ꓙꓲ ꓟ ꓟꓵꓽ ꓘꓳꓼ ꓔꓯ ꓖꓶ ꓐ ꓡ ꓢꓴ ꓒꓬꓱꓼ ꓡ ꓠꓯ, ꓟ
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓙꓲ ꓟ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓖꓶ ꓡ ꓢꓴ ꓒꓬꓱꓼ ꓡ ꓠ, ꓟ ꓣꓳ ꓢꓯꓼ ꓕꓵꓼ ꓡꓯ ꓐꓯ ꓟ ꓚꓱ, ꓗꓪ ꓐꓰ ꓢꓯꓼ ꓖꓶ ꓩꓴ ꓡ ꓥꓳ꓿
ꓠꓬꓲ. ꓠꓬꓲ ꓣꓳ ꓞꓳ ꓙꓳ ꓢꓯ. ꓔꓬ ꓟ ꓟꓲ ꓠꓯ ꓕꓯ ꓢꓲ ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯ. ꓔꓬ ꓟ ꓙꓵ, ꓕꓯ ꓟꓲ ꓠꓯ ꓡ ꓞꓳ ꓮ ꓙꓵꓽ ꓠꓬ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓘꓳ, ꓣꓴ ꓠꓲ, ꓫꓵˍ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓬꓰ ꓟ ꓟꓬꓱꓽ ꓗꓪ ꓐꓰ ꓪꓴ. ꓕꓵ ꓢꓲ ꓠꓬꓲ ꓙꓲ ꓟ ꓟꓵꓽ ꓘꓳꓼ ꓔꓯ ꓖꓶ ꓐ ꓡ ꓢꓴ ꓒꓬꓱꓼ ꓡ ꓝꓲ ꓢꓴ ꓒꓬꓱꓼ ꓡ ꓠ, ꓟ ꓣꓳ ꓬꓰ ꓠ, ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓮ ꓟꓶ ꓟ ꓙꓵ, ꓗꓪ ꓣꓳ ꓔꓬ ꓟ ꓦꓲꓻ ꓘꓴꓽ ꓞꓳ ꓘ, ꓡꓳ ꓒꓱ ꓮ ꓟꓬ, ꓗꓪ ꓠꓬ ꓑꓶ. ꓛꓵꓽ ꓔꓯ ꓮ ꓔꓳꓽ ꓔꓳꓽ ꓡꓰ ꓡꓳ ꓔ ꓟ ꓠꓬ ꓟꓵꓽ ꓘꓳꓼ ꓒꓳ, ꓡ ꓫꓵꓽ ꓪꓴꓽ ꓓꓽ ꓕꓲ ꓫꓵꓽ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓔꓬ ꓟ ꓒ ꓕꓲ ꓗꓪ ꓣꓳ ꓡꓳ. ꓠꓬꓲ ꓠꓬ ꓑꓶ. ꓛꓵꓽ ꓮ ꓟꓬ, ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿ ꓑꓶ ꓛꓵꓽ ꓔꓯ ꓮꓽ ꓔꓳ ꓔꓳ ꓡꓳ. ꓗꓷ ꓠꓬ ꓮ ꓙꓲ ꓟ ꓡꓰ ꓟꓽ ꓛꓵꓽ ꓐꓰ ꓓꓴ ꓙ ꓖꓴ ꓟ ꓙꓳ ꓟ ꓥ ꓡꓳ꓿
