Olympic ꓡꓯ ꓫꓴ ꓪ ꓢꓴ ꓟꓬꓱꓺ ꓓꓳꓽ ꓙꓳ ꓢꓴ ꓢꓗꓬ ꓐꓣꓳꓪꓠ ꓚꓺ ꓟꓲꓽ (Sky Brown)
ꓧꓪ. ꓧꓪ ꓠꓬꓲ. ꓠꓬꓲ ꓟꓬꓱꓺ ꓓꓳꓽ ꓙꓳ ꓢꓴ ꓐꓴ ꓚꓺ ꓟꓲꓽ ꓚꓱ, ꓗꓪ ꓐꓰ ꓳꓡꓬꓟꓑꓲꓚ ꓡꓯ ꓫꓴ ꓪ ꓢꓴ ꓢꓗꓬꓐꓳꓮꓔ ꓤꓶꓻ ꓟ ꓗꓪ ꓮ ꓘꓶ. ꓓꓽ ꓢꓴ ꓢꓗꓬ ꓐꓣꓳꓪꓠ ꓚꓺ ꓟꓲ ꓔꓯ ꓚꓺ ꓟ. ꓖꓶ ꓓꓴ ꓥ ꓡꓳ꓿
ꓢꓗꓬ ꓐꓣꓳꓪꓠ ꓠꓬ (17) ꓘꓳꓼ ꓙꓳ ꓥ ꓟꓲ ꓟꓲ ꓠꓯ ꓡ ꓞꓳ ꓐꓴ ꓬꓲ ꓔꓯ ꓟꓬꓱꓺ ꓓꓳꓽ ꓖꓶ ꓟ ꓔꓯ ꓘꓳ, ꓣꓴ ꓪ ꓢꓴ ꓞꓳ ꓡꓱ ꓜ ꓕꓲ ꓣꓳ ꓥ ꓡꓳ꓿
ꓞꓲꓼ ꓣꓳ ꓟ ꓠꓬ ꓫꓵꓽ ꓪꓴꓽ ꓟꓽ ꓥ ꓟ ꓔꓯ ꓟ. ꓖꓶ ꓢꓴ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓮ ꓙꓵꓽ ꓢꓴ ꓣꓳ ꓤꓶꓻ ꓠꓯ, ꓗꓪ ꓓꓴ ꓙ ꓥꓳꓽ ꓡꓳ. ꓔ ꓟ ꓮ ꓟꓬ, ꓫꓵꓽ ꓙꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓕꓱ ꓡꓱ ꓫꓵꓽ ꓔꓯ ꓒꓬꓱꓼ ꓡ ꓠ, ꓟ ꓬꓲ ꓙꓵ, ꓔꓯ ꓡꓳ. ꓔꓬ ꓡꓳ ꓐꓰ ꓣꓳ ꓓꓴ ꓙ ꓗꓴ ꓟ ꓙꓳ ꓟ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓢꓗꓬ ꓐꓣꓳꓪꓠ ꓡꓰ ꓣꓳ ꓔꓯ ꓮ ꓡꓲ ꓐꓰ ꓬꓰ ꓠꓯ, ꓟ ꓔꓯ ꓐꓯ ꓟ. ꓖꓶ ꓡ ꓟ ꓙꓳ ꓟ ꓥ ꓡꓳ꓿
ꓢꓗꓬ ꓐꓣꓳꓪꓠ ꓠꓬ ꓞꓲꓼ ꓣꓳ ꓟ ꓠꓬ ꓮ ꓘꓶ. ꓛꓲ ꓪꓴꓽ ꓟ ꓟꓬꓱꓽ ꓔꓯ ꓬꓰ ꓠ, ꓟ ꓫꓵꓽ ꓪꓴꓽ ꓟꓽ ꓥ ꓚꓱ, ꓔꓯ ꓟ. ꓖꓶ ꓢꓴ ꓥ ꓡꓳ꓿ ꓬꓲ ꓠꓬ (17) ꓘꓳꓼ ꓙꓳ ꓥ ꓟꓲ ꓳꓡꓬꓟꓑꓲꓚ ꓡꓳ ꓖꓪ ꓑꓮꓲꓽ ꓓꓽ ꓗꓪ ꓐꓰ ꓡꓯ ꓫꓴ ꓓꓽ ꓘꓳ, ꓣꓴ ꓪ ꓢꓴ ꓥ ꓡꓳ꓿ ꓬꓲ ꓠꓬ ꓳꓬꓟꓑꓲꓚ ꓡꓳ ꓖꓪ ꓢꓴ ꓞꓳ ꓡꓱ ꓐꓴ ꓠꓯ, ꓗꓪ ꓮ ꓘꓶ. ꓛꓲ ꓔꓯꓺ ꓢꓳ ꓓꓴ ꓕꓲ ꓣꓳ ꓥ ꓡꓳ꓿
ꓬꓲ ꓮ ꓡꓲ ꓐꓰ ꓢꓯꓼ ꓕꓵꓼ ꓗꓳ. ꓡ ꓟ ꓚꓱ,
ꓢꓗꓬ ꓐꓣꓳꓪꓠ ꓔꓯ (2008) ꓘꓳꓼ ꓕꓯ ꓒꓬꓱꓼ ꓟꓳ ꓗꓷꓳ꓿ ꓬꓲ ꓞꓲꓼ (3) ꓘꓳꓼ ꓙꓳ ꓟ ꓙꓵ, ꓕꓯ ꓓꓽ ꓪꓴ ꓢꓗꓬ ꓐꓳꓮꓔ ꓔꓯ ꓗ ꓗꓷ ꓟ ꓥ ꓡꓳ꓿
ꓬꓲ ꓔꓯ ꓢꓗꓬ ꓐꓳꓮꓔ ꓡꓳ ꓖꓪ ꓠ, ꓟ ꓐꓱ ꓶ ꓬꓲ ꓔꓯ ꓮ ꓡꓲ ꓟ ꓥ ꓟꓲ ꓟ. ꓖꓶ ꓢꓴ ꓟꓽ ꓔꓬ꓿ ꓬꓲ ꓠꓬ ꓚꓲ. ꓛꓬ ꓬꓴꓔꓴꓓꓰ ꓗꓪ ꓮ ꓡꓲ ꓗ ꓠꓬ ꓠ, ꓟ ꓔꓯ ꓡꓳ ꓢꓲ ꓠꓬꓲ ꓡꓳ ꓖꓪ ꓗꓷ ꓟ ꓥ ꓡꓳ꓿
ꓬꓲ ꓠꓬ ꓮ ꓘꓶ. ꓛꓲ ꓢꓯꓼ ꓕꓵꓼ ꓟ ꓪꓴ. ꓠꓬꓲ ꓬꓲ ꓞꓲꓼ (13) ꓘꓳꓼ ꓙꓳ ꓡꓰ ꓟ ꓙꓵ, ꓕꓯ (ꓙꓮꓑꓮꓠ ꓗꓴꓷꓼ ꓔꓳꓗꓬꓳ) ꓡꓳ ꓒꓱ ꓗꓪ ꓐꓲꓔꓲꓠ ꓗꓴꓷꓼ ꓐꓱ ꓶ ꓢꓗꓬꓐꓳꓮꓔ ꓡꓳ ꓖꓪ ꓔꓯꓺ ꓗꓷ ꓢꓲ ꓠꓬꓬꓲ ꓬꓲ ꓠꓬ ꓡꓯꓼ ꓫꓴ ꓓꓽ ꓔꓯ ꓘꓳ, ꓣꓴ ꓪ ꓗꓷ ꓟ ꓥ ꓡꓳ꓿
