ꓧꓳꓽ ꓓꓱꓽ ꓔꓲ, ꓒꓽ ꓬꓳ‐ꓦ ꓦꓵꓻ ꓡ ꓠ, ꓟ (Daily reflection)
ꓧꓪ. ꓧꓪ ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 1ꓽ5‐15 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓖꓳ ꓓꓱꓽ ꓔꓲ, ꓒꓽ ꓬꓳ‐ꓦ ꓦꓵꓻ ꓡ ꓠ, ꓟ ꓚꓱ, ꓥ ꓡꓳ꓿
ꓪꓴ‐ꓢ ꓠꓬ ꓞꓲꓼ ꓪꓴꓽ ꓡꓰ ꓢꓲ ꓠꓬꓲ ꓤ ꓠꓱ ꓟꓽ ꓙꓳ ꓟ ꓢ‐ꓚꓬ‐ꓡꓬ‐ꓬ ꓐꓰ ꓬꓲ‐ꓡꓲ‐ꓫ‐ꓑꓷ ꓐꓴ ꓠꓬꓲꓽ ꓣꓳ ꓔꓯ ꓪꓴ‐ꓢ ꓟꓬꓱꓺ ꓓꓳꓽ ꓓꓳ ꓡ ꓠ, ꓟ ꓟꓬꓱꓽ ꓔꓯ ꓬꓰ ꓗꓷ ꓟ ꓥ ꓡꓳ꓿ ꓟꓲ ꓠꓯ ꓡ ꓞꓳ ꓐꓴ ꓓꓵ ꓙ ꓚꓱ, ꓗꓪ ꓐꓰ ꓠꓬ ꓞꓲꓼ ꓪꓴꓽ ꓡꓰ ꓢꓴ ꓐꓴ ꓠꓯ, ꓗꓪ ꓤ ꓠꓱ ꓤ ꓦꓵꓻ ꓡ ꓠ, ꓟ ꓮ ꓘꓶ. ꓫ. ꓟ ꓥ ꓡꓳ꓿
ꓣꓳ ꓡꓱ ꓥ ꓟꓲ ꓖꓳ ꓓꓱꓽ ꓔꓲ, ꓒꓽ ꓬꓳ‐ꓦ ꓐ, ꓐ ꓐꓰ ꓟ, ꓟ ꓐꓴ ꓠꓬꓲꓽ ꓣꓳ ꓠꓬ ꓪꓴ‐ꓢ ꓣꓱ ꓛꓰ ꓘꓳ, ꓣꓴ ꓪ ꓢꓴ ꓥ ꓟ ꓪꓴ. ꓠꓬꓲ ꓪꓴ‐ꓢ ꓡꓰ ꓡꓯꓽ ꓫꓴꓻ ꓖꓶ ꓟ ꓔꓯ ꓘꓳ, ꓣꓴ ꓪ ꓡꓰ ꓢꓴ ꓐꓴ ꓥ ꓡꓳ꓿
ꓢ‐ꓚꓬ‐ꓡꓬ‐ꓬ ꓠꓬ ꓪꓽ ꓘꓴ ꓦꓲꓻ ꓜꓲꓼ ꓦꓲꓻ ꓗꓪ ꓔꓲꓺ ꓒ ꓕꓲ ꓣꓳ ꓥ ꓟ ꓑꓶ. ꓓꓴ ꓬꓲ ꓠꓬ ꓪꓽ ꓘꓴ ꓔꓬ ꓟ ꓙꓵ, ꓔꓯ ꓟꓴ ꓗꓪ ꓝꓲ ꓓꓴ ꓕꓲ ꓣꓳ ꓡꓰ ꓬꓲ ꓔꓯ ꓕꓽ ꓙꓳꓺ ꓐꓰ ꓐꓯ ꓖꓶ ꓡꓳ꓿ ꓠꓴ ꓤ ꓟꓶ ꓠꓬ ꓤ ꓠꓱ ꓤ ꓕꓲ ꓣꓳ ꓦꓵꓻ ꓡ ꓥꓳ꓿ ꓬꓲ ꓔꓯ ꓬꓳ‐ꓦ ꓟꓬꓱꓺ ꓖꓶ ꓐꓰ ꓐꓯ ꓖꓶ ꓡꓳ꓿
ꓬꓲ ꓠꓬ ꓮ ꓘꓶ. ꓛꓲ ꓓꓴ ꓙ ꓟꓶ ꓡꓰ ꓟ ꓥ ꓡꓳ꓿ ꓪꓴ‐ꓢ ꓠꓬ ꓮ ꓫꓵꓽ ꓥ ꓟꓲ ꓒꓬꓱꓼ ꓡ ꓝꓲ ꓐ ꓡ ꓢꓴ ꓪꓴ‐ꓢ ꓥ ꓡꓳ ꓐꓰ ꓬꓳ‐ꓦ ꓐ, ꓐ ꓢ‐ꓚꓬ‐ꓡꓬ‐ꓬ ꓔꓯ ꓟꓴ ꓗꓪ ꓝꓲ ꓓꓴ ꓡꓰ ꓐꓯ ꓖꓶ ꓡꓳ꓿
