ꓢꓲ ꓒ ꓠꓯꓸꓼ ꓗꓪ ꓬꓲꓼ ꓤ ꓠꓬꓲ ꓤ ꓐꓴꓳ ꓮ ꓙꓵꓽ ꓢꓴ ꓧꓪ. ꓧꓪꓸꓼ꓿ ꓕꓱ ꓕꓲ ꓠꓽ ꓠꓬ ꓢꓲꓽ ꓫꓬ ꓟ‐ꓡꓲ‐ꓬ ꓔꓯ ꓧꓪꓽ ꓖꓳ ꓓꓱꓽ ꓐꓰ ꓬꓲ ꓦ ꓟꓴ ꓗꓪ ꓗꓴꓷꓼ ꓗꓪ ꓔꓯ, ꓓꓯ ꓙꓰˍ ꓟ ꓑꓮꓲꓽ ꓔꓯ ꓣꓳ ꓬꓰ ꓔꓬ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓟ,ꓟ ꓠꓬ ꓝꓴꓲ. ꓟꓽ ꓙꓳ ꓟ ꓤ ꓟꓶ ꓤ ꓕꓲ ꓣꓳ ꓥ ꓡꓳ꓿ ꓐ, ꓐ ꓪꓴ‐ꓢ ꓠꓬ ꓕꓲ ꓣꓳˍ ꓟ ꓬꓲ ꓤ ꓔꓲ. ꓔꓯ ꓝꓲ ꓩꓴ ꓠ, ꓟ ꓐꓱ ꓶ ꓢꓲꓽ ꓫꓬ ꓟ‐ꓡꓲ‐ꓬ ꓔꓯ ꓟꓵꓽ ꓟꓽ ꓚꓰꓼ ꓟꓲ ꓟꓽ ꓚꓰꓼ ꓕꓯ ꓡꓰ ꓢꓲ ꓚꓰ. ꓔˍ ꓟ ꓥ ꓡꓳ꓿ ꓬꓲ ꓚꓰ ꓬꓲ ꓪꓴ. ꓕꓳꓽ ꓶ ꓗꓪ ꓐ, ꓐ ꓪꓴ‐ꓢ ꓠꓬ ꓠꓲꓽ ꓢ‐ꓓꓯ ꓔꓯ ꓙꓱꓽˍ ꓕꓯ ꓕꓱ ꓡꓱ ꓐꓯ ꓔ ꓟ ꓥ ꓡꓳ꓿ “ꓠꓴ ꓔꓯ ꓠꓬ ꓤ ꓟꓶ ꓤ ꓕꓲ ꓣꓳ ꓠꓴ ꓪꓴ. ꓓꓵ ꓗꓪ ꓬꓲ ꓛꓲ ꓒꓯ, ꓡꓰ ꓕꓳꓼ ꓞꓰ ꓗꓷˍ ꓥꓳ꓾” ꓐꓯˍ ꓟ ꓠꓬ ꓢꓲꓽ ꓫꓬ ꓟ‐ꓡꓲ‐ꓬ ꓔꓯ ꓖꓴ ꓢꓲ ꓠꓬꓲ ꓐꓯˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓞꓳ ꓤ ꓕꓲ ꓤꓶꓻ ꓗ ꓠꓯ. ꓕꓲ ꓤꓶꓻ꓾ ꓕꓲ ꓝ. ꓗ ꓠꓯ. ꓕꓲ ꓝ. ꓚꓬꓴ. ꓢꓲ ꓒ ꓔꓯ ꓥꓳ ꓡꓳ. ꓔꓬ ꓟ ꓠꓬ ꓢꓲꓽ ꓫꓬ ꓟ‐ꓡꓲ‐ꓬ ꓛꓲ ꓡ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓒꓬꓱꓽ ꓟꓳꓻ ꓡ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓒꓬꓱꓽ ꓟꓳ ꓡ ꓠ, ꓟ ꓐꓱ ꓶ ꓐ, ꓐ ꓪꓴ‐ꓢ ꓠꓬ ꓢꓲꓽ ꓫꓬ ꓟ‐ꓡꓲ‐ꓬ ꓔꓯ ꓢꓲ ꓚꓰ. ꓔˍ ꓟ ꓑꓶ. ꓓꓴ ꓬꓲ ꓠꓬ ꓤ ꓟꓶ ꓤ ꓮ ꓙꓵꓽ ꓟ ꓗꓪ ꓢꓲꓽ ꓫꓬˍ ꓟ꓾ ꓤ ꓟꓶ ꓤ ꓮ ꓙꓵꓽ ꓟ ꓕꓯꓽ ꓢꓲ ꓒꓴˍ ꓟ꓾ ꓤ ꓟꓶ ꓤ ꓮ ꓙꓵꓽ ꓟ ꓕꓯꓽ ꓢꓲ ꓗꓪ ꓮ ꓘꓶ. ꓠꓲ, ꓠꓵ ꓒꓵꓽˍ ꓟ꓾ ꓒꓵꓽ ꓗ ꓬꓰ ꓒꓵꓽˍ ꓟ ꓤ ꓟꓶ ꓤ ꓕꓲ ꓣꓳ ꓥ ꓡꓳ ꓐꓯˍ ꓟ ꓣꓳ ꓡꓳ. ꓟꓳˍ ꓡꓳ꓿
ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓪꓴ‐ꓢ ꓕꓲ ꓣꓳ ꓟꓲ ꓠꓯ ꓗꓪ ꓛꓲ ꓡ ꓠ, ꓟ ꓐꓱ ꓶ ꓠꓬ ꓤ ꓟꓶ ꓤ ꓕꓲ ꓣꓳ ꓒꓬꓱꓼ ꓠ, ꓟ ꓡꓰꓽ ꓟꓽ ꓞꓲ꓾ ꓤ ꓟꓶ ꓤ ꓖꓳ ꓕꓲ ꓣꓳ ꓟˍ ꓟꓲ ꓢꓲꓽ ꓫꓬˍ ꓟ ꓒꓵꓽ ꓓꓰ ꓡꓰˍ ꓟ ꓤ ꓟꓶ ꓤ ꓕꓲ ꓣꓳ ꓥ ꓠ ꓔˍ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓔꓬ ꓠ, ꓟ ꓤ ꓘꓶꓻ ꓠꓬ ꓝꓴꓲ. ꓟꓽ ꓙꓳ ꓙꓳ ꓢꓲꓽ ꓫꓬˍ ꓟ ꓥ ꓠ ꓔˍ ꓡꓳ꓿ ꓮ ꓠꓱ ꓘꓶꓽ ꓫꓵꓽ ꓡꓵ ꓦꓬꓼ ꓠꓬꓲ ꓗꓪ ꓘꓶꓽ ꓫꓵꓽ ꓝꓲ. ꓖꓶ ꓥ ꓟ ꓪꓴ‐ꓢ ꓬꓲ ꓙꓵꓽ ꓗ ꓗꓶ ꓔˍ ꓟ ꓝꓲ. ꓖꓶ ꓖꓳ ꓟ ꓠꓬ ꓢꓲꓽ ꓫꓬˍ ꓟ ꓡꓰ ꓐꓰ꓾ ꓒꓵꓽˍ ꓟ ꓗꓪ ꓐꓰ ꓫꓬ, ꓔ ꓟ ꓡꓰ ꓐꓰ꓾ ꓢꓲ ꓒ ꓬꓰ‐ꓢꓴ ꓛꓲ ꓡˍ ꓟ ꓘꓶꓽ ꓫꓵꓽ ꓫꓵꓼ ꓗꓪ ꓐꓰ ꓘꓶꓽ ꓫꓵꓽ ꓝꓲ. ꓖꓶ ꓥ ꓟ ꓢꓲꓽ ꓫꓬ ꓟ‐ꓡꓲ‐ꓬ ꓥ ꓟꓲ ꓢꓲꓽ ꓫꓬ ꓓꓰ ꓡꓰˍ ꓟ ꓥ ꓡꓳ꓿ ꓖꓳ ꓡꓰ ꓠꓬꓲ ꓟꓴ ꓗꓪ ꓝꓲ ꓓꓴ ꓚꓬ‐ꓑꓷ‐ꓡꓰ ꓡꓰ ꓢꓲꓽ ꓫꓬ ꓟ‐ꓡꓲ‐ꓬ ꓔꓯ ꓡ ꓢꓲ ꓠꓬꓲ “ꓮ ꓪꓰ ꓟ‐ꓡꓲ‐ꓬ ꓣꓱꓽ ꓛꓰꓽ ꓐꓲ ꓞ, ꓢꓴ ꓢꓲ ꓒ ꓠꓴ ꓐꓰ ꓕꓲ ꓪˍ ꓔꓬ ꓡꓳ” ꓐꓰ ꓐꓯ ꓔ ꓡꓳ꓿ ꓣꓱꓽ ꓛꓰꓽ ꓐꓲˍ ꓡꓳ ꓐꓯ ꓔ ꓡꓳ꓿ ꓣꓱꓽ ꓛꓰꓽ ꓕꓲ ꓐꓶꓽ ꓤ ꓡꓰꓽ ꓙꓳˍ ꓟ ꓟꓽ ꓥ꓿ ꓣꓱꓽ ꓛꓰꓽ ꓒ ꓐꓲ ꓙꓳˍ ꓟ ꓑꓶ. ꓓꓴ ꓠꓯꓸꓼ ꓘꓴꓽ ꓗꓪ ꓝꓴꓲ. ꓐꓯˍ ꓟ ꓬꓲ ꓔꓬ ꓔꓶ. ꓕꓲ ꓔꓶ.ˍ ꓟꓲ ꓟꓽ ꓙꓳ꓿ ꓕꓱ ꓟ ꓠꓬ ꓪꓴ‐ꓢ ꓬꓲ ꓢꓲ ꓚꓰ. ꓔ ꓟ ꓟꓶ ꓤ ꓥ ꓡꓳ꓿
