ꓟꓲ ꓠꓯ ꓦꓲꓻ ꓓ ꓠꓬ ꓠꓻ ꓠ ꓗꓪ ꓛꓲ ꓠꓻ ꓒꓬ ꓓꓴ ꓔꓳ, ꓜꓳ ꓔꓬ ꓟ (laudatosi)
ꓧꓪ, ꓧꓪ ꓠꓬꓲ. ꓠꓬꓲ ꓝꓮꓲ ꓕꓲ ꓧꓪ, ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓟꓲ ꓠꓯ ꓦꓲꓻ ꓓꓽ ꓠꓬ ꓠꓻ ꓒꓬ ꓓꓴ ꓐꓰ ꓫ. ꓓꓴ ꓟꓷꓼ ꓓꓴ ꓓꓽ ꓟ ꓔꓳ, ꓜꓳ ꓔꓬ ꓡꓳ ꓐꓰ ꓐꓯ ꓟ ꓚꓱ, ꓗꓪ ꓐꓰ ꓮ ꓙꓵꓽ ꓢꓴ ꓔꓯ ꓐꓯ ꓟ. ꓖꓶ ꓓꓴ ꓥ ꓡꓳ꓿
ꓮ ꓟꓶ ꓣꓳ ꓔꓬ ꓟ ꓟꓲ ꓠꓯ ꓦꓲꓻ ꓓꓽ ꓠꓬ ꓚꓱ, ꓔꓯ ꓕꓲ ꓒ ꓤ ꓓꓴ ꓙ ꓠꓬꓲ ꓡꓯ꓿ ꓔꓲꓺ ꓒ ꓪ ꓔꓲ ꓑꓳꓑꓰ ꓝꓣꓮꓠꓚꓲꓢ ꓡꓰ ꓐꓳ ꓔ ꓟ ꓡꓮꓴꓓꓮꓔꓳꓢꓲ ꓟꓵꓽ ꓘꓳꓼ ꓒꓳ, ꓡ ꓟ ꓮ ꓡꓲ ꓐꓰ ꓗꓽ ꓕꓽ ꓠꓯˍ ꓟ ꓕꓳ ꓶ ꓗꓪ ꓟꓲ ꓠꓯ ꓠꓬ ꓣꓳ ꓮ ꓙꓵꓽ ꓢꓴ ꓔꓬ ꓟ ꓦꓲꓻ ꓓꓽ ꓐꓰ ꓐꓯ ꓔ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓮ ꓟꓶ ꓟ ꓙꓵ, ꓗꓪ ꓣꓳ ꓮ ꓙꓵꓽ ꓢꓴ ꓔꓬ ꓟ ꓟꓲ ꓠꓯ ꓦꓲꓻ ꓓꓽ ꓠꓬ ꓮ ꓔꓳ ꓐꓬ ꓔꓬ ꓟ ꓐꓰ ꓫꓵꓻ ꓠ ꓗꓪ ꓛꓲ ꓠꓻ ꓓꓴ ꓒꓬ ꓓꓴ ꓫ. ꓓꓴ ꓟꓷꓽ ꓓꓴ ꓔꓳ, ꓜꓳ ꓔꓬ ꓟ ꓥꓡꓳ꓿
ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓘꓶ. ꓞ ꓡ ꓟ꓾ ꓬꓲꓻ ꓙꓬ ꓙꓵꓽ ꓟꓵꓽ ꓙꓴꓽ ꓙꓵ ꓗꓷ ꓡꓰ ꓟ ꓠꓬ ꓟꓲ ꓠꓯ ꓠꓬ ꓠꓻ ꓓꓴ ꓓꓽ ꓟ ꓔꓳ, ꓜꓳ ꓔꓬ ꓡꓳ ꓐꓰ ꓐꓯ ꓔꓬ ꓟ ꓢꓷ. ꓡꓰ ꓓꓴ ꓥ ꓡꓳ꓿
ꓕꓱ ꓡꓱ ꓐꓰ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫ. ꓓꓴ ꓟꓷꓼ ꓓꓴ ꓓꓽ ꓟ ꓔꓳ, ꓜꓳ ꓔꓬ ꓢꓴ ꓐꓴ ꓠꓬ ꓞꓳ ꓫ. ꓐꓴ ꓥ ꓡꓳ꓿ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓡ ꓟ ꓙꓵ, ꓕꓯ ꓞꓳ ꓫ. ꓐꓴ ꓠꓬ ꓮ ꓘꓶ. ꓛꓲ ꓠꓲ, ꓫ. ꓟꓬ ꓫ. ꓓꓴ ꓔꓳ, ꓜꓳ ꓢꓲ ꓠꓬꓲ ꓡ ꓞꓳ ꓫꓵꓻ ꓡꓰ ꓟ꓾ ꓠꓻ ꓓꓴ ꓡꓰ ꓟ ꓮ ꓟꓬ, ꓠꓬ ꓞꓳ ꓫ. ꓐꓴ ꓮ ꓟꓬ, ꓔꓳ, ꓜꓳ ꓟ ꓥ ꓡꓳ꓿
ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓘꓶ. ꓛꓲ ꓞ ꓡ ꓟ ꓔꓯ ꓫꓵꓽ ꓪꓴꓽ ꓓ ꓟ ꓔꓳ, ꓜꓳ ꓔꓬ ꓟ ꓠꓬ ꓞꓳ ꓫ. ꓐꓴ ꓥ ꓡꓳ꓿
ꓡꓳ ꓒꓱ ꓓꓽ ꓦꓲꓻ ꓓꓽ ꓗꓪ ꓔꓬ ꓢꓴ (ꓮꓲꓣꓚꓳꓠ) ꓣꓱ ꓘꓴ ꓢꓴ ꓐꓴ ꓠꓬ ꓟꓲ ꓠꓯ ꓮ ꓘꓶ. ꓛꓲ ꓞ ꓡ ꓥ ꓟꓲ ꓫꓵꓽ ꓪꓴꓽ ꓮ ꓘꓶ. ꓟꓽ ꓙꓳ ꓖꓳ ꓡꓱ ꓥ ꓟꓲ ꓞꓳ ꓫ. ꓐꓴ ꓠꓬ ꓠꓻ ꓒꓬ ꓓꓴ ꓔꓳ, ꓜꓳ ꓢꓲ ꓠꓬꓲ ꓫꓵꓽ ꓪꓴꓽ ꓓꓽ ꓟ ꓔꓳ, ꓜꓳ ꓡꓰ ꓢꓴ ꓐꓴ ꓥ ꓡꓳ꓿
ꓕꓲ ꓠꓬꓲ ꓜ ꓓꓴ ꓕꓲ ꓠꓬꓲ ꓟꓬꓱꓽ ꓬꓰ ꓢꓲ ꓠꓬꓲ ꓜ ꓔꓬ ꓟ ꓞꓳ ꓫ. ꓐꓴ ꓠꓬ ꓞꓳ ꓙꓳ ꓢꓯ. ꓔꓬ ꓚꓱ, ꓗꓪ ꓮ ꓘꓶ. ꓫ. ꓡꓰ ꓟ ꓥ ꓡꓳ꓿
ꓟꓲ ꓠꓯ ꓠꓬ ꓮ ꓘꓶ. ꓛꓲ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓟ꓾ ꓙꓼ ꓦꓲꓻ ꓓꓽ ꓟ ꓮ ꓟꓬ, ꓫꓬ, ꓢꓲ ꓠꓬꓲ ꓟꓴ ꓘꓶ ꓮ ꓟꓬ, ꓓꓳ ꓡ ꓟ ꓑꓶ. ꓓꓴ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓔꓯ ꓫꓵꓽ ꓪꓴꓽ ꓓꓽ ꓒꓬꓱꓼ ꓡ ꓝꓲ ꓟ ꓥ ꓡꓳ꓿
ꓕꓱ ꓡꓱ ꓐꓰ ꓔꓶ. ꓜ ꓔꓶ ꓓꓳ ꓢꓴ ꓟꓬꓱꓽ ꓬꓰ ꓢꓴ ꓐꓴ ꓔꓶ ꓜ ꓔꓶ ꓓꓳ ꓚꓱ, ꓗꓪ ꓫ. ꓡꓰ ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓓꓳ ꓓꓴ ꓬꓲꓻ ꓙꓬ ꓟꓽ ꓙꓳ ꓗꓷ ꓡꓰ ꓟ꓾ ꓮ ꓘꓶ. ꓛꓲ ꓶꓻ ꓟ ꓬꓲ ꓔꓶ. ꓗꓪ ꓬꓲꓻ ꓙꓬ ꓪ ꓠ, ꓟ ꓙꓰ ꓠ, ꓟ ꓕꓱ ꓡꓰ ꓐꓰ ꓞꓳ ꓫ. ꓐꓴ ꓢꓯ. ꓔꓬ ꓚꓱ, ꓗꓪ ꓫꓵꓽ ꓪꓴꓽ ꓓ ꓔꓳ, ꓜꓳ ꓡ ꓓꓴ ꓥ ꓡꓳ꓿
