ꓡꓲꓽ ꓒꓰꓼ ꓐꓰ ꓫ. ꓕꓱ ꓟ ꓗꓪ ꓐꓰ ꓘꓴ ꓜꓲꓼ ꓞꓳ ꓡꓰ ꓟ. ꓖꓶ ꓡ ꓟ (Social teaching of the Church) ꓐꓯˍ ꓟ ꓞꓳ ꓙꓳ ꓢꓯ. ꓔꓬ ꓚꓱ, ꓗꓪ ꓐꓰ꓾ ꓡꓲꓽ ꓒꓰꓼ ꓚꓱ, ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓟ. ꓖꓶ ꓡˍ ꓟ ꓔꓯ ꓠ ꓠ, ꓓꓴ ꓬꓰ ꓡꓯ꓿ ꓡꓳ, ꓬꓰ ꓟ ꓙꓵ, ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓙꓵꓽ ꓗ, ꓛꓳˍ ꓟ ꓔꓯ ꓢꓲ ꓠꓲ, ꓟ ꓢꓲꓽ ꓫꓬ ꓡꓰ ꓠ, ꓟ ꓣꓳ. ꓚꓵˍ ꓡꓳ꓾ ꓐꓯ ꓟ ꓔꓯ ꓐꓯ ꓟ. ꓖꓶ ꓡꓳ, ꓬꓰꓳ꓿ ꓮ ꓟꓶ ꓥˍ ꓟꓲ ꓝ. ꓢꓲ ꓐꓯ ꓟ. ꓖꓶ ꓓꓴ ꓥꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓠꓯ,ꓸꓼ ꓗꓪ ꓠꓵꓻ ꓠꓲ, ꓠꓬ ꓙꓵꓽ ꓗ ꓮ ꓙꓵꓽ ꓟ ꓬꓲ. ꓝꓳ, ꓟꓶ ꓥ ꓡꓳ꓿ ꓬꓴ‐ꓔ ꓡ ꓞꓳ ꓐꓴ ꓠꓯꓸꓼ ꓗꓪ ꓟꓬꓽ ꓢꓶꓽ ꓬꓲ. ꓛꓲ ꓟꓬ ꓟꓶꓽ ꓢꓶꓽ꓾ ꓢꓶꓽ ꓛꓲ ꓬꓲ. ꓛꓲ ꓢꓶꓽ ꓛꓲ꓾ ꓕꓱ ꓡꓰ ꓪ ꓛꓵꓽ ꓚꓱ, ꓔ ꓟ ꓔꓯ ꓫꓱ. ꓤˍ ꓟ ꓠꓲ, ꓟ꓾ ꓝꓴꓲ. ꓣꓷꓠ. ꓖꓶ ꓟ ꓠꓲ, ꓟ꓾ ꓠꓲ, ꓟ ꓫꓵˍ ꓟ ꓐꓰ꓾ ꓕꓱ ꓡꓱ ꓢꓳˍ ꓡꓳ꓿

(ꓟ‐ꓕꓲ꓿5ꓽ39‐40) ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯˍ ꓟ ꓠꓬ꓾ “ꓞꓳ ꓥꓶ ꓔꓯ ꓕꓽ ꓗꓽ ꓔ꓿ ꓮꓽ ꓟ ꓡꓰ ꓠꓴ ꓒꓬꓱꓽ ꓟꓬ ꓡꓯꓼ ꓙ ꓕꓲꓽ ꓛꓱꓽ ꓗꓪ ꓓꓶꓽ ꓡ ꓠꓬ꓾ ꓡꓯꓼ ꓶ. ꓕꓲꓽ ꓛꓱꓽ ꓟˍ ꓟꓲ ꓬꓲ ꓔꓯ ꓒꓳ, ꓟꓳ. ꓖꓶ꓿ ꓮꓽ ꓟ ꓡꓰ ꓠꓴ ꓐꓵ ꓞꓶꓽ ꓠꓯ. ꓘꓪ ꓕꓲ ꓘꓳ, ꓟ ꓣꓴ ꓔꓯ, ꓙꓰ ꓠꓲ, ꓫꓵ ꓢꓲ ꓠꓴ ꓔꓯ ꓗꓳ, ꓢꓴ ꓙꓳˍ ꓠꓬ꓾ ꓕꓯꓽ ꓢꓲ ꓕꓲ ꓘꓳ, ꓟˍ ꓟꓲ ꓔꓯ, ꓙꓰ ꓝꓲ꓿” ꓕꓱ ꓟ ꓠꓬ ꓬꓲ‐ꓢꓷ‐ꓡꓰ ꓡ ꓞꓳ ꓐꓴ ꓡꓲꓽ ꓒꓰꓼ ꓛꓳˍ ꓟ ꓕꓱ ꓟ ꓔꓯ ꓐꓯ ꓟ. ꓖꓶˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓪ ꓛꓳˍ ꓟ ꓠꓬ ꓥꓳꓽ ꓔꓬ ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓟ ꓖꓶ ꓟ ꓥ ꓡꓳ꓿ ꓪ ꓛꓵꓽ ꓚꓱ, ꓔ ꓟ ꓠꓬ ꓟꓽ ꓜꓳꓽˍ ꓟ ꓥ ꓢꓲ꓾ ꓕꓱ ꓡꓱ ꓫꓵꓽ ꓔꓯ ꓠꓽ ꓡꓰ ꓠ, ꓟ ꓟꓬꓽ ꓠꓬꓲ ꓬꓲ. ꓔꓯ ꓖꓽ ꓖꓶ ꓣꓷꓠ. ꓖꓶ ꓠ, ꓟ꓾ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓟ. ꓖꓶ ꓔ ꓡꓳ꓿

