ꓪꓴꓽˍ ꓟ ꓬꓰ ꓠꓲ, ꓫꓵ ꓢꓴ ꓠꓬ ꓣꓱꓽ ꓙ ꓢꓴ ꓬꓰ ꓠꓯ, ꓟ (Daily reflection) 27.5.2025 (reflection)
ꓧꓪ. ꓧꓪ ꓠꓬꓲ.ꓠꓬꓲ ꓵˍ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓘꓳ ꓕꓳ ꓶ 10ꓽ32‐45 ꓝꓲ. ꓗꓪ ꓛꓲ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓡꓯꓼ ꓐꓳ ꓔꓶ. ꓓꓴ ꓠꓬ ꓮ ꓘꓶ. ꓛꓲ ꓣꓳ ꓚꓵˍ ꓟ ꓚꓱ, ꓥ ꓡꓳ꓿
ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓢꓲ ꓠꓬꓲ ꓢꓴ ꓡꓰ ꓬꓲ ꓔꓯ ꓢꓰꓼ ꓗꓷ ꓢꓲ ꓠꓬꓲ ꓫꓵꓻ ꓗꓪ ꓐꓰ ꓝꓮꓲ ꓢꓯ. ꓬꓲꓼ ꓡ ꓟ ꓚꓱ, ꓔꓯ ꓐꓯ ꓟ. ꓖꓶ ꓟ ꓥ ꓡꓳ꓿
ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓫ. ꓓꓴ ꓟꓷ ꓓꓴ ꓠꓬ ꓫ. ꓔꓳ ꓓꓴ ꓟꓽ ꓥ꓾ ꓢꓲꓺ ꓒ ꓬꓰ‐ꓢꓴ ꓔꓯ ꓡꓰ ꓟ. ꓖꓶ ꓔ ꓟ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓡꓳ ꓢꓲ ꓠꓬꓲ ꓞꓳ ꓫꓱ, ꓠ, ꓟ ꓣꓳ ꓚꓵˍ ꓟ ꓔ ꓟ. ꓖꓶ ꓔ ꓡꓳ꓿ ꓝꓮꓲ ꓬꓲ ꓐꓯ ꓘꓶ ꓔꓯ ꓠ ꓠ, ꓢꓲ ꓠꓬꓲ ꓠꓵꓻ ꓠꓲ, ꓙꓳ ꓙꓲ‐ꓢꓴ ꓢꓲꓺ ꓤ ꓐꓴ ꓬꓰ ꓠ, ꓟ ꓣꓳ ꓚꓵˍ ꓡꓳ꓿
ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓙꓵꓽ ꓪ ꓠꓬ ꓣꓳ ꓚꓵˍ ꓡ?
ꓝꓲ ꓓꓴ ꓬ‐ꓗꓴ ꓐꓰ ꓬꓳ‐ꓦ ꓐꓴ ꓠꓬꓲꓽ ꓣꓳ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓽ ꓪ ꓖꓶ ꓠ, ꓟ ꓓꓰꓽ ꓗꓷ ꓟ ꓥ ꓡꓳ꓿ ꓠꓴ ꓪ ꓓꓰꓽ ꓟ ꓬꓲ ꓪ ꓟꓽ ꓢꓷ. ꓿ ꓥꓪ ꓓꓳꓻˍ ꓟ ꓡꓴ ꓗꓶ. ꓠꓴ ꓪ ꓓꓳꓻˍ ꓐ ꓡ ꓡ? ꓐꓰ ꓠ ꓠꓬꓲ ꓗꓷ ꓟ ꓥ ꓡꓳ꓿
ꓔꓱ ꓚꓵˍ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓒꓬꓱꓼ ꓠ, ꓟ ꓠꓬ ꓙꓵꓽ ꓪ ꓘꓳ, ꓣꓴ ꓢꓲ ꓙꓵꓽ ꓪ ꓗꓪ ꓐꓰ ꓙꓵꓽ ꓠ, ꓟ ꓟꓽ ꓥ꓿ ꓢꓲꓺ ꓒ ꓬꓰ‐ꓢꓴ ꓐꓰ ꓕꓲ ꓪ ꓣꓳ ꓤꓶꓻ ꓗꓪ ꓫ. ꓓꓴ ꓟꓷ ꓓꓴ ꓠꓲ, ꓫ ꓟꓬ ꓫ. ꓓꓴ ꓔꓯ ꓧꓪ. ꓡꓰ ꓠ, ꓟ ꓙ ꓫꓱ, ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓣꓱ ꓙ ꓢꓴ ꓬꓰ ꓢꓲ ꓠꓬꓲ ꓧꓪꓽ ꓪꓴ. ꓟꓴ ꓠ, ꓟ꓾
ꓢꓲꓺ ꓒ ꓬꓰ‐ꓢꓴ ꓡꓰ ꓟꓲ ꓠꓯ ꓗꓴꓷꓼ ꓔꓯ ꓙꓵꓽ ꓢꓴ ꓐꓴ ꓡꓰ ꓙꓵꓽ ꓪ ꓣꓱ ꓢꓲ ꓠꓬꓲ ꓢꓴ ꓔꓯ ꓧꓪ ꓜ ꓟ ꓡꓰ ꓐꓰ ꓟꓽ ꓬꓰ ꓠ, ꓟ꓾ ꓟꓴ ꓗꓪ ꓗꓴꓷꓼ ꓗꓪ ꓮ ꓘꓶ. ꓛꓲ ꓪꓴꓽ ꓢꓴ ꓠꓬ ꓮ ꓙꓵꓽ ꓢꓴ ꓔꓯ ꓙ ꓣꓳ ꓟ ꓠꓲ, ꓟ ꓗꓪ ꓐꓰ ꓣꓱ ꓙ ꓢꓴ ꓥ ꓡꓳ ꓐꓰ ꓐꓯ ꓖꓶ ꓔ ꓡꓳ꓿
ꓟꓲ ꓠꓯ ꓡ ꓞꓳ ꓔꓯ ꓫꓴ, ꓣꓴ ꓠ, ꓟ ꓢꓯꓼ ꓟꓬ ꓖꓶ ꓗꓷ ꓟ ꓢꓲꓺ ꓒ ꓬꓰ‐ꓢꓴ ꓥ ꓡꓳ꓿
ꓡ‐ꓞꓳ ꓮ‐ꓐꓲ ꓥꓪ ꓟꓲ ꓢꓴ ꓡꓰ ꓥꓪ ꓔꓯ ꓣꓱꓽ ꓙ ꓝꓲ ꓠ, ꓟ ꓡ ꓟ ꓟꓽ ꓥ꓿ ꓢꓴ ꓔꓯ ꓣꓱꓽ ꓙ ꓠ, ꓟ ꓐꓰ ꓥꓪ ꓢꓯꓼ ꓟꓬ ꓡꓰ ꓡ ꓞꓳ ꓮꓽ ꓟꓬ, ꓔ ꓢꓴ, ꓣꓴ ꓠ, ꓟ ꓡ ꓗꓷ ꓟ ꓥꓳ꓿
