2026 ꓘꓳꓼ꓾ 10 ꓦ 27 ꓠꓬꓲ ꓗꓪ ꓐꓰ 28 ꓗꓪ ꓛꓲ ꓦ‐ꓘ ꓢꓽ‐ꓢꓶ‐ꓠ꓾ ꓣꓰ‐ꓜꓪ ꓡꓳ ꓒꓱ ꓗꓪ ꓙꓳˍ ꓟ ꓙꓲꓻ ꓫꓬ ꓢꓴ ꓬꓳ‐ꓢꓷ ꓪꓽ ꓘꓴ ꓦꓲ ꓗꓪ “Synodal Church (ꓕꓲ ꓠꓲ, ꓕꓲ ꓪ ꓙ ꓫꓱꓽ ꓔꓬ ꓟ ꓘꓴ ꓜꓲꓼ ꓞꓳ)” ꓐꓰ ꓤ ꓠꓱ ꓤ ꓐꓴ ꓔꓯ ꓗꓽ ꓕ. ꓙꓳˍ ꓟ ꓚꓱ, ꓐꓰ ꓗꓴ. ꓙꓲꓽ ꓙꓳˍ ꓟ ꓢꓷ. ꓠꓲ, ꓖꓶ ꓖꓪ ꓙꓱˍ ꓟ ꓔꓯ (2) ꓠꓬꓲ ꓬꓰ ꓗꓷ ꓟ ꓥ ꓡꓳ꓿
ꓖꓪ ꓙꓱ ꓜꓲꓼ ꓓꓴ ꓗꓪ ꓣꓰ‐ꓜꓪꓪ ꓐꓰ ꓦ‐ꓠ‐ꓣꓰ, ꓗꓪ ꓟ ꓔꓲꓺ ꓒ (13) ꓣꓳ꓾ ꓓꓰꓮꓚꓳꓠ 1 ꓣꓳ꓾ ꓘꓴ ꓜꓲꓼ ꓞꓳ ꓟ. ꓒ ꓟ. ꓟ (50) ꓣꓳ ꓐꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓗꓪ ꓪꓴꓽ ꓢꓴ ꓟꓴ ꓢꓴ ꓐꓴ (5) ꓣꓳ꓾ ꓮ ꓙꓵꓽ (69) ꓣꓳ ꓔ, ꓗꓷ ꓟ ꓥ ꓡꓳ꓿
ꓖꓪ ꓙꓱ ꓜꓲꓼ ꓓꓴ ꓬꓲ ꓔꓶ ꓙꓱꓼ ꓠꓬ Synodality ꓚꓱ, ꓔꓯ ꓪ ꓜꓲ ꓙ ꓜꓲꓼ ꓢꓷ. ꓡ ꓠ, ꓟ꓾ ꓘꓴ ꓜꓲꓼ ꓞꓳ ꓘꓴꓽ ꓠꓯꓸꓼ ꓗꓪ ꓕꓲ ꓠꓲ, ꓕꓲ ꓪ ꓬꓰˍ ꓟ ꓪꓽ ꓠꓬꓬꓲ ꓡ ꓠ, ꓟ ꓐꓰ ꓬꓲ ꓞꓲꓼ ꓟꓽ ꓙꓳ ꓡ ꓢꓰꓽ ꓟ ꓤ ꓠꓱ ꓐꓴ ꓬꓲ ꓪ ꓙꓳꓺ ꓗꓽ ꓓꓴ ꓟꓽ ꓙꓳ ꓠ, ꓟ ꓐꓰ ꓙꓲꓻ ꓖꓴ ꓐꓱ ꓶ ꓗꓽ ꓕ. ꓙ ꓖꓶ ꓐ ꓡ ꓠ, ꓟ ꓥ ꓡꓳ꓿ ꓖꓪ ꓙꓱꓼ ꓜꓲꓼ ꓓꓴ ꓖꓳ ꓟ ꓔꓯ ꓙꓲꓻ ꓫꓬ ꓢꓴ ꓬꓳ‐ꓢꓷ ꓔꓲꓺ ꓒ ꓙꓵꓽ ꓔꓶ. ꓗꓪ ꓧꓳꓽ ꓪꓴ. ꓟꓴ ꓢꓴ ꓥ ꓟ ꓔꓲꓺ ꓒ James Kai Khaw ꓬꓲ ꓙꓵ, ꓫꓬ, ꓖꓶ ꓗꓷ ꓟ ꓥ ꓡꓳ꓿
ꓪꓴ‐ꓢ ꓗꓴꓷꓼ ꓗꓪ ꓕꓲ ꓠꓲ, ꓕꓲ ꓪ ꓙꓰ ꓡꓯ
ꓖꓪ ꓙꓱ ꓜꓲꓼ ꓓꓴ ꓬꓲ ꓪꓴ. ꓕꓲ ꓠꓬꓲ ꓗꓪ ꓦ‐ꓘ ꓢꓽ‐ꓢꓶ‐ꓠ ꓔꓲꓺ ꓒ ꓓꓽ ꓟ Lucius Hre Kung ꓡꓰ ꓘꓶꓽ ꓒꓴ ꓘꓶꓽ ꓫ. ꓕꓱ ꓗꓷ ꓢꓲ ꓛꓲ ꓡ ꓢꓴ ꓐꓴ ꓔꓯ ꓶꓼ ꓓꓳꓽ ꓫꓱ, ꓓꓳꓽ ꓟꓬꓱꓽ ꓗꓪ ꓕꓲ ꓠꓲ, ꓕꓲ ꓪ ꓐꓰ ꓕꓶ ꓕꓶ ꓡꓰꓽ ꓬꓰ ꓠ, ꓟ ꓕꓵꓼ ꓪ ꓖꓶ ꓗꓷꓳ꓿
ꓔꓲꓺ ꓒ ꓓꓽ ꓟ ꓠꓬ ꓬꓲ ꓚꓰ ꓬꓲ ꓪꓴ. ꓕꓳꓽ ꓶ ꓗꓪ ꓓ, ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓝꓮꓲ ꓔꓱ, ꓕ ꓗꓷ ꓢꓲ ꓞꓳ ꓤ ꓐꓴ ꓟꓽ ꓠ ꓡꓳ. ꓟ ꓑꓶ. ꓓꓴ ꓚꓰꓼ ꓔˍ ꓟ ꓟꓲ ꓠꓯ ꓗꓪ ꓫ. ꓙꓵ ꓓꓴ ꓓꓳ ꓡ ꓗꓷ ꓟ ꓥ ꓢꓲ ꓠꓬꓲ꓾ ꓮ‐ꓓꓯ ꓐꓰ ꓰ‐ꓪ ꓐꓴ ꓥˍ ꓟꓲ ꓰ‐ꓓꓰ ꓐꓱ ꓗꓪ ꓐꓰ ꓖꓼ ꓓꓳ ꓗꓷ ꓟꓶ ꓡꓰ ꓟ ꓔꓯ ꓐꓯ ꓖꓶ ꓗꓷꓳ꓿
ꓖꓳ ꓟ ꓡꓰꓽ ꓟꓽ ꓞꓲ ꓡ ꓞꓳ ꓐꓴ ꓠꓬ ꓚꓲ. ꓛꓬ ꓙꓵ, ꓐꓰ ꓚꓲ. ꓛꓬ ꓢꓯꓼ ꓪ ꓔꓯ ꓡꓰꓽ ꓦ ꓡꓱ ꓢꓲ ꓡꓳ ꓒꓱ ꓕꓲ ꓟ ꓫꓬ, ꓜꓶ ꓠ, ꓟ ꓢꓯꓼ ꓕꓵꓼ ꓗꓷ ꓟ ꓐ‐ꓐꓷ ꓟꓵꓽ ꓔꓳ, ꓤꓲꓻ ꓚꓱ, ꓔꓯ ꓥˍ ꓟꓲ ꓐꓯ ꓖꓶ ꓗꓷꓳ꓿
