ꓗꓯ‐ꓢ‐ꓔꓯ ꓖꓯ‐ꓓꓳꓡ꓾ꓒꓳ (Castel Gandolfo) ꓦꓲꓻ ꓠꓱ ꓫꓳ. ꓟ. ꓗꓪ ꓬꓰˍ ꓟ ꓫ. ꓕꓱ ꓓꓴ ꓓꓽ ꓟ ꓗꓪ ꓔꓲꓺ ꓒ ꓪ ꓔꓲ. ꓡꓰꓳ (14) ꓡꓰ ꓟꓲ ꓠꓯ ꓔꓯ ꓬꓳ. ꓚꓵˍ ꓟ ꓓꓳꓽ ꓕꓲ ꓐꓱ ꓔꓯ ꓐꓯ ꓖꓶ ꓗꓷꓳ꓿
ꓟꓬꓱꓽ ꓠꓬꓲ ꓬꓳ. ꓚꓵˍ ꓟ (3) ꓚꓱ, ꓔꓯ ꓐꓯ ꓪˍ ꓠꓬ꓾
ꓖ‐ꓜ ꓐꓱ ꓶ ꓫꓱ. ꓤ ꓟꓬꓱꓽ ꓮ ꓟꓬ, ꓣꓱꓽ ꓞ, ꓔꓬ ꓡꓳ꓾
ꓖ‐ꓜ ꓗꓪ ꓔꓬ ꓟ ꓑ ꓫꓬ ꓐꓴ ꓔꓳ, ꓜꓳꓽ ꓔꓬ ꓟ ꓫ. ꓙꓵ ꓓꓴ ꓐꓱ ꓶ ꓮ ꓟꓬ, ꓠꓲ, ꓟ ꓫ. ꓔꓬ ꓪˍ ꓟ ꓐꓰ ꓬꓰ ꓙ ꓔꓳ, ꓙˍ ꓟ ꓠꓬ ꓮ ꓟꓶ ꓗꓪ ꓛꓲ ꓮ ꓟꓬ, ꓟꓽ ꓙꓳ ꓡꓰ ꓢꓰꓽ ꓟ ꓑꓶ. ꓓꓴ ꓬꓲ ꓡꓰ ꓠꓲ, ꓟ ꓫ. ꓔꓬ ꓟ ꓔꓯ ꓐꓯ ꓗꓷꓳ꓿ “ꓕꓱ ꓟ ꓠꓬ ꓘꓴ ꓔꓬ ꓟ ꓡꓰꓽ ꓟꓽ ꓥ꓾ ꓙꓵꓽ ꓪ ꓙꓳ ꓢꓴ ꓮ ꓙꓵꓽ ꓠꓬ ꓖ‐ꓜ ꓑ ꓫꓬꓼ ꓐꓴ ꓔꓯ ꓬꓰ ꓙ ꓠ, ꓟ ꓐꓰ ꓝꓮꓲ ꓫꓬ, ꓜꓶˍ ꓟ ꓟꓬꓱꓽ ꓬꓰ ꓠ, ꓟ ꓚꓵ ꓚꓵ ꓓꓰꓽ ꓔꓬ ꓟ ꓓꓰꓽ ꓘꓶꓽ ꓥ ꓡꓳ” ꓐꓰ ꓐꓯˍ ꓡꓳ꓿ ꓖꓳ ꓟ ꓡꓰꓽ ꓟꓽ ꓞꓲ ꓮ ꓡꓲ ꓕꓲ ꓛꓱꓽ ꓗꓪ ꓐꓰ ꓥˍ ꓟꓲ ꓟꓽ ꓓꓻ ꓟꓽ ꓞꓽ ꓬꓰˍ ꓟ ꓠꓬ ꓒꓳ, ꓖꓶ ꓓꓴ ꓕꓲ ꓟ ꓟꓽ ꓥ꓾ ꓞꓳ ꓤ ꓮ ꓙꓵꓽ ꓪꓺ ꓙꓵꓽ ꓪ ꓔꓯ ꓒꓵꓽ ꓗ ꓬꓰ ꓢꓲ ꓖꓪ ꓙꓱ ꓡꓯ ꓘꓳˍ ꓟ ꓚꓱ, ꓗꓪ ꓐꓰˍ ꓡꓰꓽ ꓫꓬ, ꓔꓱ, ꓐ ꓡˍ ꓟ ꓥ ꓡꓳ꓾ ꓐꓰ ꓬꓲ ꓡꓰ ꓡꓲꓽ ꓡꓲꓽ ꓡꓰꓽ ꓐꓯ ꓖꓶ ꓗꓷꓳ꓿
ꓐꓳꓽ ꓡꓽ ꓛꓴ. ꓫꓺ ꓗꓷˍ ꓟ ꓮꓲ ꓔꓯ ꓫꓬ, ꓔꓶ ꓠ, ꓟ
