ꓬꓲꓼ ꓤ ꓠꓬꓲ ꓤ ꓐꓴꓳ ꓢ. ꓠꓯ ꓠꓬ Pentecost Day ꓐꓰ ꓐꓯˍ ꓟ ꓢꓲ‐ꓫꓬ‐ꓟ‐ꓦ ꓬꓯꓼ ꓡˍ ꓟ ꓑꓮꓲ ꓥ ꓡꓳ꓿ ꓟ. ꓟꓲꓽ ꓔꓯ ꓣꓳ ꓧꓶ. ꓕꓯ ꓠ ꓠ, ꓓꓴ ꓬꓰ ꓡꓯ꓿ ꓝꓲ ꓓꓴ ꓕꓳꓽ ꓶ 2ꓽ1‐11 ꓥ ꓡꓳ꓿
ꓥꓪꓽ-ꓞꓲ-ꓠꓬꓲ-ꓑꓮꓲ ꓦꓬꓼ ꓠꓬꓲ ꓛꓲ ꓡ ꓕꓯ꓾ ꓬꓲ ꓪꓽ ꓮꓽ ꓙꓵ ꓠꓬ ꓕꓲ ꓖꓺꓼ ꓗꓪ ꓜꓲꓼ ꓔꓬ ꓡꓳ꓿ ꓖꓳ ꓕꓯ ꓞꓼ ꓐꓰ ꓟꓲꓽ ꓦꓲ ꓓ ꓟ ꓙꓱꓼ ꓡ ꓟ ꓡꓰ ꓐꓰ꓾ ꓟꓴꓽ ꓗꓪ ꓗꓪ ꓐꓰ ꓢꓯꓼ ꓕꓲ ꓟ ꓬꓯꓼ ꓡ ꓢꓲ꓾ ꓬꓲ ꓪꓽ ꓠꓬꓲꓸ ꓠꓸ ꓔꓬ ꓟ ꓦꓲ ꓗꓪ ꓐꓲ ꓡꓰˍ ꓡꓳ꓿
ꓡ ꓛꓱꓺ ꓡꓰ ꓐꓰ ꓗꓹ ꓟ ꓮꓸ ꓔꓳꓸ ꓡ ꓡꓱˍ ꓟꓲ ꓬꓲ ꓪꓽ ꓔꓯ ꓟꓳꓸ ꓖꓶ ꓡ ꓢꓲ꓾ ꓗꓪꓺ ꓒꓬꓱ ꓙꓰ ꓢꓲ ꓠꓬꓲ꓾ ꓬꓲ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓥꓳꓽ ꓡ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓮꓽ ꓙꓵ ꓢꓴ ꓔꓯ ꓢꓲ-ꓫꓬ-ꓟ-ꓦ ꓐꓲ ꓡꓰ ꓢꓲ꓾ ꓢꓲ-ꓫꓬ-ꓟ-ꓦ ꓡꓰ ꓬꓲ ꓪꓽ ꓔꓯ ꓮ ꓡꓲ ꓐꓯ ꓝꓲˍ ꓠꓬ꓾ ꓬꓲ ꓖꓳ ꓡꓱ ꓠꓱꓸ ꓐꓯꓼ ꓥꓳꓽ ꓫꓸ ꓕꓱ ꓔꓴ ꓡ ꓡꓳ꓿
ꓖꓳ ꓕꓯ ꓟꓵ ꓕꓯꓽ ꓗꓳꓹ ꓕꓯꓽ ꓗꓪ ꓐꓰ ꓡꓻ ꓟ꓾ ꓠꓲꓹ ꓒꓵꓽ ꓠꓲꓹ ꓡꓱꓻ ꓟ ꓬꓴ-ꓔ ꓡ ꓞꓳ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓜꓲꓼ ꓞꓹ ꓡꓳ꓿ ꓢꓯꓼ ꓕꓱ ꓟ ꓔꓯ ꓑ ꓙꓽˍ ꓕꓯ ꓡ ꓞꓳ ꓬꓲ ꓜꓴ ꓜꓲꓼ ꓡ ꓢꓲ꓾ ꓝꓲ ꓓꓴ ꓐꓴ ꓡꓰ ꓫ ꓕꓱˍ ꓟ ꓔꓯ ꓮꓽ ꓟ ꓚꓲ ꓛꓬ ꓥꓳꓽ ꓗꓪ ꓮꓽ ꓟ ꓑ ꓙꓽˍ ꓠꓬꓲ꓾ ꓬꓲ ꓪꓽ ꓠꓬ ꓓꓵꓽ ꓙ ꓮ’ꓺ ꓡꓰꓳ꓿ ꓬ
