ꓢꓲ, ꓜꓲ ꓕꓲ ꓜꓲ ꓗꓪ ꓐꓰ ꓟꓲ ꓠꓯ ꓔꓯ ꓙꓲˍ ꓟ ꓚꓱ, ꓗꓪ ꓒꓳ, ꓡꓶꓽ ꓡꓰ ꓖꓶ ꓢꓴ ꓤ ꓟꓶ ꓕꓲ ꓣꓳ (Wangari Maathai)
ꓧꓪ. ꓧꓪ ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓟꓬꓱꓺ ꓓꓳꓽ ꓙꓳ ꓢꓴ ꓐꓴ ꓚꓺ ꓟꓲꓽ ꓚꓱ, ꓗꓪ ꓐꓰ ꓢꓲ, ꓜꓲ ꓕꓲ ꓜꓲ ꓗꓪ ꓐꓰ ꓟꓲ ꓠꓯ ꓔꓯ ꓙꓲ ꓟ ꓕꓲ ꓒꓳ, ꓗꓪ ꓒꓳ, ꓡꓶꓽ ꓖꓶ ꓢꓴ ꓟ. ꓒ ꓓ ꓑꓣꓳꓢꓢꓳꓣ ꓪꓮꓠꓖꓖꓮꓣ ꓟꓮꓮꓔꓧꓮꓲ ꓚꓺ ꓟꓲꓽ ꓔꓯ ꓚꓺ ꓟ. ꓖꓶ ꓥ ꓡꓳ꓿
ꓬꓲ ꓠꓬ ꓗꓰꓠꓬꓮ ꓗꓴꓷꓼ ꓗꓪ ꓔꓬ ꓟ ꓤ ꓟꓶ ꓤ ꓕꓲ ꓣꓳ ꓥ ꓢꓲ ꓠꓬꓲ ꓬꓲ ꓠꓬ ꓢꓷ. ꓠꓲ, ꓙꓳ ꓟ ꓓ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓗꓽ ꓕꓽ ꓟꓬꓱꓽ ꓗꓪ ꓮ ꓘꓶ. ꓢꓯꓼ ꓢꓴ ꓕꓲ ꓣꓳ ꓥ ꓡꓳ꓿
ꓬꓲ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕ ꓟ ꓟꓬꓱꓽ ꓗꓬꓰꓠꓬꓮ ꓗꓴꓷꓼ ꓗꓪ ꓢꓲ, ꓜꓲ ꓟꓽ ꓙꓳ ꓟ ꓟꓵꓽ ꓗꓪ ꓢꓲ, ꓜꓲ ꓮ ꓟꓬ, ꓔꓶ ꓖꓶ ꓗꓷ ꓟ ꓑꓶ. ꓓꓴ 2004 ꓘꓳꓼ ꓕꓯ ꓟꓲ ꓠꓯ ꓗꓪ ꓗꓪ ꓮ ꓘꓶ. ꓟꓬꓱꓽ ꓓꓳ ꓙꓳ ꓟ ꓠꓳꓐꓡꓰ ꓑꓰꓮꓚꓰ ꓑꓣꓲꓚꓰ ꓡꓯ ꓜꓴꓻ ꓔꓯ ꓘꓳ, ꓣꓴ ꓪ ꓗꓷ ꓟ ꓟꓲ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓬꓲ ꓠꓬ ꓡꓯ ꓫꓴ ꓔꓯ ꓢꓽ ꓢ ꓐꓰ ꓘꓳ, ꓣꓴ ꓟꓶ ꓟ ꓟꓽ ꓥ ꓡꓳ꓿ ꓕꓱ ꓟ ꓠꓬ ꓢꓲ, ꓜꓲ ꓕꓲ ꓜꓲ ꓔꓯ ꓔꓶ ꓟ ꓗꓪ ꓐꓰ ꓪꓴ. ꓔꓴ ꓗꓷ ꓟ ꓥ ꓡꓳ꓿
ꓪꓮꓠꓖꓮꓣꓲ ꓟꓮꓮꓔꓧꓮꓲ ꓠꓬ ꓬꓲ ꓔꓬ ꓟ ꓗꓴꓷꓼ ꓗꓪ ꓟꓵꓽ ꓗꓳ ꓢꓲ, ꓜꓲ ꓮ ꓘꓶ. ꓟꓽ ꓙꓳ ꓡ ꓟ꓾ ꓬꓲꓻ ꓙꓬ ꓟꓽ ꓙꓳ ꓗꓷ ꓡꓰ ꓟ꓾ ꓦ ꓟꓲ ꓬꓰ ꓜ ꓢꓴ ꓐꓴ ꓔꓶ ꓜ ꓔꓶ ꓓꓳ ꓟꓽ ꓙꓲ ꓗꓷ ꓡꓰ ꓟ ꓔꓯ ꓡꓳ. ꓟꓳ ꓗꓷ ꓡꓰ ꓗ. ꓠꓯ ꓟꓲ ꓠꓯ ꓡ ꓞꓳ ꓐꓴ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓡ ꓟ ꓔꓯ ꓢꓷ. ꓡꓰ ꓟ ꓥ ꓡꓳ꓿
ꓬꓲ ꓠꓬ ꓕꓱ ꓗꓴꓷꓼ ꓘꓴꓽ ꓗꓪ ꓔꓬ ꓟ ꓑ ꓫꓬ ꓐꓴ ꓫ ꓓꓴ ꓟꓷ ꓓꓴ ꓔꓳ, ꓜꓳ ꓔꓬ ꓟ ꓔꓯ ꓮ ꓡꓲ ꓐꓰ ꓬꓰ ꓙ ꓐ ꓡ ꓢꓲ꓾ ꓐꓰ ꓓꓴ ꓙ ꓗꓷ ꓟ ꓥ ꓡꓳ꓿ ꓝꓮꓲ ꓬꓲ ꓠꓬ ꓬꓲ ꓕꓲ ꓣꓳ ꓡꓰ ꓮ ꓡꓲ ꓐꓰ ꓬꓰ ꓐ ꓢꓲ ꓐꓰ ꓟꓽ ꓓꓴ ꓙ꓾
ꓬꓲ ꓠꓬ ꓬꓲ ꓠꓬꓲ. ꓠꓬꓲ ꓮ ꓘꓶ. ꓬꓰ ꓐ ꓡ ꓡ ꓐꓰ ꓓꓴ ꓙ ꓗꓷꓳ꓿
ꓖꓳ ꓗ. ꓠꓯ ꓬꓲ ꓠꓬ ꓤ ꓟꓶ ꓤ ꓕꓲ ꓜꓴꓻ ꓔꓯ ꓜꓲꓼ ꓗꓷ ꓢꓲ ꓠꓬꓲ ꓢꓲ, ꓜꓲ ꓔꓶ ꓠ, ꓟ ꓟꓬꓱꓽ ꓔꓯ ꓢꓯꓼ ꓕꓵꓼ ꓗꓷꓳ꓿ ꓖꓳ ꓗ. ꓠꓯ ꓖꓣꓰꓰꓠ ꓐꓰꓔꓧ ꓟꓳꓦꓰꓠꓟꓰꓠꓔ ꓔꓯ ꓬꓰ ꓔꓴ ꓗꓷꓳ꓿
ꓞꓳ ꓡꓱ ꓐꓴ ꓣꓳ ꓐꓱ ꓶ ꓓꓴ ꓙ ꓢꓪ ꓠꓬꓲ ꓓꓴ ꓕꓲ ꓟ ꓙꓳ ꓟ ꓥ ꓡꓳ꓿
ꓟꓲ ꓠꓯ ꓔꓯ ꓒꓳ, ꓡꓶ ꓝꓲ ꓠ, ꓟ ꓐꓱ ꓶ ꓠꓴ ꓥꓪ ꓗꓪ ꓐꓰ ꓪꓴ. ꓔꓴ ꓠ, ꓟ ꓐꓯ ꓟ ꓔꓯ ꓣꓳ ꓓꓴ ꓙ ꓠ, ꓟ ꓥ ꓡꓳ꓿
ꓣꓳ ꓦꓲꓻ ꓒ ꓕꓲ ꓗꓪ ꓢꓲ, ꓜꓲ ꓕꓲ ꓜꓲ ꓔꓶ ꓟ ꓠꓬ ꓟꓲ ꓠꓯ ꓔꓯ ꓙꓲ ꓟ ꓚꓱ, ꓗꓪ ꓟꓵꓽ ꓘꓳꓼ ꓔꓯ ꓙꓲ ꓡ ꓝꓲ ꓟ ꓟꓬꓱꓽ ꓔꓯ ꓬꓰ ꓔꓬ ꓟ ꓥ ꓡꓳ꓿
ꓣꓳ ꓔꓬ ꓟ ꓡꓳ ꓒꓱ ꓞꓳ ꓘ, ꓗꓪ ꓑꓶ ꓛꓵꓽ ꓔꓯ ꓮ ꓔꓳ ꓔꓳ ꓟꓽ ꓡꓳꓽ ꓠ, ꓟ ꓝꓮꓲ ꓞꓳ ꓡꓱ ꓐꓴ ꓜꓲꓼ ꓢꓲ, ꓠꓲ ꓙ ꓖꓴ ꓗꓪ ꓙꓳ ꓟ ꓑꓶ. ꓛꓵ ꓔꓯ ꓫ ꓟ ꓟꓬꓱꓽ ꓔꓯ ꓬꓰ ꓐ ꓡ ꓟ ꓥ ꓡꓳ꓿
ꓕꓱ ꓡꓱ ꓐꓰ ꓬꓲꓻ ꓙꓬ ꓐꓰ ꓮ ꓔꓳ ꓙ ꓔꓯ ꓮ ꓔꓳꓽ ꓔꓳꓽ ꓟꓽ ꓗꓷ ꓡꓰ ꓠ, ꓟ ꓤ ꓟꓳ ꓠ, ꓟ ꓥꓡꓳ꓿ ꓣꓳ ꓓꓲ ꓟ ꓟꓬꓱꓽ ꓔꓯ ꓜꓲꓼ ꓗꓷ ꓠꓬ ꓮ ꓘꓶ. ꓛꓲ ꓪꓴꓽ ꓟ ꓟꓬꓱꓽ ꓓ ꓟ ꓒꓬꓱꓼ ꓡ ꓟ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓠꓬ ꓣꓳ ꓔꓬ ꓟ ꓗꓴꓷꓼ ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫ ꓓꓴ ꓟꓷ ꓓꓴ ꓔꓯ ꓔꓳ, ꓜꓳ ꓔꓬ ꓟ ꓥ ꓡꓳ꓿ ꓟꓵꓽ ꓗꓪ ꓢꓲ, ꓜꓲ ꓟꓽ ꓙꓳ ꓗꓷ ꓡꓰ ꓟ ꓪꓴ. ꓠꓬꓲ ꓬꓲꓻ ꓙꓬ ꓟꓽ ꓙꓳ ꓗꓷ ꓡꓰ ꓟ꓾ ꓣꓳ ꓔꓬ ꓟ ꓟꓵꓽ ꓗꓪ ꓟꓽ ꓢꓲꓽ ꓫꓬ ꓡꓰ ꓟ ꓫꓵꓽ ꓪꓴ ꓮ ꓟꓬ ꓙꓳ ꓟ ꓥꓡꓳ꓿
