ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓒꓵꓽ ꓠꓯˍ ꓟ (Laudatosi)
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓼ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓒꓵꓽ ꓠꓯ, ꓟ ꓐꓯ ꓟ ꓚꓱ, ꓗꓪ ꓐꓰ ꓐꓯ ꓟ. ꓖꓶ ꓓꓴ ꓥꓳ꓿
ꓠꓬꓲ. ꓠꓬꓲ ꓣꓳ ꓔꓬ ꓟ ꓟꓵꓽ ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫ. ꓓꓴ ꓟꓷ ꓓꓴ ꓮ ꓟꓬ, ꓛꓲ ꓔꓬ ꓜꓳ ꓔꓬ ꓟ ꓥ ꓡꓳ꓿ ꓟꓶ ꓞ ꓮ ꓘꓶ. ꓞ ꓡ ꓟ ꓑꓶ. ꓓꓴ ꓠꓻ ꓓꓴ ꓐꓰ ꓫꓵꓻ ꓡꓰ ꓢꓴ ꓡ ꓞꓳ ꓐꓴ ꓥ ꓟꓲ ꓙꓳ ꓟ ꓥꓡꓳ꓿
ꓝꓮꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓕꓳ ꓶ ꓡꓮꓴꓓꓮꓔꓳꓢꓲ ꓔꓲꓺ ꓒ ꓪ ꓔꓲ ꓑꓳꓑꓰ ꓝꓣꓮꓠꓚꓲꓢ ꓡꓰ ꓐꓳ ꓔ ꓟ ꓕꓳ ꓶ ꓗꓪ ꓪꓴ‐ꓢ ꓡꓰ ꓚꓰꓼ ꓔ ꓟ ꓔꓯ ꓟꓽ ꓒꓵꓽ ꓟ ꓠꓬ ꓝꓴꓲ. ꓥ ꓟ ꓚꓱ, ꓔꓯ ꓐꓳ ꓖꓶ ꓔ ꓟ ꓥ ꓡꓳ꓿
ꓪꓴ‐ꓢ ꓠꓬ ꓣꓳ ꓟꓲ ꓠꓯ ꓞꓳ ꓤ ꓔꓯ ꓮ ꓘꓶ. ꓡꓳ. ꓐꓲ ꓟ ꓟꓲ ꓠꓯ ꓓꓲ ꓔꓯ ꓖꓶ ꓔ ꓟꓥ ꓡꓳ꓿ ꓢꓲ, ꓜꓲ ꓡꓳ ꓜꓲ ꓢꓲ ꓪꓰ ꓡꓳ ꓪꓰ ꓝꓮꓲ ꓢꓲ, ꓠꓯ ꓐꓰ ꓬꓲ ꓙꓬ ꓡꓳ ꓗ ꓮ ꓘꓶ. ꓡꓳ ꓐꓲˍ ꓟ ꓙꓬ ꓐꓴ ꓐꓰ ꓧꓪꓽ ꓫꓵꓽ ꓧꓪꓽ ꓙꓰ ꓢꓯꓼ ꓦ ꓓꓴ ꓟꓲ ꓦꓲꓻ ꓐꓰ ꓕꓱ ꓡꓱ ꓫꓵꓽ ꓮ ꓙꓵꓽ ꓠꓬ ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓘꓶ. ꓡꓳ. ꓐꓲ ꓫꓵꓽ ꓡꓰ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓠꓬꓲ. ꓠꓬꓲ ꓣꓳ ꓔꓬ ꓟ ꓟꓵꓽ ꓔꓯ ꓡꓳ. ꓠꓬꓲ ꓠꓬ ꓢꓲ, ꓠꓯ ꓗꓪ ꓢꓲ, ꓜꓲ ꓡꓳ ꓜꓲ ꓟꓽ ꓙꓳ ꓗꓷ ꓡꓰꓳ꓿ ꓬꓲ ꓙꓬ ꓡꓳ ꓗ ꓟꓽ ꓢꓲꓽ ꓫꓬ ꓡꓰꓳ꓿ ꓡ ꓞꓳ ꓐꓰ ꓧꓪꓽ ꓫꓵꓽ ꓧꓪꓽ ꓙꓰ ꓓꓳ ꓟꓽ ꓙꓲ ꓗꓷ ꓡꓰ ꓔꓬ ꓡꓳ꓿