ꓖꓳ ꓟ ꓡꓰꓽ ꓟꓽ ꓞꓲ ꓞꓳ ꓤ ꓐꓴ ꓠꓬ ꓦꓲꓻ ꓫꓬˍ ꓟ ꓐꓰ ꓞꓳ ꓘ, ꓗꓪ ꓙꓲꓻ ꓖꓴ ꓬꓰˍ ꓟ ꓟꓬꓱꓽ ꓗꓪ ꓕꓲ ꓣꓳ ꓛꓳꓽ ꓕꓲ ꓣꓳ ꓬꓰ ꓙ ꓡꓯ ꓘꓳˍ ꓟ ꓥ ꓢꓲ꓾ ꓖꓳ ꓟ ꓠꓬ ꓠꓵꓻ ꓠꓲ, ꓟ ꓕꓲ ꓠꓲ, ꓕꓲ ꓪˍ ꓥ ꓟ ꓔꓯ ꓖꓴ ꓟ. ꓖꓶ ꓔꓬ ꓡꓳ꓾ ꓐꓰ ꓐꓯ ꓗꓷꓳ꓿
“ꓕꓲ ꓣꓳ ꓛꓳꓽ ꓕꓲ ꓣꓳ ꓬꓰ ꓙ ꓡꓯ ꓘꓳˍ ꓟ ꓠꓲ, ꓟ ꓠꓬ Synodal Church ꓬꓲ ꓥꓳ ꓡꓳ. ꓓꓴ ꓐꓰ ꓕꓲ ꓡꓰ, ꓥ ꓡꓳ꓿ ꓕꓱ ꓟ ꓠꓬ ꓮ ꓡꓲ ꓕꓲ ꓣꓳ ꓔꓯ ꓥˍ ꓟꓲ ꓗ ꓠꓯ. ꓢꓲ ꓗꓪ ꓟꓽ ꓤꓰꓻ ꓡꓰ ꓝꓲ ꓝꓲ ꓐꓰ ꓪꓴ‐ꓢ ꓬꓲ ꓗꓴꓷꓼ ꓗꓪ ꓮ ꓙꓵꓽ ꓕꓲ ꓠꓲ, ꓕꓲ ꓪ ꓓꓴ ꓓꓳ ꓙꓰ ꓠ, ꓟ ꓥ ꓡꓳ” ꓐꓰ ꓔꓲꓺ ꓒ ꓓꓽ Lucius ꓡꓰ ꓐꓯ ꓗꓷꓳ꓿
ꓖꓳ ꓗ ꓠꓯ. ꓙꓲꓻ ꓫꓬ ꓢꓴ ꓒꓳ‐ꓡꓳ ꓡꓰ ꓕꓲ‐ꓟꓳ‐ꓕꓲ‐ꓪꓴ ꓔꓬ ꓗꓪ ꓐꓳ ꓔˍ ꓟ ꓕꓳꓽ ꓶ ꓔꓯ ꓥˍ ꓟꓲ ꓖꓴ ꓢꓲ ꓠꓬꓲ ꓔꓲꓺ ꓒ ꓐꓴ ꓐꓰ ꓘꓴ ꓜꓲꓼ ꓞꓳ ꓟ. ꓒ ꓟ. ꓟ ꓐꓴ ꓔꓯ ꓫ. ꓙꓵ ꓓꓴ ꓠꓯꓸꓼ ꓗꓪˍ ꓟꓲ ꓚꓲ. ꓛꓬ ꓬꓰ ꓙꓲ ꓙꓳˍ ꓟ ꓔꓯ ꓦ ꓡꓱ ꓐꓳ ꓐꓳˍ ꓡꓰꓽ ꓝ. ꓢꓲ ꓬꓰ ꓠ, ꓟ ꓢꓯꓼ ꓖꓶ ꓗꓷꓳ꓿
ꓧꓳ, ꓡꓯ ꓘꓳˍ ꓟ꓾ ꓕꓲ ꓠꓲ, ꓕꓲ ꓪ ꓬꓰˍ ꓟ ꓐꓰ ꓶꓼ ꓓꓳꓽ ꓫꓱ, ꓓꓳꓽ ꓟꓬꓱꓽ ꓬꓰˍ ꓟ
Fr. Lucas Tha Ling Sum ꓡꓰ Synodal Church ꓚꓱ, ꓒꓶ ꓟ. ꓖꓶ ꓗꓷ ꓢꓲ ꓕꓱ ꓟ ꓐꓱ ꓶ ꓣꓱꓽ ꓞ, ꓟ ꓢ ꓚꓱ, ꓥ ꓟ ꓧꓳ, ꓡꓯ ꓘꓳˍ ꓟ (ꓚꓳꓟꓟꓴꓠꓲꓳꓠ)꓾ ꓕꓲ ꓠꓲ, ꓕꓲ ꓪ ꓬꓰˍ ꓟ (ꓑꓮꓣꓔꓲꓚꓲꓑꓮꓔꓲꓳꓠ)꓾ ꓐꓰ ꓶꓼ ꓓꓳꓽ ꓫꓱ, ꓓꓳꓽ ꓟꓬꓱꓽ ꓬꓰˍ ꓟ (ꓟꓲꓢꓢꓲꓳꓠ) ꓐꓴ ꓔꓯ ꓬꓲ ꓕꓲꓽ ꓟꓴꓽ ꓗꓶ ꓢꓲ ꓖꓪ ꓙꓱ ꓗꓷꓳ꓿
ꓖꓳ ꓟ ꓡꓰꓽ ꓟꓽ ꓞꓲ ꓦ‐ꓘ ꓢꓽ‐ꓢꓶ‐ꓠ ꓡꓰ Synodality ꓐꓰ ꓗꓴ. ꓙꓲꓽ ꓙꓳˍ ꓟ ꓢꓳ ꓜꓲꓼ ꓓꓴ ꓐꓰ ꓖꓪ ꓙꓱ ꓓꓴ ꓔꓯ ꓬꓰ ꓗꓷ ꓢꓲ ꓖꓳ ꓗꓪ ꓐꓰ ꓟꓶ ꓡˍ ꓟ ꓖꓪ ꓙꓱ ꓚꓱ, ꓐꓰ ꓐꓯ ꓞꓷ, ꓓꓳ ꓡˍ ꓟ ꓔꓯ ꓟꓬ‐ꓟ ꓕꓲ ꓗꓴꓷꓼ ꓡꓱꓸꓼ ꓗ‐ꓔꓳ‐ꓡꓲꓗ ꓔꓲꓺ ꓒ ꓓꓽ ꓜꓴ ꓚꓰ (ꓚꓐꓚꓟ) ꓗꓪ ꓟ. ꓖꓶ ꓗꓷꓳ꓾ ꓐꓰ ꓒꓶ ꓟ. ꓖꓶ ꓗꓷꓳ꓿ ꓟꓬꓱꓽ ꓖꓳ ꓟ ꓠꓬ ꓢꓽ‐ꓢꓶ‐ꓠ ꓗꓪ ꓟ ꓢꓲ ꓤ ꓐꓴ ꓢꓯꓼ ꓔꓯ ꓘꓴ ꓜꓲꓼ ꓞꓳ ꓕꓲ ꓟ ꓡꓱꓸꓼ ꓗꓪ ꓛꓲ ꓬꓰ ꓠ, ꓟ ꓬꓰ ꓙ ꓔꓳ, ꓙ ꓖꓶˍ ꓟ ꓔꓯ ꓐꓯ ꓟ. ꓖꓶ ꓗꓷꓳ꓿
