ꓧꓪ. ꓛꓲꓽ ꓔ꓾ ꓒ‐ꓡꓲ‐ꓢꓷ ꓐꓴ ꓙꓵꓽ ꓧꓶꓽˍ ꓐꓰ ꓩꓴ‐ꓡꓲ ꓙꓵꓽ ꓧꓶꓽ ꓔꓯ ꓤ ꓟꓳ꓾ ꓐꓰ ꓬꓰ‐ꓢꓴ ꓡꓰ ꓬꓲ ꓛꓳꓽ ꓒꓯ, ꓐꓴ ꓔꓯ ꓙꓳꓺ ꓗꓽ ꓖꓶˍ ꓡꓳ꓿
ꓙꓲꓻ ꓫꓬ ꓢꓴ ꓟ-ꓘꓳ ꓡꓰ ꓐꓳ ꓔ ꓟ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓥ ꓟ (ꓟ‐ꓘꓳ 8ꓽ14‐21) ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓒ-ꓡꓲ-ꓢꓷ ꓐꓰ ꓩꓴ-ꓡꓲ ꓬꓲ ꓪ ꓙꓵꓽ ꓧꓶꓽ ꓔꓯ ꓤ ꓟꓳ ꓠꓹ ꓟ ꓙꓳ ꓗꓽ ꓖꓶ ꓔ ꓟ ꓔꓯ ꓵꓻ ꓪˍ ꓟ ꓥ ꓡꓳ= ꓟꓽ ꓙꓲꓻ ꓟ ꓔꓯ ꓔꓵꓹ ꓔ ꓟ ꓠꓲꓹ ꓟ ꓠꓬ ꓙꓵꓽ ꓧꓶꓽˍ ꓡꓰ ꓐꓰ ꓒꓴꓽ ꓡꓰ ꓝꓲ ꓐ ꓡˍ ꓟ ꓢꓯꓼ ꓙꓳˍ ꓡꓳ= ꓒ-ꓡꓲ-ꓢꓷ ꓐꓴ ꓙꓵꓽ ꓧꓶꓽ ꓠꓬ ꓮ ꓣꓳ ꓗꓴꓹ ꓙꓲꓻ ꓪꓸ ꓔ ꓟ ꓪꓰ ꓕꓳꓹ ꓡꓰ ꓐꓰ ꓙꓲˍ ꓟ ꓡ ꓞꓳ ꓡꓰ ꓐꓰ ꓞꓳ ꓙꓳ ꓔꓬꓹ ꓢꓲ ꓠꓬꓲ꓾ ꓢꓲꓺ ꓒ ꓬꓰ-ꓢꓴ ꓔꓯ ꓐꓹ ꓐ ꓪꓴ-ꓢ ꓬꓲ ꓤ ꓔꓲꓸ ꓥ ꓡꓳ ꓐꓯˍ ꓟ ꓔꓯ ꓘꓳꓹ ꓣꓴ ꓟꓽ ꓐ ꓡ ꓢꓴ ꓐꓴ ꓥ ꓡꓳ=
ꓩꓴ-ꓡꓲ ꓬꓲ ꓙꓵꓽ ꓧꓶꓽ ꓐꓰ ꓫꓱꓸˍ ꓟ ꓠꓲꓹ ꓟ ꓠꓬ ꓬꓲ ꓫꓱꓹ ꓟꓽ ꓙꓲꓻ ꓟ꓾ ꓟꓲ ꓠꓯ ꓐꓳ ꓶ ꓔꓯ ꓟꓳꓸ ꓠꓲꓹ ꓥꓳꓸˍ ꓟ ꓐꓰ ꓠꓲꓹ ꓟ ꓟꓽ ꓔꓱ, ꓟ꓾ ꓙꓵꓽ ꓪ ꓔꓯ ꓡꓰꓽ ꓠꓲ, ꓥꓳˍ ꓟ ꓥ ꓡꓳ= ꓚꓲꓸ ꓛꓬ ꓐꓱ ꓶˍ ꓡꓰꓽ ꓓꓵꓽ ꓙ ꓢꓲ ꓚꓲꓸ ꓛꓬ ꓔꓯ ꓙꓳˍ ꓟ ꓟꓲ ꓠꓯ ꓐꓳ ꓶ ꓐꓰ꓾ ꓢꓯꓸ ꓔꓬ ꓕꓯ ꓡꓰꓽ ꓟꓶˍ ꓟ ꓙꓵꓽ ꓪ ꓔꓯ ꓫꓳ. ꓔ ꓢꓲ ꓪꓴ-ꓢ ꓔꓯ ꓠꓬ ꓟꓽ ꓙꓵꓻ ꓢꓴ ꓥ ꓡꓳ=
