ꓠꓯ ꓢꓷ. ꓠꓲ, ꓢꓷ. ꓟ ꓠꓬ ꓮ ꓫꓵꓽ ꓐꓱ ꓶ ꓥ ꓡ? (Fr. Pedro Arrupe)
ꓧꓪ. ꓧꓪ ꓠꓬꓲ. ꓠꓬꓲ ꓞꓳ ꓡꓱ ꓐꓴ ꓣꓳ ꓚꓲ. ꓛꓬ ꓔꓟꓲ ꓯ ꓠꓬꓲ ꓠ, ꓟ ꓠꓬ ꓥꓪ ꓮ ꓫꓵꓽ ꓑꓶ. ꓓꓴ ꓟꓲ ꓠꓯ ꓢꓷ. ꓠꓲ, ꓣꓳ ꓣꓴ ꓔꓬ ꓡ?
ꓟꓬꓱꓽ ꓙꓲ ꓙꓲ ꓪ ꓠ, ꓟ ꓐꓱ ꓶ ꓥ ꓡ? ꓦ‐ꓐ ꓪꓽ ꓒꓴ ꓮ ꓟꓬ, ꓪ ꓠ, ꓟ ꓐꓱ ꓶ ꓥ ꓡ?
ꓣꓳ ꓕꓲ ꓦꓲꓻ ꓢꓴ ꓐꓴ ꓮ ꓙꓵꓽ ꓔꓬ ꓢ ꓠ, ꓟ ꓐꓱ ꓶ ꓥ ꓡ?
ꓥ ꓪ ꓕꓱ ꓮ ꓙꓵꓽ ꓠꓬ ꓜꓳ ꓟ ꓐꓰ ꓙꓲ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓕꓱ ꓟ ꓮ ꓙꓵꓽ ꓔꓯ ꓜꓲ ꓜꓲ ꓟꓴ ꓟꓴ ꓐꓰ ꓡꓳ. ꓟꓳ ꓪ ꓢꓴ ꓕꓲ ꓣꓳ ꓔꓬ ꓟ ꓥ ꓡꓳ꓿ ꓬꓲ ꓠꓬ ꓚꓮꓔꓧꓳꓡꓲ ꓔꓲꓺ ꓒ ꓝꓣ. ꓑꓰꓓꓣꓳ ꓮꓣꓣꓴꓑꓰ ꓥ ꓡꓳ꓿
ꓬꓲ ꓠꓬ ꓙꓰꓢꓴꓲꓔ ꓔꓲꓺ ꓒ ꓜꓴꓻ ꓗꓪ ꓐꓰ ꓔꓲꓺ ꓒ ꓕꓲ ꓪ ꓥ ꓢꓲ ꓠꓬꓲ ꓟꓲ ꓠꓯ ꓢꓷ. ꓠꓲ, ꓮ ꓟꓬ, ꓔꓯ ꓢꓳꓻ ꓣꓴ ꓗꓷ ꓗ. ꓠꓯ ꓔꓲꓺ ꓒ ꓒꓬꓱꓼ ꓡ ꓢꓲ ꓠꓬꓲ ꓙ‐ꓑꓮꓠ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓟꓯ ꓗꓷ ꓢꓴ ꓔꓲꓺ ꓒ ꓥ ꓡꓳ꓿
ꓬꓲ ꓠꓬ ꓪꓴ‐ꓢ ꓶꓼ ꓓꓳ ꓫꓱ, ꓓꓳ ꓚꓺ ꓟꓽ ꓡꓰ ꓟꓽ ꓞꓲ (ꓴꓢꓮ ꓗꓴꓷꓼ ꓡꓰ) ꓙ‐ꓑ ꓗꓴꓷꓼ ꓗꓪ ꓐꓳ ꓓꓽ ꓞꓰ ꓩꓴ ꓡ ꓟ ꓙꓵ, ꓕꓯ ꓬꓲ ꓢꓷ. ꓔ ꓟ ꓠꓯꓼ ꓞꓲꓼ ꓢꓷ. ꓠꓲ, ꓗꓪ ꓐꓰ ꓬꓲ ꓠꓬ ꓙ‐ꓑ ꓑ ꓫꓬ ꓐꓴ ꓮ ꓟꓬ, ꓢꓯꓼ ꓟ ꓔꓯ ꓚꓬꓙ ꓙ ꓗꓷ ꓢꓴ ꓔꓲꓺ ꓒ ꓕꓲ ꓪ ꓥ ꓡꓳ꓿
ꓬꓲ ꓡꓰ ꓐꓯ ꓔ ꓟ ꓠꓬ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓢꓷ. ꓢꓴ ꓓꓽ ꓢꓴ ꓕꓲ ꓣꓳ ꓠꓬ
