ꓠꓲ, ꓠꓵˍ ꓟ ꓮ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓬꓰ‐ꓢꓴ ꓙꓲ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓬꓳ. ꓚꓰꓽˍ ꓟ ꓡꓯꓼ ꓫꓴ ꓕꓲ ꓟ ꓖꓶ ꓔꓲ. ꓬꓰˍ ꓡꓳ꓿ ꓕꓱ ꓟ ꓠꓬ ꓢꓲ ꓡꓲ ꓟ ꓥ ꓡꓳ꓿ ꓬꓲ ꓡꓰ ꓬꓲ ꓪ ꓔꓯ “ꓠꓴ ꓪ ꓔꓯ ꓥꓪ ꓢꓲ ꓡꓲ ꓟ ꓖꓶ ꓔ ꓬꓰˍ ꓥꓳ꓿ ꓥꓪ ꓢꓲ ꓡꓲ ꓟ ꓠꓴ ꓪ ꓔꓯ ꓖꓶˍ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿
ꓟꓲ ꓠꓯ ꓕꓱ ꓟ ꓡꓰ ꓖꓶˍ ꓟ ꓢꓲ ꓡꓲ ꓟ ꓠꓬ ꓕꓲ ꓖ ꓕꓲ ꓧꓪ, ꓡꓰꓽ ꓟꓶ ꓓ, ꓡꓳ꓿ ꓖꓳ ꓡꓱ ꓥ ꓟꓲ ꓢꓲ ꓒ ꓖꓶˍ ꓟ ꓢꓲ ꓡꓲ ꓟ ꓠꓬ ꓫꓵꓽ ꓪꓴ ꓙꓳˍ ꓟ ꓠꓯꓸꓼ ꓗꓪˍ ꓟꓲ ꓟꓶ ꓓ, ꓡꓳ꓾ ꓠꓲ, ꓟ ꓫ. ꓓꓴ ꓠꓯꓸꓼ ꓗꓪˍ ꓟ ꓟꓶ ꓓ, ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓡꓰ “ꓠꓴ ꓪ ꓠꓲ, ꓟ ꓕꓽ ꓫ.꓾ ꓙꓳꓺˍ ꓟꓲ ꓕꓽ ꓙꓳꓺ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓗꓪ ꓠꓲ, ꓟ ꓠꓯꓸꓼ ꓗꓪ ꓙꓳˍ ꓟ ꓙꓽ ꓫ. ꓓꓴ ꓢꓲ ꓒ ꓔꓯ ꓐꓯ ꓖꓶ ꓡꓯ꓿ ꓬꓲ ꓡꓰ ꓣꓳ ꓔꓯ ꓢꓲ ꓡꓲ ꓟ ꓖꓶ ꓡˍ ꓥꓳ꓿
ꓝꓮꓲ ꓬꓰ‐ꓢꓴ ꓡꓰ ꓕꓱ ꓡꓱ ꓐꓯ ꓢꓰꓽ ꓡꓳ꓾ “ꓥꓪ ꓠꓽ ꓙꓰ ꓢꓲ ꓝꓮꓲ ꓕꓲ ꓧꓪ, ꓡˍ ꓥꓳ꓾ ꓐꓰ ꓐꓯˍ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓙꓰ ꓗꓷ ꓟ ꓠꓬ ꓝꓲ ꓓꓴ ꓐꓴ ꓐꓱ ꓶ ꓠꓲ, ꓟ ꓫ. ꓓꓴ ꓕꓲ ꓫꓵꓽ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓠꓲ, ꓫꓵˍ ꓟ ꓠꓬ ꓬꓲ ꓖꓳ ꓓꓱꓽ ꓗꓪ ꓐꓰ ꓒ ꓕꓲꓺ ꓟꓽ ꓔꓬ ꓥˍ ꓟꓲ꓾ ꓦ ꓗꓪ ꓐꓰ ꓠꓬ ꓮ ꓕꓯ ꓟꓲ ꓔꓬ ꓡꓳ꓾ ꓐꓯˍ ꓟ ꓥ ꓡꓳ꓿
ꓣꓳ ꓤꓶꓻ ꓠꓯꓸꓼ ꓗꓪ ꓥˍ ꓟꓲ ꓕꓲ ꓖ ꓕꓲ ꓧꓪ, ꓪꓴ‐ꓢ ꓐꓰ ꓶꓻ ꓤ ꓗꓶ, ꓶꓽ ꓓ, ꓟ ꓡꓰ ꓓꓵꓽ ꓙꓽ ꓟꓶˍ ꓡꓳ꓿ ꓖꓳ ꓡꓱ ꓥˍ ꓟꓲ ꓢꓲ ꓒ ꓠꓽ ꓣꓳ ꓐꓰ ꓮ ꓕꓯ ꓟꓲ ꓕꓲ ꓪꓽˍ ꓔꓬ ꓡꓳ꓿
ꓬꓰ‐ꓢꓴ ꓡꓰ ꓝꓮꓲ ꓐꓯˍ ꓟ ꓠꓬ꓾ ꓠꓴ ꓪ ꓥꓪ ꓔꓯ ꓠꓲ, ꓠꓵˍ ꓕꓯ ꓠꓽ꓾ ꓐ, ꓐ ꓔꓯ ꓥꓪ ꓙꓰˍ ꓟ ꓑꓶ. ꓓꓴ ꓠꓴ ꓪ ꓠꓲ, ꓒꓵˍ ꓡꓳ ꓫꓵꓽ ꓥꓳ꓾ ꓐꓰ ꓐꓯˍ ꓡꓳ꓿
ꓚꓵ ꓚꓵ ꓠꓲ, ꓠꓵˍ ꓐꓯ ꓟ ꓠꓬ ꓚꓲ. ꓛꓬ ꓠꓲ, ꓡꓶ ꓢꓶ. ꓟꓽ ꓞꓲ ꓢꓲ ꓒ ꓠꓲ, ꓡꓶ ꓔꓯ ꓘꓳ ꓣꓴ ꓐ ꓡˍ ꓟ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓣꓳ ꓟꓽ ꓙꓽ ꓜꓲꓼ ꓟ ꓕꓲ ꓫꓵꓽ ꓫꓵꓽ ꓔꓳ, ꓜꓳꓽ ꓡ ꓕꓯ “ꓕꓱ ꓟ ꓠꓬ ꓪꓴ‐ꓢ ꓠꓲ, ꓡꓶ ꓥ ꓗꓴ.ˍ ꓥꓳ” ꓐꓰ ꓓꓵꓽ ꓙꓽ ꓢꓲ ꓠꓬꓲ ꓙꓵꓻ ꓡꓯ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓗꓪ ꓣꓳ ꓠꓬ ꓢꓲ ꓒ ꓡꓰ ꓖꓶ ꓡ ꓟ ꓢꓲ ꓡꓲ ꓟ ꓔꓯ ꓘꓳ ꓣꓴ ꓓꓴ ꓬꓰ ꓡꓯ꓿ ꓟꓽ ꓙꓳꓺ ꓙꓳꓺ ꓢꓲ ꓒ ꓔꓯ ꓙꓵꓻ ꓡꓯ꓿ ꓮ ꓙꓵꓽ ꓔꓯ ꓫ. ꓟꓳ꓿
