ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓕꓲ ꓣꓳ ꓣꓳ ꓡˍ ꓟ ꓔꓯ ꓥꓳ ꓡꓳ. ꓔꓬ ꓕꓯ ꓬꓲ ꓡ ꓙꓵ, ꓛꓲ ꓡ ꓔꓬ ꓟ ꓔꓯ ꓢꓷ. ꓡꓰ ꓕꓯ ꓡꓰ ꓣꓳ ꓚꓲ. ꓛꓬ ꓦꓲ ꓔꓯ ꓫꓬ, ꓡꓲ. ꓢꓲ ꓦꓴ ꓠꓬ, ꓡꓳ꓿ ꓬꓲ ꓡˍ ꓟ ꓬꓲ ꓙꓵ, ꓔꓯ ꓟꓽ ꓢꓷ. ꓕꓯ ꓠꓽ ꓪ ꓜꓲ ꓙꓽ ꓖꓶ ꓔ ꓠ ꓗ, ꓡꓳ꓾ ꓟꓽ ꓥ ꓡ꓿
ꓠꓬꓲ. ꓠꓬꓲ ꓣꓳ ꓑ ꓙ ꓪ ꓠ ꓔˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓥ ꓟꓲ ꓬꓰ‐ꓢꓴ ꓡꓰ꓾ ꓢꓲ ꓒ ꓡˍ ꓟ ꓙꓵ, ꓔꓯ ꓙꓽ ꓖꓶ ꓢꓲ ꓥꓳ ꓡꓳ. ꓔꓬ ꓠ, ꓟ꓾ ꓟ. ꓖꓶ ꓔˍ ꓡꓳ꓿
ꓖꓳ ꓡꓱ ꓥ ꓟꓲ ꓬꓰ‐ꓢꓴ ꓙꓲ‐ꓢꓴ ꓔꓯ ꓡꓳ. ꓠꓬ, ꓔꓬ ꓐꓯ ꓟ ꓠꓬ ꓙꓳꓺ ꓛꓱꓽ ꓢꓲ ꓡꓳ. ꓠꓬ, ꓔꓬ ꓠ, ꓟ ꓟꓽ ꓥ꓿ ꓥꓳ ꓡꓳ. ꓠꓲ, ꓐꓰ ꓡꓳ. ꓠꓬ, ꓢꓲ꓾ ꓣꓳ ꓚꓲ. ꓛꓬ ꓞꓳ ꓙꓳ ꓔꓬ ꓟ ꓦꓬꓼ ꓠꓬꓲ ꓔꓯ ꓦ ꓡꓱ ꓐꓳ ꓐꓳˍ ꓡꓰꓽ ꓞꓳ ꓙꓳ ꓠ, ꓟ ꓥ ꓡꓳ꓿
ꓡꓴ‐ꓘ꓿ 12ꓽ35‐38 ꓗꓪ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓠ ꓠ, ꓓꓴ ꓬꓰ ꓡꓯ꓿ ꓗ ꓘꓶꓽ ꓦꓴ ꓠꓬ, ꓢꓴ ꓔꓯ ꓥꓳꓽ꓾
ꓝꓮꓲ ꓬꓲ ꓡꓰ꓾ ꓠꓴ ꓪ ꓠꓬ ꓙꓽ ꓧꓷ, ꓧꓷ ꓔ ꓢꓲ ꓟꓬ ꓡꓴ ꓟꓬ ꓔ꓿ ꓖꓳ ꓡꓱ ꓢꓲ ꓠꓴ ꓪ ꓠꓬ꓾ ꓤ ꓟꓶ ꓝꓱˍ ꓟ ꓑꓮꓲ ꓗꓪ ꓐꓰ ꓬꓲꓼ ꓡˍ ꓟ ꓬꓲ ꓢꓲ ꓒ ꓔꓯ ꓡꓳ. ꓔꓬ ꓟ ꓚꓳ ꓑ.