ꓮ˗ꓐꓲ ꓬꓰ˗ꓢꓴ ꓔꓯ ꓢꓲꓽ ꓫꓬ ꓦꓲꓻ ꓗꓪ ꓧꓳꓽ ꓙꓰˍ ꓟ (Monday reflection)

ꓧꓪ. ꓧꓪ ꓠꓬꓲ. ꓠꓬꓲ 2 ꓦ ꓟ 2 ꓠꓬꓲ 2026 ꓘꓳꓼ ꓠꓽ ꓕꓲ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 2ꓽ 22‐40 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓮ‐ꓐꓲ ꓢꓲꓺ ꓒ ꓬꓰ‐ꓢꓴ ꓔꓯ ꓢꓲꓽ ꓫꓬ ꓦꓲꓻ ꓗꓪ ꓧꓳꓽ ꓙꓰ ꓢꓲ ꓠꓬꓲ ꓡꓯꓼ ꓙꓱ ꓗꓷ ꓟ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿
ꓢꓲꓽ ꓫꓬ ꓟ ꓦꓲꓻ ꓘꓴꓽ ꓬꓰ‐ꓢꓴ ꓟ‐ꓡꓲ ꓬꓳ‐ꓢꓷ ꓐꓴ ꓦꓲꓻ ꓘꓴꓽ ꓠꓬ ꓣꓳ ꓓꓰ ꓥ ꓟꓲ ꓪꓴ‐ꓢ ꓣꓱ ꓛꓰ ꓐꓲ ꓜꓲꓼ ꓟ ꓦꓲꓻ ꓥ ꓡꓳ꓿ ꓟ‐ꓡꓲ ꓐꓰ ꓬꓳ‐ꓢꓷ ꓠꓬ ꓮ‐ꓐꓲ ꓬꓰ‐ꓢꓴ ꓔꓯ ꓢꓲꓽ ꓫꓬ ꓦꓲꓻ ꓗꓪ ꓪꓴ‐ꓢ ꓔꓯ ꓔꓲ ꓚꓰ. ꓖꓶ ꓠ, ꓟ ꓐꓱ ꓶ ꓢꓲꓽ ꓫꓬ ꓦꓲꓻ ꓗꓪ ꓧꓳꓽ ꓡ ꓟ ꓥ ꓡꓳ꓿ ꓟ‐ꓡꓲ ꓬꓳ‐ꓢꓷ ꓠꓬ ꓙꓺ ꓣꓳ ꓟ ꓠꓲ, ꓟ ꓗꓪ ꓐꓰ ꓪꓴ‐ꓢ ꓙꓵꓽ ꓗ ꓔꓯ ꓒꓵꓽ ꓞꓳ ꓗꓷ ꓟ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ ꓠꓬꓲ ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓬꓰ‐ꓢꓴ ꓟ‐ꓡꓲ ꓬꓳ‐ꓢꓷ ꓐꓴ ꓕꓲ ꓦꓲꓻ ꓡꓰ ꓐꓰ ꓪꓴ‐ꓢ ꓔꓯ ꓦꓻ ꓡꓱ ꓢꓲ ꓠꓬꓲ ꓞꓳ ꓙꓳ ꓢꓯ. ꓔꓬ ꓠ, ꓟ ꓐꓯ ꓔ ꓟ ꓥ ꓡꓳ꓿
ꓢꓲꓽ ꓫꓬ ꓦꓲꓻ ꓘꓴꓽ ꓗꓪ ꓮ‐ꓐꓲ ꓬꓰ‐ꓢꓴ ꓔꓯ ꓐ, ꓐ ꓪꓴ‐ꓢ ꓔꓯ ꓔꓲ ꓚꓰ. ꓖꓶ ꓟ ꓥ ꓡꓳ꓿ ꓬꓰ‐ꓢꓴ ꓠꓬ ꓪꓴ‐ꓢ ꓥ ꓟꓲ ꓟꓲ ꓠꓯ ꓡ ꓞꓳ ꓐꓴ ꓡꓲꓼ ꓒꓰꓼ ꓐꓰ ꓙꓵꓽ ꓗ ꓔꓯ ꓒꓵꓽ ꓛꓳ ꓢꓴ ꓥ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓕꓱ ꓟ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓦꓲꓻ ꓘꓴꓽ ꓮ ꓙꓵꓽ ꓥ ꓟꓲ ꓡ ꓠ, ꓟ ꓦꓬꓼ ꓠꓬꓲ ꓠꓯ, ꓗꓪ ꓪꓴ‐ꓢ ꓔꓯ ꓡꓯꓼ ꓙꓱꓼ ꓔ ꓠ, ꓟ ꓟ. ꓖꓶ ꓡ ꓟ ꓥ ꓡꓳ꓿

ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓦꓲꓻ ꓘꓴꓽ ꓠꓯ, ꓗꓪ ꓠꓬ ꓪꓴ‐ꓢ ꓠꓬ ꓮ ꓘꓶ. ꓣꓳ ꓚꓵˍ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓢꓲ‐ꓟꓰ ꓠꓬ ꓢꓲꓽ ꓫꓬ ꓟ‐ꓦ ꓪꓴ‐ꓢ ꓡꓰ ꓙ ꓟꓳ ꓘꓶꓽ ꓖꓶ ꓔ ꓟ ꓐꓰ ꓙ ꓖꓴ ꓧꓳꓽ ꓟꓳ ꓖꓶ ꓟ ꓔꓯ ꓒꓵꓽ ꓛꓳ ꓢꓲ ꓠꓬꓲ ꓢꓯ. ꓔꓬ ꓢꓴ ꓥ ꓡꓳ꓿ ꓬꓲ ꓠꓬ ꓬꓲ ꓙꓵ, ꓟꓶ ꓫꓵˍ ꓫꓵˍ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓔꓯ ꓡꓳ. ꓠꓬꓲˍ ꓢꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ‐ꓢ ꓣꓱ ꓛꓰ ꓑꓶ. ꓓꓴ ꓪꓴ‐ꓢꓡꓰ ꓙ ꓟꓳ ꓘꓶꓽ ꓖꓶ ꓔ ꓟ ꓔꓯ ꓬꓲ ꓡꓳ. ꓟꓳ ꓢꓲ ꓠꓬꓲ ꓗꓷ ꓢꓲ ꓠꓬꓲ ꓚꓬꓴ ꓢꓲꓺ ꓒ ꓬꓰ‐ꓢꓴ ꓔꓯ ꓡꓳ. ꓟꓳ ꓗꓷ ꓟ ꓥ ꓡꓳ꓿
ꓢꓲ‐ꓟꓰ ꓪꓴ‐ꓢ ꓔꓯ ꓫꓱ, ꓖꓶ ꓟ ꓠꓬꓲ ꓢꓲꓽ ꓒꓽꓳ ꓠꓴ ꓐꓯ ꓟ ꓡꓰ ꓐꓰ ꓮ ꓟꓶ ꓠꓴ ꓚꓳ ꓑ. ꓥꓪ ꓔꓯ ꓧꓪ. ꓧꓪˍ ꓐꓰ ꓙꓰ ꓝꓲ ꓡꓯ꓿ ꓠꓴ ꓡꓰ ꓞꓳ ꓫꓵꓽ ꓐꓴ ꓟꓲ ꓕꓯ ꓗꓪ ꓙꓽ ꓖꓶ ꓔ ꓟ ꓠꓴ ꓫꓴ, ꓣꓴ ꓟ ꓣꓱ ꓛꓰ ꓔꓯ ꓥꓪ ꓟꓳ ꓪ ꓡꓰꓳ꓿ ꓬꓲ ꓠꓬ ꓐꓶꓽ ꓞꓳ ꓔꓯ ꓡꓬ. ꓖꓶ ꓟ ꓠꓬꓲ ꓟꓳ ꓓꓴ ꓥ ꓢꓲ꓾ ꓠꓴ ꓑ ꓫꓬ ꓬꓲ‐ꓢꓷ‐ꓡꓰ ꓐꓴ ꓟꓬꓱ ꓓꓳꓽ ꓥ ꓡꓳ ꓐꓯ ꓡꓳ꓿

ꓕꓱ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓙ ꓠ, ꓟ ꓡ ꓗꓷ ꓟ ꓠꓬ ꓞꓳ ꓫꓵꓽ ꓕꓲ ꓫꓵꓽ ꓐꓱ ꓶ ꓡꓰ ꓟꓽ ꓥ꓿ ꓟꓲ ꓠꓯ ꓡ ꓞꓳ ꓮ ꓙꓵꓽ ꓐꓱ ꓶ ꓥ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓝꓮꓲ ꓢꓲ‐ꓟꓰ ꓡꓰ ꓟ, ꓟ ꓟ‐ꓡꓲ ꓐꓰ ꓬꓳ‐ꓢꓷ ꓔꓯ ꓠꓲ, ꓫ. ꓟꓬ ꓫ. ꓓꓴ ꓔꓳ, ꓜꓳ ꓡ ꓟ ꓚꓱ, ꓔꓯ ꓐꓯ ꓟ. ꓖꓶ ꓟ ꓥ ꓡꓳ꓿ ꓟ, ꓟ ꓟ‐ꓡꓲ ꓠꓲ, ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓑꓶ. ꓓꓴ ꓮ ꓕꓯꓽ ꓪꓴ. ꓒꓲ, ꓡꓰ ꓗ. ꓙ ꓙꓰˍ ꓟ ꓐꓰ ꓗ. ꓬꓯꓼꓡ ꓟ ꓚꓱ, ꓔꓯ ꓫ. ꓕꓱ ꓗꓷ ꓟ ꓥ ꓡꓳ꓿

