ꓤ ꓠꓱ ꓤ ꓔꓯ ꓮ ꓫꓵ ꓑꓶ ꓓꓴ ꓖꓳ ꓓꓱ ꓔꓲ, ꓖꓶ_ ꓡ?
ꓡ ꓞꓳ ꓕꓲꓽ ꓣꓳ ꓠꓬ ꓦꓵꓻ ꓡ ꓕꓯ ꓡꓰ ꓮ‐ꓓꓯ꓾ ꓰ‐ꓪ ꓣꓳ ꓮꓽ ꓐ ꓮ ꓟ ꓗꓪ ꓐꓰ ꓠꓶꓼ ꓡ ꓟ ꓝꓴꓲ ꓚꓰ ꓐꓯ_ ꓟ ꓙꓳ_ ꓡꓳ꓾ ꓖꓳ ꓝꓴꓲ ꓔꓯ ꓢꓲ ꓫꓬ ꓖꓶ ꓠ, ꓟ ꓠꓬ ꓖꓳ ꓓꓱ ꓔꓲ, ꓠ, ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓚꓲ ꓛꓬ ꓥ ꓟꓲ ꓖꓳ ꓓꓱ ꓔꓲ, ꓠ, ꓟ ꓐꓯ ꓖꓶ ꓔ ꓡꓳ꓿
ꓖꓳ ꓟ ꓑꓶ ꓓꓴ ꓣꓳ ꓠꓬ ꓮ ꓫꓵ ꓑꓶ ꓓꓴ ꓤ ꓠꓱ ꓤ ꓔꓯ ꓖꓳ ꓓꓱ ꓔꓲ, ꓖꓶ_ ꓡ ꓐꓯ ꓠꓬ ꓤ ꓠꓱ ꓤ ꓠꓬ ꓦꓵꓻ ꓡ ꓕꓯ ꓡꓰ ꓬꓲ ꓔꓯ ꓝꓴꓲ ꓠꓯꓼ ꓗꓪ ꓝꓮꓲ ꓕꓲꓽ ꓧꓪ, ꓟꓽ ꓫꓵꓻ ꓗꓷ ꓡꓰ ꓠ, ꓟ꓾ ꓬꓲ ꓔꓯ ꓐ ꓡ ꓕꓯ ꓡꓰ ꓦꓵꓻ ꓡ ꓠꓬꓲ ꓢ ꓠꓬꓲ ꓕꓯ ꓡꓰ ꓖꓳ ꓓꓱ ꓔꓲ, ꓖꓶ_ ꓟ ꓥ ꓡꓳ꓿ ꓮ ꓫꓵ ꓑꓶ ꓓꓴ ꓥ ꓡ ꓐꓯ ꓠꓬ ꓝꓴꓲ ꓠꓯꓼ ꓗꓪ ꓟꓽ ꓫꓵꓻ ꓠ, ꓟ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓦꓵꓻ ꓡ ꓕꓯ ꓡꓰ ꓬꓲ ꓔꓯ ꓝꓴꓲ ꓢꓲ ꓫꓬ ꓖꓶ_ ꓡꓳ꓿ ꓖꓳ ꓕꓯ ꓪꓴ‐ꓢ ꓬꓲ ꓡꓯꓼ ꓚꓳ. ꓡꓯꓼ ꓖꓳꓼ ꓗꓪ ꓪꓴ‐ꓢ ꓤ ꓠꓱ ꓤ ꓒꓬꓱꓼ ꓡ ꓡꓳ꓿ ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓗꓪ ꓬꓲꓻ ꓙꓬ ꓐꓰ ꓢꓲ‐ꓫꓬ‐ꓟ‐ꓦ ꓢꓲ ꓫꓬ ꓖꓶ_ ꓟ ꓗꓪ ꓐꓰ ꓢꓯꓼ ꓟꓬ ꓬꓲ ꓫꓵꓼ ꓝꓮꓲ ꓕꓲ ꓧꓪ, ꓟꓶ ꓡꓰ ꓟ ꓥ ꓡꓳ꓿ ꓖꓳ ꓟ ꓒꓶ ꓓꓴ ꓪꓴꓽ ꓡ ꓕꓯ ꓖꓳ ꓓꓱ ꓔꓲ, ꓟ ꓠꓬ ꓟꓽ ꓜꓳ ꓡ ꓐꓰ ꓐꓯ ꓠꓬꓲ ꓓꓴ ꓙꓳ_ ꓡꓳ꓿ ꓕꓱ ꓟ ꓥ ꓟꓲ ꓜꓳ_ ꓡꓳ꓿ ꓪꓴꓽ ꓡ ꓕꓯ ꓖꓳ ꓓꓱ ꓔꓲ, ꓠ. ꓟ ꓕꓱ ꓟ ꓥ ꓟꓲ ꓜꓳ ꓡꓳ꓾ ꓣꓳ. ꓚꓵ. ꓟ ꓠꓬ ꓣꓳ ꓠꓬ ꓤ ꓠꓱ ꓤ ꓗꓪ ꓐꓰ ꓪꓴꓽ ꓡ ꓠꓬꓲ ꓗꓳ. ꓚ. ꓗꓪ ꓖꓳ ꓓꓱ ꓟꓽ ꓔꓲ, ꓕꓯ ꓫꓵꓻ ꓘꓪ ꓡꓰ ꓠꓬ ꓕꓱ ꓟ ꓠꓬ ꓮ ꓡꓰ ꓬꓰ ꓓꓴ ꓥ ꓡ꓾ ꓕꓱ ꓟ ꓔꓯ ꓣꓳ ꓢꓪ. ꓢꓲ ꓠꓬꓲ ꓦꓵꓻ ꓡ ꓕꓯ ꓡꓰ ꓐ ꓡ ꓠꓬ ꓬꓲ ꓔꓯ ꓖꓳ ꓓꓱ ꓔꓲ, ꓖꓶ_ ꓟ ꓥ ꓡꓳ꓿ ꓝꓴꓲ ꓠꓯꓼ ꓗꓪ ꓐꓰ ꓢꓲ ꓫꓬ ꓖꓶ ꓠ, ꓟ ꓥ ꓡꓳ꓿
ꓤ ꓠꓱ ꓤ ꓠꓬ ꓮ ꓫꓵ ꓟꓲ ꓟꓽ ꓢꓷ.꓾ ꓬꓲ ꓔꓯ ꓮꓽ ꓐ ꓮ ꓟ ꓡꓰ ꓮ ꓫꓵ ꓑꓶ ꓓꓴ ꓖꓳ ꓓꓱ ꓔꓲ, ꓖꓶ_ ꓡ? ꓬꓲ ꓠꓬ ꓪꓴ‐ꓢ ꓔꓯ ꓡꓰ ꓟ ꓢꓷ. ꓡꓰ ꓬꓲ ꓠꓬ ꓧ. ꓟ ꓟꓽ ꓧ. ꓟ ꓙꓲ_ ꓟ꓾ ꓟꓽ ꓙꓲ_ ꓟ ꓔꓯ ꓥ ꓟꓲ ꓬꓲ ꓟ ꓢꓷ. ꓕꓱ ꓡꓱ ꓐꓯ ꓓꓴ ꓙꓳ_ ꓡꓳ꓿ ꓖꓳ ꓡꓱ ꓥ ꓟꓲ ꓠꓬꓲ. ꓠꓬꓲ ꓬꓰ‐ꓡꓲ‐ꓟꓲ 1ꓽ 5 ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓟꓷꓼ ꓠꓷ, ꓝ. ꓒꓽ ꓬꓰ‐ꓡꓲ‐ꓟꓲ ꓔꓯ ꓔꓱ ꓡꓱ ꓐꓯ ꓡꓳ꓾ꓠꓴ ꓟ, ꓟ ꓤ ꓘꓶ ꓗꓪ ꓠꓴ ꓔꓯ ꓟꓽ ꓙꓳ ꓕꓯ ꓡꓰ ꓥꓪ ꓠꓴ ꓔꓯ ꓢꓷ. ꓗꓷꓳ꓾ꓥꓪ ꓠꓴ ꓔꓯ ꓘꓴ ꓗꓷꓳ꓾ꓕꓱ ꓟ ꓠꓬ ꓡ ꓞꓳ ꓮ ꓡꓰ ꓕꓲ ꓣꓳ ꓥ ꓟꓲ ꓣꓳ ꓟ, ꓟ ꓤ ꓘꓶ ꓗꓪ ꓟꓽ ꓙꓳ ꓕꓯ ꓡꓰ ꓪꓴ‐ꓢ ꓤ ꓫꓵ. ꓤ ꓠꓱ ꓥ ꓡꓳ꓿ ꓪꓴ‐ꓢ ꓡꓯꓼ ꓚꓳ. ꓡꓯꓼ ꓖꓳꓼ ꓗꓪ ꓟ, ꓟ ꓤ ꓘꓶ ꓗꓪ ꓟꓽ ꓙꓳ ꓕꓯ ꓡꓰ ꓣꓳ ꓔꓬ ꓟ ꓥ ꓡꓳ꓿ ꓕꓱ ꓟ ꓑꓶ ꓓꓴ ꓠꓬꓲ ꓣꓳ ꓠꓬ ꓧꓶ. ꓕꓯ ꓡꓰ ꓪꓴ‐ꓢ ꓤ ꓠꓱ ꓥ ꓟ ꓑꓶ ꓓꓴ ꓬꓲ ꓔꓯ ꓦꓵꓻ ꓡ ꓕꓯ ꓠꓬ ꓝꓴꓲ ꓚꓰ ꓠꓷꓼ ꓔ ꓟ ꓑꓶ ꓓꓴ ꓤ ꓠꓱ ꓤ ꓔꓯ ꓠꓲ, ꓞ ꓖꓳ ꓓꓱ ꓔꓲ, ꓖꓶ_ ꓟ ꓥ ꓡꓳ꓿ ꓬꓲ ꓪꓴꓽ ꓡ ꓧꓶ. ꓕꓯ ꓡꓰ ꓬꓲ ꓔꓯ ꓖꓳ ꓓꓱ ꓔꓲ, ꓖꓶ ꓥꓳ ꓐꓯ ꓠꓬ ꓬꓲ ꓠꓬ ꓔꓯ ꓥꓳꓽ ꓐꓯ ꓠꓬ ꓬꓲ ꓠꓬ ꓙꓲ_ ꓟ꓾ ꓟꓽ ꓙꓲ ꓟ ꓟꓽ ꓢꓷ. ꓬꓲ ꓣꓳꓺ ꓟ ꓑꓶ ꓓꓴ ꓮꓽ ꓐ ꓮ ꓟ ꓡꓰ ꓬꓲ ꓔꓯ ꓖꓳ ꓓꓱ ꓔꓲ, ꓖꓶ_ ꓟ ꓗꓪ ꓶꓻ ꓣꓴ ꓢꓲ ꓠꓬꓲ ꓝꓴꓲ ꓚꓰ ꓗꓪ ꓐꓰ ꓢꓲ ꓫꓬ ꓖꓶ_ ꓟ ꓥ ꓡꓳ ꓐꓰ ꓐꓯ ꓖꓶ ꓠ ꓔ ꓡꓳ꓿ ꓖꓳ ꓟ ꓑꓶ ꓓꓴ ꓤ ꓠꓱ ꓤ ꓔꓯ ꓕꓱ ꓡꓱ ꓐꓰ ꓖꓳ ꓓꓱ ꓔꓲ, ꓖꓶ_ ꓟ ꓥ ꓡꓳ꓿
