ꓠꓲ, ꓠꓵˍ ꓟ ꓮꓽ ꓐ ꓮ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓡ ꓞꓳ ꓕꓲ ꓣꓳ ꓔꓯ ꓡꓳ. ꓠꓬꓲˍ ꓕꓯ ꓣꓳ ꓠꓬ ꓕꓯꓽ ꓢꓲ ꓕꓲ ꓒꓳ, ꓔꓯ ꓧꓶ. ꓕꓯ ꓟꓳˍ ꓡꓳ꓿ ꓐꓵ ꓞꓶꓽ ꓟꓶ ꓞꓲ ꓫꓬ ꓫꓬ ꓡꓯꓽ ꓡꓯꓽ ꓖꓪꓽ ꓔˍ ꓡ꓾ ꓫ. ꓕꓱˍ ꓟ ꓠ ꓠ, ꓢꓻˍ ꓡ꓾ ꓞꓳ ꓤ ꓟꓲ ꓙꓬꓽ ꓗꓪ ꓬꓲ ꓮ ꓡꓲ ꓣꓱꓽ ꓬꓰ ꓔꓬ ꓡ꓾ ꓐꓯˍ ꓟ ꓔꓯ ꓧꓶ. ꓕꓯ ꓟꓳꓻ ꓐ ꓡˍ ꓟ ꓥ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓡ ꓞꓳ ꓕꓲ ꓣꓳ ꓬꓲ ꓠꓲ, ꓟ ꓠꓯꓸꓼ ꓗꓪ ꓮ ꓡꓲ ꓫꓵꓽ ꓓ,ˍ ꓡ ꓐꓯˍ ꓟ ꓔꓯ ꓠꓬ ꓠꓱ ꓫꓳ. ꓟ. ꓗꓪ ꓐꓰ ꓟꓳꓻ ꓟꓽ ꓓꓻ꓿ ꓠꓬꓲ. ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓬꓳ. ꓚꓰꓽˍ ꓟ ꓕꓲ ꓫꓵꓽ ꓣꓳ ꓔꓯ ꓟ. ꓖꓶ ꓡ ꓔꓬ ꓡꓳ꓿ ꓪꓴ‐ꓢ ꓐꓱ ꓶ ꓬꓳ. ꓚꓰꓽˍ ꓟ ꓠꓬ ꓕꓯꓽ ꓢꓲ ꓟꓳꓻ ꓓ, ꓕꓲ ꓒꓳ, ꓗꓪ ꓐꓲꓻ ꓫꓴꓽ ꓠ, ꓟ ꓡꓰꓽ ꓟꓽ ꓥ ꓥ ꓐꓰ꓾ ꓠꓯꓸꓼ ꓘꓪ ꓟ ꓠꓲ, ꓟ ꓔꓯ ꓗꓪˍ ꓟꓲ ꓔꓱ, ꓚꓵ ꓢꓲ ꓢꓲꓽ ꓫꓬ ꓠ, ꓟ ꓥ ꓡꓳ꓿
ꓡꓴ‐ꓘ 11ꓽ37‐41 ꓗꓪ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓠ ꓠ, ꓓꓴ ꓬꓰ ꓡꓯ꓿
ꓬꓰ‐ꓢꓴ ꓫ. ꓕꓱ ꓓꓳ ꓡꓱ ꓕꓯ꓾ ꓒ‐ꓡꓲ‐ꓢꓷ ꓕꓲ ꓣꓳ ꓡꓰ ꓬꓲ ꓔꓯ ꓜ ꓜꓽ ꓡꓯ꓾ ꓐꓰ ꓘꓴˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓓꓵꓽ ꓡꓰ ꓢꓲ ꓜ ꓜꓽˍ ꓐꓰ ꓠꓬꓲ. ꓠ.ˍ ꓡꓳ꓿ ꓜ ꓟꓽ ꓜꓽ ꓧꓶ. ꓕꓯ ꓬꓰ‐ꓢꓴ ꓡꓯ ꓒꓯ, ꓟꓽ ꓞꓲꓽ ꓟ ꓔꓯ ꓒ‐ꓡꓲ‐ꓢꓷ ꓖꓳ ꓕꓲ ꓣꓳ ꓟꓳꓻ ꓗꓷ ꓠꓬ ꓓꓵꓽ ꓙ ꓟꓶˍ ꓡꓳ꓿
