ꓢꓲꓽ ꓫꓬ ꓟ‐ꓦ ꓪꓴ‐ꓢ ꓡꓰ ꓙ ꓖꓴ ꓧꓳꓽ ꓟꓴ ꓖꓶ ꓟ (Daily reflection)
ꓧꓪ. ꓧꓪ ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 16ꓽ12‐15 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓢꓲꓽ ꓫꓬ ꓟ‐ꓦ ꓪꓴ‐ꓢ ꓡꓰ ꓣꓳ ꓔꓯ ꓙ ꓖꓴ ꓧꓳꓽ ꓟꓴ ꓖꓶ ꓡ ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓢꓲꓽ ꓫꓬ ꓟ‐ꓦ ꓪꓴ‐ꓢ ꓡꓰ ꓙ ꓖꓴ ꓧꓳꓽ ꓟꓴ ꓖꓶ ꓡ ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓠꓴ ꓪ ꓔꓯ ꓐꓯ ꓖꓶ ꓓꓴ ꓮꓽ ꓟꓬ, ꓙꓳˍ ꓟꓲ꓾ ꓮ ꓟꓶ ꓠꓴ ꓪ ꓟꓯꓻ ꓟꓽ ꓘꓴ ꓐꓰ ꓐꓯ ꓖꓶ ꓔ ꓡꓳ꓿
, ꓔꓯ ꓠꓬ ꓙ ꓜꓲꓼ ꓟꓽ ꓐ ꓡ ꓢꓴ ꓐꓴ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓡ ꓞꓳ ꓐꓴ ꓮ ꓡꓲ ꓫꓵˍ ꓗꓪ ꓢꓯꓼ ꓐ ꓟ ꓔꓯ ꓢꓷ. ꓟ ꓪꓴ. ꓠꓬꓲ ꓣꓳ ꓔꓯ ꓙ ꓜꓲꓼ ꓠꓲ, ꓔꓯ ꓮꓽ ꓤ ꓤ ꓢꓷ. ꓡ ꓠ, ꓟ ꓐꓱ ꓶ ꓪꓴ‐ꓢ ꓚꓱ, ꓗꓪ ꓮ ꓤ ꓤ ꓢꓷ. ꓡ ꓠ, ꓟ ꓔꓱ ꓚꓵˍ ꓟ ꓪꓴ‐ꓢ ꓐꓯ ꓘꓶ ꓔꓯ ꓢꓷ. ꓡ ꓟ ꓬꓲ ꓙꓵ, ꓣꓴ ꓠ, ꓟ ꓔꓯ ꓐꓯ ꓖꓶ ꓔ ꓡꓳ꓿
ꓢꓲꓽ ꓫꓬ ꓟ‐ꓦ ꓪꓴ‐ꓢ ꓠꓬ ꓔꓱ ꓚꓵˍ ꓟ ꓙ ꓖꓴ ꓗꓪ ꓧꓳꓽ ꓟꓴ ꓖꓶ ꓢꓴ ꓥ ꓟ꓾ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓙꓵꓻ ꓠꓲ, ꓗꓪ ꓢꓲꓽ ꓫꓬ‐ꓠ‐ꓦ ꓪꓴ‐ꓢ ꓠꓬ ꓘꓴ ꓜꓲꓼ ꓞꓳ ꓔꓯ ꓙꓽ ꓖꓴ ꓧꓳꓽ ꓟꓴ ꓖꓶ ꓢꓴ ꓥ ꓡꓳ꓿
ꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓪꓴ‐ꓢ ꓐꓯ ꓘꓶꓽ ꓔꓯ ꓟꓲ ꓠꓯ ꓡ ꓞꓳ ꓐꓴ ꓙ ꓜꓲꓼ ꓐ ꓡ ꓠ, ꓟ ꓣꓳ ꓠꓲ, ꓟ ꓘꓴꓽ ꓗꓪ ꓦꓻ ꓕꓲ ꓒꓳ, ꓗꓪ ꓐꓰ ꓟꓬꓽ ꓢꓶ ꓒꓴ ꓖꓶ ꓢꓴ ꓥ ꓡꓳ꓿ ꓣꓳ ꓮ ꓕꓯ ꓥ ꓟꓲ ꓦꓻ ꓟꓬ ꓢꓶ ꓒꓴ ꓖꓶ ꓢꓴ ꓢꓷ. ꓠꓲ, ꓖꓶ ꓢꓴ ꓠꓬ ꓢꓲꓽ ꓫꓬ ꓟ‐ꓦ ꓪꓴ‐ꓢ ꓥ ꓡꓳ꓿