ꓢꓲ‐ꓟꓰ ꓐꓰ ꓐꓯ ꓟ ꓠꓬ ꓡꓯꓼ ꓐꓳ ꓔꓶ ꓗꓪ ꓢꓲꓺ ꓒ ꓬꓰ‐ꓢꓴ ꓫꓵꓻ ꓙ ꓗꓷ ꓠ, ꓟ ꓔꓯ ꓐꓯ ꓔ ꓟ ꓥ ꓡꓳ꓿ ꓠꓲ, ꓫ. ꓟꓬ ꓫ. ꓟ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓔꓳ, ꓜꓳ ꓡ ꓗꓴ ꓟ ꓕꓯ ꓟ. ꓖꓶ ꓔ ꓟꓥ ꓡꓳ꓿ ꓬꓰ‐ꓢꓴ ꓙꓲ‐ꓢꓴ ꓠꓬ ꓠꓲ, ꓫ ꓟꓬ ꓫ. ꓟ ꓐꓰ ꓫꓵꓻ ꓙ ꓗꓷ ꓟ ꓪꓴ. ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓮ ꓙꓵꓽ ꓚꓬꓴ ꓙ ꓟ ꓣꓱ ꓛꓰ ꓘꓳ, ꓣꓴ ꓟꓶ ꓡꓰ ꓟ ꓥ ꓡꓳ꓿
ꓟ‐ꓡꓲ ꓠꓬ ꓢꓲ ꓡꓲ ꓐꓰ ꓪꓴ‐ꓢ ꓔꓯ ꓙꓵꓻ ꓟ ꓥ ꓡꓳ꓿ ꓟ‐ꓡꓲ ꓠꓬ ꓪꓴ‐ꓢ ꓡꓰ ꓮ ꓡꓰ ꓫꓵꓽ ꓬꓰ ꓟ ꓔꓯ ꓟꓽ ꓠ, ꓠꓬꓲˍ ꓠꓬꓲ ꓬꓲ ꓠꓲ, ꓟ ꓗꓪ ꓪꓴ‐ꓢ ꓐꓯ ꓘꓶꓽ ꓔꓯ ꓘꓳ, ꓣꓴ ꓢꓲ ꓠꓬꓲ ꓙꓵꓻ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓥ ꓟꓲ ꓟ, ꓟ ꓟ‐ꓡꓲ ꓙꓵꓻ ꓠꓲ, ꓔꓯ ꓔꓯꓺ ꓢꓳꓻ ꓠ, ꓟ ꓣꓳ ꓚꓵ ꓟ ꓥ ꓡꓳ꓿

ꓟꓷ ꓠꓷ ꓝ ꓟ ꓧ‐ꓠ ꓥ ꓟꓲ ꓮ ꓕꓯ ꓥ ꓟꓲ ꓪꓴ‐ꓢ ꓔꓯ ꓪꓽ ꓘꓴ ꓢꓴ ꓪꓴ‐ꓢ ꓠꓲ, ꓡꓶ ꓔꓯ ꓛꓳ ꓢꓴ ꓥ ꓟ ꓔꓯ ꓢꓳ ꓡꓳ. ꓟꓳ ꓗꓷ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓥ ꓟꓲ ꓧ‐ꓠ ꓡꓰ ꓐꓰ ꓮ ꓕꓯ ꓥ ꓟꓲ ꓪꓽ ꓘꓴ ꓢꓲ ꓠꓬꓲ ꓣꓳ ꓤꓶꓻ ꓦꓬꓼ ꓠꓬꓲ ꓗꓪ ꓢꓯ. ꓔꓬ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿ ꓪꓽ ꓘꓴ ꓟ ꓠꓬ ꓣꓳ ꓐꓱ ꓶ ꓮ ꓘꓶ ꓙꓲ ꓟ ꓟꓬꓱꓽ ꓥ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓡꓳ ꓠ, ꓟ ꓐꓰ ꓮ ꓕꓯ ꓥ ꓟꓲ ꓥꓳꓽ ꓡꓳꓽ ꓢꓲ ꓠꓬꓲ ꓪꓽ ꓘꓴ ꓠ, ꓟ ꓮ ꓡꓲꓳ ꓫꓵꓽ ꓠꓲ, ꓫ. ꓟꓬ ꓫ. ꓓꓴ ꓔꓳ, ꓜꓳ ꓡ ꓥ ꓟꓲ ꓪꓴ‐ꓢ ꓔꓯ ꓪꓽ ꓘꓴ ꓠ, ꓟ ꓐꓯ ꓔ ꓟ ꓥ ꓡꓳ꓿ ꓢꓲ‐ꓟꓰ ꓐꓰ ꓧ‐ꓠ ꓡꓰ ꓐꓰ ꓪꓴ‐ꓢ ꓠꓬꓲ ꓟꓳ ꓓꓴ ꓔꓯ ꓟꓲ ꓠꓯ ꓡ ꓞꓳ ꓔꓯ ꓟ. ꓖꓶ ꓢꓴ ꓐꓴ ꓒꓬꓱꓼ ꓡ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓘꓴ ꓔꓬ ꓟ ꓥ ꓡꓳ꓿ ꓫ. ꓟꓳ ꓪ꓿