ꓮ ꓟꓶ ꓦꓬꓼ ꓠꓬꓲ ꓡꓰ‐ꓐꓯ‐ꓠꓷ ꓐꓰ ꓕꓲ ꓪꓽ ꓢꓰꓼ ꓡꓯ ꓘꓳˍ ꓟ ꓗꓪ ꓞꓳ ꓤ ꓢꓯꓼ ꓟꓬ ꓔꓯ ꓟꓽ ꓫꓱ. ꓤ ꓤ ꓐꓰ꓾ ꓟꓴ ꓓꓯꓻ ꓡ ꓔꓬ ꓟ ꓢꓷ. ꓠꓲ, ꓚꓱ, ꓮꓲ ꓔꓯ ꓣꓱꓽ ꓢꓲ ꓢꓰꓼ ꓡꓯ ꓘꓳ ꓔꓬ ꓟ ꓔꓯ ꓔꓲꓺ ꓒ ꓪ ꓔꓲ. ꓡꓰ ꓙꓳꓺ ꓗꓽ ꓖꓶ ꓗꓷꓳ꓿ ꓓꓵꓽ ꓙꓽ ꓞꓷ, ꓟ ꓗꓪ ꓞꓳ ꓤ ꓢꓯꓼ ꓟꓬ ꓔꓯ ꓡꓳ ꓒꓰ, ꓔˍ ꓟ ꓢꓷ. ꓠꓲ, ꓟꓽ ꓒꓬꓱꓼ ꓡꓰ ꓝꓲ ꓝꓲ ꓐꓰ꓾ ꓢꓰꓼ ꓡꓯ ꓘꓳˍ ꓟ ꓗꓪ ꓮꓲ ꓔꓯ ꓟꓽ ꓣꓱꓽ ꓣꓱꓽ “ꓐꓳꓽ ꓡꓽ ꓛꓴ. ꓣꓴ ꓦ ꓔˍ ꓟ ꓢꓷ. ꓠꓲ, ꓮꓲ (Disarmed AI)” ꓒꓬꓱꓼ ꓡ ꓠ ꓔˍ ꓡꓳ꓾ ꓐꓰ ꓐꓯ ꓗꓷ ꓟ ꓥ ꓡꓳ꓿
ꓙꓼ ꓢꓷ. ꓠꓲ, ꓗꓳ‐ꓑ‐ꓠꓲ Anthropic ꓐꓰ ꓦꓮꓔꓲꓚꓮꓠ ꓐꓴ ꓙ ꓡꓯ ꓘꓳˍ ꓟ
ꓡ ꓠ, ꓟ ꓮꓲ ꓢꓷ. ꓠꓲ, ꓠꓬ ꓞꓳ ꓫꓵꓽ ꓐꓴ ꓐꓱ ꓶ ꓙꓲꓻ ꓖꓴ ꓙꓳ ꓠ, ꓟ ꓐꓰ ꓙꓵꓻ ꓠꓲ, ꓚꓱ, ꓐꓰ ꓙꓼ ꓢꓷ. ꓠꓲ, ꓚꓱ, ꓮ ꓡꓲ ꓐꓰ ꓙ ꓡꓯ ꓘꓳ ꓠ ꓗ, ꓡ꓿ ꓔꓲꓺ ꓒ ꓪ ꓔꓲ. ꓬꓲ ꓕꓳꓽ ꓶ ꓡꓳ, ꓬꓰˍ ꓟ ꓗꓪ ꓦꓮꓔꓲꓚꓮꓠ ꓞꓳ ꓤ ꓪꓴꓽ ꓡ ꓟꓴ ꓡ ꓠ, ꓟ ꓛꓵꓽ ꓔꓴˍ ꓟ ꓟꓬꓱꓽ ꓬꓰ ꓜꓴ ꓠꓬ ꓟꓬꓱꓽ ꓓꓳ ꓪꓴꓽˍ ꓟ ꓮꓲ ꓗꓳ‐ꓑ‐ꓠꓲ ꓕꓲ ꓟ ꓥ ꓟ Anthropic ꓐꓰ ꓜꓲ ꓡꓯ ꓘꓳ ꓢꓲ ꓖꓪ ꓙꓱ ꓡꓯ ꓘꓳ ꓢꓲ ꓠꓬꓲ꓾ ꓙ ꓡꓯ ꓘꓳ ꓢꓲ ꓟꓬꓱꓽ ꓬꓰ ꓔꓬ ꓟ ꓥ ꓡꓳ꓾ ꓐꓰ ꓐꓯ ꓑꓶ ꓗꓷꓳ꓿
“ꓟꓽ ꓓꓻ ꓟꓽ ꓞꓽ ꓬꓰˍ ꓟ ꓠꓬ ꓮ ꓡꓲ ꓕꓲ ꓛꓱꓽ ꓗꓪ ꓐꓰ ꓡˍ ꓥ ꓟꓲ ꓞꓳ ꓤ ꓐꓴ ꓐꓱ ꓶ ꓙꓲꓻ ꓖꓴ ꓟꓽ ꓙꓳ ꓟ ꓥ ꓡꓳ꓿ ꓟꓽ ꓧꓳ, ꓡꓯ ꓓꓴ ꓘꓳ ꓛꓴꓽ ꓙꓳ ꓓꓴ ꓔꓯˍ ꓡꓰꓽ ꓟꓬꓽ ꓡ ꓝꓲˍ ꓡꓳ꓿ ꓣꓳ ꓠꓬ ꓖꓪ ꓙꓱ ꓡꓯ ꓘꓳˍ ꓟ ꓚꓱ, ꓗꓪ ꓡꓰꓽ ꓚꓱ, ꓬꓲꓼ ꓙꓰ ꓠ ꓗ, ꓡꓳ” ꓐꓰ ꓔꓲꓺ ꓒ ꓪ ꓔꓲ. ꓡꓰꓳ (14) ꓡꓰ ꓐꓯ ꓗꓷ ꓟ ꓥ ꓡꓳ꓿
#VaticanNews