ꓲ ꓪꓽ ꓮꓽ ꓙꓵ ꓠꓬ ꓓꓵꓽ ꓙ ꓟꓶ ꓢꓲ꓾ ꓕꓱ ꓗꓪ ꓫ ꓕꓱ ꓔꓬ ꓢꓴ ꓮꓽ ꓙꓵ ꓠꓬ ꓖ-ꓡꓲ-ꓡꓲ ꓢꓴ ꓟꓽ ꓥ ꓡ? ꓮ ꓡꓲ ꓗꓷ ꓡꓰ ꓠꓬꓲ ꓬꓲ ꓪꓽ ꓟꓸ ꓟꓲ ꓚˍ ꓟ ꓔꓯ ꓣꓳ ꓮꓽ ꓟ ꓚꓲ ꓛꓬ ꓥꓳꓽ ꓗꓪ ꓮꓽ ꓟ ꓑ ꓙꓽˍ ꓡ? ꓒ-ꓕꓲ-ꓬ ꓢꓴ꓾ ꓟꓲ-ꓓꓲ ꓢꓴ꓾ ꓬꓲ-ꓡꓽ-ꓟꓷꓽ ꓢꓴ꓾ ꓟꓲ-ꓢꓳ-ꓒꓳ-ꓔ-ꓟꓲ ꓟꓵꓽ ꓗꓪ ꓔꓬ ꓢꓴ꓾ ꓬꓴ-ꓔ ꓟꓵˍ ꓐꓰ ꓚꓬ-ꓑꓷ-ꓓꓳ-ꓚꓬ ꓢꓴ꓾ ꓒ-ꓠꓷ-ꓕꓴ ꓢꓴ꓾ ꓮ-ꓢꓲ-ꓬ ꓢꓴ꓾ꓩ-ꓡꓴ-ꓚꓲ-ꓬ ꓢꓴ꓾ ꓒ-ꓩꓴ-ꓡꓲ-ꓬ ꓢꓴ꓾ ꓬꓲ-ꓙꓲ ꓟꓵ ꓗꓪ ꓔꓬ ꓢꓴˍ ꓐꓰ ꓢ-ꓡꓲ-ꓠꓲ ꓡꓳ ꓒꓱ ꓒꓻ ꓕꓲꓺꓼ ꓗꓪ ꓟ ꓡꓲ-ꓑꓲꓸ-ꓬꓼ ꓢꓴ꓾ ꓣꓳ-ꓟ ꓟꓵꓽ ꓗꓪ ꓐꓰ ꓡꓻˍ ꓟ ꓪꓰ ꓤ ꓬꓴ-ꓔ ꓡ ꓞꓳˍ ꓐꓰ ꓬꓴ-ꓔ ꓢꓳ ꓗꓪ ꓓꓵꓽ ꓡꓰ ꓢꓴ꓾ꓗꓷ-ꓡꓲ-ꓔꓲ ꓢꓴˍ ꓐꓰ ꓬꓹ-ꓡꓽ-ꓑꓷ ꓢꓴ ꓣꓳꓽ ꓮꓽ ꓙꓵ ꓠꓬ꓾ ꓪꓴ-ꓢ ꓪ ꓠꓬꓲˍ ꓟ ꓟꓬꓱꓽ ꓬꓲ ꓓꓳꓽ ꓚˍ ꓟ ꓔꓯ ꓣꓳꓽ ꓚꓲ ꓛꓬ ꓥꓳꓽ ꓡꓰ ꓑ ꓙꓽ ꓪ ꓡꓰꓳ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓮꓽ ꓙꓵ ꓢꓴ ꓮꓽ ꓘꓶꓸ ꓓꓵꓽ ꓙ ꓟꓶ ꓢꓲ꓾ ꓕꓱ ꓟ ꓮꓸ ꓫꓵ ꓢꓷꓸ ꓡꓰ ꓓꓴ ꓥ ꓡ? ꓐꓰ ꓠ ꓠꓬꓲ ꓡꓯ ꓘꓳˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓫꓵ ꓢꓲ ꓝꓮꓲ ꓢꓯ. ꓬꓲꓼ ꓡ ꓗ ꓠꓯ. ꓥꓪꓽ ꓞꓲ ꓠꓬꓲ ꓔꓯ ꓠꓬ Pentecost Day ꓐꓰ ꓐꓯˍ ꓟ ꓢꓲ‐ꓫꓬ‐ꓟ‐ꓦ ꓬꓯꓼ ꓡ ꓟ ꓔꓯ ꓣꓳ ꓬꓰ ꓔꓬ ꓡꓳ꓿ Pentecost ꓐꓯˍ ꓟ ꓠꓬ ꓖꓣꓰꓰꓗ ꓥꓳꓽ ꓗꓪ ꓐꓰ ꓦꓲ‐ꓡꓲ ꓥꓳꓽ ꓗꓪ ꓐꓰ ꓡ ꓟ ꓥ ꓢꓲ ꓠꓬꓲ ꓥꓪꓽ ꓞꓲ ꓠꓬꓲ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿
ꓝꓲ ꓓꓴ ꓐꓴ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓮ ꓙꓵꓽ ꓠꓬ ꓙꓳꓺ ꓛꓱꓽ ꓢꓲ ꓠꓬꓲ ꓗ ꓘꓶꓽ ꓚꓲ. ꓔ ꓢꓲ ꓑꓬ ꓔꓬ ꓡꓳ꓿ ꓙꓳꓺ ꓛꓱꓽ ꓠꓬꓲ ꓔꓬ ꓖꓴˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓢꓲ‐ꓫꓬ‐ꓟ‐ꓦ ꓬꓯꓼ ꓡ ꓕꓯ ꓬꓲ ꓪ ꓠꓬ ꓑꓶ. ꓡ ꓢꓲ ꓠꓬꓲ ꓫ. ꓕꓱ ꓑꓶ. ꓡ ꓟ꓾ ꓬꓲ ꓪ ꓫ. ꓕꓱˍ ꓟ ꓔꓯ ꓞꓳ ꓫꓵꓽ ꓞꓳ ꓙꓰꓽ ꓥꓳꓽ ꓗꓪ ꓐꓰ ꓑ ꓙꓽˍ ꓟ꓾ ꓕꓱ ꓡꓱ ꓐꓰ ꓗꓷ ꓡꓰˍ ꓡꓳ꓿
ꓟ. ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓔꓯ ꓬꓲ ꓪꓴ. ꓕꓲ ꓫꓵꓽ ꓢꓯꓼ ꓪ ꓖꓶ ꓡ ꓟ ꓠꓬ ꓣꓳ ꓥˍ ꓟꓲ ꓝꓲ ꓓꓴ ꓐꓴˍ ꓡꓰ ꓐꓰ ꓙꓳꓺ ꓛꓱꓽ ꓓꓴ꓾ ꓙꓲ ꓣꓴꓽ ꓓꓴ꓾ ꓟꓬ ꓑꓬ ꓓꓴ꓾ ꓠꓲ, ꓟ ꓫ. ꓓꓴ ꓕꓱ ꓡꓱ ꓫꓵꓽ ꓙꓳˍ ꓡꓳ꓿ ꓝꓲ ꓓꓴ ꓐꓴ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓐꓴ ꓠꓬ ꓗ ꓘꓶ ꓚꓲ. ꓔ ꓢꓲ ꓔꓬ ꓟ ꓡꓰ ꓐꓰ ꓣꓳ ꓥˍ ꓟꓲ ꓣꓳ ꓤꓶꓻ ꓗꓪ ꓣꓳ ꓠꓻ ꓓꓴ ꓑ ꓓꓴ ꓡꓰ ꓟ꓾ ꓣꓳ ꓓꓳꓽ ꓡꓰ ꓟ ꓣꓳ ꓡꓱ. ꓙꓰ ꓟ꓾ ꓣꓳ ꓫ. ꓔꓳ ꓫ. ꓒꓯꓼ ꓬꓰ ꓗꓷ ꓟ꓾ ꓥ ꓠꓬ ꓢꓴ ꓡꓰ ꓣꓳ ꓔꓯ ꓧꓪ. ꓜꓽ ꓗꓷ ꓟ꓾ ꓕꓱ ꓡꓱ ꓫꓵꓽ ꓦ ꓐꓬꓱꓽ ꓟꓳ ꓠꓲ, ꓟꓽ ꓫꓵ꓿
ꓖꓳ ꓡꓱ ꓠꓬꓲ ꓣꓳ ꓠꓬ ꓚꓲ. ꓛꓬ ꓠꓲ, ꓟ ꓔꓯ ꓗ ꓘꓶꓽ ꓚꓲ. ꓔ ꓢꓲ ꓠꓬꓲ ꓠꓵ ꓠꓲ, ꓥ ꓟꓲ ꓟꓽ ꓓꓵꓽ ꓡ ꓝꓲ꓾ ꓙꓵꓻ ꓠꓲ, ꓥ ꓟꓲ ꓟꓽ ꓓꓵꓽ ꓡ ꓝꓲ ꓕꓱ ꓡꓱ ꓐꓰ ꓗ ꓘꓶꓽ ꓚꓲ. ꓔ ꓢꓲ ꓔꓬ ꓗꓴ.ˍ ꓡꓳ꓿ ꓢꓲ‐ꓫꓬ‐ꓟ‐ꓦ‐ꓪꓴ‐ꓢ ꓠꓬ ꓕꓱ ꓡꓱ ꓫꓵꓽ ꓣꓳ ꓢꓯꓼ ꓐꓽˍ ꓟ ꓗꓪ ꓬꓲ ꓡꓰ ꓛꓲ ꓡ ꓢꓲ ꓠꓬꓲ ꓣꓳ ꓔꓯ ꓢꓯꓼ ꓪ ꓧꓳꓽ ꓖꓶˍ ꓡꓳ꓿ ꓬꓲ ꓠꓬ ꓮ ꓔꓳ. ꓡ ꓛꓱˍ ꓡꓰ ꓐꓰ ꓡˍ ꓡꓳ ꓐꓰ ꓕꓳꓽ ꓶ ꓗꓪ ꓐꓳ ꓔˍ ꓟ ꓡꓰ ꓐꓰ ꓢꓲ‐ꓫꓬ‐ꓟ‐ꓦ‐ꓪꓴ‐ꓢ ꓬꓲ ꓣꓱꓽ ꓛꓰꓽ ꓠꓬ ꓣꓳ ꓠꓲ, ꓟ ꓠꓯꓸꓼ ꓗꓪ ꓓꓵꓽ ꓡ ꓕꓯ ꓣꓳ ꓠꓬ ꓗ ꓘꓶꓽ ꓒꓰꓼ ꓠꓯꓸꓼ ꓗꓪ ꓐꓰ ꓓꓳ ꓡ ꓑꓶ.ˍ ꓡꓳ꓿ ꓣꓳ ꓔꓯ ꓓꓳꓽ ꓡꓰ ꓝꓲ꓾ ꓣꓳ ꓔꓯ ꓡꓱ. ꓡꓰ ꓝꓲˍ ꓟ ꓗꓪ ꓐꓰ ꓔꓴ ꓡ ꓢꓲ ꓠꓬꓲ ꓢꓯꓼ ꓙꓳ ꓙꓳ ꓡꓰꓽ ꓮ ꓫꓵꓽ ꓔꓯ ꓥˍ ꓟꓲ ꓑꓶ. ꓑꓶ. ꓡꓰꓽ ꓬꓰ ꓑꓶ. ꓡˍ ꓡꓳ꓿ ꓕꓱ ꓟ ꓠꓬ ꓢꓲ‐ꓫꓬ‐ꓟ‐ꓦ ꓢꓯꓼ ꓪ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓢꓲ‐ꓫꓬ‐ꓟ‐ꓦ ꓢꓯꓼ ꓪ ꓔꓯ ꓘꓳ ꓣꓴ ꓡꓯ꓿ ꓬꓲ ꓔꓯ ꓣꓳ ꓠꓲ, ꓟ ꓠꓯꓸꓼ ꓗꓪ ꓡꓯ꓾ ꓐꓰ ꓣꓳ ꓓꓰꓽ ꓡꓯ꓿ ꓖꓳ ꓡꓱ ꓠꓬ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓣꓷꓠ. ꓐ ꓡˍ ꓟ꓾ ꓢꓲ ꓒ ꓬꓰ‐ꓢꓴ ꓚꓱ, ꓔꓯ ꓠꓱ. ꓐꓯ ꓢꓴ ꓔꓯ ꓚꓺ ꓟ. ꓖꓶ ꓐ ꓡˍ ꓟ꓾ ꓝꓮꓲ ꓠꓵ ꓠꓲ, ꓣꓱꓽ ꓛꓰꓽ ꓥˍ ꓟꓲ ꓣꓳ ꓐꓲ ꓡˍ ꓡꓳ꓿ ꓧꓳ, ꓡꓯ ꓘꓳˍ ꓟ ꓠꓲ, ꓠꓵ ꓡꓯ ꓘꓳˍ ꓟ ꓣꓱꓽ ꓛꓰꓽ ꓥꓳˍ ꓟꓲ ꓣꓳ ꓠꓯꓸꓼ ꓗꓪ ꓙꓳˍ ꓡꓳ꓿
ꓢꓲ‐ꓫꓬ‐ꓟ‐ꓦ‐ꓪꓴ‐ꓢ ꓢꓯꓼ ꓪ ꓟꓽ ꓙꓳ ꓠꓬ ꓣꓳ ꓮ ꓫꓵꓽˍ ꓟꓲ ꓬꓰ ꓟꓽ ꓐ ꓡ ꓐꓯˍ ꓟ ꓣꓳ ꓓꓵꓽ ꓙꓽ ꓡꓯ꓿ ꓣꓳ ꓢꓲ‐ꓫꓬ‐ꓟ‐ꓦ‐ꓪꓴ‐ꓢ ꓬꓲ ꓢꓷ. ꓡꓰ ꓓꓴ ꓓꓽ ꓟ ꓕꓲ ꓟ ꓟ ꓠꓬ꓾ ꓡ ꓞꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓔꓯ ꓧꓳ, ꓡꓯ ꓘꓳ ꓡꓰ ꓝꓲˍ ꓟ ꓬꓲ ꓣꓱꓽ ꓛꓰꓽ ꓓꓽ ꓟ ꓥ ꓡꓳ꓿ ꓮ ꓠꓱ ꓘꓶꓽ ꓫꓵꓽ ꓡꓵ ꓗꓪ ꓣꓳ ꓑ ꓙꓽˍ ꓟ ꓐ‐ꓐꓷ ꓟꓵꓽ ꓔꓳ, ꓤꓲ ꓫꓬ, ꓟ ꓚꓱ, ꓣꓳ ꓢꓷ. ꓗꓷꓳ꓿ ꓟꓵꓽ ꓔꓳ, ꓤꓲ ꓖꓳ ꓟ ꓫꓬ, ꓟ ꓑꓶ. ꓓꓴ ꓞꓳ ꓤ ꓮ ꓙꓵꓽ ꓠꓬ ꓥꓳꓽ ꓫꓵꓽ ꓥꓳꓽ ꓙꓰꓽ ꓮ ꓟꓬ, ꓗꓪ ꓙꓰꓳ꓿ ꓝꓴꓲ. ꓐꓯˍ ꓟ ꓠꓬ ꓞꓳ ꓤ ꓔꓯ ꓗꓪꓺ ꓡꓰ ꓝꓲˍ ꓡꓳ꓿
