ꓟꓬ‐ꓟ ꓗꓴꓷꓼ ꓟ‐ꓓ‐ꓡꓲ, ꓢꓽ‐ꓢꓶ‐ꓠ ꓘꓴꓽ ꓗꓪ ꓙꓳˍ ꓟ ꓑ‐ꓡꓰꓲ ꓡꓳ ꓒꓱ ꓚꓧꓮꓠ‐ꓔ‐ꓗꓳꓥ ꓞꓳ ꓘ, ꓗꓪ ꓙꓳˍ ꓟ ꓣꓳ‐ꓢ‐ꓣꓲ ꓟ, ꓟ ꓑꓮꓲ ꓠꓬꓲ ꓐꓰ ꓟ, ꓟ ꓐꓬꓱꓽ ꓗꓶ ꓖꓴ ꓦꓲꓻ ꓫꓵꓼ ꓒꓴ ꓑꓮꓲ ꓟꓲ‐ꓢ ꓪꓽ ꓘꓴ ꓙꓵ, ꓔꓯ (26.10.2026) ꓠꓽ ꓕꓲꓽ ꓠꓬꓲ꓾ ꓠꓯꓼ 8ꓽ00 ꓙꓵ, ꓕꓯ Msgr. ꓔꓲꓺ ꓒ ꓑꓰꓔꓰꓣ ꓢꓰꓲꓠ ꓧꓡꓮꓲꓠꓖ ꓳꓳ ꓗꓪ ꓐꓰ ꓟꓲ‐ꓢ ꓔꓲꓺ ꓖꓶ ꓗꓷꓳ꓿

ꓟ, ꓟ ꓐꓬꓱꓽ ꓗꓶ ꓖꓴ ꓦꓲꓻ ꓔꓯ ꓴ‐ꓟꓬꓲꓠꓔ‐ꓪꓮꓲ ꓢꓧꓪꓰ‐ꓠꓖꓮꓣ ꓕꓲ ꓦꓲꓻ ꓗꓪ ꓐꓰ ꓫꓬ, ꓖꓶ ꓗꓷ ꓟ ꓥ ꓡꓳ꓿ ꓑꓮꓲ ꓗꓪ ꓕꓲ ꓟꓵꓽ ꓕꓲ ꓟꓵꓽ ꓗꓪ ꓐꓰ ꓪꓽ ꓘꓴ ꓡ ꓢꓴ ꓢꓲ ꓤ ꓐꓴ꓾ ꓔꓲꓺ ꓒ ꓔꓲꓺ ꓟ ꓐꓴ꓾ ꓐ‐ꓣ‐ꓓ ꓐꓴ ꓐꓰ ꓧꓪ. ꓧꓪꓸꓼ ꓡꓰꓽ ꓬꓰ ꓓꓳ ꓡꓰꓳ꓿

