ꓠꓻ ꓢꓴ ꓒꓬꓽ ꓢꓴ ꓔꓯ ꓟꓰ ꓞꓶꓻ ꓟꓰ ꓖꓶ_ ꓟ꓾

ꓞꓳ ꓠꓻ ꓔꓯ (ꓥ ꓠꓬ) ꓫꓵꓻ ꓟꓳ. ꓓ_ ꓢꓴ (ꓥ ꓠꓬ) ꓠꓯꓺ ꓞꓲꓼ ꓦꓲꓻ ꓗꓪ ꓮ ꓘꓶ. ꓫꓵꓻ ꓠ, ꓢꓴ ꓠꓻ ꓔꓬ ꓢꓴ ꓖꓳ ꓓꓱ ꓔꓯ ꓘꓶꓽ ꓢꓲ ꓠꓬꓲ ꓠꓻ ꓫꓬ, ꓠ, ꓟ ꓐꓱ ꓶ ꓙ ꓖꓶ ꓔꓬ ꓢꓴ ꓮ ꓕꓯ ꓫꓵꓻ ꓟ ꓟꓽ ꓢꓷ. ꓕꓱ ꓡꓱ ꓓ, ꓢꓴ ꓮ ꓙꓵ ꓐꓱ ꓶ ꓠꓬ ꓟꓰ ꓞꓶꓻ ꓟꓰ ꓖꓶ_ ꓟ ꓬꓲ. ꓚꓱ, ꓙꓳ_ ꓡꓳ꓾ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓟ. ꓟꓲꓽ ꓗꓪ ꓐꓰ ꓥ ꓟꓲ ꓕꓱ ꓡꓱ ꓐꓯ ꓔ ꓡꓳ꓿

ꓟ. ꓟꓲꓽ ꓗꓪ ꓠꓬ ꓬ‐ꓗꓴ 5ꓽ14‐15 ꓠꓴ ꓪ ꓗꓳ ꓡꓳ ꓗꓪ ꓠꓻ ꓢꓴ ꓙꓳ_ ꓠꓬ ꓠꓴ ꓪ ꓘꓴ ꓜꓲꓼ ꓞꓳ ꓗꓪ ꓐꓰ ꓪꓴꓽ ꓢꓴ ꓟꓴ ꓢꓴ ꓔꓯ ꓪꓽ ꓘꓴ ꓠ, ꓟ ꓐꓰ ꓟꓰ ꓞꓶꓻ ꓟꓰ ꓖꓶ ꓠ, ꓟ꓾ ꓟ‐ꓘꓳ 6ꓽ13, ꓟ‐ꓕꓲ 8ꓽ17 ꓗꓪ ꓥ ꓟꓲ ꓟꓰ ꓞꓶꓻ ꓟꓰ ꓖꓶ ꓠ, ꓟ ꓐꓯ ꓔ ꓡꓳ꓿