ꓬꓲ ꓠꓬ ꓐꓲ ꓔꓲ ꓗꓴꓷꓼ ꓗꓪ ꓐꓰ ꓳꓡꓬꓟꓑꓲꓚ ꓡꓳ ꓖꓪ ꓑꓮꓲꓽ ꓗꓪ ꓞꓲꓼ ꓣꓳ ꓓꓲ ꓢꓴ ꓡꓯꓼ ꓫꓴ ꓪ ꓢꓴ ꓒꓬꓱꓼ ꓡ ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓬꓲ ꓠꓬ 2024 ꓘꓳꓼ ꓐꓲ ꓔꓲ ꓗꓴꓷꓼ ꓗꓪ ꓬꓰ ꓗꓷ ꓟ ꓳꓬꓟꓑꓲꓚ ꓑꓮꓲꓽ ꓗꓪ ꓥ ꓟꓲ ꓬꓲ ꓞꓲꓼ (16) ꓘꓳꓼ ꓙꓳ ꓡꓰ ꓟ ꓙꓵ, ꓕꓯ ꓡꓯ ꓫꓴ (3) ꓟ ꓘꓳ, ꓣꓴ ꓟꓥ ꓡꓳ꓿ ꓕꓱ ꓡꓰ ꓐꓰ ꓬꓲ ꓠꓬ ꓟꓲ ꓠꓯ ꓮ ꓘꓶ. ꓛꓲ ꓓꓽ ꓟ ꓞꓳ ꓡꓱ ꓤ ꓕꓲ ꓣꓳ ꓒꓬꓱꓼ ꓡ ꓟ ꓥ ꓡꓳ꓿
ꓫ. ꓓꓴ ꓟꓷ ꓓꓴ ꓔꓯ ꓮ ꓡꓲ ꓐꓰ ꓧꓪ. ꓡꓰ ꓟ ꓚꓱ,
ꓢꓗꓬ ꓐꓣꓳꓪꓠ ꓐꓱ ꓶ ꓬꓲ ꓤꓶꓻ ꓗꓪ ꓢꓽ ꓢꓽ ꓡꓰ ꓡꓯ ꓫꓴ ꓔꓯ ꓘꓳ, ꓣꓴ ꓪ ꓢꓴ ꓟꓽ ꓥ꓿ ꓬꓲ ꓠꓬ ꓳꓡꓬꓑꓲꓚ ꓡꓳ ꓖꓪ ꓑꓮꓲꓽ ꓓꓽ ꓟ ꓛꓲ ꓢꓲ ꓧꓶ. ꓕꓯ ꓢꓗꓬ ꓐꓳꓮꓔ ꓡꓳ ꓖꓪ ꓗꓷ ꓟ ꓪꓴ. ꓠꓬꓲ ꓬꓲ ꓪꓴ. ꓔꓴ ꓗꓪ ꓑꓶ ꓡꓰ ꓟ ꓥ ꓡꓳ꓿ ꓝꓮꓲ ꓡꓯꓼ ꓒꓯ, ꓠꓻ ꓓꓴ ꓡꓰ ꓟ ꓥ ꓡꓳ꓿ ꓮ ꓘꓶ. ꓛꓲ ꓠꓻ ꓓꓴ ꓓꓽ ꓔꓳ, ꓜꓳ ꓓꓴ ꓙꓳ ꓡꓰ ꓟ ꓥ ꓡꓳ꓿
ꓬꓲ ꓠꓬ ꓕꓱ ꓟꓬ, ꓛꓲ ꓠꓻ ꓓꓴ ꓓꓽ ꓔꓳ, ꓜꓳ ꓥ ꓟꓲ ꓟꓽ ꓙꓳꓺ ꓙꓳꓺ ꓝꓮꓲ ꓠꓬꓲ ꓮ ꓕꓯ ꓥ ꓟꓲ ꓢꓯꓼ ꓕꓵꓼ ꓢꓲ ꓠꓬꓲ ꓢꓗꓬ ꓐꓳꓮꓔ ꓡꓳ ꓖꓪ ꓗꓷ ꓟ ꓪꓴ. ꓠꓬꓲ ꓟꓲ ꓠꓯ ꓗꓪ ꓮ ꓘꓶ. ꓛꓲ ꓓ ꓢꓴ ꓕꓲ ꓣꓳ ꓥ ꓟꓲ ꓔꓯ ꓟ. ꓖꓶ ꓗꓷ ꓟ ꓥ ꓡꓳ꓿
ꓕꓱ ꓡꓱ ꓐꓰ ꓠꓲ, ꓫ. ꓟꓬ, ꓫ ꓓꓴ ꓮ ꓘꓶ. ꓛꓲ ꓔꓳ, ꓜꓳ ꓥ ꓟꓲ ꓬꓲ ꓠꓬ ꓠꓲ, ꓟ ꓟꓽ ꓐꓬ ꓡꓰ ꓢꓯꓼ ꓕꓵꓼ ꓗꓷ ꓟ ꓪꓴ. ꓠꓬꓲ ꓧꓪ. ꓡꓰ ꓟ ꓔꓯ ꓘꓳ, ꓣꓴ ꓪ ꓟ ꓥ ꓡꓳ꓿