ˍ ꓡꓰ ꓐꓰ꓾ ꓬꓲ ꓡꓰꓼ ꓡ ꓢ ꓗ ꓘꓶꓽ ꓲʼꓼ ꓡ ꓠꓬ꓾ ꓞꓼ ꓐꓰ ꓬꓲ ꓔꓯ ꓗ ꓘꓶꓽ ꓒꓴ ꓖꓶ ꓠ, ꓟ ꓙꓽ ꓖꓶ ꓔ꓿ ꓢꓲ ꓒꓽ ꓡˍ ꓕꓯ ꓧꓪ. ꓛꓲꓽ ꓐꓰ ꓔꓬ ꓟ ꓚꓳ ꓑ. ꓐꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓥꓳ꓿ ꓠꓴ ꓪ ꓔꓯ ꓥꓪ ꓔꓱ, ꓔꓱ,ˍ ꓐꓰ ꓖꓶˍ ꓠꓬꓲ꓾ ꓬꓲ ꓠꓬ ꓚꓳ ꓑ. ꓔꓯ ꓜ ꓜꓽ ꓠ, ꓟ ꓗꓳ ꓔ ꓝꓲ ꓢꓲ꓾ ꓬꓲ ꓚꓲ ꓛꓬ ꓠꓬ ꓙꓽ ꓧꓷ, ꓧꓷ, ꓢꓲ ꓠꓬꓲ ꓬꓲ ꓪ ꓔꓯ ꓑꓶ ꓖꓶ ꓜꓽˍ ꓥꓳ꓿
ꓬꓲ ꓠꓬ ꓢ ꓘꓪ ꓔꓱ ꓫꓵ꓾ ꓥ ꓠꓬ ꓠꓯꓼ ꓝꓲ. ꓗꓪ ꓡˍ ꓟꓲ꓾ ꓕꓱ ꓡꓱ ꓧꓪ. ꓛꓲꓽ ꓐꓰ ꓦꓴ ꓠꓬ, ꓔꓬ ꓟ ꓚꓳ ꓑ. ꓐꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓥꓳ꓾ ꓐꓯˍ ꓡꓳ꓿
ꓔꓯ ꓥꓳꓽ ꓗꓪ ꓤ ꓟꓶ ꓝꓱ ꓑꓮꓲ ꓐꓯˍ ꓟ ꓠꓬ ꓬꓰ‐ꓢꓴ ꓙꓲ‐ꓢꓴ ꓠꓬꓲꓽ ꓧꓪ, ꓕꓲ ꓧꓪ, ꓡˍ ꓟ꓾ ꓡꓳ, ꓬꓰˍ ꓟ ꓙꓵ, ꓔꓯ ꓖꓴ ꓢꓲ ꓐꓯ ꓔ ꓟ ꓥ ꓡꓳ꓿ ꓙꓽ ꓧꓷ, ꓧꓷ ꓔˍ ꓝꓲˍ ꓟ ꓠꓬ ꓢꓲ ꓒ ꓪꓴ‐ꓢ ꓠꓬ ꓣꓳ ꓔꓯ ꓠꓱ. ꓐꓯ ꓢꓴ ꓐꓱ ꓶ ꓙꓲˍ ꓟ ꓬꓰ ꓖꓶˍ ꓟ꓾ ꓚꓲ. ꓛꓬ ꓚꓬꓴ. ꓟꓶ ꓠ, ꓟ ꓐꓱ ꓶ ꓟꓬꓱꓽ ꓬꓰˍ ꓟ ꓔꓯ ꓟꓳꓻ ꓠꓲ, ꓫꓵˍ ꓟ ꓥ ꓡꓳ꓿ ꓟꓬ ꓡꓴ ꓟꓬ ꓔ ꓝꓲˍ ꓟ ꓠꓬ ꓟꓽ ꓥ ꓟ ꓗꓪ꓾ ꓥꓳꓽ ꓡꓰˍ ꓟ ꓚꓱ, ꓗꓪ ꓫꓱꓽ ꓔꓬ ꓢꓴ ꓐꓴ ꓐꓱ ꓶ ꓔꓱ,ˍ ꓟ ꓗꓪ ꓟ. ꓖꓶ ꓢꓴ꓾ ꓟꓽ ꓙꓲꓻ ꓟ ꓥꓶˍ ꓟ ꓠꓯ ꓞꓲ,ˍ ꓟ ꓔꓯ ꓡꓬ. ꓖꓶ ꓢꓴ꓾ ꓢꓲ ꓒ ꓪꓴ‐ꓢ ꓬꓲ ꓠꓵꓻ ꓠꓲ, ꓐꓰ ꓖꓽ ꓖꓶˍ ꓟ ꓠꓬꓲ ꓟꓳꓻ ꓓꓴ ꓔꓯ ꓡꓬ. ꓖꓶ ꓢꓴ ꓒꓬꓱꓼ ꓠ ꓗ, ꓡꓳ꓾ ꓐꓰ ꓐꓯˍ ꓟ ꓥ ꓡꓳ꓿