ꓢꓽ ꓣꓳ ꓕꓲ ꓖꓳꓽ ꓓꓱ ꓪꓴ‐ꓢ ꓠꓬ ꓕꓲ ꓡꓲ ꓥ ꓟ ꓔꓯ ꓬꓳ‐ꓦ ꓕꓳ ꓶ 16ꓽ15 ꓝꓲ. ꓗꓪ ꓐ, ꓐ ꓙꓳ ꓟ ꓮ ꓙꓵꓽ ꓠꓬ ꓥꓪ ꓔꓯ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓥꓪ ꓡꓰ ꓔꓱ, ꓟ ꓦ ꓠꓬ ꓥꓪ. ꓟ ꓣꓴ ꓢꓲ ꓠꓴ ꓔꓯ ꓠꓯ ꓡ ꓥꓳ ꓐꓰ ꓐꓯ ꓟ ꓥ ꓡꓳ꓿
ꓕ ꓱ ꓢꓲꓽ ꓫꓬ ꓕꓳ ꓶ ꓝꓲ. ꓠꓬ ꓐ, ꓐ ꓪꓴ‐ꓢ ꓤ ꓠꓱ ꓬꓰ‐ꓢꓴ ꓙꓲ‐ꓢꓴ ꓐꓰ ꓢꓲꓽ ꓫꓬ ꓟ‐ꓦ ꓪꓴ‐ꓢ ꓐꓴ ꓠꓬ ꓙ ꓡꓯꓽ ꓘꓳ, ꓔꓬ ꓟ ꓐꓰ ꓠꓵꓻ ꓠꓲ, ꓗꓪ ꓐꓰ ꓕꓲ ꓪ ꓟꓬꓱꓽ ꓬꓰ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓢꓲꓽ ꓫꓬ ꓟ‐ꓦ ꓪꓴ‐ꓢ ꓠꓬ ꓔꓱ, ꓟ ꓪꓴ‐ꓢ ꓐꓯ ꓘꓶꓽ ꓔꓯ ꓣꓳ ꓠꓲ, ꓟ ꓗꓪ ꓙ ꓜꓲꓼ ꓠ, ꓟ ꓦꓻ ꓟꓬꓽ ꓢꓶ ꓖꓶ ꓢꓴ ꓥ ꓢꓲ ꓠꓬꓲ ꓣꓳ ꓔꓯ ꓙꓲ ꓟ ꓚꓱ, ꓗꓪ ꓙ ꓖꓴ ꓧꓳꓽ ꓟꓳ ꓖꓶ ꓢꓴ ꓥ ꓡꓳ꓿
ꓖꓳ ꓡꓱ ꓠꓬ ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓣꓳ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓔꓯ ꓙꓵꓻ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿ ꓣꓳ ꓤꓶꓻ ꓠꓯ, ꓗꓪ ꓫ. ꓓꓴ ꓟꓷ ꓓꓴ ꓠꓲ, ꓫ. ꓟꓬ ꓫ. ꓓꓴ ꓙꓳ ꓡ ꓟ ꓙꓵ, ꓕꓯ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓔꓯ ꓙꓵꓻ ꓓꓴ ꓬꓰ ꓡꓯ꓿
ꓝꓮꓲ ꓢꓲꓽ ꓫꓬ ꓟ‐ꓦ ꓪꓴ‐ꓢ ꓔꓯ ꓪꓽ ꓘꓴ ꓠ, ꓟ꓾ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓫ. ꓓꓴ ꓟꓷ ꓓꓴ ꓠꓲ, ꓫ. ꓟꓬ ꓫ. ꓓꓴ ꓔꓳ, ꓜꓳ ꓡ ꓕꓯ ꓢꓲꓽ ꓫꓬ ꓟ‐ꓦ ꓔꓯ ꓪꓽ ꓪꓴꓽ ꓘꓳ, ꓓꓴ ꓬꓰ ꓡꓯ꓿ ꓬꓲ ꓔꓯ ꓙ ꓖꓴ ꓧꓳꓽ ꓟꓴ ꓖꓶ ꓡ ꓠ, ꓟ ꓪꓽ ꓘꓴ ꓡꓯ꓿
ꓝꓮꓲ ꓠ ꓡꓳ ꓠ, ꓟ ꓣꓳ ꓚꓵˍ ꓟ꓾
ꓠꓬꓲ. ꓠꓬꓲ ꓣꓳ ꓘꓴ ꓜꓲꓼ ꓞꓳ ꓗꓪ ꓐꓰ ꓟ. ꓖꓶ ꓡ ꓟ ꓚꓱ, ꓪꓴ‐ꓢ ꓐꓯ ꓘꓶꓽ ꓔꓯ ꓣꓳ ꓔꓯ ꓵꓻ ꓢꓲ ꓠꓬꓲ ꓟꓽ ꓙ ꓜꓲꓼ ꓟꓽ ꓢꓷ. ꓗꓷ ꓡꓰ ꓠꓬ ꓢꓲꓽ ꓫꓬ ꓟ‐ꓦ ꓪꓴ‐ꓢ ꓔꓯ ꓪꓽ ꓘꓴ ꓠ, ꓟ ꓢꓯꓼ ꓕꓵꓼ ꓡꓯ꓿
