ꓧꓪ. ꓧꓪ. ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓕꓲ ꓠꓽ ꓠꓬ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓪꓴ‐ꓢ ꓑꓮꓲ ꓥ ꓡꓳ꓿ ꓪꓴ‐ꓢ ꓠꓬ ꓐ, ꓐ꓾ ꓤ ꓔꓲ.꓾ ꓢꓲ‐ꓫꓬ‐ꓟ‐ꓦ ꓕꓱ ꓡꓱ ꓢ ꓣꓳ ꓙꓳˍ ꓥ ꓟꓲ ꓕꓲ ꓖꓳ ꓓꓱꓽˍ ꓡꓰꓽ ꓥ ꓡꓳ꓿ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓪꓴ‐ꓢ ꓐꓰ ꓐꓯˍ ꓟ ꓑꓮꓲ ꓥ ꓡꓳ꓿ ꓣꓳ ꓪꓴ. ꓠꓶ. ꓗꓪ ꓐꓰ꓾ ꓥ ꓠꓬ ꓪꓵ ꓕꓲ. ꓗꓪ ꓐꓰ ꓪꓵˍ ꓠꓬ ꓪꓵ ꓟꓽ ꓠ꓿ ꓕꓲꓽ ꓢ ꓟ ꓑꓳ. ꓗꓷ ꓠꓬ ꓢ ꓓꓳ ꓡˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓪꓴ‐ꓢ ꓠꓬ ꓕꓲꓽ ꓢ ꓟ ꓑꓳ. ꓔ ꓥˍ ꓟꓲ ꓕꓲ ꓟˍ ꓥꓳ ꓐꓯˍ ꓟ ꓣꓳ ꓓꓵꓽ ꓙꓽ ꓟꓶ ꓓꓴ ꓥꓳ꓿ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓪꓴ‐ꓢ ꓕꓲ ꓔꓲ.ˍ ꓪꓴ‐ꓢ꓾ ꓬꓲ ꓪ ꓢ ꓟ ꓠꓬ ꓕꓲ ꓡꓰ, ꓐꓰ ꓓˍ ꓟ ꓣꓳ ꓡꓳ. ꓟꓳˍ ꓡꓳ꓿
ꓣꓳ ꓟꓲ ꓠꓯ ꓞꓳ ꓤ ꓔꓯ ꓚꓰꓼˍ ꓕꓯ ꓬꓲ ꓚꓰ ꓬꓲ ꓪꓴ. ꓕꓳꓽ ꓶ ꓗꓪ ꓣꓳ ꓔꓯ ꓫꓱ.ˍ ꓟ ꓞꓳ ꓤ ꓔꓯ ꓫꓬ, ꓡꓯ꓾ ꓐꓰ ꓫ. ꓕꓱ ꓘꓶꓽ ꓣꓳ ꓑ ꓙꓽˍ ꓡꓳ꓿ ꓖꓳ ꓡꓱ ꓠꓬꓲ ꓪꓴ‐ꓢ ꓠꓬ ꓕꓲ ꓣꓳˍ ꓟꓽ ꓥ꓾ ꓢ ꓣꓳ ꓐꓯˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓟꓲ ꓠꓯ ꓕꓱ ꓟ ꓗꓪ ꓬꓯꓼ ꓡ ꓕꓯ ꓔꓲ ꓔꓲ ꓢꓲꓽ ꓢꓲꓽ ꓡꓰꓽ ꓣꓳ ꓟꓳꓻ ꓡꓰꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓟ. ꓟꓲꓽ ꓚˍ ꓟ ꓗꓪ ꓥˍ ꓟꓲ ꓐ, ꓐ ꓠꓬ ꓕꓱ ꓡꓱ ꓐꓯ ꓝꓲˍ ꓟ꓾ ꓖꓳ ꓡꓱ ꓐꓯ ꓝꓲˍ ꓟ ꓐꓯ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓟ. ꓘꓶ ꓮ ꓟꓬ, ꓐꓰ ꓣꓳ ꓔꓯ ꓟ. ꓖꓶ ꓗꓳ. ꓡꓺꓳ꓿ ꓕꓱ ꓟˍ ꓡꓰ ꓐꓰ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓗꓪ ꓐꓰ ꓥˍ ꓟꓲ ꓠꓴ ꓪ ꓔꓯ ꓢꓷ. ꓙ ꓟꓳ ꓙ ꓡˍ ꓥꓳ꓾ ꓐꓯ ꓢꓲ ꓠꓬꓲ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓙꓳˍ ꓟ ꓪꓴ‐ꓢ ꓔꓯ ꓣꓳ ꓔꓯ ꓬꓲ ꓡꓰ ꓐꓯ ꓟꓳ. ꓖꓶ ꓗꓷꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓓꓵꓽ ꓙꓽ ꓟꓽ ꓐ ꓡ ꓟ ꓕꓱ ꓟ ꓔꓯ ꓠꓬ ꓜꓲꓽ ꓜꓲꓽ ꓑꓰ, ꓑꓰ, ꓐꓰ ꓣꓳ ꓪꓴ. ꓠꓶ. ꓗꓪ ꓐꓰ꓾ ꓣꓳ ꓠꓲ, ꓟ ꓗꓪ ꓐꓰ ꓓꓵꓽ ꓙꓽˍ ꓟ ꓟꓽ ꓥ ꓥ ꓐꓰ ꓚꓵ ꓘꓶꓽ ꓕꓱ ꓟ ꓠꓯꓸꓼ ꓗꓪ ꓢꓯ. ꓔꓬ ꓐ ꓡ ꓠ, ꓟ ꓣꓳ ꓔꓯ ꓠꓬꓲ. ꓠꓬꓲ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓪꓴ‐ꓢ ꓑꓮꓲ ꓗꓪ ꓐꓰ ꓘꓴ ꓔꓬ ꓟ ꓥ ꓡꓳ꓿ ꓕꓱ ꓟ ꓠꓬ ꓣꓳ ꓢꓪ. ꓚꓱ, ꓓꓵꓽ ꓙꓽ ꓚꓱ, ꓔꓯ ꓟꓳ. ꓧꓪ ꓠ, ꓟ꓾ ꓮ ꓡꓲ ꓫꓵꓽ ꓬꓲ. ꓬꓲ ꓢꓲ ꓙꓳˍ ꓟ ꓔꓯ ꓧꓪ ꓠ, ꓟ ꓟꓽ ꓥ ꓥ ꓐꓰ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓠꓯꓸꓼ ꓘꓴꓽ ꓗꓪ ꓞꓳ ꓙꓳ ꓠ, ꓟ꓾ ꓚꓵ ꓘꓶꓽ ꓕꓱ ꓟ ꓠꓯꓸꓼ ꓗꓪ ꓞꓳ ꓙꓳ ꓠ, ꓟ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿ ꓠꓬꓲ. ꓠꓬꓲ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓪꓴ‐ꓢ ꓑꓮꓲ ꓗꓪ ꓐ, ꓐ꓾ ꓤ ꓔꓲ.꓾ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓬꓲ ꓪ ꓠꓬ ꓕꓲ ꓣꓳ ꓛꓳ ꓕꓲ ꓣꓳ ꓠꓲ, ꓠꓵ ꓡꓯ ꓘꓳ ꓢꓲ ꓠꓬꓲ ꓐ, ꓐ ꓐꓰ ꓤ ꓔꓲ. ꓠꓬꓲꓽ ꓗꓴ. ꓚꓸꓼ ꓗꓪ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓔꓬ ꓢꓲ꓾ ꓐ, ꓐ ꓐꓰ ꓤ ꓔꓲ. ꓔꓯ ꓝ. ꓠꓷꓼ ꓖꓶˍ ꓟ ꓠꓬ ꓢꓲ‐ꓫꓬ‐ꓟ‐ꓦ ꓥ ꓡꓳ꓿
