ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓮ ꓟꓶ ꓠꓬ ꓔꓱ, ꓚꓵˍ ꓟ ꓠꓵ ꓠꓲ, ꓐꓯˍ ꓟ ꓠꓬ ꓮ ꓡꓲ ꓫꓵꓽ ꓔꓯ ꓐꓯˍ ꓡ ꓐꓰ ꓐꓯˍ ꓟ ꓔꓯ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓣꓳ ꓠ ꓡꓳ. ꓓꓴ ꓥꓳ꓿ ꓟ. ꓟꓲꓽ ꓝꓲ. ꓠꓬ (ꓬꓳ‐ꓦ 15ꓽ9‐17) ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ ꓠꓬꓲ. ꓠꓬꓲ ꓣꓳ ꓟꓲ ꓠꓯ ꓗꓪ ꓠꓬ “ꓠꓵ ꓠꓲ,” ꓐꓰ ꓣꓳ ꓮ ꓘꓶ. ꓐꓯˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓠꓲ, ꓠꓵˍ ꓟ ꓬꓲ ꓚꓱ, ꓠꓬ ꓔꓱ, ꓚꓵˍ ꓡ꓾ ꓟꓽ ꓔꓱ, ꓚꓵ ꓡ꓿ ꓔꓱ, ꓚꓵˍ ꓟ ꓠꓵ ꓠꓲ, ꓠꓬ ꓮ ꓡꓲ ꓟ ꓔꓯ ꓐꓯˍ ꓡ꓿ ꓠꓬꓲ. ꓠꓬꓲ ꓣꓳ ꓣꓱꓽ ꓬꓰ ꓔꓬ ꓟ꓾ ꓠꓬꓲ. ꓠꓬꓲ ꓣꓳ ꓠꓲ, ꓠꓵ ꓔꓬ ꓟ ꓠꓲ, ꓠꓵ ꓚꓱ, ꓥ ꓟꓲ ꓔꓱ, ꓚꓵˍ ꓟ ꓥ ꓡ꓾ ꓟꓽ ꓥ ꓡ ꓐꓯ ꓟ ꓔꓯ ꓠꓬꓲ. ꓠꓬꓲ ꓪꓴ‐ꓢ ꓐꓯ ꓘꓶꓽ ꓗꓪ ꓐꓰ ꓔꓯꓺ ꓢꓳ ꓓꓴ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓟꓲ ꓠꓯ ꓗꓪ ꓟ ꓠꓵ ꓠꓲ, ꓠꓬ ꓕꓱ ꓡꓱ ꓥ ꓡꓳ꓿ ꓥꓪ ꓬꓲ ꓔꓯ ꓠꓲ, ꓠꓵˍ ꓟ ꓠꓬ ꓥꓪ ꓐꓱ ꓶ ꓗ, ꓛꓲꓽˍ ꓟ ꓑꓶ. ꓓꓴ ꓬꓲ ꓔꓯ ꓠꓲ, ꓠꓵ ꓔꓬ ꓟ ꓥ ꓡꓳ꓿ ꓕꓱ ꓡꓱ ꓟꓽ ꓥ ꓥꓳ ꓐꓯ ꓕꓯ ꓠꓽ ꓕꓱ ꓡꓱ ꓟꓽ ꓥ ꓥꓳ ꓐꓯ ꓕꓯ ꓠꓽ ꓟꓽ ꓗ, ꓛꓲꓽ ꓕꓯ ꓠꓽ ꓬꓲ ꓔꓯ ꓟꓽ ꓠꓲ, ꓠꓵ꓿ ꓖꓳ ꓡꓱ ꓥꓳ ꓐꓯ ꓠꓬ ꓠꓵ ꓠꓲ, ꓕꓱ ꓟ ꓠꓬ ꓬꓲ ꓔꓯ ꓔꓱ, ꓚꓵˍ ꓟ ꓠꓵ ꓠꓲ, ꓟꓽ ꓥ ꓥ ꓐꓰ ꓣꓳ ꓚꓲ. ꓛꓬ ꓗ, ꓛꓲꓽ ꓓꓴ ꓔꓯ ꓟꓳ. ꓬꓲ ꓔꓯ ꓠꓲ, ꓠꓵ ꓔꓬ ꓟ ꓥ ꓡꓳ꓿ ꓕꓱ ꓟ ꓠꓬ ꓠꓵ ꓠꓲ, ꓚꓵ ꓟꓽ ꓥ꓿
ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓟꓬꓽ ꓠꓬꓲ ꓞꓳ ꓡꓱ ꓤ ꓐꓴ ꓠꓬ ꓕꓱ ꓡꓱ ꓐꓯˍ ꓡꓳ꓿ ꓥꓪ ꓠꓴ ꓔꓯ ꓮ ꓘꓶ. ꓠꓲ, ꓠꓵˍ ꓟ ꓥ ꓡꓳ꓿ ꓥꓪ ꓠꓴ ꓔꓯ ꓟꓽ ꓠꓲ, ꓠꓵ ꓠꓬ ꓟꓽ ꓓꓻ꓿ ꓮ ꓡꓲ ꓫꓵꓽ ꓥ ꓠꓲ, ꓫꓵˍ ꓥ ꓠꓲ, ꓠꓵˍ ꓡꓳ꓾ ꓐꓰ ꓕꓰ ꓡꓰ ꓐꓯˍ ꓡꓳ꓿ ꓦꓲ ꓕꓴꓽ ꓗꓷ ꓢꓴ ꓥˍ ꓟꓲ ꓕꓰ ꓡꓰ ꓥꓳ꓿ ꓥꓪ ꓠꓴ ꓔꓯ ꓮ ꓘꓶ. ꓠꓲ, ꓠꓵˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓬꓲ ꓔꓯ ꓠꓲ, ꓠꓵˍ ꓟ ꓑꓶ. ꓓꓴ ꓣꓳ ꓠꓬ ꓗ, ꓛꓲꓽˍ ꓡꓳ꓿ ꓣꓳ ꓗ, ꓛꓲꓽˍ ꓟ ꓑꓶ. ꓓꓴ ꓬꓲ ꓔꓯ ꓠꓲ, ꓠꓵ ꓔꓬ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓠꓵ ꓠꓲ, ꓕꓱ ꓟ ꓠꓬ ꓔꓱ, ꓚꓵˍ ꓡ ꓟꓽ ꓔꓱ, ꓚꓵ ꓡ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓓꓴ ꓥꓳ꓿ ꓬꓲ ꓠꓬ ꓣꓳ ꓔꓯ ꓗ, ꓛꓲꓽ ꓓꓴ ꓟꓽ ꓖꓶ ꓡ ꓕꓯ ꓠꓽ ꓣꓳ ꓠꓽ ꓬꓲ ꓔꓯ ꓠꓲ, ꓠꓵ ꓠ, ꓟ ꓮ ꓘꓶ. ꓫ.ˍ ꓟ ꓥ ꓡꓳ꓿
