ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓿ ꓢ. ꓠꓯ ꓠꓬ All Saint Day ꓐꓰ ꓐꓯˍ ꓟ ꓙꓲ ꓫꓬ ꓢꓴ ꓮ ꓙꓵꓽ ꓑꓮꓲꓽ ꓔꓯ ꓬꓰ ꓔꓬ ꓟ ꓥ ꓡꓳ꓿ ꓟꓳ. ꓖꓶ ꓓꓴ ꓕꓳꓽ ꓶ 7ꓽ1‐4, 9‐14 ꓗꓪ ꓣꓳ ꓑ ꓙꓽˍ ꓟ ꓡꓰ ꓐꓰ ꓙꓲ ꓫꓬ ꓢꓴ ꓬꓳ‐ꓦ ꓠꓬ ꓬꓲ ꓦ ꓐꓬꓱꓽ ꓟꓳˍ ꓟ ꓔꓯ ꓬꓲ ꓐꓳ ꓔˍ ꓡꓳ꓿ ꓬꓲ ꓠꓬ ꓟꓴ ꓗꓪ ꓗꓪ ꓛꓲ ꓬꓰ ꓕꓯ ꓡ ꓞꓳ ꓬꓲ ꓜꓴ ꓬꓲ ꓟꓯꓼ ꓐꓵꓻ ꓞꓶꓽ ꓒꓴ ꓒꓴ ꓖꓪꓽ ꓔ ꓢꓲ ꓪꓴ‐ꓢ ꓔꓯ ꓫꓱ. ꓖꓶ ꓔꓬ ꓡꓳ꓿ ꓪꓴ‐ꓢ ꓔꓯ ꓓꓳ ꓟꓴ ꓔꓬ ꓡꓳ꓿ ꓡ ꓞꓳ ꓕꓱ ꓕꓷ, ꓠꓬ ꓮꓽ ꓟ ꓥ ꓡ ꓐꓰ ꓬꓲ ꓠ ꓠꓬꓲˍ ꓕꓯ ꓬꓲ ꓔꓯ ꓒꓳ, ꓖꓶ ꓢꓴ ꓡ ꓞꓳ ꓖꓳ ꓕꓲ ꓣꓳ ꓟ ꓠꓬ꓾ ꓡ ꓞꓳ ꓕꓱ ꓕꓷ, ꓠꓬ ꓬꓲ ꓪ ꓠꓲ, ꓫ ꓟꓬ ꓫˍ ꓕꓯ ꓬꓲ ꓪ ꓠꓬ ꓫ. ꓙꓵ ꓟꓷꓼ ꓙꓵ ꓢꓴ ꓠꓲ, ꓫ. ꓓꓴ ꓔꓯ ꓘꓳ ꓗꓳ. ꓙꓰ ꓢꓴ꓾ ꓮ ꓣꓳ ꓤ ꓬꓲ ꓫꓵꓽ ꓗꓪ ꓔꓲ, ꓗꓷ ꓢꓲ ꓠꓬꓲ ꓞꓲꓽ ꓫꓬ ꓗꓷ ꓢꓴ ꓥ꓾ ꓐꓰ ꓒꓳ, ꓖꓶˍ ꓡꓳ꓿ ꓕꓱ ꓟ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓙꓲ ꓫꓬ ꓢꓴ ꓮ ꓟꓬ, ꓛꓲ ꓬꓰꓳ꓿ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓢꓴ ꓮ ꓟꓬ, ꓙꓳˍ ꓡꓳ ꓐꓯˍ ꓟ ꓠꓬꓲ. ꓠꓬꓲ ꓣꓳ ꓢꓷ. ꓡꓰ ꓓꓴ ꓥ ꓡꓳ꓿
ꓖꓳ ꓡꓱ ꓠꓬꓲ ꓢ. ꓠꓯ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓢꓴ ꓮ ꓙꓵꓽ ꓟ ꓑꓮꓲꓽ All Saints Day ꓐꓯˍ ꓟ ꓔꓯ ꓣꓳ ꓬꓰ ꓔꓬ ꓟ ꓥ ꓡꓳ꓿ ꓖꓳ ꓟ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓔꓬ ꓟ ꓙꓲ ꓫꓬ ꓢꓴ ꓐꓰ ꓣꓳ ꓐꓯˍ ꓕꓯ ꓣꓳ ꓟꓬ ꓢꓶꓽ ꓗꓪ ꓟꓳˍ ꓟ ꓠꓬ ꓮ ꓘꓶ. ꓢꓲꓽ ꓫꓬˍ ꓫꓵꓽ꓾ ꓮ ꓘꓶ. ꓙꓲ ꓫꓬˍ ꓫꓵꓽ꓾ ꓕꓲ ꓠꓬꓲ ꓕꓲ ꓠꓬꓲ ꓠꓯꓼ ꓠꓯꓼ ꓔꓴ ꓡ ꓗꓪ ꓚꓳ. ꓟꓶ ꓘꓶ ꓟꓰ ꓡ ꓗꓪ ꓛꓲ ꓪꓽ ꓘꓴ ꓦꓲ ꓗꓪ ꓙꓰ ꓢꓲ ꓪꓽ ꓘꓴ ꓔꓬ ꓢꓴ ꓙꓲˍ ꓟ ꓬꓰ ꓔꓬ ꓢꓴ꓾ ꓕꓰ ꓡꓰ ꓐꓰ ꓣꓳꓽ ꓢꓷ. ꓪˍ ꓥꓳ꓿ ꓖꓳ ꓡꓱ ꓥ ꓟꓲ ꓚꓵ ꓚꓵ ꓢꓲꓽ ꓫꓬ ꓢꓴ ꓐꓯˍ ꓟ ꓠꓬ ꓮ ꓡꓲ ꓫꓵꓽ ꓥ꓾ ꓐꓯˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳꓽ ꓫꓬꓽ ꓫꓬꓽ ꓡꓰꓽ ꓟꓳ ꓓˍ ꓡꓳ꓿
ꓣꓳ ꓢꓷ.ˍ ꓟ ꓠꓬ ꓙꓲ ꓫꓬ ꓢꓴ ꓒꓳ‐ꓡꓳ꓾ ꓙꓲ ꓫꓬ ꓢꓴ ꓒꓲ‐ꓕꓱ꓾ ꓙꓲ ꓫꓬ ꓢꓴ ꓟ‐ꓡꓲ‐ꓬ ꓟ‐ꓓ‐ꓡꓰ‐ꓠ꓾ ꓙꓲ ꓫꓬ ꓢꓴ ꓕ‐ꓣꓰ‐ꓤ꓾ ꓕꓱ ꓡꓱ ꓐꓰˍ ꓡꓰꓽ ꓢꓷ. ꓔˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓥˍ ꓟꓲ ꓣꓳ ꓟꓽ ꓢꓷ. ꓡꓰ ꓫꓵꓽ꓾ ꓪꓴ‐ꓢ ꓡꓰꓽ ꓢꓷ.ˍ ꓟ ꓢꓲꓽ ꓫꓬ ꓢꓴ ꓮ ꓟꓬ, ꓙꓳˍ ꓡꓳ ꓐꓯˍ ꓟ ꓣꓳ ꓢꓷ. ꓠ ꓗ, ꓡꓳ꓿ ꓮ ꓡꓲꓳ ꓐꓯˍ ꓠꓬ ꓣꓳ ꓠꓬ ꓟꓬ ꓢꓶꓽ ꓟꓳˍ ꓟ ꓔꓯ ꓡꓰꓽ ꓢꓷ.ˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓚꓳ ꓡꓳ ꓚꓳ ꓫꓵ ꓗꓪ ꓚꓳ. ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓫꓵꓽ ꓮ ꓟꓬ, ꓙꓳˍ ꓡꓳ ꓐꓯˍ ꓟ ꓑꓮꓲꓽ ꓕꓱ ꓟ ꓔꓯ ꓬꓰˍ ꓟ ꓗꓪ ꓐꓰ ꓣꓳ ꓔꓯ ꓢꓷ. ꓡꓰ ꓝꓲˍ ꓡꓳ꓿