ꓟꓲ‐ꓢ ꓘꓴꓽ ꓠꓯꓸꓼ ꓗꓪ ꓔꓲꓺ ꓒ Fr. William Phyo Wai ꓡꓰ ꓶꓼ ꓓꓳꓽ ꓫꓱ, ꓓꓳꓽ ꓚꓺˍ ꓟ ꓗꓪ꓾ “ꓟ, ꓟ ꓟ‐ꓡꓲ‐ꓬ ꓡꓰ ꓐꓰ ꓣꓱꓽ ꓛꓰꓽ ꓐꓲˍ ꓟ ꓠꓬꓲ ꓐꓯˍ ꓟ ꓠꓬ ꓣꓳ ꓔꓯ ꓥˍ ꓟꓲ ꓙꓳˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓟ, ꓟ ꓟ‐ꓡꓲ ꓐꓰ ꓣꓳ ꓮ ꓡꓲ ꓗꓪ ꓟꓽ ꓫꓱ. ꓡꓯ ꓘꓳ ꓡ ꓐꓯˍ ꓠꓬ ꓟ, ꓟ ꓟ‐ꓡꓲ ꓠꓬ ꓬꓲ ꓕꓲ ꓤꓶꓻ ꓗꓪ ꓪꓴ‐ꓢ ꓐꓯ ꓘꓶ ꓔꓯ ꓕꓲ ꓘꓶ ꓘꓴˍ ꓡꓰ ꓠ ꓠ, ꓢꓲ ꓔꓲꓺ ꓖꓶ ꓢꓴ ꓥ ꓡꓳ꓿ ꓣꓳ ꓠꓽ ꓖꓳ ꓡꓱ ꓬꓰ ꓟꓽ ꓐ ꓡ꓿ ꓣꓱꓽ ꓛꓰꓽ ꓐꓰ ꓐꓯˍ ꓕꓯ ꓠꓬ ꓣꓳ ꓢꓷ. ꓠꓲ, ꓐꓰ ꓠꓲ, ꓟ ꓔꓯ ꓪꓴ‐ꓢ ꓡꓰ ꓙꓲˍ ꓟ ꓔꓯ ꓢꓲꓺ ꓣꓴ ꓠ, ꓟ ꓐꓱ ꓶ ꓕꓲ ꓧꓪ, ꓧꓪ, ꓡꓵ, ꓫꓴ ꓖꓶˍ ꓡꓳ꓿

ꓟ, ꓟ ꓠꓬ ꓣꓱꓽ ꓛꓰꓽ ꓐꓲ ꓢꓴ ꓥ ꓟ ꓑꓶ. ꓓꓴ ꓬꓲ ꓢꓲꓺ ꓣꓴ ꓗꓷ ꓟ ꓠꓬ ꓮ ꓕꓯ ꓥ ꓟꓲ ꓔꓱ, ꓚꓵˍ ꓟ ꓢꓲꓺ ꓣꓴ ꓚꓱ, ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓪꓴ‐ꓢ ꓣꓱꓽ ꓛꓰꓽ ꓐꓰ ꓔ ꓑꓳ. ꓗꓷ ꓢꓲ ꓬꓲ ꓡꓰ ꓢꓲꓺ ꓣꓴ ꓗꓷ ꓟ ꓑꓶ. ꓓꓴ ꓥ ꓡꓳ꓿ ꓣꓳ ꓮ ꓙꓵꓽ ꓥ ꓟꓲ ꓪꓴ‐ꓢ ꓤꓽ ꓮ ꓟꓲꓽ ꓕꓲ ꓣꓳˍ ꓡꓰ ꓐꓰ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓟ ꓤꓶꓻ ꓗꓪ ꓞꓳ ꓙꓳ ꓠ, ꓟ ꓐꓱ ꓶ ꓪꓴ‐ꓢ ꓡꓰ ꓣꓳ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓘꓴ ꓔꓬ ꓡꓳ꓿