ꓡꓮꓴꓓꓮꓔꓳꓢꓲ ꓡꓰ ꓣꓳ ꓔꓯ ꓮ ꓘꓶ. ꓛꓲ ꓣꓳ ꓚꓵˍ ꓟ ꓕꓲ ꓫꓵꓽ ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓕꓱ ꓟ ꓠꓬ ꓟꓲ ꓠꓯ ꓫꓵꓻ ꓠ ꓗꓪ ꓛꓲ ꓠꓻ ꓒꓬ ꓓꓴ ꓔꓳ, ꓜꓳ ꓔꓬ ꓟ ꓠꓬ ꓞꓳ ꓫ. ꓐꓴ ꓔꓳ, ꓜꓳ ꓔꓬ ꓟ ꓡꓰ ꓕꓲ ꓡꓰ ꓥ ꓡꓳ ꓐꓰ ꓐꓯ ꓖꓶ ꓔ ꓟ ꓥ ꓡꓳ꓿
ꓣꓳ ꓔꓬ ꓟꓵꓽ ꓔꓯ ꓐꓬ ꓡꓰ ꓝꓲ ꓟ ꓚꓱ, ꓮ ꓙꓵꓽ ꓔꓯ ꓤ ꓟꓳ ꓢꓲ ꓠꓬꓲ ꓝꓮꓲ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓙꓲ ꓡꓰ ꓝꓲ ꓠ,ꓟ ꓚꓱ, ꓔꓯ ꓟꓬꓱꓽ ꓬꓰ ꓢꓯꓼ ꓕꓵꓼ ꓠ, ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫꓵꓽ ꓪꓴꓽ ꓔꓳ, ꓜꓳ ꓡ ꓟ ꓠꓬ ꓣꓳ ꓧꓪꓽ ꓖꓳ ꓓꓱ ꓡꓰ ꓟꓽ ꓞꓲ ꓦꓻ ꓕꓲ ꓒꓳ, ꓗꓪ ꓥ ꓟꓲ ꓠꓻ ꓓꓴ ꓙꓳ ꓡꓰ ꓝꓲ ꓟ ꓥ ꓡꓳ꓿
ꓣꓳ ꓟꓲ ꓠꓯ ꓘꓴꓽ ꓗꓪ ꓙꓳ ꓟ ꓫꓵꓺ ꓐꓰ ꓒꓴ ꓫꓵꓽ ꓒꓴ ꓙꓰ ꓔꓯ ꓠꓯ. ꓦꓰ ꓙꓵꓽ ꓢꓲ ꓠꓬꓲ ꓒꓴ ꓧꓪ, ꓟ ꓚꓱ, ꓔꓯ ꓤ ꓟꓳ ꓓꓴ ꓬꓰ ꓡꓯ꓿
ꓑꓡꓮꓢꓔꓲꓚ ꓐꓰ ꓕꓲ ꓧꓪ ꓣꓱ ꓟ ꓣꓱ ꓫꓵꓽ ꓮ ꓙꓵꓽ ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓛꓲ ꓡ ꓟ ꓣꓳ ꓮ ꓟꓲ ꓮ ꓐꓲ ꓐꓴ ꓔꓯ ꓙꓲ ꓟ ꓟꓵꓽ ꓘꓳꓼ ꓖꓶ ꓐ ꓡ ꓢꓴ ꓒꓬꓱꓼ ꓡ ꓢꓴ ꓒꓬꓱꓼ ꓠ, ꓟ ꓢꓯꓼ ꓕꓵꓼ ꓡꓯ꓿
ꓖꓳ ꓡꓱ ꓠꓬ ꓣꓳ ꓐꓴ ꓜ ꓓꓴ ꓓꓳ ꓓꓴ ꓔꓯ ꓮ ꓔꓳ ꓔꓳ ꓕꓽ ꓡꓳ ꓓꓴ ꓬꓰ ꓡꓯ꓿
ꓑꓡꓮꓢꓔꓲꓚ ꓣꓱ ꓟ ꓔꓯ ꓤ ꓟꓳ ꓓꓴ ꓬꓰ ꓡꓯ꓿
ꓣꓳ ꓞꓳ ꓙꓳ ꓚꓱ, ꓔꓯ ꓙꓲ ꓟ ꓚꓱ, ꓗꓪ ꓞꓳ ꓙꓳ ꓓꓴ ꓬꓰ ꓡꓯ꓿
ꓕꓱ ꓡꓰ ꓐꓰ ꓣꓳ ꓓꓲ ꓟ ꓚꓱ, ꓔꓯ ꓬꓰ ꓔꓴ ꓢꓲ ꓠꓬꓲ ꓙꓲ ꓟ ꓟꓵꓽ ꓘꓳꓼ꓾ ꓙꓲ ꓟ ꓟꓲ ꓠꓯ ꓒꓬꓱꓼ ꓡ ꓝꓲ ꓠ, ꓟ ꓢꓯꓼ ꓕꓵꓼ ꓡꓯ꓿
