ꓬꓰ‐ꓢꓴ ꓡꓰ ꓠꓻ ꓢꓴ ꓒꓬꓻ ꓢꓴ ꓔꓯ ꓫꓬ, ꓓꓻ ꓡꓰ ꓟ (Monday reflection)

2 ꓦ ꓟ 9.2026 ꓘꓳꓼ ꓠꓽ ꓕꓲ ꓙꓵ, ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓘꓳ ꓕꓳ 6ꓽ53‐56 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓖꓶ‐ꓠꓲ‐ꓢ‐ꓡꓱ ꓟꓵꓽ ꓗꓪ ꓛꓲ ꓬꓰ ꓢꓲ ꓬꓲꓻ ꓙꓬ ꓘꓶꓽ ꓗꓪ ꓡꓲ ꓞꓳ, ꓔ ꓬꓰˍ ꓡꓳ꓿ ꓬꓲ ꓪ ꓔꓯ ꓑ ꓫꓬ ꓐꓴ ꓡꓳ ꓢꓷ. ꓡꓰ ꓠꓬ ꓬꓲ ꓪ ꓮ ꓡꓲ ꓗꓪ ꓙꓰ ꓠꓬ ꓖꓳ ꓗꓪ ꓠꓻ ꓒꓬꓻ ꓢꓴ ꓐꓴ ꓬꓰ‐ꓢꓴ ꓔꓯ ꓠꓻ ꓫꓬ ꓖꓶ ꓡ ꓠ, ꓟ ꓡ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓓꓰ ꓟ ꓡ ꓞꓳ ꓐꓴ ꓔꓯ ꓬꓰ ꓚꓲ. ꓛꓬ ꓡ ꓗꓷ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓟ. ꓟꓲꓽ ꓮ ꓟꓬ, ꓟꓽ ꓚꓺ ꓥ ꓟꓲ ꓬꓲ ꓔꓬ ꓗꓪ ꓑ ꓫꓬ ꓐꓴ ꓠꓬ ꓡ ꓢꓲ ꓠꓬꓲ ꓟ.ꓟꓲꓽ ꓠ, ꓡꓳ ꓡ ꓟ ꓥ ꓡꓳ꓿ ꓝꓮꓲ ꓠꓻ ꓒꓬꓻ ꓢꓴ ꓐꓴ ꓥ ꓟꓲ ꓠꓻ ꓓꓴ ꓗꓪ ꓐꓰ ꓓꓻ ꓡꓰ ꓠ ,ꓟ ꓢꓲꓺ ꓒ ꓔꓬ ꓗꓪ ꓡ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓝꓴꓲ ꓙꓳ ꓟ ꓡ ꓞꓳ ꓐꓴ ꓐꓰ ꓶꓻ ꓤ ꓗꓪ ꓔꓬ ꓢꓴ ꓟꓽ ꓥ ꓬꓲ ꓠꓬ ꓣꓳ ꓓꓰ ꓟ꓾ ꓡ ꓞꓳ ꓐꓴ ꓡꓰ ꓡꓳ ꓔ ꓢꓴ ꓐꓴ ꓢꓯꓼ ꓐ ꓢꓴ ꓐꓴ ꓔꓬ ꓗꓪ ꓬꓲ ꓚꓲ. ꓛꓬ ꓡ ꓢꓲ ꓢꓴ ꓢꓲꓺ ꓒ ꓥ ꓡꓳ꓿ ꓬꓲ ꓠꓬ ꓫ. ꓓꓴ ꓟꓷꓽ ꓢꓴ ꓫ. ꓕꓱ ꓘꓶꓽ ꓔꓯ ꓠ ꓡꓳ ꓢꓴ ꓢꓲꓺ ꓒ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓚꓵ ꓥ ꓟ ꓔꓯ ꓟꓲ‐ꓢ ꓔꓲ ꓟ ꓢꓲꓽ ꓫꓬ ꓖꓳ ꓓꓱꓽ ꓗꓪ ꓣꓳ ꓡꓳ ꓢꓷ. ꓪ ꓓꓽ ꓟ ꓥ ꓡꓳ꓿