ꓟ, ꓟ ꓟ‐ꓡꓲ ꓠꓬ ꓮ ꓡꓲ ꓘꓶ ꓛꓲ ꓫ. ꓙꓵ ꓟꓷ ꓙꓵ ꓓꓴ ꓔꓯ ꓟꓳꓻ ꓔˍ ꓐꓯˍ ꓥ ꓟꓲ ꓪꓴ‐ꓢ ꓬꓲ ꓣꓱꓽ ꓛꓰꓽ ꓐꓰ ꓑꓳ. ꓗꓷ ꓢꓲ ꓪꓴ‐ꓢ ꓐꓯ ꓘꓶꓽ ꓔꓯ ꓘꓳ ꓣꓴ ꓢꓲ ꓬꓲ ꓤꓶꓻ ꓔꓯ ꓡꓯꓼ ꓙꓱ ꓗꓷꓳ꓿ ꓣꓳ ꓮ ꓙꓵꓽ ꓥ ꓟꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟ ꓤꓶꓻ ꓗꓪ ꓮ ꓕꓯ ꓟꓲ ꓪꓴ‐ꓢ ꓣꓱꓽ ꓛꓰꓽ ꓐꓰ ꓑꓳ. ꓗꓷ ꓢꓲ ꓪꓴ‐ꓢ ꓣꓳ ꓔꓯ ꓡꓵ, ꓫꓴ ꓖꓶ ꓔꓬ ꓟ ꓣꓱꓽ ꓛꓰꓽ ꓖꓶˍ ꓕ ꓑꓳꓸꓼ ꓣꓱꓽ ꓛꓰꓽ ꓖꓳ ꓟ ꓐꓰ ꓑꓳ. ꓢꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟ ꓤꓶꓻ ꓗꓪ ꓢꓲꓺ ꓣꓴˍ ꓥꓳ꓾ ꓞꓳ ꓙꓳˍ ꓥꓳ ꓐꓯˍ ꓠꓬ ꓣꓳ ꓮ ꓙꓵꓽ ꓥˍ ꓟꓲ ꓟ, ꓟ ꓟ‐ꓡꓲ ꓡꓰ ꓐꓰ ꓙꓲˍ ꓟ ꓪꓴ‐ꓢ ꓬꓲ ꓤ ꓮ ꓟꓲꓽ ꓐꓴ ꓒꓬꓱꓼ ꓡ ꓐ ꓡˍ ꓥꓳ꓿” ꓐꓰ ꓐꓯ ꓗꓷꓳ꓿

ꓖꓳ ꓗꓪ ꓧꓳꓽ ꓣꓱꓽ ꓔꓬ ꓟ ꓔꓲꓺ ꓒ Fr. Aung Kyaw Khaing ꓫ. ꓟꓳ ꓘꓶ ꓫ. ꓕꓱˍ ꓟ ꓗꓪ꓾ ꓬꓲ ꓪꓴ. ꓕꓱ ꓟ, ꓟ ꓑꓮꓲ ꓔꓯ ꓧꓪ. ꓧꓪꓸꓼ ꓡꓰꓽ ꓬꓰ ꓐ ꓡˍ ꓟ ꓑꓶ. ꓓꓴ ꓪꓴ‐ꓢ ꓔꓯ ꓧꓶ. ꓕꓯ ꓫ. ꓟꓳˍ ꓡꓳ꓿ ꓝꓮꓲ ꓕꓱ ꓚꓧꓮꓠ‐ꓔ‐ꓗꓳꓥ ꓟ, ꓟ ꓑꓮꓲ ꓬꓰ ꓐ ꓡ ꓠ, ꓟ ꓐꓱ ꓶ ꓮ ꓟꓬ, ꓚꓱ, ꓗꓪ ꓐꓰ ꓬꓰ‐ꓢꓴ ꓡ ꓢꓴ ꓮ ꓙꓵꓽ ꓔꓯ ꓥˍ ꓟꓲ ꓫ. ꓟꓳ꓿ ꓟ, ꓟ ꓐꓬꓱꓽ ꓗꓶ ꓖꓴ ꓦꓲꓻ ꓫꓵꓼ ꓫꓬ, ꓖꓶ ꓢꓴ ꓔꓯ ꓥˍ ꓟꓲ ꓮ ꓘꓶ. ꓫ. ꓟꓳ ꓔꓬ ꓡꓳ꓿ ꓖꓳ ꓟ ꓡꓰꓽ ꓟꓽꓞꓲ ꓕꓱ ꓑꓮꓲ ꓠꓳ‐ꓪꓰ‐ꓠ ꓬꓲ ꓪꓴ. ꓔꓴˍ ꓟ ꓗꓪ ꓐꓰ ꓑꓮꓲ ꓦꓬꓼ ꓠꓬꓲ ꓗꓪ ꓛꓲ ꓪꓽ ꓘꓴ ꓡ ꓢꓴ ꓐꓴ ꓐꓱ ꓶ ꓜꓽ ꓓꓴ ꓬꓰ ꓙ ꓔꓳ, ꓙ ꓖꓶˍ ꓟ ꓐꓱ ꓶ ꓥˍ ꓟꓲ ꓴ‐ꓟꓬꓲꓠꓔ‐ꓪꓮꓲ ꓔꓯ ꓝ. ꓢꓲ ꓫ. ꓟꓳˍ ꓡꓳ꓿