ꓞꓳ ꓙꓲ ꓕꓲ ꓣꓳ ꓒꓬꓱꓼ ꓡ ꓠ, ꓟ ꓐꓱ ꓶ ꓥ ꓡꓳ꓿
ꓔꓱ ꓚꓵˍ ꓟ ꓔꓯ ꓧꓪ ꓖꓴ ꓢꓴ ꓒꓬꓱꓼ ꓡ ꓠ, ꓟ ꓐꓱ ꓶ꓾ ꓙꓲ ꓟ ꓐꓰ ꓟꓽ ꓙꓲ ꓟ ꓔꓯ ꓢꓲ ꓖꓴ ꓢꓴ꓾
ꓜꓴꓻ ꓐꓱ ꓶ ꓙꓲ ꓟ ꓟꓬꓱꓽ ꓗꓪ ꓧꓳꓽ ꓪꓴ. ꓟꓴ ꓖꓶ ꓢꓴ ꓒꓬꓱꓼ ꓡ ꓠ, ꓟ ꓥ ꓡꓳ ꓐꓰ ꓐꓯ ꓖꓶ ꓔ ꓡꓳ꓿
ꓝꓣ. ꓑꓰꓓꓣꓳ ꓮꓣꓣꓴꓑꓰ ꓠꓬ 1945 ꓘꓳꓼ ꓙ‐ꓑ ꓗꓴꓷꓼ ꓬꓴ‐ꓗꓴ‐ꓢꓧꓲ‐ꓟꓮ ꓡꓳ ꓒꓱ ꓗꓪ ꓴꓢꓮ ꓗꓴꓷꓼ ꓡꓰ ꓐꓳ ꓔ ꓞꓰ ꓡ ꓟ ꓙꓵ, ꓕꓯ ꓬꓲ ꓠꓬ ꓶꓻ ꓤ ꓗꓪ ꓟꓽ ꓘꓰ ꓙꓰ ꓬꓲ ꓠꓬ ꓔꓲꓺ ꓒ ꓟꓽ ꓒꓬꓱꓼ ꓡ ꓢꓲ ꓕꓯ ꓠꓯꓼ ꓞꓲ ꓢꓷ. ꓠꓲ, ꓢꓳ ꓣꓴ ꓔ ꓟ ꓔꓯ ꓙ‐ꓑ ꓑ ꓫꓬ ꓐꓴ ꓐꓳ ꓑꓶ. ꓓꓴ ꓠꓻ ꓓꓴ ꓔꓳ,ꓜꓳ ꓔꓬ ꓢꓴ ꓐꓴ ꓔꓯ ꓬꓰ ꓙ ꓗꓷꓳ꓿
ꓝꓣ. ꓑꓰꓓꓣꓳ ꓕꓱ ꓡꓱ ꓐꓰ ꓮ ꓘꓶ. ꓛꓲ ꓑꓶ ꓢꓲ ꓠꓬꓲ ꓚꓲ. ꓛꓬ ꓢꓯꓼ ꓟꓬ ꓔꓯ ꓟꓽ ꓛꓳ ꓬꓲ ꓠꓬ ꓠꓻ ꓓꓴ ꓒꓬ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓜꓳ ꓗꓷ ꓟ ꓑꓶ. ꓓꓴ ꓕꓲ ꓟꓲ ꓠꓯ ꓡꓱꓼ ꓗꓪ ꓔꓬ ꓟ ꓞꓳ ꓡꓱ ꓐꓴ ꓬꓲ ꓔꓯ ꓟꓬꓱꓽ ꓓꓳ ꓖꓶ ꓗꓷ ꓟ ꓥ ꓡꓳ꓿
ꓣꓳ ꓞꓳ ꓡꓱ ꓐꓴ ꓔꓯ ꓝꓣ. ꓑꓰꓓꓣꓳ ꓡꓰ ꓮ ꓡꓲ ꓐꓰ ꓬꓰ ꓠꓯ, ꓟ (3) ꓚꓱ, ꓗꓪ ꓐꓰ ꓢꓯꓼ ꓖꓶ ꓔ ꓡꓳ꓿
ꓠꓱ. ꓐꓯꓼ ꓢꓴ ꓐꓱ ꓶ ꓠꓴ ꓥꓪ ꓠꓬ ꓙꓲ ꓟ ꓡ ꓞꓳ ꓕꓲ ꓣꓳ ꓒꓬꓱꓼ ꓠ, ꓟ ꓞꓳ ꓙꓳ꓿
ꓣꓳ ꓕꓲ ꓣꓳ ꓢꓷ. ꓔ ꓟ ꓢꓷ. ꓠꓲ, ꓟꓬꓱꓽ ꓓꓳ ꓙꓳ ꓟ ꓮ ꓙꓵꓽ ꓠꓬ ꓠꓱ. ꓐꓯꓼ ꓢꓴ ꓐꓱ ꓶ ꓣꓱ ꓬꓯꓼ ꓔꓬ ꓢꓴ ꓐꓴ ꓐꓱ ꓶ ꓣꓱ ꓢꓲ ꓠꓬꓲ ꓬꓲ ꓪ ꓞꓳ ꓙꓳ ꓚꓱ, ꓪꓴꓽ ꓟꓴ ꓡ ꓠ, ꓟ ꓬꓰ ꓖꓶ꓿