ꓠꓴ ꓗꓪ ꓐꓰ ꓡꓳ ꓗꓷ ꓟ ꓑꓶ ꓛꓵꓽ ꓝꓮꓲ ꓟꓲ ꓠꓯ ꓕꓯ ꓢꓲ ꓗꓪ ꓞꓳ ꓙꓳ ꓢꓯ. ꓔꓬ ꓟ ꓡ ꓞꓳ ꓮ ꓙꓵꓽ ꓡꓰ ꓕꓱ ꓡꓰ ꓑꓶ. ꓛꓵꓽ ꓔꓯ ꓮꓽ ꓔꓳꓽ ꓔꓳꓽ ꓡꓳ. ꓗꓷ ꓠꓬ ꓟꓲ ꓠꓯ ꓕꓯ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓫꓵꓽ ꓪꓴꓽ ꓓ ꓟ ꓒꓬꓱꓼ ꓡ ꓝꓲ ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓠꓬ ꓬꓲꓻ ꓙꓬ ꓙꓵꓽ ꓡꓳ ꓧꓳ ꓧꓳꓽ ꓙ ꓖꓴ ꓐꓬ ꓕꓱ ꓡꓰ ꓐꓰ ꓫ. ꓓꓴ ꓮ ꓟꓬ, ꓔꓳ, ꓜꓳ ꓡ ꓓꓴ ꓥ ꓡꓳ꓿
ꓖꓳ ꓡꓰ ꓥ ꓠꓬ ꓟꓲ ꓠꓯ ꓠꓬ ꓑꓶ. ꓛꓵꓽ ꓟꓲ ꓠꓯ ꓒꓬꓱꓼ ꓡꓰ ꓖꓴ ꓟ ꓥ ꓡꓳ꓿ ꓣꓳ ꓡꓱ ꓠꓬ ꓣꓳ ꓔꓬ ꓟ ꓟꓲ ꓠꓯ ꓔꓯ ꓠꓲ, ꓠꓵ ꓡꓯ꓿
ꓠꓬꓲ. ꓠꓬꓲ ꓣꓳ ꓔꓬ ꓟ ꓟꓲ ꓠꓯ ꓔꓯ ꓠꓲ, ꓠꓵ ꓢꓲ ꓠꓬꓲ ꓮ ꓡꓲ ꓐꓰ ꓔꓬ ꓠ, ꓟ ꓐꓯ ꓠꓬ꓾
1.ꓣꓳ ꓡꓳ. ꓗꓷ ꓑꓶ. ꓛꓵꓽ ꓔꓯ ꓜꓲ ꓜꓲ ꓟꓳ ꓟꓳ ꓬꓰ ꓢꓲ ꓠꓬꓲ ꓡꓳ. ꓗꓷ ꓠ, ꓟ ꓣꓳ ꓚꓵˍ ꓡꓳ꓿ ꓣꓱ ꓟꓽ ꓬꓯ ꓬꓯ ꓑꓡꓮꓢꓔꓲꓚ ꓔꓯ ꓟꓽ ꓣꓱ ꓠ, ꓟ ꓤ ꓟꓳ ꓓꓴ ꓬꓰ ꓡꓯ꓿ ꓣꓳ ꓦꓲꓻ ꓗꓪ ꓐꓰ ꓶꓻ ꓤ ꓗꓪ ꓙꓰ ꓟ ꓙꓵ, ꓕꓯ ꓚꓲ. ꓛꓬ ꓬꓲꓻ ꓙꓬ ꓓꓳ ꓓꓴ ꓔꓯ ꓔꓯꓺ ꓔ ꓓꓴ ꓬꓰ ꓡꓯ꓿ ꓳꓠꓰ ꓴꓢꓰ ꓔꓯ ꓒ ꓡ ꓟꓬ ꓛꓲ ꓤ ꓟꓳ ꓢꓲ ꓠꓬꓲ ꓣꓱ ꓓꓴ ꓬꓰ ꓡꓯ꓿
2. ꓠꓬꓲ ꓗꓪ ꓛꓲ ꓣꓳ ꓡꓳ ꓗꓷ ꓟ ꓑꓶ. ꓛꓵꓽ ꓔꓯ ꓠꓱ. ꓐꓯ ꓔꓶ. ꓗꓪ ꓣꓱ ꓙꓲ ꓡ? ꓝꓮꓲ ꓣꓳ ꓡꓳ. ꓗꓷ ꓔꓯ ꓠꓱ. ꓐꓯꓼ ꓢꓴ ꓣꓱ ꓙꓲ ꓟ ꓠꓬ ꓝꓮꓲ ꓣꓱ ꓠ, ꓟ ꓢꓯꓼ ꓕꓵꓼ ꓡꓯ꓿ ꓕꓱ ꓡꓱ ꓡ ꓞꓳ ꓐꓴ ꓡꓰ ꓡꓳ. ꓗꓷ ꓑꓶ. ꓛꓵꓽ ꓗꓪ ꓝꓮꓲ ꓬꓲ ꓫꓵꓼ ꓫꓬ, ꓢꓲ ꓠꓬꓲ ꓟꓲ ꓠꓯ ꓞꓳ ꓡꓱꓼ ꓐꓴ ꓒꓴ ꓮ ꓟꓬ, ꓧꓪ ꓔꓬ ꓟ ꓗꓴꓷꓼ ꓙꓳ ꓟ ꓥ ꓡꓳ꓿