ꓔꓲꓺ ꓒ Lucas ꓡꓰ “ꓔꓲꓺ ꓒ ꓕꓲ ꓣꓳ ꓔꓬ ꓗꓪ ꓔꓱ, ꓠꓲ, ꓟꓽ ꓡꓳꓼ ꓕꓯ ꓠꓽ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓘꓶꓻ ꓡꓶ ꓓꓴ ꓐꓰ ꓕꓲ ꓠꓲ, ꓕꓲ ꓪˍ ꓟ ꓔꓯ ꓐꓬ ꓡꓰ ꓝꓲˍ ꓟ ꓕꓱ ꓡꓱ ꓫꓵꓽ ꓒꓬꓱꓼ ꓡ ꓝꓲ ꓐ ꓡˍ ꓡꓳ꓿ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓕꓲ ꓪˍ ꓬꓰ ꓠ, ꓟ ꓥˍ ꓟꓲ ꓮ ꓘꓶ. ꓫ. ꓡꓰˍ ꓥꓳ” ꓐꓰ ꓬꓲ ꓡꓰ ꓐꓯ ꓗꓷꓳ꓿
ꓤ ꓠꓱ ꓤ ꓐꓴ ꓔꓯ ꓗꓽ ꓕ. ꓖꓶˍ ꓟ꓾ “ꓬꓲ ꓪ ꓮ ꓙꓵꓽ ꓠꓬ ꓙꓳꓺ ꓦꓲ. ꓓꓴ ꓟꓽ ꓙꓳ ꓠ, ꓟ ꓢꓯꓼ ꓕꓵꓼ ꓠ ꓗ, ꓡꓳ”
Fr. James Kai Khaw ꓡꓰ ꓤ ꓠꓱ ꓤ ꓐꓴ ꓔꓯ ꓠꓬꓲ ꓡꓳ. ꓗꓪꓽ ꓫꓵꓼ ꓖꓶˍ ꓟ ꓚꓱ, ꓔꓯ ꓟꓳ. ꓢꓷ. ꓠꓲ, ꓖꓶˍ ꓟ ꓚꓱ, ꓔꓯ ꓧꓳꓽ ꓪꓴ. ꓟꓴ ꓖꓪ ꓙꓱ ꓗꓷ ꓢꓲ ꓤ ꓠꓱ ꓤ ꓐꓴ ꓬꓲ ꓒꓵꓽ꓾ ꓬꓲ ꓪ ꓙꓳꓺ ꓦꓲ. ꓓꓴ ꓟꓽ ꓙꓳ ꓠ, ꓟ ꓐꓰ ꓬꓲ ꓪ ꓙꓲꓻ ꓖꓴ ꓔꓯ ꓗꓽ ꓕ. ꓙ ꓖꓶ ꓠ, ꓟ ꓘꓴ ꓜꓲꓼ ꓞꓳ ꓔꓯ ꓶꓻ ꓙꓳˍ ꓡꓳ꓾ ꓐꓰ ꓐꓯ ꓖꓶ ꓗꓷꓳ꓿
ꓦ‐ꓘ ꓢꓽ‐ꓢꓶ‐ꓠ ꓠꓬ ꓤ ꓠꓱ ꓐꓴ ꓔꓯ ꓠꓬꓲ ꓡꓳ. ꓗꓪꓽ ꓫꓵꓼ ꓖꓶˍ ꓟ ꓙꓵꓽ ꓗ ꓔꓯ ꓐꓳ ꓗꓷ ꓢꓲ ꓡꓯꓼ ꓕꓲ ꓣꓱꓽ ꓬꓰ ꓔꓬ ꓟ꓾ ꓙꓵꓽ ꓗ ꓖꓳ ꓟ ꓔꓯ ꓥˍ ꓟꓲ ꓚꓐꓚꓟ ꓗꓪ ꓟ. ꓖꓶ ꓓꓳ ꓡꓰ ꓟ ꓔꓯ ꓔꓲꓺ ꓒ ꓡꓰ ꓐꓯ ꓖꓶˍ ꓡꓳ꓿ ꓖꓳ ꓟ ꓑꓶ. ꓓꓴ ꓖꓪ ꓙꓱ ꓜꓲꓼ ꓓꓴ ꓗꓪ ꓛꓲ ꓡ ꓢꓴ ꓐꓴ ꓥˍ ꓟꓲ ꓙꓵꓽ ꓗ ꓖꓳ ꓟ ꓔꓯ ꓣꓱꓽ ꓬꓰ ꓠ, ꓟ ꓕꓵꓼ ꓪ ꓖꓶ ꓗꓷꓳ꓿
