ꓢꓲ ꓡꓲ, ꓟ ꓔꓯ ꓠꓬꓲ ꓙ ꓡꓳ. ꓙ ꓟ ꓠꓬ ꓤꓶꓻ ꓔꓯ ꓠꓬꓲ ꓙ ꓟ ꓥ ꓡꓳ꓾
ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓢ‐ꓢꓲ‐ꓠ ꓗꓪ ꓐꓰ ꓡꓮꓴꓓꓮꓔꓳ ꓢꓲʼ ꓔꓯ ꓬꓰ ꓟ ꓕꓲꓽ ꓫꓵ ꓠꓽ ꓠꓯꓼ ꓘꓴꓽ ꓗꓪ ꓠꓲ, ꓟ ꓘꓴ ꓗꓪ ꓢꓲ ꓡꓲ, ꓟ ꓙꓳ ꓟꓶ ꓠ, ꓟ ꓐꓱ ꓶ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓐꓯ ꓔ ꓟ ꓥ ꓡꓳ꓿
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓠꓽ ꓦꓬꓼ ꓠꓬꓲ ꓣꓰꓖꓲꓠꓮ ꓚꓮꓰꓡꓲ ꓪꓽ ꓘꓴ ꓙꓵ, ꓗꓪ 5 ꓦ 17 ꓠꓬꓲ ꓗꓪ ꓐꓰ 24 ꓠꓬꓲ ꓗꓪ ꓛꓲ ꓬꓰ ꓟ ꓡꓮꓴꓓꓮꓔꓳ ꓢꓲʼ ꓕꓲ ꓫꓵ ꓠꓽ ꓔꓯ ꓓꓵꓽ ꓙ ꓫ. ꓕꓱ ꓘꓶꓽ ꓐꓯ ꓗꓷ ꓟ ꓥꓳ꓿
ꓕꓲꓽ ꓘꓳꓼ ꓡꓲ ꓕꓲ ꓘꓳꓼ ꓬꓰ ꓔꓬ ꓟ ꓕꓱ ꓟ ꓠꓬ ꓣꓳ ꓮ ꓙꓵ ꓐꓱ ꓶ ꓔꓬ ꓦꓲꓻ ꓔꓯ ꓠꓬꓲ ꓡꓳ. ꓗꓪ ꓫꓵ ꓠ, ꓟ ꓚꓱ, ꓔꓯ ꓟꓳ. ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓬꓲ ꓡꓰ ꓐꓯ ꓑꓶ ꓔ ꓟ ꓚꓵ. ꓟꓶ ꓓꓴ ꓐꓰ ꓬꓰ ꓔꓬ ꓟ ꓥ ꓢꓲ꓾ ꓞꓳ ꓤ ꓮ ꓙꓵ ꓥꓳ ꓡꓳ. ꓓꓴ ꓗꓪ ꓐꓰ ꓕꓲ ꓝ. ꓠꓬ ꓚꓵ ꓚꓵ ꓟꓬꓱꓽ ꓬꓰ ꓟ ꓗꓪ ꓛꓳ ꓫꓱꓽ ꓐ ꓡ ꓠ, ꓟ ꓘꓴ ꓔ ꓟ ꓥ ꓡꓳ꓿