ꓖꓳ ꓡꓱ ꓥ ꓟꓲ ꓣꓳ ꓞꓳ ꓡꓱ ꓐꓴ ꓠꓯ, ꓗꓪ ꓙꓲ ꓟ ꓟꓬꓱꓽ ꓔꓯ ꓬꓰ ꓐ ꓡ ꓟ ꓢꓯꓼ ꓪ ꓙꓳ ꓟ ꓥ ꓡꓳ꓿ ꓟꓲ ꓠꓯ ꓢꓷ. ꓠꓲ, ꓔꓯ ꓢꓳꓻ ꓣꓴ ꓪ ꓟ ꓢꓯꓼ ꓪ꓾ ꓞꓳ ꓡꓱ ꓐꓴ ꓜꓲꓼ ꓢꓲ ꓠꓬꓲ ꓙꓲ ꓟ ꓟꓬꓱꓽ ꓔꓯ ꓬꓰ ꓐ ꓡ ꓟ ꓢꓯꓼ ꓪ ꓙꓳ ꓟ ꓥ ꓡꓳ꓿
ꓪꓮꓠꓖꓮꓣꓲ ꓟꓮꓮꓔꓧꓮꓲ ꓡꓰ ꓣꓳ ꓔꓯ ꓮ ꓡꓲ ꓐꓰ ꓢꓯꓼ ꓖꓶ ꓔꓬ ꓠꓬ ꓐꓯ ꓠꓬ
ꓠꓬꓲ. ꓠꓬꓲ ꓢꓲ, ꓜꓲ ꓕꓲ ꓜꓲ ꓔꓶ ꓢꓲ ꓠꓬꓲ ꓢꓷ. ꓠꓲ, ꓕꓲ ꓫꓵꓽ ꓢꓳꓻ ꓣꓴ꓾
ꓠꓬꓲ. ꓠꓬꓲ ꓣꓳ ꓬꓰ ꓗꓷ ꓟ ꓔꓯ ꓙꓲ ꓟ ꓛꓳ ꓒꓯ, ꓐꓴ ꓔꓯ ꓐꓯ ꓟ. ꓖꓶ ꓐꓰ ꓢꓯꓼ ꓖꓶ ꓔ ꓡꓳ꓿
ꓟꓲ ꓠꓯ ꓔꓯ ꓠꓴ ꓕꓲ ꓣꓳ ꓡꓰ ꓒꓳ ꓡꓶꓽ ꓝꓲ ꓠ ꓟ ꓟꓽ ꓥ꓾ ꓠꓴ ꓬꓰ ꓟ ꓚꓱ, ꓠꓱ. ꓐꓯ ꓢꓴ ꓔꓯ ꓥ ꓟꓲ ꓙꓲ ꓟ ꓟꓬꓱꓽ ꓔꓯ ꓬꓰ ꓝꓲ ꓠ,ꓟ ꓢꓯꓼ ꓪ ꓖꓶ ꓐ ꓡ ꓟ ꓥ ꓡꓳ꓿
ꓚꓧꓮꓠꓖꓰ ꓐꓰꓖꓲꓠꓢ ꓪꓲꓔꓧ ꓳꓠꓰ ꓑꓣꓰꓢꓳꓠ, ꓳꓠꓰ ꓮꓚꓔꓲꓳꓠ ꓮꓠꓓ ꓳꓠꓰ ꓢꓟꓮꓡꓡ ꓢꓔꓰꓑ
ꓞꓳ ꓡꓱ ꓐꓰ ꓣꓳ ꓟ ꓟꓬꓱꓽ ꓗꓪ ꓐꓰ ꓪꓴꓽ ꓔꓴ ꓢꓲꓠꓬꓲ ꓣꓳ ꓔꓬ ꓟ ꓟꓵꓽ ꓕꓯ ꓙꓲ ꓟ ꓗꓴꓷꓼ ꓙꓲ ꓟ ꓟꓵꓽ ꓘꓳꓼ ꓘꓳ, ꓣꓴ ꓪ ꓠ, ꓟ ꓢꓯꓼ ꓕꓵꓼ ꓡꓯ꓿ ꓫ. ꓟꓳ ꓪ꓿