3. ꓠꓬ ꓣꓰꓚꓬꓚꓡꓰ ꓐꓯ ꓣꓳ ꓡꓰ ꓡꓳ. ꓗꓷ ꓟ ꓑꓶ. ꓛꓵ ꓔꓯ ꓬꓲ ꓩꓴ ꓩꓴ ꓘꓶꓽ ꓔꓯ ꓢꓲ ꓠꓬꓲ ꓡꓳ. ꓠ, ꓟ ꓢꓯꓼ ꓕꓵꓼ ꓡꓯ꓿ ꓑꓡꓮꓢꓔꓲꓚ ꓐꓰ ꓞꓳ ꓫꓵꓽ ꓓꓳ ꓫꓵꓽ ꓔꓯ ꓘꓶꓽ ꓢꓲ ꓠꓬꓲ ꓡꓳ. ꓗꓷ ꓠ, ꓟ ꓣꓳ ꓢꓯꓼ ꓕꓵꓼ ꓡꓯ꓿
ꓕꓱ ꓡꓰ ꓐꓰ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓱ ꓗꓷ ꓟ ꓑꓶ. ꓛꓵꓽ ꓔꓯ ꓤ ꓟꓳ ꓢꓲ ꓠꓬꓲ ꓡꓳ. ꓠ, ꓟ ꓟꓬꓱꓽ ꓬꓰ ꓡꓯ꓿ ꓕꓱ ꓡꓱ ꓟꓽ ꓬꓰ ꓠꓬ ꓣꓳ ꓦꓲꓻ ꓒ ꓕꓲ ꓗꓪ ꓔꓬ ꓟꓽ ꓙꓲ ꓠ, ꓟ ꓛꓵꓽ ꓬꓲ ꓐꓴ ꓛꓵꓽ ꓠꓴ ꓡ ꓓꓴ ꓥꓳ꓿ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓣꓳ ꓘꓳ, ꓣꓴ ꓟꓽ ꓓ꓿
ꓙꓲ ꓟ ꓐꓰ ꓢꓲꓽ ꓫꓬ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓘꓳ, ꓣꓴ ꓪ ꓠ, ꓟ ꓠꓴ ꓥꓪ ꓠꓯ, ꓗꓪ ꓶꓻ ꓓ ꓟ ꓙꓳ ꓟ ꓥ ꓡꓳ꓿ ꓛꓲ ꓡ ꓤꓶꓻ ꓠꓯ, ꓗꓪ ꓣꓳ ꓮ ꓐꓲ ꓮ ꓟꓲ ꓐꓴ ꓔꓯ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬ ꓔꓯ ꓖꓶ ꓐ ꓡ ꓢꓴ ꓒꓬꓱꓼ ꓡ ꓝꓲ ꓡꓯ꓿
ꓣꓳ ꓮ ꓐꓲ ꓮ ꓟꓲ ꓐꓴ ꓔꓯ ꓟꓽ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓬꓲ ꓓꓳꓼ ꓙꓳ ꓟ ꓟꓲ ꓠꓯ ꓔꓯ ꓖꓶ ꓢꓴ ꓟꓽ ꓒꓬꓱꓼ ꓠ, ꓟ ꓤ ꓟꓳ ꓓꓴ ꓬꓰ ꓡꓯ꓿ ꓮ ꓙꓵꓽ ꓢꓴ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓘꓳ, ꓣꓴ ꓪ ꓝꓲ꓿ꓫ. ꓟꓳ ꓪ꓿
