ꓘꓷ‐ꓠ ꓤ ꓟꓶ ꓤ ꓬꓲ ꓙꓵꓻ ꓠꓲ, ꓮ ꓟꓬ, ꓙꓳ ꓟ (Daily reflection )
ꓧꓪ. ꓧꓪ ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 15ꓽ21‐28 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓘꓷ‐ꓠ ꓘ, ꓗꓪ ꓐꓰ ꓤ ꓟꓶ ꓤ ꓕꓲ ꓣꓳ ꓙꓵꓻ ꓠꓲ, ꓮ ꓟꓬ, ꓙꓳ ꓟ ꓚꓱ, ꓔꓯ ꓡꓳ. ꓟꓳ ꓓ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓢꓲ‐ꓓꓳ ꓟꓵꓽ ꓗꓪ ꓙꓰ ꓛꓲ ꓡꓰ ꓟ ꓙꓵ, ꓕꓯ ꓬꓯ‐ꓢꓷ‐ꓡꓲ ꓡ ꓞꓳ ꓟꓽ ꓥ ꓟ ꓘꓷ‐ꓠ ꓤ ꓟꓶ ꓤ ꓕꓲ ꓣꓳ ꓡ ꓢꓲ ꓠꓬꓲ ꓢꓲꓺ ꓒꓽꓳ ꓓ‐ꓪꓴ ꓞꓲ ꓤ ꓡꓯ, ꓤꓽꓳ ꓥꓪ ꓔꓯ ꓫꓱ, ꓤ ꓤ ꓡꓯ꓿ ꓐꓰ ꓐꓯ ꓢꓲ ꓠꓬꓲ ꓬꓲ ꓮ ꓟꓲ ꓠꓬ ꓠꓲꓽ ꓜꓶ ꓞ ꓢꓲ ꓮ ꓘꓶ. ꓫ. ꓙꓵꓻ ꓔꓬ ꓟ ꓚꓱ, ꓔꓯ ꓙ ꓣꓳ ꓟ ꓠꓲ, ꓟ ꓗꓪ ꓐꓰ ꓐꓯ ꓖꓶ ꓟ ꓥ ꓡꓳ꓿
ꓓꓽ ꓪꓴ. ꓕꓯ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓓꓰꓽ ꓘꓶꓽ ꓔꓯ ꓟꓽ ꓪꓳ ꓔꓬ ꓗꓷ ꓥ ꓟꓲ ꓤ ꓟꓶ ꓤ ꓙꓵꓻ ꓠꓲ, ꓔꓯ ꓡꓳ. ꓟꓳ ꓗꓷ ꓠꓬ ꓠꓽ ꓫꓬ ꓖꓶ ꓗꓷ ꓟ ꓥ ꓡꓳ꓿
ꓠꓬꓲ. ꓠꓬꓲ ꓟ ꓙꓵ, ꓗꓪ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓶꓻ ꓓꓰ ꓪꓽ ꓘꓴ ꓘꓶꓽ ꓔꓯ ꓐ, ꓐ ꓪꓴ‐ꓢ ꓠꓬ ꓓꓽ ꓪꓴ. ꓕꓯ ꓟꓽ ꓪꓳ ꓔꓬ ꓥ ꓟꓲ ꓣꓳ ꓙꓵꓻ ꓠꓲ, ꓣꓱ ꓢꓲ ꓠꓬꓲ ꓟꓽ ꓠꓽ ꓠꓽ ꓶꓻ ꓓꓰ ꓠꓬ ꓣꓳ ꓪꓽ ꓘꓴ ꓘꓶꓽ ꓔꓯ ꓠ ꓠ, ꓖꓶ ꓡ ꓟ ꓔꓯ ꓟ. ꓖꓶ ꓔ ꓡꓳ꓿