ꓐ, ꓐ ꓪꓴ‐ꓢ ꓪꓴ‐ꓢ ꓠꓬ ꓠꓴ ꓥꓪ ꓪꓽ ꓘꓴ ꓘꓶꓽ ꓔꓯ ꓮ ꓕꓯ ꓥ ꓟꓲ ꓠ ꓠ, ꓖꓶ ꓢꓴ ꓪꓴ‐ꓢ ꓥ ꓡꓳ꓿ ꓣꓳ ꓶꓻ ꓓꓰ ꓪꓽ ꓘꓴ ꓗꓷ ꓟ ꓙꓵ, ꓕꓯ ꓣꓳ ꓥꓳꓽ ꓡꓳ. ꓓꓴ ꓟꓽ ꓙꓳ ꓗꓷ ꓡꓰ ꓟ ꓙꓵ, ꓕꓯ ꓥ ꓟꓲ ꓪꓴ‐ꓢ ꓠꓬ ꓣꓳ ꓐꓱ ꓶ ꓓꓴꓽ ꓙ ꓟꓶ ꓓꓴ ꓟꓬꓱꓽ ꓔꓯ ꓬꓰ ꓖꓶ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓽ ꓠꓽ ꓠꓽ ꓪꓽ ꓘꓴ ꓠ, ꓟ ꓣꓳ ꓚꓵ ꓡꓳ꓿
ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓪꓽ ꓘꓴ ꓟ ꓠꓬ ꓮ ꓘꓶ. ꓣꓳ ꓚꓵˍ ꓟ ꓔꓯ ꓠꓬꓲ. ꓠꓬꓲ ꓣꓳ ꓐꓴ ꓡꓳ. ꓟꓳ ꓪ ꓓ ꓟ ꓥ ꓡꓳ꓿ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓐ, ꓐ ꓢ‐ꓚꓬ‐ꓡꓲ‐ꓬ ꓠꓬ ꓪꓴ‐ꓢ ꓔꓯ ꓔꓲ, ꓚꓬ ꓖꓶ ꓢꓲ ꓠꓬꓲ ꓪꓽ ꓘꓴ ꓟ ꓙꓵ, ꓔꓯ ꓟꓴ ꓗꓪ ꓝꓲ ꓓꓴ ꓡꓰ ꓬꓲ ꓔꓯ ꓟꓳ ꓖꓶ ꓡ ꓢꓲ ꓠꓬꓲ ꓫ. ꓕꓱ ꓡ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓥ ꓟꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓔꓯ ꓓꓳ ꓟꓴ ꓫꓱ, ꓖꓶ ꓪꓽ ꓘꓴ ꓠ, ꓟ ꓮ ꓘꓶ. ꓛꓲ ꓣꓳ ꓚꓵˍ ꓟ ꓥ ꓡꓳ꓿ ꓣꓳ ꓠꓯ, ꓗꓪ ꓣꓱ ꓬꓯꓼ ꓟ ꓣꓱ ꓛꓰ ꓔꓯ ꓪꓴ‐ꓢ ꓠꓯ, ꓗꓪ ꓟꓽ ꓠꓽ ꓠꓽ ꓓꓰ ꓠ, ꓟ ꓐꓱ ꓶ ꓪꓴ‐ꓢ ꓡꓰ ꓘꓴ ꓔꓬ ꓟ ꓥꓡꓳ꓿
