ꓛꓳꓽ ꓒꓯꓹ ꓐꓴ ꓠꓬ ꓬꓲ ꓪꓽ ꓗꓳ ꓡꓳ ꓗꓪ ꓮꓽ ꓟ ꓪ ꓜꓲ ꓪꓴꓽˍ ꓟ ꓒꓬꓱꓼ ꓡ ꓥꓳ ꓪ?꓾ ꓐꓰ ꓧꓳꓺ ꓡꓯꓽ ꓘꓳ ꓔꓴ ꓡ ꓡꓳ꓿ꓬꓰ-ꓢꓴ ꓠꓽ ꓬꓲ ꓪꓽ ꓓꓵꓽ ꓙˍ ꓟ ꓔꓯ ꓢꓷꓸˍ ꓠꓬꓲ꓾ ꓤ ꓠꓱ ꓤ ꓕꓲ ꓣꓳ ꓧꓳꓽ ꓔꓯꓹ ꓡ ꓢꓲ꓾ ꓬꓲ ꓒ ꓕꓲ ꓗꓪ ꓦꓰꓼ ꓞꓹ ꓝꓲ ꓢꓲ ꓠꓬꓲ ꓬꓲ ꓪꓽ ꓔꓯ꓾ꓮꓽ ꓟ ꓥ ꓟꓲ ꓥꓪ ꓟꓬꓱ ꓗꓪ ꓐꓰ ꓤ ꓠꓱ ꓤ ꓕꓱ ꓟ ꓔꓯ ꓘꓳꓻ ꓣꓴˍ ꓠꓬ ꓥꓪ ꓔꓯ ꓘꓳꓻ ꓣꓴˍ ꓟ ꓥ ꓡꓳ꓿ ꓮꓽ ꓟ ꓥ ꓟꓲ ꓥꓪ ꓔꓯ ꓘꓳꓻ ꓣꓴˍ ꓠꓬ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯ ꓘꓳꓻ ꓣꓴˍ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓓꓽ ꓓꓰꓺ ꓬꓰ ꓢꓴ ꓠꓬ ꓓꓽ ꓪꓴꓸ ꓥꓳ꓾ ꓐꓯ ꓖꓶˍ ꓡꓳ꓿ꓬꓳ-ꓦ ꓡꓰ꓾ ꓢꓲ ꓒꓽꓳ꓾ ꓠꓴ ꓟꓬꓱ ꓗꓪ ꓐꓰ ꓠꓲꓽ ꓖꓼ ꓓꓳ ꓔꓬ ꓟ ꓕꓲ ꓣꓳ ꓔꓯ ꓥꓪ ꓠꓴꓽ ꓟꓳꓻ ꓗꓷꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓽ ꓣꓳꓽ ꓗꓪ ꓟ ꓕꓲ ꓣꓳ ꓟꓽ ꓥ ꓠꓬꓲ꓾ ꓬꓲ ꓔꓯ ꓥꓪ ꓠꓴꓽ ꓗꓽ ꓔ ꓡꓳ꓾ ꓐꓯˍ ꓡꓳ꓿ꓬꓰ-ꓢꓴ ꓡꓰ꓾ ꓬꓲ ꓔꓯ ꓕꓽ ꓗꓽ ꓔ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓔꓳꓹ ꓢꓴ ꓟꓽ ꓥ ꓠꓬ꓾ ꓠꓴ ꓪꓽ ꓔꓯ ꓬꓰ ꓙ ꓢꓴ ꓥ ꓡꓳ꓾ ꓐꓯ ꓖꓶˍ ꓡꓳ꓿
ꓠꓬꓲ. ꓠꓬꓲ ꓟ ꓢꓲ ꓫꓬ ꓕꓳ ꓶ ꓗꓪ ꓛꓳꓽ ꓒꓯ, ꓐꓴ ꓠꓬ ꓬꓲ ꓪ ꓗꓳ, ꓡꓳ ꓗꓪ ꓮꓽ ꓟ ꓪ ꓜꓲ ꓪꓴꓽ_ ꓡ ꓐꓰ ꓐꓯ ꓔꓳ, ꓡꓯ ꓘꓳ_ ꓟ ꓥ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓡꓰ ꓔꓱ, ꓟ ꓪꓴꓽ ꓞ, ꓢꓴ ꓠꓬ ꓙꓽ ꓣꓳ ꓟ ꓐꓰ ꓒꓵꓽ ꓛꓳ_ ꓟ ꓗꓪ ꓐꓰ ꓡꓰ ꓟꓳ ꓪ ꓟ ꓔꓯ ꓟ. ꓖꓶ_ ꓡꓳ꓿ ꓤ ꓠꓱ ꓤ ꓔꓯ ꓘꓳ ꓣꓴ ꓠꓬ ꓥꓪ ꓔꓯ ꓘꓳ ꓣꓴ ꓟ ꓥ ꓡꓳ ꓐꓰ ꓟꓳ. ꓖꓶ ꓔ ꓟ ꓥꓳ꓿
ꓕꓱ ꓢꓲ ꓫꓬ ꓕꓳ ꓶ ꓝꓲ. ꓠꓬ ꓪꓴ. ꓔꓴ ꓣꓱꓽ ꓢꓴ ꓐꓰ ꓪꓴꓽ ꓞ, ꓟ ꓚꓱ, ꓔꓯ ꓟꓳ. ꓣꓳ ꓠꓲ, ꓟ ꓔꓯ ꓝꓮꓲ ꓓꓵꓽ ꓙ ꓠ, ꓟ ꓘꓴ ꓔ ꓡꓳ꓿ ꓙꓽ ꓣꓳꓺ_ ꓟ ꓐꓰ ꓒꓵꓽ ꓛꓳ_ ꓟ ꓠꓲ, ꓟ ꓔꓯ ꓘꓳ, ꓣꓴ ꓠ, ꓟ ꓢꓯꓼ ꓖꓶ ꓢꓲ ꓢꓲ ꓒ ꓬꓰ‐ꓢꓴ ꓔꓶꓻ ꓔ ꓟ ꓘꓴ ꓜꓲꓼ ꓞꓳ ꓠꓯꓼ ꓗꓪ ꓥ ꓟꓲ ꓡ ꓞꓳ ꓮ ꓙꓵ ꓔꓯ ꓒꓵꓽ ꓢꓲ ꓟꓬꓱꓺ ꓓꓳꓽ ꓖꓶ ꓠ, ꓟ ꓓꓵꓽ ꓙ ꓡꓰ ꓝꓲ_ ꓟ ꓥꓳ꓿