ꓔꓱ ꓚꓵˍ ꓟ ꓪꓽ ꓘꓴ ꓟ ꓠꓬ ꓪꓴ‐ꓢ ꓠꓯ, ꓗꓪ ꓐꓰ ꓙꓵꓽ ꓪ ꓓꓰ ꓟꓽ ꓥ꓾ ꓣꓳ ꓚꓲ. ꓛꓬ ꓔꓯ ꓙ ꓣꓳ ꓠꓲ, ꓟ ꓗꓪ ꓪꓴ‐ꓢ ꓠꓯ, ꓗꓪ ꓢꓲꓺ ꓒ ꓟꓲ ꓙ ꓗꓪ ꓙꓰ ꓠ, ꓟ ꓬꓲ ꓔꓯ ꓦꓻ ꓡꓱ ꓠ, ꓟ ꓥ ꓡꓳ꓿
ꓚꓬꓴ ꓙ ꓟ ꓣꓱ ꓛꓰ ꓠꓬ ꓮ ꓙꓵꓽ ꓢꓴ ꓐꓱ ꓶ ꓥ ꓟ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓟ. ꓖꓶ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓬꓲ ꓚꓲ. ꓛꓬ ꓬꓲ‐ꓢꓷ‐ꓡꓰ ꓦꓲ ꓗꓪ ꓒꓲꓼ ꓬꓰ ꓟ ꓮ ꓣꓳ ꓔꓯ ꓡꓰꓽ ꓟꓽ ꓥ ꓠꓬ ꓥꓪ ꓔꓯ ꓟꓽ ꓝꓲ ꓔ ꓐꓰ ꓐꓯ ꓔ ꓡꓳ꓿ ꓖꓳ ꓟ ꓠꓬ ꓬꓲ‐ꓢꓷ‐ꓡꓰ ꓡ ꓞꓳ ꓔꓯ ꓪꓴ‐ꓢ ꓡꓰ ꓢꓲ ꓔ ꓟ ꓢꓴ ꓐꓴ ꓠꓬ ꓪꓴ‐ꓢ ꓡꓰ ꓚꓬꓴ ꓙ ꓣꓱ ꓛꓰ ꓔꓯ ꓓꓽ ꓪꓴ. ꓘꓳ, ꓣꓴ ꓪ ꓡꓰ ꓢꓴ ꓐꓴ ꓐꓰ ꓐꓯ ꓔ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓘꓷ‐ꓠ ꓗꓪ ꓒꓬꓱꓼ ꓡꓰ ꓟ ꓚꓱ, ꓠꓬ ꓬꓲ‐ꓢꓷ‐ꓡꓰ ꓡ ꓞꓳ ꓟꓽ ꓥ ꓠꓱ. ꓐꓯ ꓢꓴ ꓡ ꓞꓳ ꓐꓴ ꓔꓯ ꓥ ꓟꓲ ꓪꓴ‐ꓢ ꓡꓰ ꓚꓬꓴ ꓙ ꓣꓱ ꓛꓰ ꓘꓽ ꓘꓶ ꓠꓬ ꓒꓴ ꓖꓶ ꓔ ꓡꓳ ꓐꓰ ꓟ. ꓖꓶ ꓔ ꓟꓥ ꓡꓳ꓿
ꓣꓳ ꓡꓱ ꓥ ꓟ ꓪꓴ. ꓠꓬꓲ ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓐꓴ ꓠꓬ ꓞꓳ ꓫꓵꓽ ꓕꓲ ꓫꓵꓽ ꓐꓱ ꓶ ꓡꓰ ꓟꓽ ꓥ꓾ ꓟꓴ ꓗꓳ ꓓꓵ ꓓꓵ ꓗꓪ ꓔꓬ ꓟ ꓞꓳ ꓫꓵꓽ ꓞꓳ ꓙꓵ ꓐꓴ ꓮ ꓙꓵꓽ ꓐ ꓟ ꓘꓴ ꓜꓲꓼ ꓞꓳ ꓥ ꓢꓲ ꓠꓬꓲ ꓪꓴ‐ꓢ ꓠꓵꓻ ꓠꓲ, ꓪꓴ‐ꓢ ꓡꓰ ꓚꓬꓴ ꓙ ꓣꓱ ꓛꓰ ꓡꓯ ꓫꓴ ꓔꓯ ꓡ ꓞꓳ ꓮ ꓙꓵꓽ ꓘꓳ, ꓣꓴ ꓪ ꓠ, ꓟ ꓐꓱ ꓶ ꓥ ꓡꓳ꓿
ꓪꓴ‐ꓢ ꓠꓯ, ꓗꓪ ꓞꓳ ꓫꓵꓽ ꓟꓽ ꓘꓶꓽ꓾ ꓘꓴ ꓜꓲꓼ ꓞꓳ ꓟꓽ ꓘꓶꓽ ꓪꓴ‐ꓢ ꓠꓬ ꓠꓵꓻ ꓠꓲ, ꓢꓲꓽ ꓒ ꓪꓴ. ꓠꓬꓲ ꓥ ꓡꓳ꓿
ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓡꓰ ꓪꓽ ꓘꓴ ꓙ ꓖꓶ ꓠꓬ ꓠ ꓓꓴ ꓒꓬ ꓓꓴ ꓫ. ꓓꓴ ꓟꓷ ꓓꓴ ꓗꓪ ꓐꓰ ꓡꓰ ꓙꓰ ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓡ ꓟ ꓤ ꓟꓶ ꓤ ꓠꓬ ꓬꓲ ꓐꓱ ꓶ ꓓꓰꓽ ꓟ ꓟꓽ ꓥ ꓠꓲꓽ ꓤꓶ ꓞ ꓢꓲ ꓠꓬꓲ ꓮ ꓘꓶ. ꓫ. ꓔꓬ ꓠ ꓬꓲ ꓮ ꓟꓲ ꓐꓱ ꓶ ꓢꓲꓺ ꓒ ꓬꓰ‐ꓢꓴ ꓔꓯ ꓠꓽ ꓫꓬ ꓖꓶ ꓠ,ꓟ ꓐꓱ ꓶ ꓓꓰꓽ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓙꓲꓻ ꓫꓬ ꓢꓴ ꓐꓴ ꓡꓰ ꓪꓽ ꓘꓴ ꓙ ꓖꓶ ꓠ, ꓟ ꓝꓮꓲ ꓘꓴ ꓜꓲꓼ ꓞꓳ ꓠꓯ, ꓗꓪ ꓙꓰ ꓢꓲ ꓠꓬꓲ ꓠꓻ ꓒꓬ ꓓꓴ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓡ ꓕꓯ ꓪꓽ ꓘꓴ ꓙ ꓖꓶ ꓠ, ꓟ ꓶꓻ ꓓꓰ ꓠ, ꓟ ꓣꓳ ꓚꓵˍ ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓪꓽ ꓘꓴ ꓠ, ꓟ ꓢꓯꓼ ꓐ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙ ꓖꓶ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓐꓯ ꓟ. ꓔꓬ ꓟ ꓠꓬ ꓪꓽ ꓘꓴ ꓕꓯ ꓟꓽ ꓠꓽ ꓠꓽ ꓶꓻ ꓓꓰ ꓠ, ꓟ
ꓪꓴ‐ꓢ ꓠꓲ ꓡꓶ ꓒꓬꓱꓼ ꓡ ꓝꓲ ꓠ, ꓟ ꓪꓽ ꓘꓴ ꓠ, ꓟ
ꓣꓳ ꓚꓲ. ꓛꓬ ꓔꓯ ꓙ ꓣꓳ ꓟ ꓠꓲ, ꓟ ꓗꓪ ꓐꓰ ꓪꓽ ꓘꓴ ꓠ, ꓟ ꓠꓴ ꓥꓪ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓘꓴ ꓔꓬ ꓟ ꓥꓡꓳ꓿
ꓢꓲꓺ ꓒ ꓠꓯ, ꓗꓪ ꓙꓰ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓠ
