ꓿
ꓟꓲ ꓠꓯ ꓗꓪ (10) ꓘꓳꓼ ꓡꓰ ꓙꓳ ꓟ ꓤ ꓠꓱ ꓤ ꓐꓴ ꓠꓬ ꓮꓽ ꓔꓳꓽ ꓔꓳꓽ ꓡꓰ ꓗ ꓠꓬꓲ ꓔꓬ ꓟ ꓤ ꓠꓱ ꓤ ꓐꓴ ꓡꓰ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓮ ꓟꓲ ꓤ ꓮꓐꓲꓖꓮꓲꓡ ꓠꓬ ꓢꓴ ꓔꓯ ꓮ ꓡꓰ ꓐꓰ ꓗ, ꓛꓲ ꓡꓰ ꓠ, ꓟ ꓮ ꓡꓰ ꓐꓰ ꓢꓯꓼ ꓖꓶ ꓠ, ꓟ ꓔꓯ ꓟꓬꓱꓽ ꓬꓰ ꓖꓶ ꓠ, ꓟ ꓬꓰ ꓗꓷ ꓟ ꓥ ꓡꓳ꓿
ꓬꓲ ꓠꓬ ꓮ ꓡꓲ ꓐꓰ ꓟꓬꓱꓺ ꓬꓰ ꓬꓲ. ꓪꓴ. ꓔꓴ ꓡ ꓟ ꓚꓱ, ꓠꓬ ꓬꓲ ꓞꓲꓼ (10) ꓘꓳꓼ ꓙꓳ ꓡꓰ ꓟ ꓙꓵ, ꓕꓯ ꓞꓲꓼ ꓪꓴꓽ ꓟꓴ ꓞꓳ ꓟꓳ ꓓꓴ ꓔꓬ ꓔꓶ. ꓗꓪ ꓙꓰ ꓗꓷ ꓟ ꓗꓪ ꓐꓰ ꓪꓴ. ꓔꓴ ꓗꓷ ꓟ ꓥ ꓡꓳ꓿
ꓖꓳ ꓕꓲ ꓙꓵ, ꓗꓪ ꓞꓲꓼ ꓪꓴꓽ ꓟ ꓞꓳ ꓟꓳ ꓐꓴ ꓠꓬ ꓮ ꓘꓶ. ꓛꓲ ꓛꓳꓽ ꓒꓯ, ꓟꓽ ꓔꓬ ꓮ ꓘꓶ. ꓛꓲ ꓗ, ꓟꓽ ꓛꓲ ꓔꓬ ꓟ ꓔꓯ ꓬꓲ. ꓡꓳ. ꓟꓳ ꓗꓷ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓞꓲꓼ ꓪꓴꓽ ꓡꓰ ꓢꓴ ꓞꓲ ꓟꓳ ꓡꓰ ꓢꓴ ꓐꓴ ꓔꓯ ꓐ ꓡ ꓟꓬ ꓛꓲ ꓬꓰ ꓙ ꓠ, ꓟ ꓜꓴꓻ (Caregivers for the Elderly) ꓟꓬꓱꓺ ꓔ ꓟ ꓜꓴꓻ ꓔꓯ ꓒꓴ ꓖꓶ ꓗꓷ ꓟ ꓥ ꓡꓳ꓿
ꓝꓮꓲ ꓬꓲ ꓠꓬ ꓬꓲ ꓛꓳꓽ ꓒꓯ, ꓐꓴ ꓔꓯ ꓜꓲꓼ ꓢꓲ ꓠꓬꓲ ꓞꓲꓼ ꓪꓴꓽ ꓡꓰ ꓢꓴ ꓐꓴ ꓔꓬ ꓟ ꓔꓶ. ꓗꓪ ꓙꓰ ꓢꓲ ꓠꓬꓲ ꓬꓲ ꓪ ꓐꓱ ꓶ ꓟꓴꓽ ꓖꓪ ꓮ ꓟꓬ, ꓖꓪ ꓖꓶ ꓢꓲ ꓠꓬꓲ ꓗ, ꓛꓲ ꓠ, ꓟ ꓞꓲꓼ ꓪꓴꓽ ꓡꓰ ꓢꓴ ꓐꓴ ꓔꓯ ꓬꓰ ꓖꓶ ꓗꓷꓳ꓿
ꓮ ꓘꓶ. ꓛꓲ ꓣꓳ ꓚꓵˍ ꓟ ꓠꓬ ꓛꓳꓽ ꓒꓯ, ꓟꓽ ꓙꓳ ꓠꓲ, ꓫ. ꓟꓬ ꓫ. ꓔꓬ ꓟ ꓞꓲꓼ ꓪꓴꓽ ꓡꓰ ꓢꓴ ꓔꓯ ꓠꓵꓻ ꓠꓲ, ꓟ. ꓖꓶ ꓟ꓾ ꓬꓲ ꓪ ꓔꓯ ꓫ. ꓕꓱ ꓟ ꓟꓴ ꓖꓪ ꓖꓪ ꓖꓶ ꓟ ꓔꓯ ꓮ ꓟꓬ, ꓫꓵꓽ ꓔꓯ ꓬꓰ ꓖꓶ ꓗꓷꓳ꓿
