ꓟ‐ꓘꓳ ꓕꓳꓽ ꓶ꓿ 10ꓽ28‐31
ꓒꓲ-ꓕꓱ ꓡꓰ ꓬꓲ ꓔꓯ꓾ ꓥꓪ ꓠꓴꓽ ꓠꓬ ꓙꓳˍ ꓟ ꓮꓽ ꓙꓵ ꓗꓶ ꓔꓸ ꓬꓰ ꓢꓲ ꓠꓴ ꓔꓯ ꓛꓳˍ ꓡꓳ꓾ ꓐꓯˍ ꓡꓳ꓿ ꓖꓳ ꓕꓯ ꓬꓰ-ꓢꓴ ꓡꓰ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓥꓪ ꓐꓱ ꓶˍ ꓐꓰ ꓶꓼ ꓓꓳ ꓫꓱꓹ ꓓꓳ ꓐꓱ ꓶ ꓮꓽ ꓟˍ ꓟꓲ꓾ ꓬꓲ ꓦꓲ꓾ ꓥ ꓠꓬ ꓬꓲꓼ ꓤ ꓠꓬꓲ ꓤ꓾ ꓮꓸ ꓝꓲ ꓠꓬꓲ ꓟ꓾ ꓥ ꓠꓬ ꓮꓽ ꓐꓽ ꓮ ꓟ ꓐꓰ ꓤ ꓠꓱ꓾ ꓥ ꓠꓬ ꓦꓻ ꓟꓲ ꓗꓶ ꓔ ꓬꓰ ꓢꓴ ꓠꓬ꓾ꓮ ꓟꓶ ꓕꓱ ꓕꓲ ꓤꓶ ꓗꓪˍ ꓟꓲ꓾ ꓦꓲꓻ꓾ ꓬꓲꓼ ꓤ ꓠꓬꓲ ꓤ꓾ ꓮꓸ ꓝꓲ ꓠꓬꓲ ꓟ꓾ ꓮ ꓟ꓾ ꓤ ꓠꓱˍ ꓐꓰ ꓦ ꓟꓲˍ ꓟꓲ ꓕꓲ ꓦꓬꓻ ꓝꓸ ꓟꓶˍ ꓥꓳ꓿ ꓗꓸ ꓧꓪ ꓟˍ ꓟꓲ ꓔꓳꓹ ꓜꓳꓽˍ ꓥꓳ꓿ ꓡ ꓠꓹ ꓟ ꓤꓶ ꓗꓪˍ ꓟꓲ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶˍ ꓥꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓴꓸ ꓟ ꓮꓽ ꓟꓬꓹ ꓣꓳ ꓠꓬ꓾ ꓬꓲ ꓟꓶꓽˍ ꓟ ꓗꓷ ꓡꓰˍ ꓥꓳ꓿ ꓬꓲ ꓟꓶꓽˍ ꓟ ꓠꓽ ꓬꓲ ꓪꓴꓸ ꓟ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿
ꓣꓳ ꓠꓬ ꓙꓲˍ ꓟ ꓬꓰ ꓔꓬ ꓟ ꓑꓶ. ꓓꓴ ꓣꓳ ꓠꓬ ꓮ ꓫꓵꓽ ꓟꓶˍ ꓡ꓿ ꓙꓲˍ ꓟ ꓬꓰˍ ꓕ ꓑꓳꓸꓼ ꓙꓲˍ ꓟ ꓔꓯ ꓡꓰꓽ ꓟꓶˍ ꓟ ꓥ ꓡ꓿ ꓙꓲˍ ꓟ ꓔꓯ ꓬꓰ ꓗꓷˍ ꓟ ꓡꓰ ꓶꓼ ꓤ ꓫꓱ, ꓤ ꓔꓯ ꓠꓲ, ꓞꓼ ꓟꓶ ꓡꓰ ꓟ ꓥ ꓡ꓿