ꓞꓳ ꓤ ꓠꓬ ꓠꓲ, ꓟ ꓮ ꓪꓴ. ꓪꓴ ꓪꓴꓽ ꓢꓲ ꓠꓬꓲ ꓟꓴ ꓗꓪ ꓗꓪ ꓛꓲ ꓬꓰˍ ꓗꓪ ꓛꓲ ꓟꓵꓽ ꓔꓳ, ꓤꓲ ꓫꓬ, ꓡꓯ ꓐꓰ ꓬꓰ ꓗꓷ ꓢꓲ ꓠꓬꓲ ꓝꓴꓲ. ꓖꓳ ꓟ ꓑꓶ. ꓓꓴ ꓥꓳꓽ ꓫꓵꓽ ꓠꓬ ꓮ ꓟꓬ, ꓗꓪꓺ ꓡꓰꓳ꓿ ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓢꓲ‐ꓫꓬ‐ꓟ‐ꓦ‐ꓪꓴ‐ꓢ ꓬꓯꓼ ꓡ ꓕꓯ ꓬꓲ ꓪ ꓕꓲ ꓘꓶꓽ ꓫ. ꓕꓱˍ ꓟ ꓔꓯ ꓮ ꓙꓵꓽ ꓢꓴ ꓠꓬ ꓚꓲ. ꓛꓬ ꓥꓳꓽ ꓗꓪ ꓐꓰ ꓚꓲ. ꓛꓬ ꓑ ꓙꓽˍ ꓟ ꓑꓶ. ꓓꓴ ꓮ ꓠꓱ ꓗꓪꓺ ꓡꓰ ꓟ ꓥꓳꓽ ꓔꓯ ꓝꓮꓲ ꓕꓲ ꓧꓪ, ꓫꓬ, ꓔꓱ, ꓗꓷꓳ꓿ ꓖꓳ ꓡꓱ ꓠꓬꓲ ꓟ. ꓟꓲꓽ ꓑꓷꓠꓽ ꓗꓪ ꓓꓵꓽˍ ꓟ ꓠꓬ ꓐꓲ ꓡꓰꓳ꓿ ꓢꓲ‐ꓫꓬ‐ꓟ‐ꓦ‐ꓪꓴ‐ꓢ ꓠꓬ ꓟꓲ ꓠꓯ ꓕꓱ ꓟ ꓔꓯ ꓝꓮꓲ ꓬꓲ ꓫꓵꓼ ꓫꓬ, ꓚꓰꓼ ꓗꓷˍ ꓥꓳ ꓐꓯˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓐꓲ ꓜꓲꓼ ꓡꓰꓳ꓿
ꓠꓬꓲ. ꓠꓬꓲ ꓢꓲ‐ꓫꓬ‐ꓟ‐ꓦ ꓗꓪ ꓐꓰ ꓣꓳ ꓔꓯ ꓬꓲ ꓫꓵꓼ ꓫꓬ, ꓚꓰꓼˍ ꓟ ꓟꓶ ꓡꓰꓳ꓿ ꓪꓴ‐ꓢ ꓠꓯꓸꓼ ꓗꓪ ꓣꓳ ꓬꓲ ꓦ ꓗꓪ ꓐꓰ ꓪꓴ. ꓓꓵ ꓕꓱꓼˍ ꓟ꓾ ꓢꓲ‐ꓫꓬ‐ꓟ‐ꓦ‐ꓪꓴ‐ꓢ ꓗꓪ ꓐꓰ ꓣꓳ ꓪꓴ. ꓓꓵ ꓕꓱꓼ ꓐ ꓡˍ ꓟ꓾ ꓔꓱ, ꓚꓵˍ ꓟ ꓔꓯ ꓪꓴ. ꓓꓵ ꓕꓱꓼ ꓐ ꓡˍ ꓟ ꓢꓯꓼ ꓪ ꓣꓳ ꓟꓶˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ‐ꓫꓬ‐ꓟ‐ꓦ ꓬꓲ ꓣꓱꓽ ꓛꓰꓽ ꓠꓬ ꓮ ꓫꓵꓽ ꓥ ꓡ꓿ ꓠꓵꓻ ꓠꓲ, ꓥ ꓡꓳ꓿ ꓢꓲ‐ꓫꓬ‐ꓟ‐ꓦ ꓠꓬ ꓣꓳ ꓔꓯ ꓠꓲ, ꓠꓵ ꓡꓰ ꓝꓲˍ ꓟ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓧꓳ, ꓫꓵꓽ ꓧꓳ, ꓡꓯ ꓘꓳ ꓝꓲˍ ꓟ꓾ ꓞꓳ ꓤ ꓔꓯ ꓠꓲ, ꓟ ꓠ ꓗꓴ.ˍ ꓟ ꓬꓲ ꓚꓱ, ꓥ ꓡꓳ꓿
ꓠꓬꓲ. ꓠꓬꓲ ꓟꓲ ꓠꓯ ꓕꓱ ꓟ ꓗꓪ ꓢꓲ‐ꓫꓬ‐ꓟ‐ꓦ ꓐꓯ ꓢꓲ ꓠꓬꓲ ꓓꓳ ꓡ ꓫꓵꓽ ꓮ ꓟꓬ, ꓙꓳˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓢꓲ‐ꓫꓬ‐ꓟ‐ꓦ ꓥ ꓡ꓾ ꓟꓽ ꓥ ꓡ ꓐꓯˍ ꓟ ꓠꓬ ꓠꓬꓲꓽ ꓫꓵꓽ ꓗꓪ ꓐꓰ ꓡꓳ. ꓠꓬꓲ ꓕꓲ ꓖꓼ ꓢꓷ. ꓓ, ꓡꓳ꓿ ꓬꓲ ꓪꓴ. ꓕꓲ ꓫꓵꓽ ꓟ ꓠꓬ ꓬꓲ ꓠꓬ ꓪꓴ‐ꓢ ꓟꓬꓱ ꓓꓳꓽ ꓓꓳ ꓠ, ꓟ ꓬꓰ ꓔꓬ ꓡ꓾ ꓢꓲ‐ꓫꓬ‐ꓟ‐ꓦ ꓖꓳ ꓟ ꓠꓬ ꓪꓴ‐ꓢ ꓟꓬꓱ ꓓꓳꓽ ꓓꓳ ꓠ, ꓟ ꓬꓰ‐ꓢꓴ ꓙꓲ‐ꓢꓴ ꓟꓬꓱ ꓓꓳꓽ ꓪꓴꓽ ꓡ ꓠ, ꓟ ꓐꓯ ꓔꓬ ꓡ꓾ ꓝꓮꓲ ꓕꓲ ꓫꓵꓽ ꓟ ꓠꓬ ꓬꓲ ꓠꓬ ꓠꓵ ꓠꓲ, ꓙꓳˍ ꓡ ꓐꓯˍ ꓟ ꓔꓯ ꓣꓳ ꓡꓳ. ꓠꓬꓲ ꓠ ꓗ, ꓡꓳ꓿
ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯ ꓠꓬ ꓢꓲ‐ꓫꓬ‐ꓟ‐ꓦ ꓠꓬ ꓠꓵ ꓠꓲ, ꓥ ꓟ ꓑꓶ. ꓓꓴ ꓕꓱ ꓡꓱ ꓠꓬꓲꓽ ꓫꓵꓽ ꓗꓪ ꓐꓰ ꓣꓳ꓾ ꓕꓱ ꓕꓲ ꓣꓳ ꓟ ꓠꓬ ꓢꓲ‐ꓫꓬ‐ꓟ‐ꓦ ꓐꓲˍ ꓡ ꓟꓽ ꓐꓲ ꓡ ꓐꓯˍ ꓟ ꓔꓯ ꓣꓳ ꓡꓳ. ꓠꓬꓲ ꓙꓲˍ ꓡꓳ꓿
