ꓟ‐ꓓ‐ꓡꓰ ꓗ‐ꓔꓳ‐ꓡꓲꓗ ꓢ‐ꓢꓶ‐ꓠ ꓞꓳ ꓡꓱ ꓐꓴ ꓕꓲ ꓠꓬꓲ ꓞꓳ ꓡꓱ ꓢꓳ ꓜꓲꓼ ꓓꓴ ꓔꓯ ꓑꓬꓲꓠ‐ꓳꓳ‐ꓡꓪꓲꓠ ꓡꓳ ꓒꓱ꓾ ꓮ‐ꓠꓲ,‐ꓢ‐ꓘꓯ, ꓗꓪ ꓙꓳˍ ꓟ ꓠ‐ꓜ‐ꓣꓯꓸꓼ ꓢꓳ ꓦꓲꓻ ꓗꓪ (2.5.2026) ꓕꓯ ꓞꓳ ꓡꓱ ꓐꓴ ꓔꓯ ꓧꓳꓽ ꓪꓴ. ꓟꓴ ꓢꓴ ꓔꓲꓺ ꓒ Fr. Alphone Aung Ko Lat ꓗꓪ ꓐꓰ ꓧꓳꓽ ꓪꓴ. ꓟꓴ ꓢꓲ ꓬꓰ ꓗꓷꓳ꓿

ꓢꓳ ꓜꓲꓼ ꓓꓴ ꓖꓳ ꓟ ꓗꓪ ꓟ‐ꓓ‐ꓡꓰ ꓢꓽ‐ꓢꓶ‐ꓠ ꓕꓲ ꓟ ꓡꓱꓸꓼ ꓔꓲꓺ ꓒ ꓙꓵꓽ ꓔꓶ. ꓮ ꓙꓵꓽ ꓗꓪ ꓐꓰ ꓞꓳ ꓡꓱ (300) ꓣꓳ ꓟꓽ ꓞꓲ ꓢꓳ ꓜꓲꓼ ꓓꓴ ꓗꓪ ꓛꓲ ꓡ ꓗꓷ ꓟ ꓥ ꓡꓳ꓿

ꓢꓳ ꓜꓲꓼ ꓓꓴ ꓗꓪ Fr. Peter Yan Naung ꓗꓪ ꓐꓰ ꓞꓳ ꓡꓱ ꓐꓴ “ꓚꓲ. ꓛꓬ ꓖꓳ ꓓꓱꓽ ꓔꓯ ꓒꓵꓽ ꓗ ꓬꓰ ꓠ, ꓟ” ꓐꓯˍ ꓟ ꓬꓲ ꓕꓲꓽ ꓟꓴ ꓗꓪ ꓐꓰ ꓟ. ꓖꓶ ꓗꓷ ꓢꓲ꓾ ꓟꓶ ꓘꓶ ꓙꓵ, ꓗꓪ ꓥˍ ꓟꓲ Fr. Raymond Than (SDB) ꓗꓪ ꓐꓰ ꓞꓳ ꓡꓱ ꓐꓰ ꓣꓱꓽ ꓙˍ ꓟ ꓤꓶꓻ ꓐꓯˍ ꓟ ꓚꓱ, ꓔꓯ ꓟ. ꓖꓶ ꓗꓷꓳ꓿

ꓢꓳ ꓜꓲꓼ ꓓꓴ ꓟꓲ‐ꓢ ꓪꓽ ꓘꓴ ꓙꓵ, ꓘꓴꓽ ꓗꓪ ꓔꓲꓺ ꓒ Fr. John Gam Seng (SDB) ꓗꓪ ꓐꓰ ꓶꓼ ꓓꓳꓽ ꓫꓱ, ꓓꓳꓽ ꓟ. ꓖꓶˍ ꓟ ꓗꓪ꓾ ꓕꓱ ꓗꓪ ꓜꓲꓼ ꓛꓲ ꓡˍ ꓟ ꓙꓵꓻ ꓢꓴ ꓞꓳ ꓡꓱ ꓤ ꓐꓴ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓪꓴ‐ꓢ ꓐꓯ ꓘꓶꓽ ꓬꓲ ꓔꓱ, ꓚꓵˍ ꓟ ꓬꓲꓻ ꓓꓵꓽ ꓡꓰ ꓔꓬ ꓥꓳ꓾ ꓐꓰ ꓥꓪ ꓙꓵˍ ꓡꓳ꓿ ꓙꓲ‐ꓢꓴ ꓬꓲ ꓐꓯ ꓘꓶꓽ ꓔꓯ ꓑ ꓙꓽ ꓪˍ ꓟ ꓞꓳ ꓡꓱ ꓐꓴ ꓮ ꓡꓲ ꓬꓰ ꓠ ꓗ, ꓡ꓾ ꓪꓴ‐ꓢ ꓬꓲ ꓔꓱ, ꓚꓵˍ ꓟ ꓔꓯ ꓧꓪ ꓢꓲ ꓔꓱ, ꓚꓵˍ ꓟ ꓖꓳ ꓟ ꓡꓰ ꓞꓳ ꓙꓳ ꓢꓯ. ꓔꓬ ꓠ ꓗ, ꓡꓳ꓿