ꓕꓲ ꓐꓱ ꓙꓳ ꓟ ꓠꓬ ꓟꓰ ꓞꓶꓻ ꓟꓰ ꓖꓶ ꓐꓯ ꓠꓬ ꓥꓪ ꓔꓯ ꓟꓰ ꓞꓶꓻ ꓟꓰ ꓖꓶ ꓡ ꓕꓯ ꓠꓬ ꓥꓪ ꓠꓬ ꓫꓵꓻ ꓘꓪ ꓡꓰ ꓓꓴ ꓬꓰ ꓡꓳ꓾ ꓐꓰ ꓓꓵ ꓙ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓠꓬꓲ. ꓠꓬꓲ ꓕꓱ ꓡꓱ ꓟꓽ ꓥ꓾ ꓟꓰ ꓞꓶꓻ ꓟꓰ ꓖꓶ ꓟ ꓬꓲ. ꓚꓱ, ꓠꓬ ꓕꓱ ꓡꓱ ꓙꓳ_ ꓡꓳ꓾ (1) ꓠꓬ ꓟꓰ ꓞꓶꓻ ꓟꓰ ꓖꓶ ꓕꓯ ꓠꓬ ꓞꓳ ꓠꓻ ꓖꓳ ꓕꓲ ꓣꓳ ꓠꓬ ꓤ ꓟꓲ ꓔꓬ ꓢ ꓟ ꓣꓱ ꓛꓰ ꓟꓶ ꓡ ꓟ ꓥ ꓡꓳ꓿ (2) ꓠꓬ ꓬꓲ ꓠꓬ ꓬꓰ ꓗꓷ ꓟ ꓮ ꓙꓵ ꓬꓲ ꓠꓬ ꓪꓴ‐ꓢ ꓗꓪ ꓐꓰ ꓖꓽ ꓖꓶ_ ꓟ ꓐꓱ ꓶ ꓟꓶ._ ꓟ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓝꓴꓲ ꓖꓽ ꓖꓶ_ ꓟ ꓣꓱ ꓛꓰ ꓥ ꓟꓲ ꓟꓶ._ ꓟ ꓥ ꓡꓳ꓿ ꓖꓳ ꓟꓰ ꓖꓶ_ ꓟ ꓕꓲ ꓑ, ꓗꓪ ꓠꓬ ꓬꓲ ꓔꓯ ꓣꓳ ꓠ ꓠꓬꓲ ꓓꓴ ꓥ ꓡꓳ꓿ ꓬꓲ ꓠꓬ ꓓꓵꓽ ꓙ ꓒꓳ, ꓡ ꓓꓴ ꓙꓳ_ ꓡ? ꓠꓴ ꓠꓬ ꓮ ꓘꓶ. ꓠꓻ ꓔꓬ ꓟ ꓑꓶ ꓓꓴ ꓪꓴ‐ꓢ ꓔꓯ ꓠꓴ ꓝꓮꓲ ꓕꓲꓽ ꓧꓪ, ꓓꓵꓽ ꓙ ꓒꓳ, ꓡ ꓓꓴ ꓙꓳ_ ꓡ? ꓐꓰ ꓠ ꓠꓬꓲ ꓕꓯ ꓠꓬ ꓬꓲ ꓠꓬ ꓠꓲ, ꓡꓶꓽ ꓙꓳ ꓐꓭ ꓠꓬ ꓟꓰ ꓞꓶꓻ ꓖꓳ ꓟ ꓟꓰ ꓖꓶ_ ꓕꓯ ꓠꓬ ꓖꓽ ꓖꓶ_ ꓟ ꓟꓲ ꓟꓶ. ꓟ ꓥ ꓡꓳ꓿ ꓝꓮꓲ ꓕꓲꓽ ꓫꓵ ꓠꓬ ꓦ ꓐꓱ ꓶ ꓣꓱ ꓛꓰ ꓟꓶ._ ꓟ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓘꓴ ꓜꓲꓼ ꓞꓳ ꓗꓪ ꓐꓰ ꓠꓬ ꓟꓰ ꓞꓶꓻ ꓟꓰ ꓖꓶ_ ꓟ ꓠꓬ ꓫꓵꓻ ꓟꓳ ꓓ, ꓢꓴ ꓫꓵꓻ ꓘꓪ ꓡꓰ ꓓ, ꓢꓴ ꓠꓬ ꓖꓳ ꓡꓱ ꓬꓲ ꓖꓳ ꓫꓵꓻ ꓟ ꓕꓯ ꓢꓲ ꓟꓽ ꓫꓵꓻ ꓕꓯ ꓟꓰ ꓞꓶꓻ ꓟꓰ ꓖꓶ ꓪꓴ‐ꓢ ꓗꓪ ꓐꓰ ꓐꓯ ꓔ ꓟ ꓟ. ꓟꓲꓽ ꓗꓪ ꓐꓰ ꓐꓯ ꓔ ꓟ ꓡꓰ ꓐꓰ ꓬꓲ ꓐꓱ ꓶ ꓟꓰ ꓞꓶꓻ ꓟꓰ ꓖꓶ ꓐꓰ ꓐꓯ ꓔ ꓟ ꓡꓰ ꓐꓰ ꓕꓱ ꓟ ꓠꓬ ꓪ ꓙꓵ ꓙꓲ_ ꓡꓳ꓿ ꓘꓴ ꓜꓲꓼ ꓞꓳ ꓪꓴ‐ꓢ ꓟ. ꓟꓲꓽ ꓗꓪ ꓟꓲ ꓕꓱ ꓡꓱ ꓟ. ꓖꓶ ꓔ ꓟ ꓡꓰ ꓐꓰ ꓟꓰ ꓞꓶꓻ ꓟꓰ ꓖꓶ ꓟ ꓥ ꓡꓳ꓿

ꓖꓳ ꓟ ꓑꓶ ꓓꓴ ꓠꓲ, ꓠꓵꓻ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓠꓴ ꓪ ꓤꓶꓻ ꓠꓯꓼ ꓗꓪ ꓮ ꓘꓶ. ꓠꓻ ꓔꓬ ꓡ? ꓕꓱ ꓡꓱ ꓗꓷ ꓔꓬ ꓕꓯ ꓠꓽ ꓘꓴ ꓜꓲꓼ ꓞꓳ ꓗꓪ ꓪꓴꓽ ꓢꓴ ꓟꓴ ꓢꓴ ꓔꓲꓺ ꓒ ꓐꓴ ꓔꓯ ꓘꓴ ꓢꓲ ꓠꓬꓲ ꓟꓰ ꓞꓶꓻ ꓘꓳ, ꓣꓴ ꓟꓶ ꓕꓯ ꓠꓽ ꓠꓴ ꓪ ꓐꓱ ꓶ ꓠꓬ ꓦ ꓐꓱ ꓶ ꓧꓪ ꓖꓳ ꓓꓱ ꓐꓱ ꓶ ꓪꓴ‐ꓢ ꓥ ꓟꓲ ꓣꓳ ꓔꓯ ꓣꓱ ꓛꓰ ꓒ ꓐꓲ ꓡꓵ ꓖꓶ ꓢꓲ ꓠꓬꓲ ꓣꓳ ꓔꓯ ꓠꓬꓲ ꓤ ꓡꓳ. ꓙ ꓖꓶ ꓟ ꓥ ꓡꓳ꓿ ꓟꓰ ꓞꓶꓻ ꓟꓰ ꓟ ꓠꓬ ꓣꓳ ꓐꓱ ꓶ ꓣꓱ ꓛꓰ ꓟꓶ ꓚꓱ, ꓥ ꓡꓳ꓿ ꓖꓳ ꓟ ꓒꓶ ꓓꓴ ꓣꓳ ꓮ ꓙꓵ ꓘꓳ, ꓣꓴ ꓟꓶ ꓡꓰ ꓝꓲ꓿