ꓔꓱ ꓚꓵ ꓟ ꓚꓱ, ꓗꓪ ꓞꓳ ꓙꓳ ꓠ,ꓟ ꓐꓯ ꓖꓶ ꓔ ꓡꓳ꓿ ꓙꓵꓻ ꓠꓲ, ꓐꓯ ꓠꓬ ꓫ. ꓕꓱ ꓘꓶꓽ ꓗꓪ ꓐꓰ ꓙꓵꓻ ꓟ ꓟꓽ ꓥ꓾ ꓣꓱ ꓬꓯꓼ ꓣꓱ ꓞ ꓔꓬ ꓢꓴ ꓐꓴ ꓐꓰ ꓕꓲ ꓪ ꓔꓬ ꓠ, ꓟ ꓔꓯ ꓐꓯ ꓖꓶ ꓔ ꓡꓳ꓿
ꓥꓳꓽ ꓡꓳ ꓓꓴ ꓮ ꓕꓯ ꓥ ꓟꓲ ꓕ ꓐꓬ ꓡꓰ ꓐꓰ ꓐꓯ ꓖꓶ ꓔ ꓡꓳ꓿
ꓣꓳ ꓤꓶꓻ ꓗꓪ ꓫ. ꓓꓴ ꓟꓷ ꓓꓴ ꓠꓲ, ꓫ. ꓟꓬ ꓫ. ꓓꓴ ꓮ ꓟꓬ, ꓙꓳ ꓮ ꓘꓶ. ꓛꓲ ꓠꓬꓲ ꓟꓳ ꓓꓴ ꓔꓯ ꓡꓳ. ꓟꓳ ꓟꓽ ꓓ ꓓꓴ ꓙꓳ ꓥ ꓟꓲ ꓣꓳ ꓥꓳ ꓡꓳ ꓓꓴ ꓙꓳ ꓟ ꓔꓯ ꓠꓲ, ꓟ ꓟꓽ ꓐꓬ ꓡꓰ ꓠ, ꓟ ꓝꓮꓲ ꓠꓵꓻ ꓠꓲ, ꓔꓯ ꓣꓱ ꓢꓲ ꓠꓬꓲ ꓬꓰ ꓙ ꓔꓳ, ꓙ ꓡꓯꓽ ꓘꓳ, ꓠ, ꓟ ꓢꓯꓼ ꓖꓶ ꓔ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓠꓬ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓢꓷ. ꓓ ꓟ ꓡꓰ ꓟꓽ ꓞꓰ ꓢꓷ. ꓠꓲ, ꓢꓷ. ꓕꓲ ꓣꓳ ꓥ ꓟꓲ ꓞꓳ ꓙꓲ ꓒꓬꓱꓼ ꓠ, ꓟ ꓣꓳ ꓚꓵˍ ꓡꓳ꓿
ꓚꓲ. ꓛꓬ ꓞꓳ ꓙꓳ ꓚꓱ, ꓗꓪ ꓮ ꓘꓶ. ꓛꓲ ꓪꓴꓽ ꓟꓴ ꓡ ꓢꓴ ꓒꓬꓱꓼ ꓔꓬ ꓟ ꓡꓰ ꓟꓽ ꓞꓰ ꓠꓱ. ꓐꓯꓼ ꓢꓴ ꓤꓶꓻ ꓔꓯ ꓥ ꓟꓲ ꓛꓵꓽ ꓔꓴ ꓖꓶ ꓢꓴ ꓒꓬꓱꓼ ꓠ, ꓟ ꓝꓣ. ꓑꓰꓓꓣꓳ ꓮꓣꓣꓴꓑꓰ ꓡꓰ ꓢꓯꓼ ꓖꓶ ꓔ ꓡꓳ꓿ ꓠꓴ ꓢꓷ. ꓔ ꓟ ꓮ ꓙꓵꓽ ꓠꓬ ꓠꓴ ꓕꓲ ꓣꓳ ꓐꓱ ꓶ ꓡꓰ ꓟꓽ ꓥ ꓠꓱ. ꓐꓯ ꓢꓴ ꓔꓯ ꓙꓲ ꓟ ꓚꓱ, ꓗꓪ ꓧꓳꓽ ꓪꓴ ꓟꓴ ꓖꓶ ꓐ ꓡ ꓢꓴ ꓙꓲ ꓟ ꓚꓱ, ꓗꓪ ꓙ ꓖꓴ ꓟꓳ ꓖꓶ ꓢꓴ ꓒꓬꓱꓼ ꓡ ꓝꓲ ꓐꓰ ꓢꓯꓼ ꓖꓶ ꓔ ꓡꓳ꓿ ꓫ. ꓟꓳ ꓪ꓿