ꓞꓳ ꓡꓱ ꓐꓴ ꓟꓷꓽ ꓠꓷ, ꓝ. ꓟꓬꓱꓽ ꓬꓰ ꓠ, ꓟ ꓪꓴ‐ꓢ ꓠꓬ ꓞꓳ ꓡꓱ ꓐꓴ ꓔꓯ ꓘꓴ ꓔꓬ ꓡꓳ꓿ ꓞꓳ ꓡꓱ ꓥ ꓕ ꓑꓳꓸꓼ ꓠꓬ ꓪꓴ‐ꓢ ꓬꓲ ꓔꓱ, ꓚꓵˍ ꓟ ꓗꓪ ꓞꓳ ꓙꓳˍ ꓥꓳ ꓐꓯ ꓠꓬ꓾ ꓚꓲ. ꓛꓬ ꓔꓬ ꓖꓴ꓾ ꓚꓲ. ꓛꓬ ꓕꓲ ꓦꓲ ꓢꓴ ꓐꓰ꓾ ꓚꓲ. ꓛꓬ ꓔꓲꓺ ꓒ ꓙꓵꓽ ꓔꓶ. ꓘꓴꓽ ꓗꓪ ꓟꓷꓽ ꓠꓷ, ꓝ. ꓢꓴ ꓬꓲ ꓪꓰꓻ ꓢꓶꓽ ꓓꓱꓼ ꓡˍ ꓟ ꓔꓯ ꓣꓳ ꓟꓳꓻ ꓪ ꓓꓴ ꓥꓳ꓾ ꓐꓰ ꓐꓯ ꓗꓷꓳ꓿

ꓢꓳ ꓜꓲꓼ ꓓꓴ ꓠꓯꓸꓼ ꓗꓪ Fr. Peter Yan Naung ꓗꓪ ꓐꓰ ꓞꓳ ꓡꓱ ꓐꓴ ꓔꓯ “ꓚꓲ. ꓛꓬ ꓖꓳ ꓓꓱꓽ ꓔꓯ ꓒꓵꓽ ꓗ ꓬꓰ ꓠ, ꓟ” ꓐꓯˍ ꓟ ꓬꓲ ꓕꓲꓽ ꓟꓴ ꓗꓪ ꓐꓰ ꓟ. ꓖꓶˍ ꓟ ꓗꓪ꓾ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓪꓴ‐ꓢ ꓡꓰ ꓚꓰꓼ ꓔ ꓟ ꓣꓳ ꓟꓲ ꓠꓯ ꓞꓳ ꓤ ꓐꓴ ꓠꓬ ꓚꓲ. ꓛꓬ ꓖꓳ ꓓꓱꓽ ꓔꓯ ꓪꓴ‐ꓢ ꓡꓰ ꓔꓶ ꓙꓱꓼ ꓗꓶ ꓔ ꓟ ꓡꓰ ꓟꓽ ꓥ ꓟ ꓚꓱ, ꓗꓪ ꓣꓱꓽ ꓔꓬ ꓟ ꓥ ꓡꓳ꓿ ꓕꓲ ꓐꓱ ꓠꓬ ꓡꓯꓽ ꓒꓯ, ꓟꓽ ꓝ. ꓗꓷ ꓕꓯ ꓡꓰ ꓕꓲ ꓡꓰ, ꓔꓬ ꓡꓳ꓿ ꓕꓲ ꓐꓱ ꓠꓬ ꓡꓯꓽ ꓒꓯ, ꓝ. ꓗꓷ ꓗ ꓠꓯ. ꓠꓱ. ꓐꓯ ꓕꓲ ꓣꓳ ꓐꓰ ꓦꓬꓽ ꓛꓳꓽ ꓧꓪˍ ꓡꓳ꓿ ꓕꓲ ꓐꓱ ꓠꓬ ꓚꓲ. ꓛꓬ ꓖꓳ ꓓꓱꓽ ꓔꓯ ꓪꓴꓽ ꓜꓽˍ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓬꓲ ꓚꓰꓼ ꓔ ꓟ ꓔꓶ ꓙꓱꓼ ꓐꓰ ꓧꓶ. ꓙꓰˍ ꓟ ꓥ ꓡꓳ꓿

ꓖꓳ ꓟ ꓑꓶ. ꓓꓴ ꓚꓲ. ꓛꓬ ꓔꓯ ꓪꓴ‐ꓢ ꓡꓰ ꓚꓰꓼ ꓔ ꓖꓶˍ ꓟ ꓖꓳ ꓓꓱꓽ ꓐꓰ ꓥꓪ ꓮ ꓡꓲ ꓐꓰ ꓞꓳ ꓙꓳ ꓔꓬ ꓡ꓾ ꓥꓪ ꓖꓳ ꓓꓱꓽ ꓔꓯ ꓥꓪ ꓚꓵ ꓚꓵ ꓠꓲ, ꓠꓵˍ ꓡ꓾ ꓐꓰ ꓚꓲ. ꓛꓬ ꓔꓯ ꓚꓲ. ꓛꓬ ꓠ ꓠꓬꓲ ꓠ ꓗ, ꓡꓳ꓿ ꓚꓲ. ꓛꓬ ꓖꓳ ꓓꓱꓽ ꓔꓯ ꓒꓵꓽ ꓠ, ꓟ꓾ ꓒꓵꓽ ꓗ ꓬꓰ ꓠ, ꓟ꓾ ꓚꓲ. ꓛꓬ ꓖꓳ ꓓꓱꓽ ꓗꓪ ꓪꓴ‐ꓢ ꓬꓲ ꓢꓲ‐ꓫꓬ‐ꓟ‐ꓦ ꓔꓬ ꓡꓳ ꓐꓯ ꓟ ꓔꓯ ꓮ ꓕꓯ ꓟꓲ ꓓꓵꓽ ꓙ ꓟꓶ ꓠ ꓗ, ꓡꓳ꓿

ꓖꓳ ꓟ ꓡꓰ ꓐꓰ ꓚꓲ. ꓛꓬ ꓖꓳ ꓓꓱꓽ ꓔꓯ ꓒꓵꓽ ꓗ ꓗꓶˍ ꓟ ꓡꓰ ꓐꓰ ꓠꓱ. ꓐꓯ ꓢꓴ ꓖꓳ ꓓꓱꓽ ꓔꓯ ꓥˍ ꓟꓲ ꓒꓵꓽ ꓖꓶ ꓠ ꓗ, ꓡꓳ꓿ ꓛꓳꓽ ꓒꓯ, ꓐꓴ ꓕꓲ ꓣꓳ ꓐꓰ ꓕꓲ ꓣꓳ ꓠꓯꓸꓼ ꓗꓪ ꓕꓲ ꓣꓳ ꓛꓳꓽ ꓕꓲ ꓣꓳ ꓒꓵꓽ ꓠ ꓗ, ꓡꓳ꓿ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓢꓳꓚꓲꓮꓡ ꓟꓰꓓꓲꓮ ꓗꓪ ꓬꓲ ꓙꓵ, ꓣꓱꓽ ꓒꓬ, ꓟ ꓟꓬꓽ ꓡ ꓔꓬ ꓡꓳ꓿ ꓞꓳ ꓡꓱ ꓐꓴ ꓠꓬ ꓮ ꓡꓲ ꓗꓪˍ ꓟꓲ ꓟꓽ ꓙꓰ ꓙꓰ ꓑꓧꓳꓠꓰ ꓗꓪ ꓡꓰꓽ ꓬꓲ ꓙꓵ, ꓮ ꓟꓬ, ꓖꓴ ꓡꓰ ꓔꓬ ꓡꓳ꓿ ꓠꓬꓲ. ꓠꓬꓲ ꓣꓳ ꓞꓳ ꓡꓱ ꓐꓴ ꓕꓱ ꓟ ꓔꓯ ꓠꓲ. ꓡꓰ ꓝꓲ ꓠ, ꓟ ꓣꓱꓽ ꓞ, ꓡꓳ꓿ ꓚꓲ. ꓛꓬ ꓖꓳ ꓓꓱꓽ ꓔꓯ ꓗꓪꓽ ꓫꓵꓼ꓾ ꓚꓲ. ꓛꓬ ꓖꓳ ꓓꓱꓽ ꓠꓯꓸꓼ ꓗꓪ ꓪꓴ‐ꓢ ꓬꓲ ꓢꓲ‐ꓫꓬ‐ꓟ‐ꓦ ꓔꓬ ꓡꓳ꓾ ꓐꓯ ꓟ ꓔꓯ ꓮ ꓕꓯ ꓟꓲ ꓓꓵꓽ ꓙ ꓟꓶ ꓠ ꓗ, ꓡꓳ꓾ ꓐꓰ ꓢꓯꓼ ꓖꓶ ꓔ ꓡꓳ꓿