ꓓꓳ ꓟꓴ ꓟꓴ ꓗꓪ ꓗꓪ ꓖꓶˍ ꓟ ꓚꓧꓳꓲꓣ ꓜꓴ ꓐꓰ ꓑꓮꓲ ꓬꓲ ꓪꓴ. ꓗꓪ ꓐꓰ ꓚꓲ. ꓛꓬ ꓬꓰ ꓠ ꓔˍ ꓟ ꓗꓪ ꓬꓰ ꓙ ꓢꓴ ꓮ ꓙꓵꓽ ꓔꓯ ꓥˍ ꓟꓲ ꓫ. ꓟꓳ꓿ ꓠꓴ ꓪ ꓮ ꓙꓵꓽ ꓡꓰ ꓕꓱ ꓡꓱ ꓬꓰ ꓙ ꓖꓶˍ ꓟ ꓑꓶ. ꓓꓴ ꓑꓮꓲ ꓔꓯ ꓧꓪ. ꓧꓪꓸꓼ ꓡꓰꓽ ꓬꓰ ꓐ ꓡ ꓟ ꓑꓶ. ꓓꓴ ꓮ ꓙꓵꓽ ꓔꓯ ꓮ ꓘꓶ ꓫ. ꓟꓳˍ ꓡꓳ꓿ ꓟ, ꓟ ꓟ‐ꓡꓲ ꓗꓪ ꓐꓰ ꓣꓱꓽ ꓛꓰꓽ ꓘꓳ ꓣꓴ ꓟꓶ ꓡꓰ ꓝꓲ꓾ ꓐꓰ ꓐꓯˍ ꓡꓳ꓿

ꓝꓮꓲ ꓴ‐ꓟꓬꓲꓠꓔ‐ꓪꓮꓲ ꓗꓪ ꓐꓰ ꓟ, ꓟ ꓐꓬꓱꓽ ꓗꓶ ꓖꓴ ꓦꓲꓻ ꓫꓬ, ꓟ ꓬꓲ ꓔꓶ ꓙꓱꓼ ꓔꓯ ꓐꓯ ꓟ. ꓖꓶˍ ꓟ ꓗꓪ “ꓥꓪ ꓠꓬ ꓟ, ꓟ ꓔꓬ ꓗꓪ ꓚꓳ. ꓣꓱꓽ ꓛꓰꓽ ꓮ ꓟꓬ, ꓘꓳ ꓣꓴ ꓟꓶˍ ꓡꓳ꓿ ꓟ, ꓟ ꓔꓯ ꓥˍ ꓟꓲ ꓠꓲ, ꓠꓵˍ ꓡꓳ꓿ ꓖꓳ ꓟ ꓑꓶ. ꓓꓴ ꓟ, ꓟ ꓟ‐ꓡꓲ‐ꓬ ꓜꓴ ꓐꓰ ꓟ, ꓟ ꓐꓰ ꓗꓴ. ꓙꓲꓽ ꓙꓳˍ ꓟ ꓜꓴ ꓐꓴ ꓔꓯ ꓐ ꓡˍ ꓕ ꓑꓳꓸꓼ ꓬꓰ ꓙ ꓖꓶ ꓗꓷ ꓟ ꓮ ꓟꓶ ꓠꓬ 35 ꓘꓳꓼ ꓗꓪ ꓛꓲ ꓡꓺꓳ꓿ ꓕꓱ ꓡꓱ ꓬꓰ ꓐ ꓡˍ ꓟ ꓥ ꓟꓲ ꓟ, ꓟ ꓬꓲ ꓣꓱꓽ ꓛꓰꓽ ꓗꓪ ꓐꓰ ꓥ ꓡꓳ꓿ ꓟ, ꓟ ꓔꓯ ꓠꓲ, ꓠꓵˍ ꓠꓬ ꓟ, ꓟ ꓡꓰ ꓮ ꓕꓯ ꓟꓲ ꓟꓽ ꓡꓳ ꓒꓰ, ꓔ ꓐꓯ ꓟ ꓔꓯ꓾ ꓥꓪ ꓙꓵˍ ꓡꓳ꓿

