ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ “ꓥꓪ ꓠꓵ ꓠꓲ, ꓠꓯꓸꓼ ꓗꓪ ꓔꓬ” ꓐꓰ ꓐꓯˍ ꓟ ꓟ. ꓟꓲꓽ ꓗꓪ ꓐꓰ ꓦ ꓢꓯꓼ ꓪ ꓣꓴ ꓓꓴ ꓥꓳ꓿ ꓟ. ꓟꓲꓽ ꓠꓬ ꓬꓳ‐ꓦ 15ꓽ9‐11 ꓥ ꓡꓳ꓿ ꓟ. ꓟꓲꓽ ꓝꓲ. ꓠꓬ ꓕꓱ ꓡꓱ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ꓾ ꓥꓪ ꓐ, ꓐ ꓥꓪ ꓔꓯ ꓠꓲ, ꓠꓵˍ ꓟ ꓡꓰ ꓐꓰ ꓥꓪ ꓥˍ ꓟꓲ ꓠꓴ ꓪ ꓔꓯ ꓠꓲ, ꓠꓵˍ ꓡꓳ꓿ ꓖꓳ ꓟ ꓑꓶ. ꓓꓴ ꓥꓪ ꓠꓵ ꓠꓲ, ꓠꓯꓸꓼ ꓗꓪ ꓔꓬ꓿ ꓥꓪ ꓐꓯ ꓘꓶꓽ ꓔꓯ ꓛꓳ ꓒꓵꓽ ꓢꓴ ꓠꓬ ꓥꓪ ꓠꓵ ꓠꓲ, ꓠꓯꓸꓼ ꓗꓪ ꓔꓬ ꓟ ꓥ ꓡꓳ꓾ ꓐꓰ ꓐꓯˍ ꓟ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ “ꓥꓪ ꓠꓵ ꓠꓲ, ꓠꓯꓸꓼ ꓗꓪ ꓔꓬ” ꓐꓰ ꓐꓯˍ ꓟ ꓬꓲ. ꓬꓲ ꓢꓲ ꓠꓬ ꓔꓯꓺ ꓥꓳꓽ ꓐꓯ ꓪˍ ꓠꓬ꓾ ꓥꓪ. ꓐꓰ ꓬꓲꓻ ꓙꓬ ꓔꓯ ꓫꓱ.ˍ ꓡꓳ꓿ ꓥꓪ. ꓟꓽ ꓔꓬ ꓥ ꓟꓲ ꓬꓲꓻ ꓙꓬ ꓔꓯ ꓠꓬ ꓮ ꓫꓵꓽ ꓟꓽ ꓛ ꓡꓰ꓿ ꓖꓳ ꓡꓱ ꓐꓯ ꓥ ꓟꓲ ꓥꓪ. ꓐꓱ ꓶ ꓠꓽ ꓬꓲꓻ ꓙꓬ ꓟꓽ ꓙꓳ ꓕꓯ ꓠꓽ ꓢꓯ. ꓔꓬ ꓟꓽ ꓐ ꓡ꓿
ꓕꓱ ꓟ ꓑꓶ. ꓓꓴ ꓣꓳ ꓠꓬ ꓥꓪ. ꓔꓯ ꓫꓱ.ˍ ꓡꓳ꓿ ꓠꓯ ꓬꓲ ꓬꓲꓻ ꓙꓬ ꓥ ꓟ ꓪꓴ‐ꓢ ꓠꓵ ꓠꓲ, ꓔꓯ ꓫꓱ.ˍ ꓡꓳ꓿ ꓕꓱ ꓟ ꓑꓶ. ꓓꓴ ꓣꓳ ꓠꓬ ꓥꓪ.ˍ ꓡꓰ ꓐꓰ ꓬꓲꓻ ꓙꓬ ꓗꓪ ꓢꓯ. ꓔꓬ ꓪˍ ꓟ ꓡꓰ ꓣꓳ ꓥˍ ꓟꓲ ꓪꓴ‐ꓢ ꓠꓵ ꓠꓲ, ꓠꓯꓸꓼ ꓗꓪ ꓢꓯ. ꓔꓬ ꓪˍ ꓟ ꓥꓳ꓿ ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓠꓬꓲ. ꓠꓬꓲ ꓣꓳ ꓔꓯ “ꓥꓪ ꓠꓵ ꓠꓲ, ꓠꓯꓸꓼ ꓗꓪ ꓔꓬ” ꓐꓯˍ ꓟ ꓥ ꓡꓳ꓿
ꓮ ꓫꓵꓽ ꓑꓶ. ꓓꓴ ꓬꓲ ꓕꓱ ꓡꓰ ꓐꓯˍ ꓡ ꓐꓯ ꓠꓬ꓾ ꓟꓲ ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓠꓽ ꓣꓳ ꓔꓯ ꓢꓲ ꓒ ꓬꓰ‐ꓢꓴ ꓖꓶˍ ꓟ ꓠꓵ ꓠꓲ,ˍ ꓡꓰ ꓐꓰ ꓟꓽ ꓗ,꓿ ꓢꓲ ꓒ ꓬꓰ‐ꓢꓴ ꓖꓶˍ ꓟ ꓠꓵ ꓠꓲ, ꓠꓬ ꓮ ꓘꓶ. ꓢꓲ ꓡꓲˍ ꓡꓳ꓿ ꓮ ꓘꓶ. ꓠꓲ, ꓘꓪꓽ ꓫꓵ ꓓꓴ ꓧ. ꓡꓳ꓿ ꓕꓲ ꓞꓲꓼ ꓕꓲ ꓑ ꓐꓬ ꓡꓰ ꓟꓽ ꓓꓻ ꓟ ꓪꓴ‐ꓢ ꓬꓲ ꓠꓵ ꓠꓲ, ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓣꓳ ꓠꓽ ꓕꓲ ꓞꓲꓼ ꓕꓲ ꓑ ꓐꓬ ꓡꓰ ꓟꓽ ꓓꓻ ꓟ꓾ ꓐꓯ ꓖꓴ ꓟꓽ ꓓꓻ ꓟ ꓪꓴꓽ ꓓꓰ ꓡꓰˍ ꓟ ꓠꓵ ꓠꓲ, ꓗꓪ ꓣꓳ ꓟꓽ ꓔꓬ ꓕꓯ ꓠꓽ꓾ ꓟꓲ ꓠꓯ ꓗꓪ ꓟ ꓠꓵ ꓠꓲ, ꓔꓯ ꓡꓰꓽ ꓣꓳ ꓧꓪ ꓔꓬ ꓕꓯ ꓠꓽ ꓟꓲ ꓠꓯ ꓗꓪ ꓟ ꓠꓵꓻ ꓠꓲ, ꓠꓽ ꓣꓳ ꓔꓯ ꓮ ꓔꓯ ꓟꓲ ꓠꓲ, ꓠꓵ ꓟꓽ ꓐ ꓡ꓿ ꓖꓳ ꓕꓯ ꓠꓬ ꓣꓳ ꓠꓬ ꓠꓲ, ꓫ. ꓟꓬ ꓫ.꓾ ꓠꓲ, ꓟ ꓙꓬ ꓓꓴ꓾ ꓠꓲ, ꓥꓴ ꓓꓴ꓾ ꓕꓱ ꓡꓱ ꓐꓰ ꓮ ꓟꓬ, ꓫ. ꓙꓵ ꓟꓶ ꓙꓵ ꓓꓴ ꓔꓳ, ꓜꓳꓽ ꓪˍ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓪꓴ‐ꓢ ꓠꓵ ꓠꓲ, ꓠꓯꓸꓼ ꓗꓪ ꓔꓬ ꓢꓴ ꓠꓬ ꓮ ꓘꓶ. ꓢꓲ ꓡꓲ ꓟ ꓟꓶˍ ꓥꓳ꓿
ꓖꓳ ꓡꓰ ꓠꓬꓲ ꓪꓴ‐ꓢ ꓠꓵ ꓠꓲ, ꓠꓯꓸꓼ ꓗꓪ ꓔꓬ ꓢꓴ ꓠꓬ ꓮ ꓡꓲ ꓫꓵꓽ ꓥ ꓡ ꓐꓯ ꓠꓬ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓛꓳ ꓒꓵꓽ ꓢꓴ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓪꓴ‐ꓢ ꓠꓵ ꓠꓲ, ꓠꓯꓸꓼ ꓗꓪ ꓔꓬ ꓐ ꓡ ꓠ, ꓟ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓛꓳ ꓒꓵꓽ ꓪˍ ꓟ ꓥ ꓡꓳ꓿ ꓬꓲꓻ ꓙꓬ ꓠꓬ ꓥꓪ. ꓔꓯ ꓟꓽ ꓣꓱꓽ ꓞ, ꓐꓯ ꓥ ꓟꓲ ꓥꓪ. ꓠꓬ ꓬꓲꓻ ꓙꓬ ꓔꓯ ꓣꓱꓽ ꓞ, ꓡꓳ꓿ ꓖꓳ ꓟ ꓑꓶ. ꓓꓴ ꓥꓪ. ꓠꓬ ꓬꓲꓻ ꓙꓬ ꓠꓯꓸꓼ ꓗꓪ ꓔꓬ ꓠꓬ ꓬꓲꓻ ꓙꓬ ꓗꓪ ꓔꓬ ꓐ ꓡ ꓠ, ꓟ ꓐꓱ ꓶ꓾ ꓬꓲꓻ ꓙꓬ ꓗꓪ ꓮ ꓡꓲ ꓙꓰ ꓠ ꓗ, ꓟ ꓮ ꓡꓲ ꓛꓳ ꓫꓱꓽ ꓪˍ ꓟ ꓔꓯ꓾ ꓠꓬꓲ. ꓠꓬꓲ ꓣꓳ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓛꓳˍ ꓥꓳ ꓐꓯˍ ꓠꓬ ꓕꓲ ꓞꓲꓼ ꓟꓽ ꓫꓵꓻ꓾ ꓠꓵ ꓠꓲ, ꓠꓯꓸꓼ ꓗꓪ ꓣꓳ ꓔꓬ ꓠꓬ ꓣꓳ ꓟꓽ ꓢꓲꓼ ꓟ ꓥꓳ꓿
