ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓗꓷ ꓡꓰ ꓝꓲˍ ꓟ (Air Pollution )
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓚꓱ, ꓗꓪ ꓐꓰ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓡꓰ ꓝꓲˍ ꓟ ꓮꓲꓣ ꓑꓳꓡꓡꓴꓔꓲꓳꓠ ꓐꓯ ꓟ ꓚꓱ, ꓔꓯ ꓐꓯ ꓟ. ꓖꓶ ꓓꓴ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓟ ꓙꓵ, ꓕꓯ ꓢꓯꓼ ꓦ ꓔꓬ ꓟ ꓟꓲꓽ ꓦꓲꓻ ꓠꓬ ꓮ ꓘꓶ. ꓛꓲ ꓣꓱ ꓬꓯꓼ ꓟꓽ ꓙꓳ ꓟ ꓟꓽ ꓓ ꓟ ꓟꓲꓽ ꓦꓲꓻ ꓥ ꓡꓳ꓿
ꓟꓲ ꓠꓯ ꓕꓯ ꓢꓲ ꓗꓪ ꓢꓯ. ꓫꓵꓽ ꓢꓯ. ꓙꓰ ꓑꓶ. ꓓꓲ ꓡꓯ ꓓꓲ ꓮ ꓙꓵꓽ ꓠꓬ ꓟꓲꓽ ꓦꓲꓻ ꓔꓯ ꓣꓱ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓮ ꓟꓶ ꓟ ꓙꓵ, ꓗꓪ ꓣꓳ ꓢꓯꓼ ꓦ ꓔꓬ ꓟ ꓟꓲꓽ ꓦꓲꓻ ꓠꓬ ꓟꓽ ꓢꓲꓽ ꓫꓬ ꓗꓷ ꓡꓰ ꓔꓬ ꓟ ꓥ ꓡꓳ꓿
ꓟꓲꓽ ꓦꓲꓻ ꓔꓯ ꓡ ꓞꓳ ꓟꓬ ꓢꓷ ꓡꓰ ꓡꓳ. ꓟꓳ ꓟꓽ ꓓ ꓥ ꓟꓲ ꓟꓲꓽ ꓦꓲꓻ ꓠꓬ ꓚꓵˍ ꓚꓵˍ ꓙꓳ ꓟ ꓥ ꓡꓳ꓿ ꓟꓲꓽ ꓦꓲꓻ ꓠꓬ ꓪꓴ‐ꓢ ꓡꓰ ꓟꓲ ꓠꓯ ꓡ ꓞꓳ ꓔꓯ ꓖꓶ ꓔ ꓟ ꓮ ꓘꓶ. ꓒꓵꓽ ꓟ ꓡꓯ ꓫꓴꓻ ꓓ ꓕꓲ ꓫꓵꓽ ꓟꓲ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓮ ꓟꓶ ꓙ ꓙꓵ, ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓝꓮꓲ ꓟꓲ ꓠꓯ ꓡ ꓞꓳ ꓐꓴ ꓡꓰ ꓙꓼ ꓦꓲꓻ ꓣꓱ ꓢꓲ ꓠꓬꓲ ꓑꓡꓮꓢꓔꓲꓚ ꓔꓯ ꓣꓱ ꓟ ꓑꓶ. ꓓꓴ ꓟꓲꓽ ꓦꓲꓻ ꓠꓬ ꓮ ꓘꓶ. ꓛꓲ ꓟꓽ ꓢꓲꓽ ꓫꓬ ꓗꓷ ꓡꓰ ꓟ ꓥ ꓡꓳ꓿
ꓟꓲꓽ ꓦꓲꓻ ꓟꓽ ꓢꓲꓽ ꓫꓬ ꓗꓷ ꓡꓰ ꓝꓲˍ ꓟ ꓠꓬ ꓟꓬ ꓢꓷ ꓡꓰ ꓡꓳ. ꓟꓳ ꓟꓽ ꓓ ꓑꓶ. ꓛꓵꓽ ꓮ ꓟꓬ, ꓐ ꓟ ꓑꓶ. ꓓꓴ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓗꓷ ꓡꓰ ꓟ ꓥ ꓡꓳ꓿
ꓣꓳ ꓔꓬ ꓟ ꓟꓬ‐ꓟ ꓗꓴꓷꓼ ꓡꓳ ꓒꓱ ꓓ ꓮ ꓟꓬ, ꓗꓪ ꓥ ꓟꓲ ꓟꓲꓽ ꓦꓲꓻ ꓟꓽ ꓢꓲꓽ ꓫꓬ ꓟ ꓒꓬꓱꓼ ꓔꓬ ꓟ ꓔꓯ ꓣꓳ ꓠꓬꓲ. ꓠꓬꓲ ꓡꓳ. ꓟꓳ ꓪ ꓓ ꓟ ꓥ ꓡꓳ꓿
ꓕꓱ ꓡꓰ ꓗꓷ ꓡꓰ ꓟ ꓠꓬ ꓟꓲ ꓠꓯ ꓡ ꓞꓳ ꓐꓴ ꓠꓬ ꓙꓼ ꓦꓲꓻ ꓓ ꓣꓱ ꓢꓲ ꓠꓬꓲ ꓒꓴ ꓫꓵꓺ ꓧꓪ ꓟ꓾ ꓝꓮꓲ ꓢꓲ, ꓠꓯ ꓗꓪ ꓢꓲ, ꓜꓲ ꓡꓳ ꓜꓲ ꓔꓯ ꓐꓬ ꓡꓰ ꓟꓶ ꓡꓰ ꓝꓲˍ ꓟ ꓑꓶ. ꓓꓴ ꓒꓬꓱꓼ ꓡ ꓟ ꓫꓵꓽ ꓪꓴꓽ ꓥ ꓡꓳ꓿
ꓟꓲꓽ ꓦꓲꓻ ꓟꓽ ꓢꓲꓽ ꓫꓬ ꓡꓰ ꓠꓬ ꓣꓳ ꓧꓪ ꓖꓳꓽ ꓓꓱ ꓗꓪ ꓠꓻ ꓫꓵꓽ ꓮ ꓟꓬ, ꓒꓬꓱꓼ ꓡ ꓓꓴ ꓥ ꓡꓳ꓿ ꓖꓳ ꓡꓱ ꓠꓬ ꓣꓳ ꓔꓬ ꓟ ꓦꓲꓻ ꓘꓴꓽ ꓣꓳ ꓔꓬ ꓟ ꓡꓳ ꓒꓱ ꓞꓳ ꓘ, ꓗꓪ ꓢꓲꓽ ꓫꓬ ꓡꓰ ꓠ, ꓟ ꓣꓳ ꓢꓯꓼ ꓕꓵꓼ ꓡꓯ꓿ ꓫ. ꓟꓳ ꓪ꓿