ꓬꓲ‐ꓡꓲ‐ꓬ ꓡꓰ ꓐꓰ ꓪꓴ‐ꓢ ꓦꓻ ꓡꓰ ꓐꓲ ꓤ ꓢꓴ ꓬꓳ‐ꓦ ꓒꓬꓱꓼ ꓡ ꓟ ꓚꓱ, ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓦꓵꓻ ꓡ ꓟ ꓮ‐ꓐꓲ ꓬꓳ‐ꓦ ꓠꓬ ꓪꓴ‐ꓢ ꓦ ꓐꓲ ꓤ ꓢꓴ ꓥ ꓢꓲ ꓠꓬꓲ ꓢꓲꓺ ꓒ ꓙ ꓖꓴ ꓙ ꓖꓶ ꓢꓴ ꓒꓬꓱꓼ ꓡ ꓟ ꓥ ꓡꓳ꓿
ꓖꓳ ꓓꓱꓽ ꓔꓲ, ꓒꓽ ꓬꓳ‐ꓦ ꓠꓬ ꓘꓶꓼ ꓫꓵꓼ ꓡꓵ ꓗꓪ ꓬꓲ ꓟꓶ ꓟꓷ ꓠꓷ ꓝ. ꓥ ꓟ ꓡꓰ ꓐꓰ ꓬꓲ ꓠꓬ ꓘꓶꓼ ꓫꓵꓼ ꓫꓵꓼ ꓦꓬꓼ ꓠꓬꓲ ꓗꓪ ꓢꓲꓺ ꓒ ꓬꓰ‐ꓢꓴ ꓐꓱ ꓶ ꓟ. ꓟꓲ ꓚꓺ ꓖꓶ ꓢꓴ ꓢꓲꓺ ꓒ ꓙ ꓖꓴ ꓙ ꓖꓶ ꓢꓴ ꓠꓬꓲ ꓟꓳ ꓓꓴ ꓔꓯ ꓟ. ꓖꓶ ꓢꓴ ꓥ ꓡꓳ꓿
ꓬꓲ ꓠꓬ ꓮ ꓘꓶ. ꓛꓲ ꓔꓱ ꓚꓵ ꓢꓴ ꓥ ꓟ ꓡꓰ ꓟꓽ ꓞꓲ ꓡꓲ ꓛꓵꓽ ꓟꓵꓽ ꓛꓱ ꓗꓪ ꓔꓬ ꓢꓲ ꓠꓬꓲ ꓝꓴꓲ. ꓠꓯ, ꓗꓪ ꓔꓬ ꓢꓴ ꓐꓴ ꓔꓯ ꓓꓴ ꓙ ꓒꓳ, ꓡꓶꓽ ꓡ ꓠ, ꓟ ꓟ. ꓟꓲ ꓚꓺ ꓖꓶ ꓢꓴ ꓥ ꓡꓳ꓿
ꓖꓳ ꓓꓱꓽ ꓔꓲ, ꓒꓽ ꓬꓳ‐ꓦ ꓠꓬ ꓮ ꓘꓶ. ꓛꓲ ꓙ ꓣꓳ ꓟ ꓠꓲ, ꓟ ꓙꓳ ꓢꓴ ꓥ ꓡꓳ꓿ ꓪꓴ‐ꓢ ꓠꓬ ꓟꓲ ꓠꓯ ꓡ ꓞꓳ ꓐꓴ ꓓꓴ ꓙ ꓚꓱ, ꓗꓪ ꓐꓰ ꓒꓬꓱꓼ ꓡ ꓟꓽ ꓓ ꓟ ꓔꓯ ꓒꓬꓱꓼ ꓡ ꓐ ꓢꓴ ꓪꓴ‐ꓢ ꓥ ꓡꓳ꓿
ꓖꓳ ꓡꓱ ꓠꓬ ꓠꓬꓲ. ꓠꓬꓲ ꓠꓴ ꓥꓪ ꓖꓳ ꓓꓱꓽ ꓔꓲ, ꓒꓽ ꓬꓳ‐ꓦ ꓔꓯ ꓔꓯꓺ ꓢꓳ ꓢꓲ ꓠꓬꓲ ꓙ ꓣꓳ ꓟ ꓠꓲ, ꓗꓪ ꓐꓰ ꓢꓲꓺ ꓒ ꓐꓱ ꓶ ꓢꓯ. ꓔꓬ ꓡꓯ꓿ ꓖꓳ ꓓꓱꓽ ꓔꓲ, ꓒꓽ ꓬꓳ‐ꓦ ꓐ, ꓐ ꓢꓲ ꓠꓬꓲ ꓟ, ꓟ ꓡꓰ ꓐꓰ ꓪꓴ‐ꓢ ꓔꓯ ꓟꓽ ꓠꓽ ꓠꓽ ꓬꓲ ꓙꓵ, ꓟꓶ ꓫꓵˍ ꓫꓵˍ ꓪꓽ ꓘꓴ ꓠꓬ ꓣꓳ ꓪꓽ ꓘꓴ ꓘꓶꓽ ꓔꓯ ꓠ ꓠ ꓖꓶ ꓡ ꓓꓴ ꓥ ꓡꓳ ꓫ. ꓟꓳ ꓪ꓿