ꓖꓳ ꓡꓱ ꓠꓬꓲ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓢꓴ ꓑꓮꓲꓽ ꓣꓳ ꓬꓰˍ ꓟ ꓗꓪ ꓐꓰ ꓣꓳ ꓥˍ ꓟꓲ ꓣꓳ ꓪ ꓡꓰ ꓐꓰ ꓢꓯꓼ ꓕꓵꓼ ꓠ, ꓟ꓾ ꓬꓲ ꓪˍ ꓡꓰ ꓐꓰ ꓪꓴ‐ꓢ ꓔꓯ ꓦ ꓡꓱ ꓠ, ꓟ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓓꓵ,ˍ ꓟ ꓡꓰ ꓐꓰ ꓫ. ꓙꓵ ꓟꓷꓼ ꓙꓵ ꓓꓴ ꓔꓳ, ꓜꓳꓽˍ ꓕꓯ꓾ ꓘꓶꓻ ꓡꓶ ꓓꓴ ꓔꓯ ꓣꓳ ꓗꓳ. ꓘꓳˍ ꓕꓯ ꓠꓲ, ꓟ ꓟꓽ ꓙꓬ ꓡꓰ ꓡꓰ ꓐꓰ ꓣꓳ ꓪꓴ‐ꓢ ꓔꓯ ꓡꓰꓽ ꓪꓳ ꓔ ꓢꓲ ꓠꓬꓲ ꓮ ꓣꓳ ꓤ ꓬꓲ ꓫꓵꓽ ꓥ ꓟ ꓪꓴ‐ꓢ ꓠꓯꓸꓼ ꓘꓴꓽ ꓗꓪ ꓢꓲ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓘꓳ ꓣꓴ ꓢꓲ ꓠꓬꓲ꓾ ꓧꓪ. ꓧꓪ. ꓡꓰꓽ ꓔꓼ ꓝꓲ ꓙꓳ ꓙꓳˍ ꓡꓰꓽ ꓘꓳ. ꓧꓳꓽ ꓖꓶ ꓡˍ ꓟ ꓣꓱꓽ ꓛꓰꓽ ꓣꓳ ꓟꓶ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓠ, ꓟ ꓥ ꓡꓳ꓿
ꓖꓳ ꓡꓰ ꓠꓬꓲ ꓟꓴ ꓗꓪ ꓗꓴꓷꓼ ꓗꓪ ꓮ ꓡꓲ ꓛꓲ ꓬꓰˍ ꓡ ꓐꓰ ꓣꓳ ꓡꓳ. ꓠꓬꓲˍ ꓕꓯ ꓢ. ꓠꓯ ꓣꓳ ꓠ ꓠ, ꓠ ꓔˍ ꓟ ꓟ‐ꓕꓲ 5ꓽ1‐12 ꓗꓪ ꓣꓳ ꓑ ꓙꓽˍ ꓟ ꓐꓰ ꓕꓲ ꓡꓰ, ꓐꓰ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓠꓲ, ꓥꓴꓻ ꓔꓬ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓫ. ꓢꓴ ꓟꓷ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓠꓲ, ꓟ ꓠꓴꓽ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓟꓶ ꓦꓰꓼ ꓟꓷꓼ ꓔꓬ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ ꓐꓰ ꓐꓯ ꓢꓲ ꓠꓬꓲ ꓬꓲ ꓠꓬ ꓶꓼ ꓘꓶꓽ ꓫꓱ, ꓘꓶꓽ 8 ꓟ ꓔꓯ ꓬꓲ ꓡꓰ ꓐꓯ ꓟ. ꓖꓶ ꓔˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓮ ꓡꓲ ꓛꓲ ꓬꓰˍ ꓡ ꓐꓯˍ ꓟ ꓚꓱ, ꓣꓳ ꓔꓯ ꓐꓯ ꓟ. ꓖꓶ ꓔꓲ.ꓳ꓿ ꓬꓲ ꓚꓲ. ꓛꓬ ꓥ ꓟꓲ ꓖꓳ ꓗꓪ ꓫꓱꓽ ꓙ ꓙꓰꓳ꓿
