Lꓳ ꓖꓪ ꓗꓪ ꓬꓲꓻ ꓙꓰ ꓔꓬ ꓟ ꓬꓲꓻ ꓙꓬ ꓠꓬ ꓬꓲ ꓪ ꓬꓲꓻ ꓙꓬ ꓔꓯ ꓬꓲ ꓪ ꓟꓽ ꓓꓳꓻ꓿ ꓢꓲ, ꓜꓲ ꓥˍ ꓟꓲ ꓬꓲ ꓪ ꓚꓲ. ꓛꓬ ꓢꓲ, ꓢꓶ ꓔꓯ ꓬꓲ ꓪ ꓟꓽ ꓜꓽ꓿ ꓟꓲꓽ ꓟꓲ ꓥˍ ꓟꓲ ꓬꓲ ꓚꓲ. ꓛꓬ ꓐꓱ ꓶ ꓬꓲ ꓟꓽ ꓡꓬ.꓿ ꓢꓲ, ꓪꓰ ꓥˍ ꓟꓲ ꓬꓲ ꓚꓲ. ꓛꓬ ꓐꓱ ꓶ ꓬꓲ ꓫꓬ.ˍ ꓟ ꓬꓲ ꓐꓵꓽ ꓟꓽ ꓓꓳ꓿ ꓖꓳ ꓡꓱ ꓠꓬꓲ ꓠꓱ. ꓐꓯ ꓐꓱ ꓶ ꓢꓯ. ꓔꓬ ꓠ, ꓟ ꓠꓬ ꓬꓳ. ꓚꓰꓽ ꓓꓰ ꓡꓰˍ ꓟ ꓥ ꓡꓳ꓿ ꓣꓳ ꓮ ꓙꓵꓽ ꓡꓱꓸꓼ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓬꓰ ꓙ ꓡꓯ ꓘꓳ ꓠ, ꓟ ꓚꓰꓼ ꓔ ꓟ ꓥ ꓡꓳ꓿ ꓠꓴ ꓠꓬ ꓗ, ꓛꓲꓽˍ ꓥꓳ ꓐꓯ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓠꓴ ꓑꓶ. ꓓꓴ ꓠꓱ. ꓐꓯ ꓢꓴ ꓗ, ꓛꓲꓽˍ ꓥꓳ ꓐꓯˍ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓾ ꓐꓯˍ ꓟ ꓔꓯ ꓔꓲꓺ ꓒ ꓪ ꓔꓲ. ꓝꓣꓮꓠꓚꓲꓢ ꓡꓰ ꓕꓲ ꓧꓪ, ꓚꓺ ꓒꓬꓱ ꓔˍ ꓡꓳ꓿ ꓡꓳ ꓖꓪ ꓗꓪ ꓬꓲꓻ ꓔꓬ ꓟ ꓬꓲꓻ ꓙꓬ ꓠꓬ ꓬꓲ ꓪ ꓟꓽ ꓓꓳꓻ꓾ ꓢꓲ, ꓜꓲ ꓥˍ ꓟꓲ ꓬꓲ ꓪ ꓢꓲ, ꓢꓶ ꓔꓯ ꓬꓲ ꓪ ꓟꓽ ꓜꓽ꓾ ꓠꓱ. ꓐꓯ ꓢꓴ ꓐꓱ ꓶ ꓖꓶˍ ꓡꓳ꓾ ꓐꓰ ꓐꓯ ꓔˍ ꓡꓳ꓿
ꓬꓲ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓞꓳ ꓤ ꓥ ꓟꓲ ꓟꓵꓽ ꓘꓳꓼ ꓕꓱ ꓟ ꓠꓯꓸꓼ ꓗꓪ ꓚꓬꓼˍ ꓑꓶ. ꓓꓴ ꓕꓱ ꓟ ꓔꓯ ꓟꓽ ꓛꓳ ꓫꓱꓽ ꓥꓳ ꓐꓯˍ ꓠꓬ ꓣꓳ ꓠꓬ ꓙꓱꓽ ꓤˍ ꓡꓰ ꓐꓰ ꓗꓷ ꓡꓰˍ ꓥꓳ꓿ ꓣꓳ ꓮ ꓙꓵꓽ ꓡꓱꓸꓼ ꓠꓬ ꓠꓱ. ꓐꓯ ꓢꓴ ꓐꓱ ꓶ ꓢꓯ. ꓔꓬ ꓠꓯ, ꓟ꓾ ꓕꓲ ꓚꓱ, ꓐꓯˍ ꓠꓬ ꓠꓵꓻ ꓠꓲ, ꓐꓱ ꓶ ꓢꓯ. ꓔꓬ ꓠ, ꓟ ꓠꓬ ꓬꓳ. ꓚꓰꓽ ꓓꓰ ꓡꓰˍ ꓟ ꓥ ꓡꓳ꓾ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓳ ꓔˍ ꓡꓳ꓿ ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓣꓳ ꓵꓻ ꓠ ꓔˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓥˍ ꓟꓲ ꓟ‐ꓕꓲ 22ꓽ34‐40 ꓥ ꓡꓳ꓿ ꓟ. ꓟꓲꓽ ꓔꓯ ꓵꓻ ꓟ. ꓖꓶˍ ꓥꓳ꓿