ꓠꓻ ꓢꓴ ꓒꓬ ꓢꓴ ꓐꓴ ꓠꓬ ꓙꓵꓻ ꓠꓲ, ꓙꓳ ꓙꓳ ꓡꓰ ꓢꓲꓺ ꓒ ꓬꓰ‐ꓢꓴ ꓔꓬ ꓗꓪ ꓡ ꓢꓲ ꓠꓬꓲ ꓬꓲ ꓪ ꓠꓻ ꓒꓬ ꓓꓴ ꓔꓳ, ꓜꓳ ꓟ ꓔꓯ ꓓꓻ ꓡꓰ ꓠ, ꓟ ꓡ ꓗꓷ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡ ꓟ ꓙꓵ, ꓔꓯ ꓠꓻ ꓒꓬꓻ ꓢꓴ ꓠꓬ ꓢꓲꓺ ꓒ ꓬꓰ‐ꓢꓴ ꓐꓵ ꓞꓶꓽ ꓟꓶꓽ ꓗꓪ ꓠꓶˍ ꓥ ꓟꓲ ꓓꓽ ꓡꓰ ꓡ ꓥꓳꓽ ꓐꓰ ꓙꓵꓻ ꓢꓲ ꓠꓬꓲ ꓡ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓮ ꓡꓰꓳ ꓫꓵꓽ ꓡ ꓞꓳ ꓥ ꓡ? ꓬꓲ ꓠꓬ ꓚꓵ ꓚꓵˍ ꓐꓰ ꓪꓴ‐ꓢ ꓮ‐ꓐꓲ ꓥ ꓟ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ  ꓗꓪ ꓐꓰ ꓟ. ꓖꓶ ꓡ ꓟ ꓥ ꓡꓳ꓿ ꓣꓳ ꓠꓬ ꓬꓲ ꓔꓯ ꓙꓵꓻ ꓢꓲ ꓠꓬꓲ ꓢꓲꓺ ꓒ ꓠꓯ, ꓗꓪ ꓡ  ꓠꓬ ꓣꓳ ꓧꓪꓽ ꓖꓳ ꓓꓱ ꓐꓰ ꓦꓻ ꓗꓪ ꓠꓻ ꓓꓴ ꓒꓬꓻ ꓓꓴ ꓔꓳ, ꓜꓳ ꓟ ꓔꓯ ꓓꓻ ꓡꓰ ꓝꓲ ꓠ, ꓟ ꓬꓲ ꓡꓰ ꓠꓻ ꓫꓬ, ꓡ ꓥꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓧꓪꓽ ꓖꓳ ꓓꓱ ꓐꓰ ꓦꓻ ꓕꓲ ꓒꓳ, ꓗꓪ ꓠꓻ ꓫꓬ, ꓖꓶ ꓢꓴ ꓥ ꓟ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓧꓪꓽ ꓖꓳ ꓓꓱ ꓕꓳ ꓒꓳ, ꓗꓪ ꓔꓬ ꓠꓻ ꓒꓬ ꓔꓬ ꓢꓴ ꓔꓯ ꓡꓰ ꓟꓽ ꓥ ꓦꓻ ꓕꓲ ꓒꓳ, ꓗꓪ ꓠꓻ ꓓꓴ ꓒꓬꓻ ꓓꓴ ꓔꓳ, ꓜꓳ ꓔꓬ ꓢꓴ ꓐꓴ ꓔꓯ ꓠꓻ ꓫꓬ, ꓖꓶ ꓢꓴ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓘꓴ ꓜꓲꓼ ꓞꓳ ꓠꓬ ꓧꓪꓽ ꓖꓳ ꓓꓱ ꓕꓲ ꓒꓳ, ꓐꓰ ꓦꓻ ꓕꓲ ꓒꓳ, ꓗꓪ ꓠꓻ ꓒꓬ ꓢꓴ ꓔꓯ ꓬꓰ ꓙ ꓔꓳ, ꓙ ꓔꓬ ꓟꓥ ꓡꓳ꓿ ꓖꓳ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓟ ꓠꓵꓻ ꓠꓲ, ꓥ ꓡꓳ꓿