ꓢꓲ ꓒ ꓬꓰ‐ꓢꓴ ꓬꓲ ꓶꓼ ꓘꓶ ꓫꓱ, ꓘꓶ꓾ ꓢꓲ ꓒ ꓬꓰ‐ꓢꓴ ꓬꓲ ꓗ, ꓛꓲꓽ ꓓꓴ ꓚꓵ ꓘꓶꓽ ꓕꓱ ꓟ ꓠꓬ ꓟꓲ ꓠꓯ ꓞꓳ ꓤ ꓕꓲ ꓒꓳ, ꓗꓪ ꓐꓰ ꓡꓳ. ꓠꓬꓲˍ ꓠꓬ ꓮ ꓡꓲ ꓫꓵꓽ ꓥ ꓟꓽ ꓢꓷ. ꓐꓰ ꓓꓵꓽ ꓙꓽ ꓓꓴ ꓥ ꓡꓳ꓿ ꓮʼ ꓡꓰ ꓓꓴ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓰ ꓐꓯˍ ꓠꓬ ꓠꓲ, ꓟ ꓠꓴꓽ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓾ ꓫ. ꓙꓵ ꓟꓷ ꓙꓵ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ ꓐꓰ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓣꓳ ꓔꓯ ꓫ. ꓠ, ꓟ ꓐꓱ ꓶ ꓮ ꓫꓵꓽ ꓟꓬꓱꓽ ꓟꓽ ꓬꓰ ꓠ, ꓟ ꓐꓯˍ ꓫꓵꓽ ꓟꓽ ꓥ꓿ ꓠꓻ ꓓꓴ ꓑ ꓔꓯ ꓑ, ꓬꓲ ꓠꓲ ꓧꓪ ꓠ, ꓟ ꓐꓱ ꓶ ꓐꓯˍ ꓟ ꓟꓽ ꓥ꓿ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓕꓯ ꓫ. ꓙꓵ ꓟꓷ ꓙꓵ ꓓꓴ ꓠꓬ ꓔꓳ, ꓜꓳꓽˍ ꓥꓳ꓿ ꓟꓲꓽ ꓦꓲ ꓕꓳꓽ ꓥꓳꓽ ꓥˍ ꓟꓲ ꓣꓳ ꓔꓳ, ꓜꓳꓽ ꓪˍ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓠꓲ, ꓟ ꓟꓽ ꓙꓬ ꓙꓬ ꓪꓴ‐ꓢ ꓔꓯ ꓡꓰꓽ ꓪꓳ ꓔ ꓢꓲ ꓠꓬꓲ ꓘꓳ ꓗꓳ. ꓙꓰˍ ꓥꓳ꓾ ꓥꓪ ꓔꓳ, ꓜꓳꓽˍ ꓟ ꓫ. ꓙꓵ ꓟꓷ ꓙꓵ ꓓꓴ ꓠꓬ ꓪꓴ‐ꓢ ꓔꓯ ꓥꓪ ꓦ ꓡꓱˍ ꓕꓯ ꓮ ꓙꓵꓽ ꓟꓶ ꓬꓰˍ ꓥꓳ ꓐꓯˍ ꓟ ꓙꓵꓻ ꓠꓲ, ꓕꓱ ꓟ ꓔꓯ ꓣꓳ ꓟꓶ ꓠ, ꓟ ꓐꓱ ꓶ ꓢꓲ ꓒ ꓬꓰ‐ꓢꓴ ꓐꓯˍ ꓟ ꓥ ꓡꓳ꓿