ꓞꓳ ꓡꓱ ꓐꓴ ꓢꓳ ꓜꓲꓼ ꓓꓴ ꓬꓰˍ ꓟ ꓬꓲ ꓔꓶ ꓙꓱꓼ ꓔꓯ ꓥˍ ꓟꓲ꓾ ꓞꓳ ꓡꓱ ꓐꓴ ꓔꓯ ꓧꓳꓽ ꓪꓴ. ꓟꓴ ꓢꓴ ꓔꓲꓺ ꓒ Alphone Aung Ko Lat ꓡꓰ ꓕꓱ ꓡꓱ ꓐꓯ ꓔ ꓡꓳ꓿

ꓟꓬꓽ ꓠꓬꓲ ꓠꓬ ꓕꓱ ꓟ‐ꓓ‐ꓡꓰ ꓢꓽ‐ꓢꓶ‐ꓠ ꓗꓪ ꓟ ꓞꓳ ꓡꓱ ꓐꓴ ꓟꓽ ꓜꓲꓼ ꓡꓯ ꓘꓳ ꓟ ꓟꓶ ꓫꓵ ꓡꓰ ꓟ ꓑꓶ. ꓓꓴ ꓬꓲ ꓪ ꓝꓮꓲ ꓕꓲ ꓧꓪ, ꓜꓲ ꓡꓯ ꓘꓳ ꓐ ꓡ ꓠ, ꓟ ꓐꓯ ꓢꓲ꓾ ꓢꓳ ꓜꓲꓼ ꓓꓴ ꓕꓱ ꓟ ꓔꓯ ꓬꓰ ꓗꓷ ꓟ ꓥ ꓡꓳ꓿ ꓞꓳ ꓡꓱ ꓐꓴ ꓐꓱ ꓶ ꓬꓲ ꓙꓵ, ꓟꓽ ꓖꓶ ꓟˍ ꓟꓲ ꓟꓶ ꓫꓵ ꓡꓰ ꓟ ꓑꓶ. ꓓꓴ ꓞꓳ ꓡꓱ ꓐꓴ ꓦ ꓕꓲ ꓒꓳ, ꓐꓱ ꓶˍ ꓟꓲ꓾ ꓠꓲ, ꓟ ꓢꓯꓼ ꓙꓳ ꓡ ꓓꓴ ꓐꓱ ꓶ ꓐꓯ ꓢꓲ ꓬꓰ ꓗꓷ ꓟ ꓥ ꓡꓳ꓿

ꓞꓳ ꓡꓱ ꓕꓲ ꓐꓱ ꓠꓲ, ꓟ ꓙꓬ ꓔꓬ ꓢꓴ ꓙꓳˍ ꓡꓳ꓾ ꓕꓲ ꓐꓱ ꓠꓽ ꓙ ꓖꓴ ꓒꓲꓼ ꓔꓬ ꓡꓳ꓾ ꓖꓳ ꓟ ꓑꓶ. ꓓꓴ ꓢꓳ ꓜꓲꓼ ꓓꓴ ꓬꓰ ꓖꓶˍ ꓟ ꓗꓪ ꓐꓰ ꓞꓳ ꓡꓱ ꓐꓴ ꓐꓱ ꓶ ꓔꓳ, ꓙ ꓓꓴ ꓕꓲ ꓫꓵꓽ ꓫꓵꓽ ꓟꓶ ꓡꓰˍ ꓥꓳ ꓐꓰ ꓥꓳ ꓡꓳ.ˍ ꓡꓳ꓿

ꓟꓬꓽ ꓠꓬꓲ ꓮ ꓟꓶ ꓕꓯ ꓪꓴꓽ ꓡ ꓔꓬ ꓟ ꓞꓳ ꓡꓱ ꓐꓴ ꓙ ꓖꓴ ꓒꓲꓼ ꓔꓬ ꓖꓴˍ ꓟ ꓥ ꓢꓲ ꓢꓳꓚꓲꓮꓡ ꓟꓰꓓꓲꓮ꓾ ꓖꓮꓟꓰ ꓗꓪ ꓡꓰꓽ ꓬꓲ ꓙꓵ, ꓮ ꓟꓬ, ꓣꓱꓽ ꓔꓬ ꓖꓴˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓪ ꓔꓯ ꓠꓲ, ꓟ ꓢꓯꓼ ꓪ ꓖꓶˍ ꓟ꓾ ꓠꓱ. ꓐꓯ ꓢꓷ. ꓫꓵꓽ ꓢꓷ. ꓙꓰꓽ ꓐꓴ ꓔꓯ ꓐꓱ ꓖꓶ ꓠ, ꓟ ꓥ ꓡꓳ꓾ ꓐꓰ ꓐꓯ ꓗꓷꓳ꓿

ꓬꓲ ꓓꓳꓽ rvamyanmar