ꓢ. ꓠꓯ ꓠꓬ ꓢꓲ ꓒ ꓬꓰ‐ꓢꓴ ꓟꓴ ꓗꓪ ꓗꓪ ꓓꓯ ꓙꓰˍ ꓟ ꓑꓮꓲꓽ ꓥ ꓡꓳ꓿ ꓢ. ꓠꓯ ꓟ. ꓟꓲꓽ ꓔꓯ ꓣꓳ ꓧꓶ. ꓕꓯ ꓠ ꓠ, ꓓꓴ ꓬꓰ ꓡꓯ꓿ ꓝꓲ ꓓꓴ ꓕꓳꓽ ꓶ 1ꓽ1‐11꓾
ꓕꓲ-ꓬ-ꓒꓲ-ꓡꓳꓽꓳ꓾ ꓥꓪ ꓡꓰ ꓕꓳ ꓶ ꓬꓲ ꓪꓴꓸ ꓕꓲ ꓑꓷꓠ ꓗꓪ꓾ ꓬꓰ-ꓢꓴ ꓟꓬꓱꓽ ꓬꓰ ꓪꓴꓸ ꓔꓴˍ ꓟ ꓗꓪ ꓐꓰ꓾ ꓬꓲ ꓔꓯ ꓔꓯꓹ ꓓꓯ ꓙꓰˍ ꓟ ꓦꓬꓼ ꓠꓬꓲ ꓗꓪ ꓛꓲ꓾ꓬꓲ ꓬꓰ ꓗꓷ ꓟ ꓐꓰ ꓟꓸ ꓗꓷ ꓟ ꓮꓽ ꓙꓵ ꓐꓳ ꓗꓷꓳ꓿ ꓬꓲ ꓔꓯ ꓟꓽ ꓔꓯꓹ ꓓꓯ ꓙꓰ ꓢꓰꓽ ꓕꓯ꓾ ꓬꓲ ꓠꓬ ꓬꓲ ꓡꓰ ꓢꓲ ꓔ ꓟ ꓝꓲ ꓓꓴ ꓐꓴ ꓔꓯ ꓢꓲ-ꓫꓬ-ꓟ-ꓦ ꓗꓪ ꓐꓰ ꓕꓵꓼ ꓪ ꓖꓶ ꓔ ꓬꓰˍ ꓡꓳ꓿ ꓬꓲ ꓫꓸ ꓙꓵꓻ ꓢꓲ ꓫꓵꓻ ꓗꓪ ꓐꓰ ꓢꓯꓸ ꓬꓲ ꓡ ꓗꓸ ꓠꓯꓸ ꓡꓲ ꓞꓲ ꓠꓬꓲ ꓟ ꓠꓯꓸꓼ ꓗꓪ꓾ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓧꓳꓺ ꓟꓽ ꓠꓺ ꓟ ꓗꓸ ꓚꓵ ꓙꓳꓻ ꓙꓳˍ ꓡꓰꓽ ꓮꓽ ꓟꓬꓹ ꓧꓪꓹ ꓬꓲ ꓖꓳ ꓓꓱ ꓟꓳꓸ ꓖꓶ ꓢꓲ꓾ ꓪꓴ-ꓢ ꓗꓴꓷ ꓟꓸ ꓟꓲ ꓟꓸ ꓖꓶˍ ꓡꓳ꓿ꓬꓰ-ꓢꓴ ꓠꓬ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓔꓬ ꓢꓰꓽ ꓕꓯ ꓬꓲ ꓪꓽ ꓔꓯ꓾ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓕꓽ ꓓꓳ ꓙꓰ꓾ ꓥꓪ ꓐꓯ ꓔ ꓖꓶˍ ꓟ꓾ ꓥꓪ ꓐꓹ ꓐ ꓖꓶ ꓙ ꓟꓳˍ ꓟ ꓡꓯꓼ ꓫꓴ ꓔꓯ ꓡꓳ ꓠꓬꓹ ꓔꓬ꓿ꓬꓳ-ꓦ ꓠꓽ ꓬꓲꓻ ꓙꓬ ꓡꓰ ꓖꓳ ꓓꓱ ꓔꓲꓹ ꓖꓶ ꓗꓷꓳ꓿ ꓖꓳ ꓡꓱ ꓥ ꓟꓲ ꓮꓽ ꓟꓬꓹ ꓠꓬꓲ ꓟꓽ ꓗꓷ ꓡꓰ ꓠꓬ ꓠꓴ ꓪꓽ ꓠꓽ ꓢꓲ-ꓫꓬ-ꓟ-ꓦ ꓡꓰ ꓔꓲꓹ ꓖꓶ ꓡ ꓟ ꓟꓶˍ ꓥꓳ꓾ ꓐꓯˍ ꓡꓳ꓿ꓬꓲ ꓪꓽ ꓕꓲ ꓪꓺꓼ ꓐꓰ ꓜꓲꓼ ꓡꓯ ꓘꓳˍ ꓕꓯ ꓬꓲ ꓪꓽ ꓡꓰ ꓬꓰ-ꓢꓴ ꓔꓯ꓾ ꓢꓲ ꓒꓽꓳ꓾ ꓠꓴ ꓠꓬ ꓬꓲ-ꓢꓷ-ꓡꓰ ꓗꓴꓷꓼ ꓔꓯ ꓮ ꓟꓶ ꓫꓬꓹ ꓔꓶˍ ꓥꓳ ꓪ? ꓐꓰ ꓠ ꓠꓬꓲˍ ꓡꓳ꓿
ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓐꓹ ꓐ ꓬꓲ ꓚꓲ ꓛꓬ ꓙꓵꓽ ꓪ ꓡꓰ ꓝꓰꓹ ꓔ ꓟ ꓝꓲꓸˍ ꓐꓰ ꓦꓬꓼ ꓠꓬꓲ ꓔꓯ ꓠꓴ ꓪꓽ ꓢꓷꓸ ꓟꓽ ꓛꓵ꓿ ꓖꓳ ꓡꓱ ꓥ ꓟꓲ ꓢꓲ-ꓫꓬ-ꓟ-ꓦ ꓠꓴ ꓪꓽ ꓔꓯ ꓬꓯꓼ ꓡ ꓕꓯ꓾ ꓠꓴ ꓪꓽ ꓠꓽ ꓪꓽ ꓠꓬꓲˍ ꓟ ꓟꓶˍ ꓥꓳ꓿ ꓖꓳ ꓡꓱ ꓢꓲ ꓠꓴ ꓪꓽ ꓠꓬ ꓙꓱ-ꓣꓴ-ꓢ-ꓡꓱ ꓗꓪˍ ꓟꓲ꓾ ꓬꓴ-ꓔ ꓟꓵꓽ ꓮꓽ ꓙꓵ ꓗꓪˍ ꓟꓲ꓾ ꓢ-ꓟ-ꓡꓲ ꓗꓪˍ ꓟꓲ꓾ ꓟꓲ ꓠꓯ ꓑꓶꓸ ꓗꓪ ꓛꓲ ꓥ ꓟꓲ꓾ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙ ꓢꓴ ꓬꓰˍ ꓥꓳ꓾ ꓐꓯˍ ꓡꓳ꓿
ꓬꓲ ꓕꓱ ꓟꓬ ꓙꓰꓽ ꓐꓯ ꓗꓷ ꓠꓬ ꓬꓲ ꓪꓽ ꓟꓳꓻ ꓟꓳˍ ꓡꓰꓽ ꓬꓲ ꓔꓯ ꓛꓵꓽ ꓓꓯ ꓙꓰ ꓢꓲ꓾ ꓟꓴ ꓗꓴꓸ ꓡꓰ ꓬꓲ ꓔꓯ ꓕꓱꓹ ꓓꓯ ꓙꓰ ꓠꓬ ꓟꓽ ꓟꓳꓻ ꓗꓷ ꓡꓰꓳ꓿ ꓬꓲ ꓓꓯ ꓙꓰ ꓔꓬ ꓟ ꓔꓯ ꓝꓲ ꓓꓴ ꓐꓴ ꓟꓴꓽ ꓗꓪ ꓗꓪ ꓟꓬꓺ ꓔꓱꓹ ꓡꓳꓸ ꓔꓬ ꓕꓯ꓾ ꓐꓵ ꓞꓶ ꓒꓴ ꓖꓪꓽ ꓔ ꓟ ꓡ ꓞꓳ ꓠꓬꓲꓽ ꓣꓳ ꓬꓲ ꓪꓽ ꓒ ꓕꓲꓺꓼ ꓗꓪ ꓦꓰꓼ ꓡ ꓢꓲ꓾ꓖ-ꓡꓲ-ꓡꓲ ꓢꓴ ꓐꓴꓳ꓾ ꓠꓴ ꓪꓽ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓕꓱ ꓡꓱ ꓦꓰꓼ ꓞ ꓢꓲ ꓟꓴꓽ ꓗꓪ ꓗꓪ ꓡꓳꓸ ꓔꓬ ꓡ? ꓠꓴ ꓪꓽ ꓗꓳ ꓡꓳ ꓗꓪ ꓐꓰ ꓟꓴꓽ ꓗꓪ ꓗꓪ ꓛꓵꓽ ꓔꓯꓹ ꓙꓰ ꓟ ꓬꓰ-ꓢꓴ ꓕꓱ ꓕꓲ ꓣꓳ ꓠꓬ꓾ ꓬꓲ ꓔꓯ ꓟꓴꓽ ꓗꓪ ꓗꓪ ꓛꓵꓽ ꓔꓯꓹ ꓙꓰ ꓟ ꓔꓯ ꓠꓴ ꓪꓽ ꓟꓳꓻ ꓟ ꓡꓰ ꓐꓰ꓾ ꓝꓮꓲ ꓕꓲ ꓧꓪꓹ ꓬꓯꓼ ꓡ ꓢꓰꓽ ꓥꓳ꓾ ꓐꓯˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓟꓴ ꓗꓪ ꓗꓪ ꓓꓯ ꓙꓰˍ ꓟ ꓔꓯ ꓣꓳ ꓑ ꓙꓽ ꓗꓷꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓫ. ꓙꓵ ꓜꓲꓽ ꓢꓲ ꓫꓵ ꓘꓪ ꓡꓰ ꓗ ꓠꓯ. ꓢꓽ ꓠꓬꓲ ꓕꓯ ꓝꓮꓲ ꓢꓯ. ꓬꓲꓼ ꓡˍ ꓡꓳ꓿ ꓢꓯ. ꓬꓲꓼ ꓡ ꓗꓷ ꓗ ꓠꓯ. ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓖꓳ ꓓꓱꓽ ꓟꓳ. ꓖꓶ ꓢꓲ ꓠꓬꓲ ꓟ. ꓖꓶˍ ꓡꓳ꓾ ꓑꓱ ꓖꓶˍ ꓡꓳ꓿ ꓮ ꓡꓲ ꓗꓪ ꓛꓲ ꓮ ꓡꓲ ꓐꓰ ꓑꓱ ꓖꓶˍ ꓡ ꓐꓯ ꓠꓬ ꓡꓲꓺ ꓞꓲ ꓦꓬꓼ ꓡꓲꓺ ꓞꓲ ꓠꓬꓲ ꓟ. ꓖꓶˍ ꓡꓳ꓿ ꓫꓵˍ ꓗꓪ ꓐꓰ ꓢꓯ. ꓬꓲꓼ ꓡ ꓢꓴ ꓖꓳ ꓕꓲ ꓣꓳ ꓠꓬ ꓢꓯ. ꓔꓬ ꓢꓴ ꓐꓰ ꓕꓲ ꓡꓰ, ꓜ ꓜꓽˍ ꓟ꓾ ꓬꓲ ꓪ ꓐꓰ ꓕꓲ ꓡꓰ, ꓫ. ꓕꓱˍ ꓟ꓾ ꓬꓲ ꓪ ꓔꓯ ꓟ. ꓖꓶˍ ꓟ ꓬꓰ ꓗꓷꓳ꓾ ꓐꓯ ꓟ ꓠꓬ ꓚꓵ ꓚꓵ ꓓꓵꓽ ꓙ ꓟꓶ ꓓꓴ ꓥ ꓡꓳ꓿ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓕꓲ ꓖ ꓕꓲ ꓧꓪ, ꓠ ꓠꓬꓲ ꓓꓴ ꓙꓳ ꓡ ꓗꓴ.ˍ ꓡꓳ꓿ ꓮ ꓫꓵꓽ ꓥ ꓡ ꓐꓯˍ ꓠꓬ꓾ ꓢꓲ ꓒ ꓬꓰ‐ꓢꓴ ꓠꓬ ꓢꓯ. ꓬꓲꓼ ꓡ ꓠꓬ ꓮ ꓫꓵꓽ ꓑꓶ. ꓓꓴ ꓠꓱ. ꓐꓯ ꓢꓴ ꓔꓯ ꓥˍ ꓟꓲ ꓟꓽ ꓟꓳ. ꓖꓶ ꓡ꓿ ꓮ ꓡꓲ ꓗ, ꓠꓬꓲ ꓬꓲ ꓝꓲ ꓓꓴ ꓐꓴ ꓔꓯ ꓡꓰꓽ ꓟꓳ. ꓖꓶˍ ꓟ ꓥ ꓡ꓿