ꓟꓽ ꓢꓲꓽ ꓫꓬ ꓡꓰ ꓟ ꓬꓲꓻ ꓙꓬ ꓡꓳ ꓒꓬꓱꓼ ꓔꓬ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓬꓲꓻ ꓙꓬ ꓟꓽ ꓙꓳ ꓗꓷ ꓡꓰ ꓟ ꓬꓲꓻ ꓙꓬ ꓙꓵꓽ ꓡ ꓟ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓬ, ꓠꓬ ꓒꓬꓱꓼ ꓡ ꓟꓥ ꓡꓳ꓿
ꓕꓱ ꓡꓱ ꓫꓵꓽ ꓫꓵꓽ ꓪꓴꓽ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓒꓬꓱꓼ ꓡ ꓟ ꓫꓵꓽ ꓪꓴꓽ ꓥ ꓡꓳ꓿
ꓪꓴ‐ꓢ ꓡꓰ ꓚꓰꓼ ꓔ ꓟ ꓟꓲ ꓠꓯ ꓔꓯ ꓐꓬ ꓡꓰ ꓝꓲ ꓟ ꓟꓶ ꓡꓰ ꓝꓲˍ ꓟ ꓚꓱ, ꓔꓯ ꓬꓰ ꓔꓬ ꓟ ꓠꓬ ꓛꓲ ꓡ ꓟ ꓣꓳ ꓤ ꓠꓱ ꓐꓴ ꓔꓯ ꓫ. ꓡꓰ ꓝꓲˍ ꓟ ꓟꓬꓱꓽ ꓬꓰ ꓔꓬ ꓟꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓵꓽ ꓘꓳꓼ ꓔꓯ ꓐꓬ ꓡꓰ ꓝꓲˍ ꓟ ꓚꓱ, ꓟꓲ ꓠꓯ ꓔꓯ ꓐꓬ ꓡꓰ ꓝꓲˍ ꓟ ꓚꓱ, ꓮ ꓙꓵꓽ ꓔꓯ ꓤ ꓟꓳ ꓠ, ꓟ ꓮ ꓘꓶ. ꓛꓲ ꓣꓳ ꓚꓵˍ ꓟ ꓥ ꓡꓳ꓿
ꓡꓮꓴꓔꓮꓔꓳꓢꓲ ꓕꓳ ꓶ ꓗꓪ ꓔꓲꓺ ꓒ ꓪ ꓔꓲ ꓡꓰ ꓟꓲ ꓠꓯ ꓔꓯ ꓟꓲ ꓠꓯ ꓞꓳ ꓤ ꓐꓴ ꓡꓰ ꓚꓲ. ꓛꓬ ꓠꓲ, ꓫꓵˍ ꓪ ꓡꓰ ꓐꓬ ꓡꓰ ꓝꓲˍ ꓠ, ꓟ ꓟꓶ ꓡꓰ ꓝꓲˍ ꓠ, ꓟ ꓟꓬꓱꓽ ꓬꓰ ꓠ, ꓟ ꓤ ꓟꓳ ꓠ, ꓟ ꓔꓯ ꓐꓯ ꓖꓶ ꓔ ꓡꓳ꓿
ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯ ꓠꓬ ꓟꓲ ꓠꓯ ꓠꓬ ꓣꓳ ꓮ ꓙꓵꓽ ꓢꓴ ꓔꓬ ꓟ ꓟꓲ ꓠꓯ ꓦꓲꓻ ꓓ ꓥ ꓟ ꓪꓴ. ꓠꓬꓲ (ꓚꓳꓟꓟꓳꓠ ꓧꓳꓟꓰ ) ꓥ ꓟ ꓪꓴ. ꓠꓬꓲ ꓥ ꓡꓳ꓿ ꓠꓴ ꓥꓪ ꓡꓰ ꓟꓲ ꓠꓯ ꓔꓯ ꓐꓬ ꓡꓰ ꓝꓲ ꓟꓶ ꓡꓰ ꓝꓲˍ ꓟ ꓟꓬꓱꓽ ꓔꓯ ꓬꓰ ꓔꓬ ꓥ ꓛꓲ ꓡ ꓟ ꓣꓳ ꓤ ꓠꓱ ꓐꓴ ꓤꓶꓻ ꓣꓳ ꓡꓲ‐ꓒ ꓡꓲ‐ꓟ ꓐꓴ ꓔꓬ ꓟ ꓦꓬꓼ ꓠꓬꓲ ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓔꓳ ꓜꓳ ꓡ ꓓꓴ ꓥ ꓡꓳ꓿
ꓖꓳ ꓡꓱ ꓠꓬ ꓣꓳ ꓐꓴ ꓮ ꓡꓲ ꓐꓰ ꓬꓰ ꓠꓯˍ ꓡ ꓐꓯ ꓠꓬ ꓑꓶ ꓚꓵ ꓑꓶ. ꓟꓲ ꓔꓯ ꓤ ꓟꓳ ꓢꓲ ꓠꓬꓲ ꓡꓳ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