ꓕꓲ ꓖ ꓕꓲ ꓧꓪ, ꓗꓪ ꓠꓽ ꓖꓳ ꓡꓱ ꓟꓽ ꓥ꓿ ꓙꓲˍ ꓟ ꓬꓰ ꓔꓬ ꓥ ꓟꓲ ꓕꓲ ꓖ ꓕꓲ ꓧꓪ, ꓗꓪ ꓠꓽ ꓕꓱ ꓡꓱ ꓬꓰˍ ꓟ ꓗꓪ ꓐꓰ ꓣꓳ ꓠꓽ ꓮ ꓘꓶ. ꓛꓳ. ꓡꓰꓳ꓾ ꓐꓰ ꓓꓵꓽ ꓙ ꓟꓶˍ ꓟ ꓙꓳˍ ꓡꓳ꓿ ꓕꓱ ꓡꓱ ꓙꓲˍ ꓟ ꓬꓰˍ ꓟ ꓐꓰ ꓣꓳ ꓟꓶ ꓡꓰ ꓟ ꓠꓬ ꓟꓽ ꓒꓵꓽ ꓐꓰ ꓓꓵꓽ ꓙ ꓟꓶˍ ꓟˍ ꓟꓲ ꓙꓳˍ ꓥꓳ꓿
ꓕꓱ ꓡꓱ ꓓꓵꓽ ꓙꓽ ꓟꓶ ꓡˍ ꓕꓯ꓾ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓒꓲ‐ꓕꓱ ꓥˍ ꓟꓲ ꓕꓱ ꓡꓱ ꓠ ꓠꓬꓲ ꓗꓷꓳ꓿ ꓥꓪ ꓠꓴꓽ ꓠꓬ ꓙꓳˍ ꓟ ꓮ ꓙꓵꓽ ꓡꓳ ꓔ ꓬꓰ ꓲꓢ ꓠꓴ ꓔꓯ ꓛꓳˍ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓕꓱ ꓬꓰ‐ꓢꓴ ꓡꓰ ꓬꓲ ꓔꓯ ꓒꓳ, ꓖꓶˍ ꓟ ꓠꓬ꓾ ꓥꓪ ꓐꓱ ꓶ ꓮ ꓙꓵꓽ ꓔꓯ ꓡꓳ ꓔ ꓬꓰ ꓢꓴ ꓔꓯ ꓠꓬ ꓮ ꓟꓶ ꓕꓲ ꓤꓶ ꓗꓪˍ ꓟꓲ ꓕꓲ ꓦꓬ ꓝ. ꓟꓶˍ ꓥꓳ꓿ ꓡ ꓠ, ꓟ ꓤꓶ ꓗꓪˍ ꓟꓲ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶˍ ꓥꓳ꓾ ꓐꓰ ꓒꓳ, ꓖꓶˍ ꓡꓳ꓿
ꓐꓯ ꓠꓲ, ꓫꓵˍ ꓟ ꓠꓬ꓾ ꓙꓲˍ ꓟ ꓬꓰˍ ꓟ ꓠꓬ ꓣꓳ ꓔꓯ ꓙꓳˍ ꓟ ꓠꓯꓸꓼ ꓗꓪ ꓐꓰ ꓫꓱ ꓡꓰ꓾ ꓡꓱ ꓡꓰ ꓝꓲˍ ꓟ ꓟꓽ ꓥ꓾ ꓣꓳ ꓠꓬ ꓙꓲˍ ꓟ ꓬꓰˍ ꓟ ꓗꓪ ꓐꓰ ꓮ ꓫꓵꓽ ꓔꓯ ꓥˍ ꓟꓲ ꓟꓽ ꓫꓴ ꓡꓰ꓿