ꓟ‐ꓕꓲ (18ꓽ22) ꓗꓪ “ꓠꓴ ꓔꓯ ꓥꓪ ꓫꓵꓽ ꓧꓪ, ꓡꓰ ꓟꓽ ꓐꓯ꓾ ꓫꓵꓽ ꓧꓪ, ꓟ ꓧꓪꓽ ꓞꓲ ꓧꓪ,ˍ ꓟꓲ ꓖꓽ ꓖꓶ꓾” ꓐꓰ ꓐꓯ ꓔ ꓡꓳ꓿ ꓝꓴꓲ ꓣꓷꓠ. ꓖꓶ ꓟ ꓠꓬ ꓕꓲ ꓧꓪ, ꓡꓰ ꓟꓽ ꓥ꓾ ꓫꓵꓽ ꓞꓲ ꓧꓪ, ꓟ ꓫꓵꓽ ꓝ.꓾ ꓐꓯ ꓠꓲ, ꓟ ꓫꓵˍ ꓟ ꓠꓬ ꓵꓻ ꓖꓴ ꓟꓽ ꓓꓻ ꓠ ꓛꓲ ꓝꓴꓲ. ꓖꓽ ꓖꓶ ꓠ, ꓟ ꓥ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡˍ ꓟ ꓥ ꓡꓳ꓿

ꓞꓳ ꓤ ꓛꓳ ꓫꓱꓽ ꓡ ꓟ ꓐꓰ ꓡꓲꓽ ꓒꓰꓼ ꓚꓱ, ꓮ ꓙꓵꓽ ꓟ ꓗꓪ ꓙꓵꓻ ꓠꓲ, ꓚꓱ, ꓠꓬ ꓬꓲ. ꓝꓳ, ꓟꓶ ꓥ ꓢꓲ ꓠꓬꓲ꓾ ꓡꓲꓽ ꓒꓰꓼ ꓐꓰ ꓞꓳ ꓙꓳ ꓚꓱ, ꓥ ꓕ ꓑꓳꓸꓼ ꓠꓬ ꓙꓵꓻ ꓠꓲ, ꓗꓪ ꓐꓰ ꓫꓷ. ꓡˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ꓾ ꓡꓲꓽ ꓒꓰꓼ ꓐꓰ ꓞꓳ ꓚꓱ, ꓠꓬ ꓙꓵꓻ ꓠꓲ, ꓡꓰ ꓟ. ꓖꓶ ꓡ ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓞꓳ ꓚꓱ, ꓐꓰ ꓙꓵꓻ ꓠꓲ, ꓠꓬ ꓘꓶꓽ ꓟꓽ ꓐ ꓡ ꓟ ꓕꓲꓽ ꓫꓵꓽ ꓥ ꓡꓳ꓿

ꓕꓲ ꓧꓪ, ꓧꓪ ꓣꓳ ꓞꓳ ꓚꓱ, ꓡꓲꓽ ꓒꓰꓼ ꓠꓬ ꓐꓲꓻ ꓜꓲꓼˍ ꓟ ꓟꓽ ꓙꓳ꓿ ꓥꓳꓽ ꓡꓰ ꓟ ꓛꓬ ꓡꓰ ꓟ ꓗꓷ ꓡꓰˍ ꓟ ꓠꓬ꓾ ꓙꓵꓻ ꓠꓲ, ꓠꓯꓸꓼ ꓗꓪ ꓐꓲꓻ ꓜꓲꓼˍ ꓟ ꓟꓽ ꓙꓳ ꓟ ꓪꓴ. ꓠꓬꓲ ꓥ ꓡꓳ꓿

ꓕꓱ ꓟ ꓠꓬ ꓙꓵꓻ ꓠꓲ, ꓗꓪ ꓐꓰ ꓓꓳ ꓡ ꓟ ꓫ. ꓙꓵ ꓟꓷꓼ ꓙꓵ ꓓꓴ ꓕꓲ ꓫꓵꓽ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓡꓲꓽ ꓒꓰꓼ ꓐꓰ ꓞꓳ ꓚꓱ, ꓕꓱ ꓟ ꓠꓬ ꓣꓳꓽ ꓙꓵꓻ ꓠꓲ, ꓠꓯꓸꓼ ꓗꓪ ꓐꓰ ꓡˍ ꓟ ꓥ ꓢꓲ ꓠꓬꓲ꓾ ꓕꓱ ꓟ ꓔꓯ ꓐꓲ ꓜꓲꓼ ꓡꓰ ꓠ, ꓟ ꓠꓬ꓾ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡˍ ꓟ ꓔꓯ ꓪꓴ. ꓓꓵ ꓛ, ꓢꓲ ꓠꓬꓲ ꓫꓬ, ꓑꓱ ꓠ ꓗ, ꓡꓳ꓿