ꓙꓵꓽ ꓧꓶꓽ ꓕꓱ ꓟ ꓣꓳ ꓠꓯꓸꓼ ꓗꓪ ꓓꓵꓽ ꓡ ꓕꓯ ꓠꓽ ꓪꓴ-ꓢ ꓐꓰ ꓠꓶꓽ ꓡꓰ ꓠꓹ ꓟ ꓮ ꓘꓶꓸ ꓫꓸ ꓡꓰ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓙꓵꓽ ꓧꓶꓽ ꓕꓱ ꓠꓬꓲꓽ ꓟ ꓡꓱꓸꓼ ꓬꓲ ꓝꓳꓹ ꓟꓶ ꓠꓬ “ꓥꓪ” ꓐꓰ ꓐꓯ ꓟ ꓚꓲꓸ ꓛꓬ ꓐꓱ ꓶꓽˍ ꓡꓰꓽ ꓓꓵꓽ ꓙˍ ꓟ ꓥ ꓡꓳ= ꓝꓮꓲ ꓕꓲ ꓚꓱꓹ ꓐꓯ ꓪˍ ꓠꓬ ꓚꓲꓸ ꓛꓬ ꓔꓯ ꓡꓰꓽ ꓦ ꓡꓱ ꓢꓲ ꓪꓴ-ꓢ ꓔꓯ ꓟꓽ ꓦ ꓡꓱ ꓟ ꓥ ꓡꓳ=
ꓚꓲꓸ ꓛꓬ ꓔꓯ ꓡꓰꓽ ꓦ ꓡꓱ ꓐꓳˍ ꓟ ꓾”ꓥꓪ” ꓐꓯ ꓟ ꓠꓲꓹ ꓟ ꓓꓵꓽ ꓡꓰ ꓕꓯ ꓠꓽ ꓝꓴꓲꓸ ꓚꓳ ꓑꓸ ꓒꓬꓱꓼ ꓡꓰ ꓢꓲ꓾ ꓝꓴꓲꓸ ꓚꓳ ꓑꓸ ꓬꓰˍꓟ ꓤꓶꓻ ꓠꓯꓸꓼ ꓗꓪ ꓐꓬ ꓡꓰ ꓛꓵꓽ ꓡꓰˍ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓕꓱ ꓡꓱ ꓐꓬ ꓡꓰ ꓛꓵꓽ ꓡꓰˍ ꓟ ꓝꓴꓲꓸ ꓠꓯꓸꓼ ꓗꓪ ꓟꓽ ꓓꓵꓽ ꓡꓰ ꓠꓹ ꓟ ꓟꓸ ꓖꓶ ꓑꓱ ꓖꓶ ꓔ ꓟ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓬꓲ ꓐꓯ ꓘꓶꓽ ꓔꓯ ꓙꓽ ꓜꓲꓼ ꓡꓰ ꓠꓹ ꓟ ꓐꓱ ꓶ ꓣꓳ ꓣꓱꓽ ꓞꓹ ꓟ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲ ꓗꓪ ꓫꓵꓻ ꓟꓶˍ ꓗꓪ ꓛꓲꓺ ꓐꓹ ꓐ ꓪꓴ-ꓢ ꓬꓲ ꓠꓲꓹ ꓡꓶꓽ ꓔꓯ ꓠꓻ ꓡꓳꓸ ꓗꓷ ꓢꓴ ꓤ ꓔꓲꓸ ꓬꓰ-ꓢꓴ ꓬꓲ ꓙꓽ ꓣꓳˍ ꓟ ꓐꓰ ꓐꓲ ꓜꓲꓼˍ ꓟ ꓠꓲꓹ ꓟ ꓡꓰꓽ ꓣꓱꓽ ꓞꓹ ꓟ ꓥ ꓡꓳ= ꓕꓱ ꓟ ꓡꓰ ꓐꓰ ꓐꓲ ꓜꓲꓼˍ ꓟ ꓢꓷꓸ ꓠꓲꓹ ꓐꓰ ꓪꓴ-ꓢ ꓟꓲꓽ ꓙꓬ ꓗꓪ ꓞꓳ ꓙꓳ ꓢꓯꓸ ꓔꓬ ꓠꓹ ꓟ ꓢꓯꓼ ꓕꓵꓼ ꓢꓲ ꓝꓴꓲꓸ ꓚꓳ ꓑꓸ ꓣꓱꓽˍ ꓟ ꓤꓶꓻ ꓗꓪ ꓐꓰ ꓡꓲꓹ ꓓꓳ ꓙꓰ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