ꓣꓳ ꓠꓵ ꓠꓲ, ꓥꓳꓽ ꓫꓵꓽ ꓐꓯˍ ꓟ ꓠꓬ ꓮ ꓡꓲ ꓫꓵꓽ ꓥˍ ꓟꓲ ꓠ ꓠ, ꓗꓴ.ˍ ꓡꓳ꓿ ꓫ. ꓕꓱ ꓟꓽ ꓗꓴ. ꓢꓴ ꓡꓲ. ꓠꓽ ꓠꓵ ꓠꓲ, ꓥꓳꓽ ꓔꓯ ꓠ ꓠ, ꓗꓴ.ˍ ꓡꓳ꓿ ꓕꓱ ꓟˍ ꓡꓰ ꓐꓰ ꓠ. ꓐꓳꓽ ꓢꓴ꓾ ꓛꓲ ꓫꓳ. ꓡꓯ ꓫꓳ. ꓢꓴ꓾ ꓮ ꓫꓵꓽ ꓟꓽ ꓢꓷ. ꓢꓴ꓾ ꓟꓶ ꓢꓴ ꓥˍ ꓟꓲ ꓠꓵ ꓠꓲ, ꓥꓳꓽ ꓔꓯ ꓠ ꓠ, ꓗꓴ.ˍ ꓡꓳ꓿ ꓕꓱ ꓟˍ ꓡꓰ ꓐꓰ ꓮ ꓫꓵꓽ ꓫꓵꓽ ꓥ ꓫꓵˍ ꓥ꓾ ꓮ ꓫꓵꓽ ꓡ ꓞꓳ ꓥ ꓫꓵˍ ꓥ ꓠꓵ ꓠꓲ, ꓥꓳꓽ ꓔꓯ ꓠ ꓠ, ꓗꓴ.ˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ‐ꓫꓬ‐ꓟ‐ꓦ ꓬꓲ ꓥꓳꓽ ꓕꓱ ꓟ ꓠꓬ ꓠꓵ ꓠꓲ, ꓥ ꓟ ꓑꓶ. ꓓꓴ ꓠꓵ ꓠꓲ, ꓠꓯꓸꓼ ꓘꓴꓽ ꓗꓪ ꓪ ꓜꓲ ꓙ ꓫꓱꓽ ꓙꓰ ꓢꓲ ꓠꓬꓲ ꓣꓳ ꓠꓯꓸꓼ ꓘꓴꓽ ꓗꓪ ꓙꓳˍ ꓟ ꓙꓳꓺ ꓛꓱꓽ ꓓꓴ꓾ ꓘꓶ ꓡꓶ ꓓꓴ꓾ ꓗꓽ ꓡ ꓓꓴ ꓮ ꓙꓵꓽ ꓗꓪ ꓐꓰ ꓓꓳ ꓡ ꓢꓲ ꓠꓬꓲ ꓠꓬꓲ. ꓠꓬꓲ ꓝꓲ ꓓꓴ ꓐꓴ ꓐꓰ ꓕꓲ ꓡꓰ, ꓐꓰ꓾ ꓢꓲ ꓒ ꓬꓰ‐ꓢꓴ ꓬꓲ ꓢꓲ‐ꓫꓬ‐ꓟ‐ꓦ ꓡꓰ ꓫꓬ, ꓖꓶ ꓗꓷ ꓟ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓠꓻ ꓓꓴ ꓮ ꓙꓵꓽ ꓔꓯ ꓬꓲ ꓐꓱ ꓶ ꓝꓮꓲ ꓕꓲ ꓧꓪ, ꓣꓱꓽ ꓠ, ꓟ꓾ ꓢꓲ‐ꓫꓬ‐ꓟ‐ꓦ ꓣꓱꓽ ꓛꓰꓽ ꓪꓴ‐ꓢ ꓠꓵ ꓠꓲ, ꓗꓪ ꓐꓰ ꓢꓯ. ꓬꓲꓼ ꓡ ꓟ꓾ ꓓꓻ ꓡꓰ ꓟ ꓑꓶ. ꓓꓴ ꓠꓵ ꓠꓲ, ꓗꓪ ꓐꓰ ꓪꓴ‐ꓢ ꓔꓯ ꓢꓷ. ꓙ ꓟꓳ ꓙ ꓖꓶ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