ꓬꓲ ꓡꓰ ꓮ ꓟꓬ, ꓛꓲ ꓢꓯꓼ ꓕꓵꓼ ꓟ ꓪꓴ. ꓠꓬꓲ ꓴꓢꓮ ꓗꓴꓷꓼ (ꓠꓰꓪ ꓙꓰꓣꓢꓰꓬ ) ꓡꓳ ꓒꓱ ꓗꓪ ꓔꓬ ꓟ ꓞꓲꓼ ꓪꓴꓽ ꓡꓰ ꓢꓴ ꓐꓴ ꓔꓬ ꓟ ꓔꓶ. ꓗꓪ ꓔꓬ ꓟ ꓞꓳ ꓟꓳ ꓐꓴ ꓮ ꓟꓬ, ꓠꓬ ꓗ, ꓛꓲ ꓟ ꓠꓲ, ꓟ ꓢ ꓡꓰ ꓟ ꓔꓯ ꓘꓳ, ꓣꓴ ꓪ ꓡꓰ ꓟ ꓥ ꓡꓳ꓿
ꓮꓐꓮꓖꓮꓲꓡ ꓠꓬ ꓬꓲ ꓠꓯ, ꓗꓪ ꓙꓳ ꓟ ꓬꓲ ꓙꓵ, ꓕꓯ ꓬꓲ ꓐꓱ ꓶ ꓡꓰ ꓟꓽ ꓣꓱ ꓢꓴ ꓔꓯ ꓗ, ꓛꓲ ꓡꓰ ꓝꓲ ꓠ, ꓟ ꓝꓮꓲ ꓞꓲꓼ ꓟꓳ ꓡꓰ ꓢꓴ ꓔꓯ ꓠꓲ, ꓟ ꓢꓽ ꓡꓰ ꓝꓲˍ ꓟ ꓙꓲ ꓟ ꓟꓬꓱꓽ ꓮ ꓟꓬ, ꓔꓯ ꓬꓰ ꓖꓶ ꓗꓷ ꓟ ꓥ ꓡꓳ꓿
ꓮꓐꓲꓖꓮꓲꓡ ꓚꓱ, ꓗꓪ ꓐꓰ ꓣꓳ ꓔꓯ ꓔꓯꓺ ꓢꓳꓻ ꓠ, ꓟ ꓮ ꓫꓵꓽ ꓖꓶ ꓡ ꓡ ꓐꓯ ꓠꓬ
ꓣꓳ ꓞꓲꓼ ꓪꓴꓽ ꓞꓲꓼ ꓣꓳ ꓟ ꓠꓬ ꓫꓵꓽ ꓪꓴꓽ ꓟꓽ ꓥ ꓢꓴ ꓔꓯ ꓙꓲ ꓟ ꓟꓬꓱꓽ ꓬꓰ ꓖꓶ ꓠ, ꓟ ꓠꓬ ꓞꓲꓼ ꓪꓴꓽ ꓡꓰ ꓗꓪ ꓛꓲ ꓡꓳ. ꓔꓬ ꓠ,ꓟ ꓟꓽ ꓛꓵꓽ ꓐꓰ ꓐꓯ ꓖꓶ ꓡ ꓟ ꓥ ꓡꓳ꓿
ꓣꓳ ꓓꓰꓺ ꓟ ꓟꓬꓱꓽ ꓙꓲ ꓟ ꓟꓬꓱꓽ ꓔꓯ ꓬꓰ ꓖꓶ ꓠꓬ ꓮ ꓘꓶ. ꓛꓲ ꓪꓴꓽ ꓟ ꓔꓯ ꓒꓬꓱꓼ ꓡ ꓝꓲ ꓟ ꓥ ꓡꓳ꓿ ꓢꓴ ꓐꓱ ꓶ ꓟꓴ ꓖꓪ ꓕꓲ ꓚꓱ, ꓖꓪ ꓟ꓾ ꓠꓱ. ꓐꓯ ꓢꓴ ꓐꓰ ꓫ. ꓕꓱ ꓟ꓾ ꓬꓲ ꓪ ꓫ. ꓕꓱ ꓟ ꓢꓯꓼ ꓔꓯ ꓠ ꓠ, ꓖꓶ ꓟ ꓔꓯ ꓬꓰ ꓖꓶ ꓠ, ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓠꓬ ꓮ ꓫꓵꓽ ꓔꓯ ꓠꓲ, ꓟ ꓐ ꓢꓴ ꓒꓬꓱꓼ ꓔꓬ ꓡ? ꓣꓳ ꓤꓶꓻ ꓠꓯ, ꓗꓪ ꓮ ꓡꓰ ꓫꓵꓽ ꓙꓲ ꓟ ꓟꓬꓱꓽ ꓗꓪ ꓬꓰ ꓠꓲ, ꓫꓵˍ ꓢꓴ ꓒꓬꓱꓼ ꓠꓲ, ꓫꓵꓽ ꓡ? ꓣꓳ ꓔꓯ ꓠ ꓠꓬꓲ ꓔꓬ ꓟ ꓥ ꓡꓳ꓿
(10) ꓘꓳꓼ ꓡꓳ ꓟ ꓮ‐ꓟꓲ ꓮꓐꓲꓖꓮꓲꓡ ꓡꓰ ꓠꓱ. ꓐꓯꓼ ꓢꓴ ꓔꓯ ꓗ, ꓛꓲ ꓝꓲ ꓟ ꓡꓰ ꓐꓰ ꓣꓳ ꓥ ꓟꓲ ꓢꓴ ꓔꓯ ꓗ, ꓛꓲ ꓟ ꓓꓳꓽ ꓔꓯ ꓖꓶ ꓐ ꓡ ꓢꓴ ꓒꓬꓱꓼ ꓠ, ꓟ ꓢꓯꓼ ꓕꓵꓼ ꓡꓯ꓿ ꓫ. ꓟꓳ ꓪ꓿