ꓝꓮꓲ ꓪꓴ‐ꓢ ꓐꓱ ꓶ ꓣꓳ ꓮ ꓙꓵꓽ ꓔꓯ ꓡꓳ ꓔ ꓬꓰˍ ꓟ ꓗꓪ ꓐꓰ ꓖꓳ ꓟ ꓠꓬ ꓒꓲꓼ ꓡꓰ ꓟ ꓟꓽ ꓥ꓿ ꓮ ꓟꓬ, ꓡꓴꓽ ꓖꓶ ꓡ ꓠ, ꓟ ꓥ ꓡꓳ꓿ ꓝꓮꓲ ꓠꓬ ꓪꓴ‐ꓢ ꓡꓰ ꓖꓶˍ ꓟ ꓶꓼ ꓤ ꓫꓱ, ꓤ ꓠꓬ ꓮ ꓟꓶ ꓕꓯ ꓡꓰ ꓠꓲ, ꓞꓼ ꓟꓶ ꓓ, ꓟ ꓟꓽ ꓥ ꓥˍ ꓟꓲ꓾ ꓕꓲ ꓠꓬꓲ ꓙꓳˍ ꓠꓬ ꓪꓴ‐ꓢ ꓣꓳ ꓔꓯ ꓖꓶ ꓡˍ ꓥꓳ꓾ ꓐꓯˍ ꓟ ꓥ ꓡꓳ꓿ ꓣꓳ ꓟꓬ ꓢꓶꓽ ꓡꓰ ꓣꓳ ꓠꓬ ꓮ ꓫꓵꓽˍ ꓟꓲ ꓟꓽ ꓟꓶ ꓐꓰ ꓓꓵꓽ ꓙꓽ ꓟꓶ ꓗꓴ.ˍ ꓥ ꓟꓲ꓾ ꓪꓴ‐ꓢ ꓠꓽ ꓣꓳ ꓔꓯ ꓟꓲ ꓡꓰ, ꓗꓷ ꓟ ꓟꓽ ꓥ꓿ ꓬꓲ ꓙꓵ, ꓛꓲ ꓡˍ ꓕꓯ ꓪ ꓜꓲ ꓙꓲˍ ꓟ ꓣꓳ ꓔꓯ ꓖꓶ ꓡˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓟ. ꓖꓶ ꓡ ꓔꓬ ꓟ ꓠꓬ꓾ ꓙꓲˍ ꓟ ꓬꓰˍ ꓟ ꓔꓯ ꓕꓽ ꓠꓽ ꓗꓷ꓾ ꓡꓳ ꓗꓷ ꓠ, ꓟ ꓢꓴ ꓔꓯ ꓖꓶ ꓠ, ꓟ ꓕꓽ ꓙꓳꓺ꓾ ꓪꓴ‐ꓢ ꓬꓲ ꓙꓵ, ꓔꓯ ꓙꓵꓻ꓾ ꓐꓰ ꓐꓯ ꓖꓶ ꓡ ꓔꓬ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓢꓲ ꓒ ꓡꓰ ꓟ. ꓖꓶ ꓡ ꓟ ꓡꓰ ꓐꓰ ꓣꓳ ꓠꓬ ꓙꓲˍ ꓟ ꓬꓰ ꓔꓬ ꓟ ꓙꓵ, ꓗꓪ ꓠꓲ, ꓟ ꓙꓬ ꓡˍ ꓕꓯ ꓬꓲ ꓔꓯ ꓙꓵꓻ ꓐ ꓡ ꓠ, ꓟ꓾ ꓝꓮꓲ ꓪꓴ‐ꓢ ꓬꓲ ꓙꓵ, ꓔꓯ ꓣꓳ ꓠꓲ, ꓟ ꓫꓵ ꓢꓲ ꓦꓴ ꓠꓬ, ꓐ ꓡ ꓠ, ꓟ ꓣꓳ ꓠꓬ ꓪꓴ‐ꓢ ꓣꓱꓽ ꓛꓰꓽ ꓓꓰꓽ ꓓꓴ ꓬꓰ ꓡꓯ꓿