ꓞꓳ ꓡꓱ ꓞꓳ ꓡꓯ. ꓐꓴ ꓢꓗꓬ ꓐꓣꓳꓪꓠ ꓠꓯ, ꓗꓪ ꓐꓰ ꓣꓳ ꓮ ꓫꓵꓽ ꓔꓯꓺ ꓢꓳ ꓠ, ꓟ ꓙꓳ ꓡ
1 ꓠꓬ ꓠꓴ ꓠꓬ ꓞꓲꓼ ꓣꓳ ꓡꓳ ꓮ ꓫꓵꓽ ꓥ ꓟꓲ ꓬꓰ ꓟꓽ ꓗꓴ ꓢꓲ꓾ ꓣꓳ ꓙꓲ ꓟ ꓟꓬꓱꓽ ꓔꓯ ꓬꓰ ꓠ ,ꓟ ꓢꓯꓼ ꓕꓵꓼ ꓠꓲ, ꓫꓵˍ ꓟ ꓔꓯ ꓗꓽ ꓞꓲꓽ ꓟ ꓔꓯ ꓠꓽ ꓗꓷ ꓢꓲ ꓠꓬꓲ ꓣꓳ ꓤꓶꓻ ꓠꓯ, ꓗꓪ ꓙꓲ ꓖꓴ ꓙꓳ ꓟ ꓚꓱ, ꓗꓪ ꓢꓯꓼ ꓕꓵꓼ ꓡꓯ꓿
2. ꓠꓬ ꓣꓳ ꓤꓶꓻ ꓗꓪ ꓮ ꓟꓬ, ꓛꓲ ꓫ. ꓓꓴ ꓟꓷ ꓓꓴ ꓠꓲ, ꓫ. ꓟꓬ ꓫ. ꓓꓴ ꓔꓳ, ꓜꓳ ꓡ ꓥ ꓟꓲ ꓟꓽ ꓠꓽ ꓠꓽ ꓠꓲ, ꓟ ꓟꓽ ꓐꓬ ꓡꓰ ꓢꓯꓼ ꓕꓵꓼ ꓠ, ꓟ ꓣꓳ ꓚꓵˍ ꓡꓳ꓿ ꓣꓳ ꓬꓰ ꓠꓲ, ꓫꓵˍ ꓟ ꓣꓳ ꓓꓴ ꓙ ꓔ ꓟ ꓚꓱ, ꓔꓯ ꓬꓰ ꓠ ,ꓟ ꓥ ꓡꓳ꓿
ꓬꓲ ꓡꓰ ꓢꓯꓼ ꓖꓶ ꓔ ꓟ ꓠꓬ ꓣꓳ ꓚꓲ. ꓛꓬ ꓔꓯ ꓙꓵꓻ ꓠ, ꓔ ꓡꓳ ꓐꓰ ꓐꓯ ꓔ ꓡꓳ꓿ ꓢꓴ ꓡꓰ ꓮ ꓡꓲ ꓐꓰ ꓐꓯ ꓔꓬ ꓥ ꓟꓲ ꓣꓳ ꓤꓶꓻ ꓗꓪ ꓪꓴꓽ ꓟꓴꓽ ꓡ ꓓꓴ ꓚꓱ, ꓗꓪ ꓢꓯꓼ ꓕꓵꓼ ꓐꓰ ꓐꓯ ꓖꓶ ꓔ ꓡꓳ꓿
ꓣꓳ ꓤꓶꓻ ꓗꓪ ꓠꓴ ꓥꓪ ꓮ ꓫꓵꓽ ꓒꓬꓱꓼ ꓠꓲ, ꓫꓵˍ ꓡ? ꓚꓲ. ꓛꓬ ꓔꓯ ꓠ ꓠꓬꓲ ꓢꓲ ꓠꓬꓲ ꓓꓴ ꓙ ꓔ ꓟ ꓚꓱ, ꓗꓪ ꓠꓲ, ꓟ ꓟꓽ ꓐꓬ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