ꓖꓳ ꓟ ꓑꓶ. ꓓꓴ ꓟ, ꓟ ꓔꓬ ꓗꓪ ꓡ ꓢꓴ ꓕꓲ ꓟꓵꓽ ꓕꓲ ꓟꓵꓽ ꓗꓪ ꓟ ꓢꓲ ꓤ ꓐꓴ꓾ ꓜꓴ ꓐꓴ ꓢꓻ ꓢꓻ ꓡꓰꓽ ꓪꓴꓽ ꓧꓶ ꓠ ꓟꓶ ꓠ, ꓟ꓾ ꓪꓽ ꓘꓴ ꓟꓶ ꓠ, ꓟ ꓔꓶ ꓙꓱꓼ ꓬꓰ ꓢꓲ ꓕꓱ ꓣꓳ‐ꓢ‐ꓣꓲ ꓠ, ꓟ ꓦꓲꓻ ꓔꓯ ꓫꓬ, ꓖꓶ ꓗꓷ ꓟ ꓥ ꓡꓳ꓿ ꓦꓲꓻ ꓕꓱ ꓟ ꓠꓲ, ꓟ ꓫꓬ, ꓓꓳ ꓡꓰ ꓗꓷ ꓟ ꓑꓶ. ꓓꓴ ꓕꓱ ꓟ ꓔꓬ ꓟ ꓔꓲꓺ ꓒ ꓐꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ꓾ ꓟꓯꓼ ꓛꓰ, ꓟꓯꓼ ꓑꓬ ꓢꓴ ꓮ ꓵꓽ ꓔꓯ ꓥˍ ꓟꓲ ꓫ. ꓟꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓦꓲꓻ ꓕꓱ ꓟ ꓞꓼ ꓞꓼ ꓫꓬ, ꓟꓶ ꓠ, ꓟ ꓐꓱ ꓶ ꓬꓲ ꓪ ꓮ ꓟꓬ, ꓬꓰ ꓙ ꓗꓷ ꓟ ꓑꓶ. ꓓꓴ ꓥ ꓡꓳ꓿ ꓕꓱ ꓟ ꓐꓱ ꓶ ꓮ ꓘꓶ. ꓫ. ꓟꓳˍ ꓡꓳ꓿ ꓟ, ꓟ ꓔꓬ ꓗꓪ ꓡ ꓢꓴ ꓐꓴ ꓜꓽ ꓓꓴ ꓔꓬ ꓓꓴ ꓛꓲ. ꓟꓽ ꓛꓵ ꓠ, ꓟ ꓐꓱ ꓶ ꓬꓰ ꓠ, ꓟ ꓥˍ ꓟꓲ ꓥꓪ ꓮ ꓕꓯ ꓟꓲ ꓓꓵꓽ ꓙꓽ ꓟꓶ ꓔꓬ ꓡꓳ꓿ ꓬꓰˍ ꓟꓲ ꓬꓰ ꓔꓬ ꓡꓳ꓿ ꓖꓳ ꓟ ꓑꓡ. ꓓꓴ ꓟ, ꓟ ꓔꓯ ꓠꓲ, ꓠꓵˍ ꓟ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓕꓱ ꓗꓪ ꓡꓯ꓿ ꓮ ꓙꓵꓽ ꓔꓯ ꓘꓳ ꓣꓴ ꓔꓬ ꓡꓳ” ꓐꓰ ꓐꓯ ꓗꓷꓳ꓿

News source from RVA Myanmar