ꓖꓳ ꓗ ꓠꓯ. ꓢꓲ ꓒ ꓬꓰ‐ꓢꓴ ꓡꓰ ꓤ ꓠꓱ ꓤ ꓕꓲ ꓣꓳ ꓔꓯ ꓝꓴꓲ. ꓬꓰ ꓠ, ꓟ ꓙ ꓖꓴ ꓟ. ꓖꓶ ꓢꓴ ꓐꓰ ꓗꓴ. ꓙꓲꓽ ꓙꓳ ꓢꓲ ꓙꓳꓺ ꓗꓽ ꓖꓶ ꓔˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓐꓯ ꓘꓶ ꓔꓯ ꓣꓴ ꓢꓲ ꓤ ꓠꓱ ꓤ ꓐꓴ ꓔꓯ ꓠꓬꓲ ꓡꓳ. ꓗꓪꓽ ꓫꓵꓼˍ ꓟ ꓠꓬ ꓪꓴꓽ ꓓꓰˍ ꓟ ꓶꓻ ꓥ ꓟ ꓔꓯ ꓐꓯ ꓟ. ꓖꓶ ꓗꓷꓳ꓿ ꓬꓲ ꓞꓲꓼ (18) ꓘꓳꓼ ꓟꓽ ꓐꓲ ꓡꓰ ꓢꓴ ꓥ ꓕ ꓑꓳꓸꓼ ꓔꓯ ꓬꓲ ꓞꓲꓼ ꓟꓽ ꓐꓲ ꓡ ꓢꓴ ꓐꓰ ꓚꓲ. ꓔ ꓢꓲ ꓠꓬꓲ ꓐ ꓡˍ ꓕ ꓑꓳꓸꓼ ꓠꓬꓲ ꓡꓳ. ꓗꓪꓽ ꓫꓵꓼ ꓖꓶ ꓠ ꓗ, ꓟ ꓔꓯˍ ꓟꓲ ꓐꓯ ꓖꓶ ꓗꓷꓳ꓿
ꓖꓳ ꓟ ꓡꓰꓽ ꓟꓽ ꓞꓲ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓤ ꓠꓱ ꓤ ꓐꓴ ꓕꓯꓽ ꓢꓲ ꓮ ꓡꓲ ꓫꓵꓽ ꓮꓽ ꓔꓳ ꓔꓳ ꓬꓰˍ ꓟ ꓔꓯ ꓟꓽ ꓘꓳ ꓣꓴ ꓠ ꓚꓱ, (Zero-Tolerance Policy) ꓔꓯ ꓣꓱꓽ ꓬꓰˍ ꓟ ꓔꓯ ꓝꓮꓲ ꓢꓷ. ꓙ ꓟꓳ ꓙ ꓗꓷꓳ꓿ ꓘꓴ ꓜꓲꓼ ꓞꓳ ꓗꓪ ꓤ ꓠꓱ ꓤ ꓐꓴ ꓔꓯ ꓠꓬꓲ ꓡꓳ. ꓗꓪꓽ ꓫꓵꓼ ꓗꓽ ꓕ. ꓙˍ ꓟ ꓢꓷ. ꓠꓲ, ꓖꓶˍ ꓟ ꓖꓪ ꓙꓱ ꓜꓲꓼ ꓓꓴ ꓪ ꓜꓲ ꓬꓰ ꓠ, ꓟ ꓔꓯˍ ꓟꓲ ꓕꓵꓼ ꓪ ꓖꓶ ꓗꓷꓳ꓿