ꓬꓰ-ꓢꓴ ꓡꓰ ꓢ-ꓓꓴ-ꓗꓷ ꓐꓴ ꓔꓯ ꓐꓯ ꓧꓪꓸ ꓡꓰ ꓟ ꓔꓯ ꓒ-ꓡꓲ-ꓢꓷ ꓐꓴ ꓑ ꓙꓽ ꓗꓷ ꓠꓬ꓾ ꓬꓲ ꓪꓽˍ ꓟꓲ ꓜꓲꓼ ꓡ ꓢꓲ꓾ꓬꓲ ꓪꓽ ꓗꓪ ꓟ ꓙꓵꓽ ꓗ ꓒ ꓕꓲ ꓣꓳ ꓠꓬ ꓬꓰ-ꓢꓴ ꓔꓯ ꓫꓵꓽ ꓠꓬꓲ ꓠꓹ ꓟ ꓕꓱ ꓡꓱ ꓠ ꓠꓬꓲˍ ꓡꓳ꓿ ꓟꓸ ꓒꓽꓳ꓾ ꓙꓵꓽ ꓗ ꓕꓳ ꓶ ꓗꓪ ꓕꓵꓼ ꓪꓽ ꓮ ꓡꓲ ꓕꓲ ꓚꓱꓹ ꓟ ꓪꓴꓽ ꓓꓰꓺˍ ꓡ꓾ ꓐꓰ ꓠ ꓠꓬꓲˍ ꓡꓳ꓿ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓠꓬ ꓕꓲ ꓠꓲꓹ ꓟ ꓡꓱꓸ꓾ ꓕꓲ ꓶꓻ ꓟꓬ ꓡꓱꓸꓼ꓾ ꓕꓲꓽ ꓙꓽ ꓠꓲꓹ ꓡꓱꓸꓼ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓾ ꓐꓰ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓕꓵꓼ ꓪꓽ ꓬꓲ ꓪꓴꓸ ꓕꓲ ꓚꓱꓹ ꓟˍ ꓐꓰ꓾ ꓪꓴꓽ ꓓꓰꓺˍ ꓕꓲ ꓚꓱꓹ ꓟ ꓥꓳ꓿ ꓗ ꓠꓯꓸ ꓕꓲ ꓚꓱꓹ ꓟˍ ꓟꓲ ꓕꓱ ꓟ ꓐꓰ ꓕꓲ ꓡꓰꓹꓼ ꓗꓹ ꓡꓳ꓿ ꓠꓴ ꓠꓬ ꓚꓲꓸ ꓛꓬ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓠꓴ ꓠꓶꓽ ꓛꓳ ꓕꓲꓺ ꓛꓳ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓾ ꓐꓯˍ ꓟ ꓕꓱ ꓕꓲꓽ ꓚꓱꓹ ꓥꓳ꓿ ꓕꓵꓼ ꓪꓽ ꓕꓱ ꓠꓬꓲꓽ ꓚꓱꓹ ꓗꓪ꓾ ꓙꓵꓽ ꓗˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓕꓳ ꓶ ꓮꓽ ꓙꓵ ꓡꓱꓸꓼ ꓥꓳꓺ ꓞꓹ ꓡꓳ꓾ ꓐꓯ ꓖꓶˍ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓲ ꓠꓯ ꓞꓳ ꓤ ꓗꓪ ꓬꓳ. ꓚꓰꓽˍ ꓟ ꓠꓬꓲꓽ ꓫꓵꓽˍ ꓡꓰꓽ ꓙꓳˍ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓔꓲ ꓔꓲ ꓢꓲꓽ ꓢꓲꓽ ꓡꓰꓽ ꓐꓯ ꓔˍ ꓡꓳ꓿ ꓪꓴ‐ꓢ ꓔꓯ ꓕꓲ ꓙꓽ ꓠꓲ, ꓡꓱꓸꓼ ꓕꓲ ꓠꓲ, ꓟ ꓡꓱꓸꓼ ꓠꓲ, ꓠꓵ ꓠ, ꓟ ꓐꓰ꓾ ꓠꓱ. ꓐꓯ ꓢꓴ ꓔꓯ ꓠꓲ, ꓠꓵ ꓠ, ꓟ ꓥ ꓡꓳ꓿