ꓘꓴ ꓜꓲꓼ ꓞꓳ ꓗꓪ ꓐꓰ ꓮꓢꓢꓲꓢꓲ ꓡꓳ ꓒꓱ ꓗꓪ ꓐꓰ ꓢꓲ ꓫꓬ ꓢꓴ ꓝꓣꓮꓠꓚꓲꓢ ꓫꓵꓻ ꓡꓰ ꓟ 800 ꓘꓳꓼ ꓐꓲ ꓚꓵ. ꓟꓶ ꓓꓴ ꓬꓰ ꓔꓬ ꓟ ꓙꓵ, ꓘꓴꓽ ꓗꓪ ꓔꓲꓺ ꓒ ꓪ ꓔꓲ ꓡꓰ ꓚꓰꓼ ꓔ ꓟꓶ ꓟ ꓮ ꓙꓵ ꓠꓯꓼ ꓗꓪ ꓔꓬ ꓟ ꓠꓵꓻ ꓠꓲ, ꓐꓰ ꓬꓲ ꓢꓲ ꓡꓲ, ꓟ ꓓꓳꓽ ꓔꓯ ꓟ. ꓖꓶ ꓐꓯ ꓔ ꓡꓳ꓿
ꓮꓢꓢꓲꓢꓲ ꓡꓳ ꓒꓱ ꓗꓪ ꓐꓰ ꓢꓲ ꓫꓬ ꓢꓴ ꓝꓣꓮꓠꓚꓲꓢ ꓡꓰ ꓕꓱ ꓙꓴ‐ꓐꓲ‐ꓡꓲ ꓘꓳꓼ ꓗꓪ ꓪꓴ‐ꓢ ꓐꓰ ꓥ ꓟꓲ ꓣꓳ ꓬꓲꓼ ꓠꓬꓲ ꓤ ꓐꓴ ꓐꓰ ꓥ ꓟꓲ ꓚꓰꓼ ꓔ ꓟꓶ ꓟ ꓮ ꓙꓵ ꓐꓰ ꓥ ꓟꓲ ꓢꓲ ꓡꓲ, ꓐꓰ ꓔꓬ ꓟꓡ ꓠ, ꓟ ꓐꓯ_ ꓟ ꓬꓲ ꓓꓳꓽ ꓐꓯ ꓘꓶꓽ ꓔꓯ ꓓꓵꓽ ꓙ ꓟꓶ ꓠ, ꓟ ꓐꓯ ꓔ ꓡꓳ꓿
ꓟꓽ ꓟꓶ ꓫꓵ ꓟ ꓙꓵ, ꓗꓪ ꓒꓬꓱꓼ ꓡꓰ ꓟ ꓟꓯꓼ ꓢꓰꓼ ꓶꓯ ꓘꓳ ꓓꓴ ꓑꓶ ꓓꓴ ꓚꓰꓼ ꓔ ꓟꓶ ꓟ ꓟꓲ ꓠꓯ ꓔꓯ ꓠꓬꓲ ꓡꓳ. ꓗꓪ ꓫꓵ ꓟ ꓚꓱ, ꓠꓯꓼ ꓗꓪ ꓟꓽ ꓬꓰ ꓪ ꓡꓰ ꓟ ꓠꓯꓼ ꓗꓪ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿
ꓬꓲ. ꓟꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓲ ꓡꓲ, ꓟ ꓔꓯ ꓠꓬꓲ ꓡꓳ. ꓗꓪ ꓫꓵ ꓟ ꓠꓬ ꓤꓶꓻ ꓔꓯ ꓠꓬꓲ ꓙ ꓟ ꓥ ꓡꓳ꓾ ꓕꓱ ꓟ ꓠꓬ ꓕꓲꓽ ꓪ ꓫꓱ, ꓟ ꓔꓯ ꓐꓯ ꓔ ꓡꓳ꓿
“ꓡꓮꓴꓓꓮꓔꓳ ꓢꓲʼ ꓠꓯꓼ ꓗꓪ ꓢꓯꓼ ꓕꓵꓼ ꓔꓬ ꓢꓴ ꓐꓴ ꓮ ꓙꓵ ꓚꓲ ꓛꓬ ꓢꓯꓼ ꓕꓵꓼ ꓔꓬ ꓟ ꓪꓵꓼ ꓙꓱꓼ ꓮ ꓙꓵ ꓔꓯ ꓝꓮꓲ ꓫꓬ, ꓔꓶ ꓠ, ꓟ ꓢꓯꓼ ꓖꓶ ꓠꓲ, ꓫꓵ_ ꓡꓳ꓾” ꓐꓰ ꓢꓯꓼ ꓖꓶ ꓢꓲ꓾ “ꓢꓲ ꓡꓲ, ꓟ ꓔꓯ ꓠꓬꓲ ꓙ ꓟ ꓠꓬ ꓤꓶꓻ ꓔꓯ ꓠꓬꓲ ꓙ ꓟ ꓥ ꓡꓳ꓾” ꓐꓰ ꓐꓯ ꓔ ꓟ ꓥ ꓡꓳ꓿
