ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓟꓲ ꓠꓯ ꓕꓱ ꓟ ꓗꓪ ꓛꓲ ꓡˍ ꓕꓯ ꓣꓳ ꓠꓬ ꓫꓵꓽ ꓙꓳ ꓧꓪꓽ ꓙꓳˍ ꓟ ꓑꓶ. ꓓꓴ ꓧꓪ ꓜꓽ ꓧꓪ ꓓꓳꓻ ꓪˍ ꓡꓳ꓿ ꓜꓽ ꓖꓴ ꓬꓲꓼ ꓔ ꓖꓴ ꓦꓲꓻ꓾ ꓖꓪꓽ ꓓꓴ ꓐꓵ ꓞꓶꓽ ꓟꓶ ꓞꓲ ꓕꓱ ꓡꓱ ꓫꓵꓽ ꓔꓯ ꓕꓲ ꓠꓬꓲ ꓕꓲ ꓠꓬꓲ ꓝꓶ ꓞꓲ. ꓢꓯꓼ ꓕꓵꓼ ꓪˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓞꓳ ꓤ ꓔꓯ ꓠꓬ ꓧꓪꓽ ꓖꓳ ꓓꓱꓽ ꓕꓲ ꓒꓳ, ꓥˍ ꓟꓲ ꓙꓳˍ ꓢꓰꓽ ꓡꓳ꓿ ꓖꓳ ꓡꓱ ꓠꓬꓲ ꓞꓳ ꓤ ꓠꓬ ꓦ ꓐꓰ ꓑꓳ. ꓗꓷ ꓢꓲ ꓠꓬꓲ ꓞꓳ ꓤ ꓒꓬꓱꓼ ꓡˍ ꓡꓳ꓿ ꓪꓴ‐ꓢ ꓠꓬ ꓞꓳ ꓤ ꓔꓯ ꓚꓬꓴ.ˍ ꓐꓰ ꓐꓯ ꓟ ꓠꓬ ꓧꓪꓽ ꓖꓳ ꓓꓱꓽ ꓐꓰ ꓦ ꓠꓬꓲꓽ ꓒꓳ, ꓡꓱꓸꓼ ꓔꓯ ꓚꓬꓴ.ˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓠꓬ ꓣꓳ ꓔꓯ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓮ ꓙꓵꓽ ꓠꓬ ꓚꓬꓴ. ꓟꓶˍ ꓟ ꓬꓲ ꓖꓶ ꓗꓷꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓙꓵˍ ꓟ ꓦꓬꓼ ꓠꓬꓲ ꓗꓪ ꓮ ꓡꓲ ꓐꓰ ꓞꓳ ꓙꓳ ꓠꓯ, ꓡ ꓐꓯ ꓟ ꓠꓬ ꓢ. ꓠꓯ ꓠꓽ ꓦꓬꓼ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓑ ꓙꓽˍ ꓡꓳ꓿ ꓟ‐ꓕꓲ ꓕꓳꓽ ꓶ ꓗꓪ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓪꓴ‐ꓢ ꓔꓯ ꓥ ꓟ ꓪꓴ‐ꓢ ꓔꓯ ꓖꓶ꓾ ꓞꓳ ꓤ ꓔꓯ ꓥ ꓟ ꓞꓳ ꓤ ꓔꓯ ꓖꓶ꓾ ꓐꓰ ꓢꓲ ꓒ ꓬꓰ‐ꓢꓴ ꓒꓳ, ꓖꓶˍ ꓟ ꓚꓱ, ꓔꓯ ꓣꓳ ꓠ ꓠ, ꓓꓴ ꓥ ꓡꓳ꓿
ꓒ‐ꓡꓲ‐ꓢꓷ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓫꓵꓽ ꓠꓬꓲ ꓠꓲ, ꓫꓵˍ ꓟ ꓑꓶ. ꓓꓴ ꓢꓲ‐ꓢ ꓔꓯ ꓬꓲ ꓘꓳ. ꓖꓶ ꓠꓯ, ꓡ꓾ ꓟꓽ ꓖꓶ ꓠꓯ, ꓡ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓬꓲ ꓪꓻ ꓕꓴˍ ꓡꓳ꓿ ꓬꓲ ꓪꓻ ꓕꓴˍ ꓐꓯ ꓟ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓰ ꓐꓯˍ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓢꓲ‐ꓢ ꓔꓯ ꓬꓲ ꓘꓳ. ꓖꓶ ꓟꓽ ꓛꓵꓻ ꓐꓰ ꓐꓯˍ ꓠꓬ ꓢꓲ‐ꓢ ꓬꓲ ꓙꓵꓽ ꓗ ꓔꓯ ꓡꓳ ꓒꓰ, ꓗꓷ ꓟ ꓑꓶ. ꓓꓴ ꓬꓲ ꓔꓯ ꓢꓴ ꓡꓰ ꓣꓴ ꓡˍ ꓥꓳ꓿ ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓬꓲ ꓪꓻ ꓕꓴˍ ꓟ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓢꓲꓽ‐ꓫꓬ‐ꓟ‐ꓦ ꓢꓯꓼ ꓪ ꓗꓪ ꓐꓰ ꓬꓲ ꓪ ꓬꓲ ꓪꓻ ꓗꓪ ꓐꓰ ꓡꓲ, ꓗꓷˍ ꓟ ꓚꓱ, ꓔꓯ ꓣꓳ ꓑ ꓙꓽˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓐꓯˍ ꓟ ꓠꓬ ꓞꓳ ꓤ ꓔꓯ ꓟ ꓠꓬ ꓞꓳ ꓤ ꓔꓯ ꓖꓶ ꓐꓰ ꓐꓯ ꓖꓶˍ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓠꓬ ꓠꓴ ꓐꓰ ꓥꓪ ꓐꓱ ꓶ ꓥ ꓡꓳ꓿ ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓠꓴ ꓠꓬ ꓪꓴ‐ꓢ ꓔꓯ ꓟ ꓪꓴ‐ꓢ ꓔꓯ ꓖꓶ ꓔꓬ ꓡ ꓐꓰ ꓐꓯ ꓟ ꓔꓯ ꓣꓳ ꓙꓽ ꓜꓲꓼ ꓓꓴ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯ ꓠꓬ ꓕꓲ ꓠꓬꓲ ꓟ ꓔꓯ ꓫꓵꓽ ꓫꓵ 24 ꓟ ꓙꓳˍ ꓥ ꓟꓲ ꓣꓳ ꓠꓬ ꓕꓱ ꓟ ꓮ ꓙꓵꓽ ꓡꓱꓸꓼ ꓔꓯ ꓣꓳ ꓚꓲ. ꓛꓬ ꓐꓱ ꓶˍ ꓡꓰꓽ ꓣꓱꓽ ꓔꓬ ꓟ ꓟꓬꓽˍ ꓡꓳ꓿ ꓫꓵꓽ ꓫꓵ ꓕꓲ ꓙꓵ, ꓡꓰ. ꓟꓽ ꓥ꓾ 15 ꓧꓷ, ꓤ ꓡꓰ. ꓪꓴ‐ꓢ ꓔꓯ ꓖꓶ ꓟꓽ ꓐ ꓡ ꓟ ꓦꓬꓼ ꓠꓬꓲ ꓙꓳˍ ꓡꓳ꓿ ꓣꓳ ꓮ ꓙꓵꓽ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶˍ ꓡꓰꓽ ꓢꓯꓼ ꓕꓵꓼ ꓔꓬ꓿ ꓖꓳ ꓡꓱ ꓬꓰˍ ꓥꓳ ꓐꓯ ꓠꓬ ꓪꓴ‐ꓢ ꓶꓼ ꓤ ꓫꓱ. ꓤ ꓟꓽ ꓟꓶ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓠꓴ ꓚꓲ. ꓛꓬ ꓤꓶꓻ ꓗꓪ ꓙꓳˍ ꓟ ꓮ ꓙꓵꓽ꓾ ꓠꓴ ꓤꓶꓻ ꓔꓯ ꓠꓴ ꓡꓯꓽ ꓒꓯ, ꓗꓪ ꓡꓰꓽ ꓗꓶ ꓔ ꓢꓲ ꓠꓬꓲ ꓞꓳ ꓙꓳ ꓔꓬ ꓡ꓿ ꓙꓳˍ ꓟ ꓬꓲ ꓙꓵ, ꓔꓯ ꓥ ꓟꓲ ꓠꓴ ꓚꓲ. ꓛꓬ ꓐꓱ ꓶˍ ꓡꓰꓽ꓾ ꓒꓴ ꓫꓵ ꓖꓴꓽ ꓙꓴꓽ ꓮ ꓙꓵꓽ ꓥˍ ꓟꓲ ꓠꓴ ꓚꓲ. ꓛꓬ ꓐꓱ ꓶˍ ꓡꓰꓽ ꓢꓯꓼ ꓕꓵꓼ ꓔꓬ ꓥꓳ ꓐꓯ ꓠꓬ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓡꓳ. ꓠꓬꓲˍ ꓕꓯ ꓢꓯꓼ ꓟꓬ ꓟꓽ ꓟꓶ꓾ ꓣꓱꓽ ꓛꓰꓽ ꓟꓽ ꓟꓶ ꓐꓯˍ ꓟ ꓣꓳ ꓡꓳ. ꓟꓳˍ ꓡꓳ꓿ ꓙꓵꓻ ꓠꓲ, ꓙꓳ ꓢꓴ꓾ ꓪꓴ‐ꓢ ꓔꓯ ꓙꓳꓺ ꓒꓵꓽ ꓢꓴ ꓠꓬ ꓠꓬꓲꓽ ꓛꓱꓽ ꓡꓱꓸꓼ ꓙꓳꓽ ꓙꓳꓽ ꓫꓱꓽ ꓗꓴ.ˍ ꓡꓳ꓿
