ꓢꓲ ꓒꓽ ꓬꓰ‐ꓢꓴ ꓠꓬ ꓬꓲ. ꓚꓲ ꓛꓬ ꓘ, ꓠ‐ꓢ‐ꓡꓱ ꓗꓪ ꓙꓰ ꓢꓲ ꓟ. ꓖꓶ_ ꓟ ꓚꓱ, ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓽ ꓦꓬꓼ ꓠꓬꓲ ꓕꓯ ꓜꓲꓼ ꓦꓲ ꓗꓪ ꓟꓽ ꓖꓶ_ ꓕꓯ ꓬꓲ ꓪ ꓠꓬ ꓓꓵꓽ ꓙ ꓮʼ ꓡꓰ ꓢꓲ ꓬꓲ ꓐꓯ ꓘꓶꓽ ꓮ ꓟꓬ, ꓫꓵ ꓐꓰ ꓐꓯ ꓡꓯ ꓘꓳ ꓢꓲ ꓬꓰ‐ꓢꓴ ꓔꓯ ꓟꓽ ꓒꓵꓽ ꓬꓰ_ ꓟ ꓥ ꓡꓳ꓿
ꓮ ꓘꓶ. ꓶꓽ ꓞ, ꓔꓬ ꓟ ꓔꓯ ꓟꓽ ꓟꓳ ꓓ_ ꓟ ꓡꓰ ꓐꓰ ꓮ ꓘꓶ. ꓠꓶꓽ ꓞ, ꓔꓬ ꓥ ꓟꓲ ꓟꓽ ꓟꓳ ꓟ ꓡꓰ ꓐꓰ ꓥ ꓡꓳ꓿ ꓠ‐ꓢ‐ꓡꓱ ꓗꓪ ꓔꓬ ꓢꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓪꓴ‐ꓢ ꓤ ꓔꓲ꓾ ꓚꓬꓴ ꓙ ꓢꓴ ꓐꓰ ꓟꓽ ꓟꓳ ꓔꓬ ꓟ ꓠꓬ ꓠꓶꓽ ꓞ, ꓔꓬ ꓟ ꓑꓶ ꓓꓴ ꓥ ꓡꓳ꓿
ꓢꓲ ꓒꓽ ꓠꓬ ꓠ‐ꓢ‐ꓡꓱ ꓢꓴ ꓖꓳ ꓕꓲ ꓜꓴ ꓙꓵꓻ ꓠꓲ, ꓟꓽ ꓙꓳ ꓟ ꓑꓶ ꓓꓴ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓘꓳ, ꓣꓴ꓾ ꓢꓲ ꓒ ꓬꓰ‐ꓢꓴ ꓣꓳꓺ ꓟ ꓙꓵ, ꓗꓪ ꓡꓰ ꓢꓷ. ꓢꓴ ꓡꓰ ꓢꓲ ꓒ ꓠꓯꓼ ꓗꓪ ꓔꓬ ꓟ ꓙꓵꓽ ꓪ ꓐꓰ ꓢꓷ. ꓠꓲ, ꓔꓯ ꓟꓽ ꓘꓳ, ꓣꓴ꓾ ꓢꓲ ꓒꓽ ꓠꓬ ꓢꓷ. ꓡꓰ ꓓꓴ ꓐꓰ ꓟ. ꓖꓶ ꓘꓶꓽ ꓔꓯ ꓢꓷ. ꓙ ꓟꓳ ꓙ ꓔꓬ ꓥ ꓟꓲ ꓢꓲ ꓒꓽ ꓔꓯ ꓟꓽ ꓙꓵꓻ꓾ ꓕꓱ ꓟ ꓠꓬ ꓣꓳ ꓙꓵꓻ ꓠꓲ, ꓔꓯ ꓟꓶꓽ ꓡꓰ ꓝꓲ_ ꓟ ꓢꓴ ꓔꓯ ꓠꓬꓲ ꓟꓽ ꓟꓵ_ ꓟ ꓟꓽ ꓠꓲ, ꓫꓵ_ ꓟ ꓠꓲ, ꓟ ꓔꓯ ꓟ. ꓖꓶ ꓔ ꓡꓳ꓿
ꓪꓴ‐ꓢ ꓠꓯꓼ ꓗꓪ ꓔꓬ ꓟ ꓣꓳ ꓙꓵꓻ ꓠꓲ, ꓠꓬ ꓮ ꓟꓬ ꓛꓲ ꓬꓲ. ꓠꓯ._ ꓡ꓾ ꓕꓶꓻ ꓞ, ꓡ꓾ “ꓥꓪ ꓔꓯ ꓟꓽ ꓟꓳꓻ ꓠꓬꓲ_ ꓟꓲ ꓙꓵꓻ ꓢꓴ ꓠ ꓶꓼ ꓙꓳ ꓫꓱ, ꓙꓳ_ ꓡꓳ꓾”ꓬꓳ‐ꓦ 20ꓽ29 ꓐꓯ_ ꓟ ꓢꓲ ꓫꓬ ꓕꓳ ꓶ ꓝꓲ. ꓔꓯ ꓓꓵꓽ ꓙ ꓢꓲ ꓠꓬꓲ ꓪꓴ‐ꓢ ꓠꓯꓼ ꓗꓪ ꓙꓵꓻ ꓠꓲ, ꓕꓶꓻ ꓞ, ꓢꓲ ꓢꓯ. ꓔꓬ ꓛꓳ ꓫꓱꓽ ꓠ, ꓟ ꓣꓱ ꓛꓰ ꓔꓯ ꓶꓽ ꓓꓰꓽ ꓓꓴ ꓬꓰ ꓡꓯ ꓐꓰ ꓢꓯꓼ ꓖꓶ ꓩꓴ ꓡ ꓥꓳ꓿
