ꓧꓪ. ꓧꓪꓸꓼ ꓬꓲꓼ ꓤ ꓠꓬꓲ ꓤ ꓐꓴꓳ꓾ (ꓬꓳ‐ꓦ꓿14ꓽ1‐12) ꓠꓬ ꓕꓱ ꓕꓲ ꓠꓽ ꓠꓽ‐ꓦꓬꓼ‐ꓠꓬꓲ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓥ ꓡꓳ꓿ ꓟ. ꓟꓲꓽ ꓘꓴꓽ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓬꓲ ꓪꓴ. ꓕꓲ ꓘꓶꓽ ꓐꓯ ꓖꓶ ꓡ ꓔꓬ ꓟ ꓠꓬ “ꓕꓽ ꓙꓽ ꓫ.” ꓐꓰ ꓐꓯˍ ꓟ ꓥ ꓡꓳ꓿ ꓣꓳ ꓠꓬ ꓮ ꓕꓯ ꓥ ꓟꓲ ꓙꓽ ꓫ. ꓗꓴ. ꓢꓴ ꓟꓲ ꓠꓯ ꓞꓳ ꓤ ꓥ ꓡꓳ꓿ ꓕꓲ ꓫꓵꓽ ꓟꓽ ꓥ ꓕꓲ ꓫꓵꓽ ꓠꓲ, ꓟ ꓠꓯꓸꓼ ꓘꓴꓽ ꓗꓪ꓾ ꓙꓲ ꓣꓴꓽ ꓓꓴ ꓟꓬ ꓑꓬ ꓓꓴ ꓮ ꓕꓯ ꓟꓲ ꓐꓲ ꓓ, ꓡꓳ꓿ ꓥꓪ ꓪꓴꓽ ꓡ ꓠꓬ ꓮ ꓡꓲ ꓗꓷ ꓡꓰˍ ꓥ ꓟꓽ ꓢꓷ.꓾ ꓥ ꓠꓬ ꓥꓪ ꓞꓲꓼ ꓪꓴꓽ ꓡ ꓕꓯ ꓮꓽ ꓟ ꓥꓪ ꓔꓯ ꓗꓪꓽ ꓫꓵꓼˍ ꓡ꓾ ꓮ ꓡꓲ ꓫꓵꓽ ꓠꓻ ꓓꓴ ꓒꓬꓽ ꓓꓴ ꓥꓪ ꓔꓳ, ꓜꓳꓽˍ ꓡ꓾ ꓮ ꓡꓲ ꓫꓵꓽ ꓠꓻ ꓫꓵꓽ ꓥꓪ ꓔꓯ ꓣꓳ, ꓜꓳꓽ ꓡˍ ꓡ꓾ ꓥꓪ ꓔꓯ ꓮꓽ ꓟ ꓖꓶ ꓜꓽ ꓖꓶ ꓓꓳˍ ꓡ꓾ ꓕꓱ ꓡꓱ ꓫꓵꓽ ꓙꓲ ꓣꓴꓽ ꓟꓬ ꓑꓬ ꓓꓴ꓾ ꓠꓲ, ꓫ. ꓓꓴ ꓙꓽ ꓫ. ꓓꓴ ꓮ ꓟꓬ, ꓣꓳ ꓤꓶꓻ ꓗꓪ ꓐꓲ ꓜꓲꓼ ꓡꓰˍ ꓡꓳ꓿
ꓮ ꓡꓲ ꓗꓪ ꓡꓳ. ꓠꓬꓲ ꓥ ꓟꓲ ꓙꓽ ꓫ. ꓓꓴ ꓠꓲ, ꓫ. ꓓꓴˍ ꓡꓰꓽ ꓣꓳ ꓟꓳˍ ꓡꓳ꓿ ꓕꓱ ꓡꓱ ꓟ ꓘꓴꓽ ꓗꓪ ꓪꓴ‐ꓢ ꓠꓬ ꓣꓳ ꓔꓯ “ꓕꓽ ꓙꓽ ꓫ.” ꓐꓰ ꓐꓯ ꓖꓶ ꓡˍ ꓡꓳ꓿ ꓥ ꓡꓳ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓲ, ꓫ. ꓟꓬ ꓫ. ꓓꓴ꓾ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓘꓶꓻ ꓡꓶ ꓗꓽ ꓡꓽ ꓓꓴ ꓠꓬ ꓮ ꓡꓲ ꓗꓪ ꓥˍ ꓟꓲ ꓙꓳˍ ꓡꓳ꓿ ꓣꓳ ꓟꓳ ꓪˍ ꓥꓳ꓿ ꓣꓳ ꓗꓳ. ꓪˍ ꓥꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ꓾ ꓟꓲ ꓠꓯ ꓕꓱ ꓟ ꓗꓪ ꓠꓴ ꓪ ꓥꓪ ꓔꓯ ꓙꓵˍ ꓠꓬ ꓮ ꓫꓵꓽ ꓫ. ꓙꓵ ꓟꓶ ꓙꓵ ꓓꓴ ꓟꓽ ꓔꓳ, ꓜꓳꓽ꓾ ꓐꓰ ꓟꓽ ꓐꓯ ꓔ꓿ ꓖꓳ ꓡꓱ ꓐꓯ ꓥ ꓟꓲ ꓐꓯ ꓔ ꓟ ꓕꓲ ꓚꓱ, ꓙꓳˍ ꓡꓳ꓿ ꓬꓲ ꓡꓰ꓾ ꓕꓽ ꓙꓽ ꓫ. ꓥꓪ ꓠꓬ ꓠꓴ ꓪ ꓐꓰ ꓕꓲ ꓡꓰ, ꓔꓬ ꓡꓳ꓾ ꓐꓯˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓐꓰ ꓔꓬ ꓡꓳ꓿ ꓬꓲ ꓠꓬ ꓣꓳ ꓔꓯ ꓕꓽ ꓙꓽ ꓫ. ꓐꓰ ꓐꓯ ꓔ ꓟ ꓔꓯ ꓣꓳ ꓙꓵꓻˍ ꓕꓯ ꓣꓳ ꓠꓲ, ꓟ ꓘꓴꓽ ꓗꓪ ꓢꓯꓼ ꓕꓲ ꓟ ꓣꓳ ꓔꓯ ꓙꓳ ꓡˍ ꓡꓳ꓿ ꓣꓳ ꓬꓰ ꓑꓶ.ˍ ꓟ꓾ ꓙꓽ ꓫ ꓓꓴ ꓔꓯ ꓘꓳ ꓐ ꓡˍ ꓟ ꓬꓲ ꓢꓯꓼ ꓕꓲ ꓟ ꓣꓳ ꓠꓯꓸꓼ ꓘꓴꓽ ꓗꓪ ꓓꓵꓽ ꓡˍ ꓡꓳ꓿ ꓕꓱ ꓟ ꓠꓬ ꓙꓵꓻ ꓠꓲ, ꓢꓯꓼ ꓪ ꓥ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ꓿ ꓕꓽ ꓙꓽ ꓫ. ꓐꓰ ꓐꓯ ꓖꓶ ꓡ ꓔꓬ ꓟ ꓐꓰ ꓕꓲ ꓡꓰ, ꓣꓳ ꓠꓲ, ꓠꓯꓸꓼ ꓘꓴꓽ ꓗꓪ ꓙꓳˍ ꓟ ꓫ. ꓓꓴ ꓟꓬ ꓑꓬ ꓓꓴ ꓔꓯ꓾ ꓢꓲ ꓒ ꓬꓰ‐ꓢꓴ ꓡꓰ ꓕꓽ ꓙꓽ ꓫ. ꓐꓯˍ ꓟ ꓔꓯ ꓠ ꓠ, ꓢꓲ ꓘꓳ ꓗꓳ. ꓙꓰ ꓡꓯ꓿ ꓢꓲ ꓒ ꓬꓰ‐ꓢꓴ ꓠꓬ ꓝꓮꓲ꓾ ꓥꓪ ꓠꓬ ꓔꓱ, ꓚꓵˍ ꓟ ꓐꓰ ꓙ ꓖꓴ ꓥ ꓡ꓾ ꓢꓯꓼ ꓟꓬ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿ ꓣꓳ ꓮ ꓙꓵꓽ ꓠꓬ ꓢꓯꓼ ꓟꓬ ꓖꓳ ꓟ ꓔꓯ ꓟꓷꓼ ꓢꓲꓼˍ ꓡꓳ꓿