 ꓘꓴ ꓜꓲꓼ ꓞꓳ ꓡꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓙ ꓖꓴ ꓧꓳꓽ ꓙꓰ ꓠꓯˍ ꓟ ꓥ ꓡꓳ꓿ ꓠꓬꓲ.ꓠꓬꓲ ꓣꓳ ꓡꓳ. ꓟꓳ ꓗꓷ ꓟ ꓢꓲꓽ ꓫꓬ ꓕꓳ ꓶ ꓗꓪ ꓠꓻ ꓢꓴ ꓒꓬꓻ ꓢꓴ ꓐꓴ ꓔꓯ ꓞꓳ ꓜꓴꓻ ꓠꓬ ꓢꓲꓺ ꓒ ꓬꓰ‐ꓢꓴ ꓔꓬ ꓗꓪ ꓧꓳꓽ ꓡ ꓟ ꓡꓰ ꓐꓰ ꓘꓴ ꓜꓲꓼ ꓞꓳ ꓥ ꓟꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓧꓳꓽ ꓙꓰ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓢꓯꓼ ꓐ ꓢꓴ ꓐꓰ ꓢꓴ ꓡꓰ ꓡꓳ ꓔ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓢꓴ ꓥ ꓟ ꓡꓰ ꓐꓰ ꓘꓴ ꓜꓲꓼ ꓞꓳ ꓥ ꓟꓲ ꓫ. ꓢꓴ ꓟꓷ ꓢꓴ ꓐꓴ ꓐꓰ ꓠꓻ ꓒꓬ ꓢꓴ ꓢꓯꓼ ꓐ ꓢꓴ ꓣꓳ ꓓꓰ ꓡꓰ ꓢꓴ ꓐꓴ ꓔꓯ  ꓟꓽ ꓡꓳ ꓡꓳ ꓬꓲ ꓪ ꓔꓬ ꓗꓪ ꓙꓰ ꓢꓲ ꓠꓬꓲ ꓢꓲꓺ ꓒ ꓐꓯ ꓘꓶꓽ ꓟ. ꓖꓶ ꓬꓰ ꓙ ꓔꓳ ꓙ ꓠ, ꓟ ꓣꓳ ꓚꓵˍ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓢꓴ ꓔꓯ ꓢꓲꓺ ꓒ ꓬꓰ‐ꓢꓴ ꓔꓬ ꓗꓪ ꓧꓳꓽ ꓡ ꓢꓴ ꓒꓬꓱꓼ ꓔꓬ ꓡ?

ꓠꓻ ꓓꓴ ꓒꓬꓻ ꓓꓴ ꓔꓳ, ꓜꓳ ꓢꓴ ꓐꓰ ꓢꓯꓼ ꓐ ꓢꓴ ꓔꓯ ꓬꓰ ꓙ ꓢꓲ ꓠꓬꓲ ꓢꓲꓺ ꓒ  ꓬꓰ‐ꓢꓴ ꓔꓬ ꓗꓪ ꓧꓳꓽ ꓡ ꓢꓴ ꓒꓬꓱꓼ ꓔꓬ ꓡ? ꓠ ꓠꓬꓲ ꓔꓬ ꓟ ꓥ ꓡꓳ꓿

ꓠꓱ. ꓐꓯ ꓢꓴ ꓔꓯ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓡ ꓢꓴ ꓔꓯ ꓢꓲꓺ ꓒ ꓔꓬ ꓗꓪ ꓡ ꓠ, ꓟ ꓧꓳꓽ ꓙꓰ ꓢꓴ ꓒꓬꓱꓼ ꓠ, ꓟ ꓢꓯꓼ ꓕꓵꓼ ꓙꓰ ꓡꓯ ꓫ. ꓟꓳ ꓪ꓿