ꓖꓳ ꓕꓯ ꓢꓲ ꓒ ꓡꓰ꓾ ꓮ ꓟꓶ ꓠꓴ ꓪ ꓒ‐ꓡꓲ‐ꓢꓷ ꓐꓴ ꓠꓬ꓾ ꓡꓴꓻ ꓗꓶˍ ꓐꓰ ꓐꓯꓻ ꓕꓯꓽ ꓢꓲ ꓕꓲ ꓒꓳ, ꓔꓯ ꓫꓬ ꓫꓬˍ ꓡꓰ ꓞꓲꓽˍ ꓡꓳ꓿ ꓖꓳ ꓡꓱ ꓥˍ ꓟꓲ ꓠꓴ ꓪ ꓠꓯꓸꓼ ꓗꓪ ꓠꓽ꓾ ꓢꓴ ꓔꓯ ꓘꓳ, ꓜꓽˍ ꓟ ꓐꓰ ꓥꓶˍ ꓟ ꓐꓲ ꓞ, ꓡꓳ꓿ ꓞꓳ ꓙꓲꓽ ꓐꓴꓳ꓾ ꓕꓯꓽ ꓢꓲ ꓗꓪ ꓟ ꓔꓯ ꓚꓰꓼ ꓢꓴ ꓡꓰ ꓠꓯꓸꓼ ꓗꓪ ꓟˍ ꓟꓲ ꓚꓰꓼ ꓔ ꓡꓳ ꓟꓽ ꓥ ꓡ? ꓠꓴ ꓪ ꓠꓬ ꓢꓴ ꓔꓯ ꓖꓶˍ ꓕꓯ ꓠꓯꓸꓼ ꓗꓪ ꓟˍ ꓟꓲ ꓖꓶ꓿ ꓖꓳ ꓡꓱ ꓠꓬ ꓠꓴ ꓪ ꓐꓱ ꓶ ꓮ ꓫꓵꓽˍ ꓟꓲ ꓫꓬˍ ꓟ ꓒꓬꓱꓼ ꓡˍ ꓥꓳ꓾ ꓐꓯˍ ꓡꓳ꓿
ꓕꓱ ꓟ ꓠꓬ ꓪꓴ‐ꓢ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓥ ꓡꓳ꓿
ꓢꓴ ꓔꓯ ꓖꓶˍ ꓟ ꓠꓬ ꓮ ꓙꓵꓽ ꓔꓯ ꓢꓲꓽ ꓫꓬ ꓡꓰ ꓝꓲˍ ꓡꓳ ꓐꓰ ꓬꓰ‐ꓢꓴ ꓙꓲ‐ꓢꓴ ꓡꓰ ꓟ. ꓖꓶˍ ꓐꓯ ꓟ ꓠꓬ꓾ ꓚꓵ ꓚꓵ ꓢꓲꓽ ꓫꓬˍ ꓟ ꓐꓯˍ ꓟ ꓠꓬ ꓖꓳ ꓓꓱꓽ ꓔꓯ ꓞꓲꓽ ꓫꓬ ꓡꓰ ꓝꓲˍ ꓟ ꓡꓰꓽ ꓟꓽ ꓥ ꓥ ꓫꓱ. ꓤ ꓠꓲ, ꓡꓰ ꓖꓶˍ ꓟ ꓗꓪ ꓐꓰ ꓒꓬꓱꓼ ꓡˍ ꓟ ꓥ ꓡꓳ꓿
ꓟꓽ ꓔꓱ, ꓚꓵ ꓟ ꓣꓳ ꓠꓲ, ꓟ ꓔꓯ ꓡꓵ. ꓦ ꓗꓷ ꓢꓲ ꓠꓯꓸꓼ ꓗꓪ ꓟ ꓠꓲ, ꓟ ꓔꓯ ꓡꓶ. ꓗꓷ ꓠ, ꓟ ꓢꓲ ꓒ ꓠꓲ, ꓡꓶ ꓙꓳˍ ꓡꓳ꓿ ꓢꓲ ꓒ ꓬꓲ ꓠꓵ ꓠꓲ, ꓐꓰ ꓫꓱ. ꓤ ꓠꓲ, ꓔꓯ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟ ꓤꓶꓻ ꓗꓪ ꓡꓯꓼ ꓕꓲ ꓣꓱꓽ ꓬꓰˍ ꓕꓯ ꓡꓰꓽ ꓣꓳ ꓠꓬ ꓠꓯꓸꓼ ꓗꓪ ꓟ ꓠꓲ, ꓟ ꓢꓲꓽ ꓫꓬ ꓢꓴ ꓒꓬꓱꓼ ꓡ ꓓ, ꓡꓳ꓿
