ꓟ‐ꓔꓲ꓿ 5ꓽ43‐48
ꓠꓴ ꓠꓶꓽ ꓛꓳ ꓕꓲ ꓛꓳ ꓔꓯ ꓠꓲꓹ ꓠꓵ ꓢꓲ꓾ ꓛꓴꓽ ꓙꓳ ꓢꓴ ꓔꓯ ꓠꓲꓹ ꓜꓳ꓾ ꓐꓯˍ ꓟ ꓠꓴ ꓪꓽ ꓑ ꓙꓽ ꓠꓬꓲꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓠꓬ ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ ꓢꓲ꓾ ꓠꓴ ꓪꓽ ꓔꓯ ꓗꓸ ꓧꓪ ꓢꓴ ꓐꓱ ꓶ ꓪꓽ ꓘꓴ ꓙ꓿ ꓠꓴ ꓪꓽ ꓕꓱ ꓡꓱ ꓬꓰˍ ꓠꓬ ꓠꓴ ꓪꓽ ꓠꓽ ꓟꓴꓽ ꓗꓪ ꓗꓪ ꓔꓬ ꓟ ꓠꓴ ꓪꓽ ꓐꓹ ꓐꓽ ꓬꓲ ꓤ ꓠꓱ ꓒꓬꓱꓼ ꓡ ꓥꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓬꓲ ꓟꓲꓽ ꓟꓲ ꓠꓬ꓾ ꓞꓳ ꓙꓲꓻˍ ꓐꓰ ꓞꓳ ꓥꓶ ꓔꓯ ꓕꓲ ꓡꓰꓹꓼ ꓐꓰ ꓣꓳꓺ ꓖꓶˍ ꓡꓳ꓿ ꓟꓶꓽ ꓦˍ ꓟꓲ ꓔꓱꓹ ꓜꓳꓽ ꓢꓴˍ ꓐꓰ ꓟꓽ ꓔꓱꓹ ꓜꓳꓽ ꓢꓴ ꓔꓯ ꓕꓲ ꓡꓰꓹꓼ ꓐꓰ ꓦ ꓖꓶˍ ꓡꓳ꓿ ꓠꓴ ꓪꓽ ꓠꓬ ꓠꓴ ꓪꓽ ꓔꓯ ꓠꓲꓹ ꓠꓵ ꓢꓴ ꓔꓯˍ ꓡꓰꓽ ꓠꓲꓹ ꓠꓵˍ ꓕꓯ ꓠꓽ ꓮꓸ ꓫꓵ ꓡꓯꓼ ꓫꓴ ꓟꓽ ꓙꓳ꓿ ꓝꓲꓸ ꓫ ꓢꓴˍ ꓟꓲ ꓕꓱ ꓡꓱ ꓬꓰˍ ꓡꓳ꓾ ꓟꓽ ꓥ ꓡ? ꓠꓴ ꓪꓽ ꓠꓬ ꓠꓴ ꓬꓲꓼ ꓠꓴ ꓠꓬꓲ ꓔꓯˍ ꓡꓰ ꓒꓵꓽ ꓗ ꓬꓰˍ ꓠꓬ꓾ ꓢꓴ ꓬꓰˍ ꓟ ꓕꓯꓽ ꓢꓲ ꓮꓸ ꓫꓵ ꓬꓰˍ ꓡ? ꓐꓶꓽ ꓞꓳ ꓐꓴˍ ꓟꓲ ꓖꓳ ꓡꓱ ꓬꓰˍ ꓡꓳ꓾ ꓟꓽ ꓥ ꓡ? ꓖꓳ ꓡꓱ ꓠꓬꓲ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓔꓬ ꓟ ꓠꓴ ꓪꓽ ꓐꓹ ꓐ ꓜꓳꓽ ꓓꓰˍ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓜꓳꓽ ꓓꓰ ꓡꓰ ꓠ ꓗꓹ ꓡꓳ꓿