ꓖꓪ ꓙꓱ ꓜꓲꓼ ꓓꓴ ꓗꓪ ꓛꓲ ꓡ ꓢꓴ ꓔꓯ ꓥˍ ꓟꓲ ꓠꓱ. ꓐꓯ ꓢꓴ ꓔꓯ ꓠꓻ ꓡꓰ ꓝꓲ ꓢꓴ ꓟꓽ ꓬꓰ ꓠ, ꓟ꓾ ꓠꓬꓲ ꓡꓳ. ꓗꓪꓽ ꓫꓵꓼ ꓙ ꓖꓶ ꓢꓴ ꓐꓰ ꓠꓻ ꓙꓵ ꓔꓬ ꓢꓴ ꓐꓴ ꓐꓱ ꓶ ꓠꓻ ꓫꓬ, ꓖꓶ ꓢꓴ ꓒꓬꓱꓼ ꓡ ꓠ, ꓟ ꓔꓯˍ ꓟꓲ ꓕꓵꓼ ꓪ ꓖꓶ ꓗꓷꓳ꓿ ꓖꓪ ꓙꓱ ꓜꓲꓼ ꓓꓴ ꓔꓯ ꓔꓲꓺ ꓒ ꓐꓴ꓾ ꓘꓴ ꓜꓲꓼ ꓞꓳ ꓟ. ꓒ ꓟ. ꓟ ꓐꓴ ꓐꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓗꓪ ꓧꓳꓽ ꓣꓱꓽ ꓢꓴ ꓐꓰ ꓡꓰ ꓕꓲ ꓠꓲ, ꓕꓲ ꓪ ꓬꓰˍ ꓟ ꓗꓪ ꓪ ꓜꓲ ꓪꓽ ꓠꓬꓲ ꓡ ꓠ, ꓟ꓾ Synodal Church ꓠꓲ, ꓟ ꓡꓰ ꓐꓰ ꓮ ꓙꓵꓽ ꓔ, ꓠ, ꓟ ꓐꓰ ꓘꓴ ꓜꓲꓼ ꓞꓳ ꓠꓬ ꓞꓳ ꓤ ꓮ ꓙꓵꓽ ꓐꓱ ꓶ꓾ ꓟꓬꓽ ꓠꓬꓲ ꓠꓬ ꓤ ꓠꓱ ꓤ ꓐꓴ ꓐꓰ ꓠꓬꓲ ꓡꓳ. ꓗꓪꓽ ꓫꓵꓼˍ ꓟ ꓣꓱꓽ ꓞ, ꓔꓬ ꓢꓴ ꓥ ꓕ ꓑꓳꓸꓼ ꓐꓱ ꓶ ꓠꓲ, ꓡꓱꓻ ꓡꓱꓻ ꓡꓰꓽ ꓘꓳ ꓣꓴ ꓖꓴ ꓕꓲ ꓟ ꓒꓬꓱꓼ ꓡ ꓠ, ꓟ ꓫꓬ, ꓔꓶ ꓠ, ꓟ ꓕꓵꓼ ꓪ ꓖꓶˍ ꓟ ꓚꓱ, ꓗꓪ ꓐꓰ ꓬꓲ ꓟꓶꓽ ꓢꓰꓼ ꓗꓷꓳ꓿
News from RVA Hakha Service