ꓑꓡꓮꓢꓔꓲꓚ ꓣꓱ ꓟ ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓝꓮꓲ ꓮ ꓔꓳ ꓙ ꓔꓯ ꓤ ꓟꓳ ꓢꓲ ꓠꓬꓲ ꓣꓱ ꓠ, ꓟ ꓥ ꓡꓳ꓿
ꓣꓳ ꓔꓬ ꓟ ꓟꓵꓽ ꓣꓳ ꓔꓬ ꓟ ꓡꓳ ꓒꓱ ꓞꓳ ꓘ, ꓔꓯ ꓠꓲ, ꓠꓵ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓝꓮꓲ ꓪꓴ‐ꓢ ꓡꓰ ꓖꓶ ꓔ ꓟ ꓮ ꓘꓶ. ꓡꓳ ꓐꓲ ꓟ ꓢꓲ, ꓜꓲ ꓡꓳ ꓜꓲ ꓔꓯ ꓮꓽ ꓔꓳ ꓕꓽ ꓘꓶ ꓓꓴ ꓬꓰ ꓡꓯ꓿ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓔꓯ ꓗꓽ ꓕꓽ ꓟ ꓢꓷ. ꓠꓲ, ꓔꓯ ꓢꓴ ꓔꓯ ꓐꓯ ꓟ. ꓖꓶ ꓓꓴ ꓬꓰ ꓡꓯ꓿
ꓟꓲ ꓠꓯ ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓠꓵꓻ ꓠꓲ, ꓟ ꓠꓬ ꓞꓳ ꓫ. ꓐꓴ ꓔꓯ ꓠꓲ, ꓠꓵ ꓟ ꓥ ꓡꓳ꓿ ꓞꓳ ꓫ. ꓐꓴ ꓔꓯ ꓠꓲ, ꓠꓵ ꓢꓴ ꓐꓴ ꓠꓬ ꓪꓴ‐ꓢ ꓔꓯ ꓠꓲ, ꓠꓵ ꓟ ꓐꓰ ꓕꓲ ꓡꓰ ꓥ ꓡꓳ꓿
ꓟꓲ ꓠꓯ ꓔꓯ ꓙꓲ ꓟ ꓚꓱ, ꓗꓪ ꓒꓬꓱꓼ ꓡꓰ ꓠ, ꓟ ꓣꓳ ꓕꓲ ꓣꓳ ꓡꓰ ꓟꓬꓱꓽ ꓬꓰ ꓔꓬ ꓟ ꓗꓪ ꓐꓰ ꓒꓬꓱꓼ ꓡ ꓟꓽ ꓓ ꓐꓰ ꓟꓽ ꓓꓴ ꓙ ꓠ, ꓟ ꓥ ꓡꓳ꓿ ꓡ ꓞꓳ ꓕꓲ ꓣꓳ ꓡꓰ ꓙꓲ ꓟ ꓟꓬꓱꓽ ꓔꓯ ꓬꓰ ꓔꓬ ꓠ, ꓠꓱ. ꓐꓯ ꓢꓴ ꓔꓯ ꓥ ꓟꓲ ꓙꓲ ꓟ ꓚꓱ, ꓗꓪ ꓬꓰ ꓠ, ꓟ ꓢꓯꓼ ꓪ ꓖꓶ ꓟ ꓥ ꓡꓳ꓿
ꓖꓳ ꓡꓱ ꓠꓬ ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓐꓬ ꓡꓰ ꓟꓶ ꓡꓰ ꓠ, ꓟ ꓟꓬꓱꓽ ꓔꓯ ꓤ ꓟꓳ ꓢꓲ ꓠꓬꓲ ꓗꓽ ꓕꓽ ꓟ ꓟꓬꓱꓽ ꓔꓯ ꓣꓳ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
ꓣꓳ ꓮ ꓙꓵꓽ ꓢꓴ ꓔꓬ ꓟ ꓟꓲ ꓠꓯ ꓦꓲꓻ ꓓ ꓔꓯ ꓠꓲ, ꓠꓵ ꓓꓴ ꓬꓰ ꓡꓯ꓿ ꓛꓲ ꓡ ꓟ ꓣꓳ ꓮ‐ꓐꓲ ꓮ‐ꓟꓲ ꓐꓴ ꓔꓬ ꓟ ꓦꓬꓼ ꓠꓬꓲ ꓗꓪ ꓔꓬ ꓢ ꓗ, ꓛꓲ ꓠ, ꓟ ꓣꓳ ꓐꓴ ꓟꓬꓱꓽ ꓬꓰ ꓡꓯ꓿ ꓙꓲ ꓟ ꓟꓵꓼ ꓘꓳꓼ ꓦꓬꓼ ꓠꓬꓲ ꓘꓳ, ꓣꓴ ꓪ ꓝꓲ꓿