ꓧꓪ. ꓧꓪ.꓾ ꓕꓲ ꓣꓳ ꓣꓳ ꓡꓰ ꓣꓳ ꓔꓯ ꓠꓻ ꓡꓰ ꓝꓲˍ ꓕꓯ ꓣꓳ ꓠꓬ ꓬꓲ ꓔꓯ ꓖꓽ ꓖꓶ ꓠ, ꓟ꓾ ꓠꓲ, ꓠꓵ ꓠ, ꓟ ꓢꓯꓼ ꓕꓵꓼ ꓠꓬꓲˍ ꓡ? ꓠꓲ, ꓟ ꓘꓴꓽ ꓗꓪ ꓠꓽ ꓠꓵꓻ ꓠꓲ, ꓢꓶ. ꓟꓽ ꓞꓲ ꓠꓲ, ꓟ ꓦꓶˍ ꓟ꓾ ꓠꓲ, ꓟ ꓠˍ ꓟ ꓡꓰ ꓟꓬꓽ ꓠꓬꓲ ꓓꓵꓽ ꓡˍ ꓡꓳ꓿ ꓚꓵ ꓚꓵ ꓠꓲ, ꓟ ꓫ. ꓪˍ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓠꓬꓲ. ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓮ ꓘꓶ. ꓫˍ ꓟ ꓐꓯ ꓘꓶꓽ ꓕꓲ ꓘꓶꓽ ꓐꓯ ꓖꓶ ꓡ ꓔꓬ ꓡꓳ꓿ “ꓠꓴ ꓪ ꓛꓴꓽ ꓙꓳ ꓢꓴ ꓔꓯ ꓠꓲ, ꓠꓵ ꓢꓲ ꓠꓴ ꓪ ꓔꓯ ꓗ. ꓧꓪ ꓢꓴ ꓐꓱ ꓶ ꓪꓽ ꓘꓴ ꓙ꓾” ꓐꓰ ꓐꓯ ꓖꓶ ꓡ ꓔꓬ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓠꓵꓻ ꓠꓲ, ꓐꓯˍ ꓟ ꓠꓬ ꓣꓳ ꓠꓲ, ꓟ ꓓꓵꓽ ꓙꓽ ꓟꓶˍ ꓟ ꓟꓽ ꓥ꓾ ꓕꓱ ꓟ ꓠꓬ ꓣꓳ ꓢꓲ ꓣꓴ ꓓꓴ ꓕꓲ ꓟ ꓥ ꓡꓳ꓿ ꓐꓯ ꓠꓲ, ꓫꓵˍ ꓟ ꓠꓬ ꓠꓲ, ꓟ ꓗꓪ ꓐꓰ ꓬꓲ ꓓ ꓬꓲ ꓓꓳ ꓡˍ ꓟ ꓠꓵꓻ ꓠꓲ,꓾ ꓟꓽ ꓥ ꓠꓬ ꓒꓬꓱꓽ ꓐꓲˍ ꓟ ꓑꓶ. ꓓꓴ ꓠꓲ, ꓠꓵˍ ꓟ꓾ ꓬꓲ ꓢꓯꓼ ꓧˍ ꓟ ꓑꓶ. ꓓꓴ ꓠꓲ, ꓠꓵˍ ꓟ꓾ ꓠꓲ, ꓟ ꓙꓲˍ ꓟ ꓪꓴ. ꓠꓬꓲ ꓠꓲ, ꓠꓵˍ ꓟ ꓟꓽ ꓥ ꓥ꓾ ꓮ ꓡꓲ ꓗ, ꓥ ꓟꓲ ꓠꓵ ꓠꓲ, ꓟꓳ. ꓖꓶˍ ꓟ ꓥ ꓡꓳ꓿
ꓠꓲ, ꓠꓵ ꓢꓻ ꓢꓴ ꓔꓯ ꓠꓲ, ꓠꓵˍ ꓟ ꓠꓽ ꓟꓽ ꓫ.꓿ ꓖꓳ ꓡꓱ ꓥˍ ꓟꓲ ꓠꓲ, ꓠꓵ ꓠꓲ, ꓟꓽ ꓫꓵ ꓢꓴ ꓔꓯ ꓠꓲ, ꓠꓵ ꓐ ꓡˍ ꓟ ꓠꓬ “ꓪꓴ‐ꓢ ꓡꓰ ꓐꓰ ꓠꓲ, ꓠꓵ ꓐ ꓡˍ ꓟ” ꓥ ꓡꓳ꓿
ꓝꓮꓲ ꓕꓲ ꓫꓵꓽ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓪꓴ‐ꓢ ꓠꓬ ꓮ ꓙꓵꓽ ꓔꓯ ꓕꓲ ꓡꓰ, ꓠꓲ, ꓠꓵˍ ꓡꓳ ꓐꓯˍ ꓟ ꓥ ꓡꓳ꓿ ꓬꓰ‐ꓢꓴ ꓡꓰ ꓐꓯˍ ꓡꓳ꓾ ꓪꓴ‐ꓢ ꓠꓬ ꓙꓲꓻ ꓫꓬ ꓢꓴ ꓐꓰ ꓟꓽ ꓙꓲꓻ ꓫꓬ ꓢꓴ ꓔꓯ ꓕꓲ ꓡꓰ, ꓟꓶꓽ ꓦ ꓦ ꓖꓶˍ ꓡꓳ꓾ ꓟꓲꓽ ꓟꓲ ꓣꓳꓺ ꓖꓶˍ ꓡꓳ꓿ ꓐꓯ ꓠꓲ, ꓫꓵˍ ꓟ ꓠꓬ ꓪꓴ‐ꓢ ꓬꓲ ꓠꓵꓻ ꓠꓲ, ꓠꓬ ꓞꓳ ꓫꓵꓽ ꓘꓶꓽˍ ꓟ꓾ ꓞꓳ ꓒꓬꓱꓽ ꓢꓲˍ ꓟ ꓟꓽ ꓙꓳ꓾ ꓐꓯˍ ꓟ ꓥ ꓡꓳ꓿
ꓠꓵ ꓠꓲ, ꓠꓬ ꓣꓳ ꓔꓯ ꓡꓲ, ꓗꓷ ꓟꓶ ꓝꓲˍ ꓡꓳ꓿ ꓠꓲ, ꓟ ꓦꓶˍ ꓟ ꓔꓯ ꓟꓽ ꓩꓴ ꓗꓷ ꓗꓷ ꓐꓰ ꓝ. ꓢꓲ ꓔꓵ, ꓔ ꓕꓯ ꓠꓽ ꓚꓲ. ꓛꓬ ꓖꓳ ꓓꓱꓽˍ ꓡꓰꓽ ꓪꓴꓽ ꓧꓶˍ ꓥꓳ꓿ ꓖꓳ ꓡꓱ ꓥ ꓟꓲ ꓖꓽ ꓖꓶ ꓗꓷ ꓢꓲ ꓠꓵ ꓠꓲ, ꓔꓯ ꓢꓲ ꓗꓷˍ ꓕꓯ ꓠꓽ ꓠꓲ, ꓟ ꓠꓯꓸꓼ ꓗꓪ ꓢꓲ ꓡꓲ ꓟ ꓟꓶ ꓡˍ ꓥꓳ꓾ ꓐꓰ ꓣꓳ ꓔꓯ ꓢꓲꓽ ꓫꓬ ꓕꓳꓽ ꓶ ꓗꓪ ꓚꓳ. ꓐꓯ ꓖꓶ ꓡ ꓔꓬ ꓡꓳ꓿
ꓐꓲ ꓜꓲꓼˍ ꓟ ꓐꓯˍ ꓟ ꓠꓬ ꓠꓵꓻ ꓠꓲ, ꓥ ꓡꓳ꓿ ꓬꓰ‐ꓢꓴ ꓡꓰ ꓡꓳ, ꓬꓰˍ ꓗꓪ ꓐꓯ ꓔ ꓡꓳ꓿ “ꓠꓴ ꓪ ꓐ, ꓐꓽ ꓜꓳꓽ ꓓꓰˍ ꓟˍ ꓡꓰ ꓐꓰ ꓠꓴ ꓪˍ ꓟꓲ ꓜꓳꓽ ꓓꓰ ꓠ ꓗ, ꓡꓳ” ꓐꓰ ꓐꓯ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓐꓯˍ ꓟ ꓜꓳꓽ ꓓꓰˍ ꓟ ꓐꓲ ꓜꓲꓼˍ ꓟ ꓐꓯ ꓟ ꓠꓬ ꓟꓽ ꓛꓳ. ꓟꓽ ꓛꓬ ꓡꓰ ꓟ ꓔꓯ ꓐꓯˍ ꓟ ꓟꓽ ꓥ꓿ ꓠꓵꓻ ꓠꓲ, ꓐꓲ ꓞ,ˍ ꓟ ꓔꓯ ꓐꓯˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓲ, ꓟ ꓗꓪ ꓠꓵꓻ ꓠꓲ, ꓐꓲ ꓡꓰ ꓝꓲ ꓠ, ꓟ꓾ ꓣꓳ ꓔꓯ ꓛꓬ ꓗꓷ ꓢꓴ ꓔꓯ ꓠꓲ, ꓠꓵ ꓐ ꓡ ꓠ, ꓟ ꓐꓱ ꓶ ꓬꓰ ꓙ ꓠ, ꓟ꓾ ꓢꓲ ꓒˍ ꓡꓰ ꓐꓰ ꓠꓵꓻ ꓠꓲ, ꓐꓲ ꓞ, ꓢꓴ ꓒꓬꓱꓼ ꓡ ꓠ, ꓟ ꓠꓬꓲ. ꓠꓬꓲ ꓗꓪ ꓣꓳꓽ ꓶꓼ ꓓꓰꓽ ꓓꓴ ꓬꓰ ꓡꓯ꓿ ꓪꓴꓽ ꓓꓰˍ ꓟ ꓠꓵꓻ ꓠꓲ, ꓠꓬ ꓛꓴꓽ ꓙꓳ ꓢꓴ ꓔꓯ ꓥˍ ꓟꓲ ꓠꓲ, ꓠꓵ ꓐ ꓡ ꓟ ꓥ ꓡꓳ꓿
