ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯꓸꓼ ꓗꓪ 3 ꓠꓽ ꓕꓲꓽ ꓠꓽ ꓟ ꓢꓲ ꓒ ꓦꓬꓼ ꓠꓬꓲ ꓥ ꓡꓳ= ꓣꓳ ꓟꓸ ꓟꓲꓽ 3 ꓔꓳꓹ ꓑ ꓙꓽ ꓪˍ ꓟ ꓘꓴꓽ ꓗꓪ ꓬꓲ ꓪꓴꓸ ꓬꓲ-ꓢ-ꓬ ꓕꓳꓽ ꓶ 8ꓽ23-9ꓽ3 ꓗꓪ ꓛꓲ ꓥ ꓡꓳ= ꓟꓸ ꓟꓲꓽ ꓘꓴꓽ ꓗꓪ ꓪꓴ-ꓢ ꓠꓬ ꓢꓲ-ꓑꓴ-ꓡꓶ ꓟꓵꓽ ꓐꓰ ꓠ-ꓩꓴ-ꓡꓲ ꓟꓵꓽ ꓔꓯ ꓧꓶꓸ ꓕꓯ ꓟꓸ ꓙꓽ ꓗꓷ ꓗꓸ ꓠꓯꓸ ꓬꓲ ꓪ ꓔꓯ ꓠꓵꓻ ꓠꓲꓹ ꓟꓳꓸ ꓖꓶˍ ꓟ꓾ ꓬꓲ ꓪ ꓔꓯ ꓪꓴ-ꓢ ꓡꓰ ꓙꓵꓽ ꓖꓶˍ ꓟ ꓔꓯ ꓟꓽ ꓛꓲ ꓟꓽ ꓡꓯꓼ ꓡꓰ ꓟꓷꓽ ꓠꓷꓹ ꓝꓸ ꓒ ꓬꓲ-ꓢ-ꓬ ꓡꓰ ꓐꓯ ꓟꓳꓸ ꓖꓶ ꓔ ꓟ ꓟꓸ ꓟꓲꓽ ꓥ ꓡꓳ=
ꓢꓲ-ꓑꓴ-ꓡꓶ ꓟꓵꓽ ꓐꓰ ꓠ-ꓩꓴ-ꓡꓲ ꓟꓵꓽ ꓠꓬ ꓮ ꓟꓶ ꓖ-ꓡꓲ-ꓡꓲ ꓠꓬꓲꓽ ꓛꓱꓽ ꓬꓲ ꓘꓶꓽ ꓗꓪ ꓓꓹ ꓡꓳ= ꓬꓲ ꓪ ꓠꓬ ꓪꓴ-ꓢ ꓟꓸ ꓙꓽˍ ꓟ ꓔꓯ ꓟꓶˍ ꓐꓯˍ ꓟ ꓮ ꓫꓵꓽ ꓔꓯ ꓐꓯˍ ꓡ ꓐꓯˍ ꓠꓬ ꓖꓳ ꓕꓯ ꓟ ꓦꓬꓼ ꓠꓬꓲ ꓗꓪ ꓮ-ꓢꓲ-ꓣꓲ-ꓬ ꓛꓴꓽ ꓙꓳ ꓢꓴ ꓡꓰ ꓬꓲ ꓪ ꓔꓯ ꓟꓯꓼ ꓓꓶꓽ ꓡ ꓕꓯ ꓧꓶꓸ ꓕꓯ ꓚꓬꓼ ꓬꓰ ꓟ ꓠꓬ ꓡꓳ ꓒꓱ ꓖꓳ ꓠꓬꓲꓽ ꓟ ꓟ ꓥ ꓡꓳ= ꓡꓳ ꓒꓱ ꓖꓳ ꓠꓬꓲꓽ ꓟ ꓟ ꓠꓬ ꓐꓶꓽ ꓛꓳ ꓐꓴ ꓡꓰ ꓠꓬꓲꓸ ꓞꓹ ꓟ ꓧꓶꓸ ꓕꓯ ꓟꓶ ꓡꓰ ꓟ ꓡꓳ ꓒꓱ ꓥ ꓡꓳ= ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓠꓯ ꓞꓲꓹ ꓟ ꓘꓴꓽ ꓠꓯꓸꓼ ꓗꓪ ꓔꓬ ꓡꓳ=
ꓟꓯꓼ ꓓꓶꓽ ꓧꓪꓸ ꓡꓰ ꓟ ꓮ-ꓢꓲ-ꓣꓲ-ꓬ ꓡ ꓞꓳ ꓡꓰ ꓬꓲ ꓪ ꓔꓯ ꓫꓸ ꓝꓲˍ ꓟ꓾ ꓤꓲˍ ꓟ꓾ ꓪꓽ ꓫꓱˍ ꓟ꓾ ꓠꓬꓲꓸ ꓞꓹ ꓟ ꓕꓱ ꓡꓱ ꓫꓵꓽ ꓬꓲ ꓪ ꓔꓳꓹ ꓜꓳꓽˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓠꓲꓹ ꓟ ꓫꓸ ꓠꓬꓲ꓾ ꓠꓲꓹ ꓟ ꓐꓶꓽ ꓡꓰ ꓠꓬꓲ ꓠꓯ ꓞꓲꓹ ꓟ ꓘꓴꓽ ꓠꓯꓸꓼ ꓗꓪ ꓔꓬ ꓟ ꓐꓰ ꓕꓲ ꓡꓰꓹ ꓥꓳ=
ꓖꓳ ꓡꓱ ꓐꓯ ꓥ ꓟꓲ ꓟꓸ ꓟꓲꓽ ꓘꓴꓽ ꓗꓪ ꓣꓳ ꓡꓯꓼ ꓫꓵ ꓡꓳꓸ ꓠꓬꓲˍ ꓕꓯ ꓪꓴ-ꓢ ꓠꓬ ꓬꓲ ꓪ ꓒꓬꓱꓽ ꓟꓬ ꓔꓯ ꓡꓳꓸ ꓠꓬꓲ ꓖꓶ ꓢꓲ ꓠꓬꓲ ꓬꓲ ꓪ ꓔꓯ ꓫꓱꓸ ꓤˍ ꓟ ꓑꓶꓸ ꓓꓴ ꓖꓳ ꓗꓪ ꓠꓬ ꓠꓯ ꓞꓲꓹ ꓟ ꓶꓻ ꓥꓳꓽ ꓠꓯꓸꓼ ꓘꓴꓽ ꓗꓪ ꓔꓬ ꓢꓴ ꓮ ꓙꓵꓽ ꓠꓬ ꓠꓬꓲ ꓟꓳꓻ ꓓꓴ ꓓꓽ ꓟ ꓔꓯ ꓟꓳꓻ ꓡꓰˍ ꓥꓳ ꓐꓰ ꓪꓵꓼ ꓘꓶꓽ ꓖꓶ ꓔ ꓡꓳ=
ꓖꓳ ꓡꓱ ꓠꓬꓲ ꓪꓵꓼ ꓘꓶꓽ ꓕꓯ ꓟ ꓠꓬ ꓮ ꓡꓲ ꓗꓪ ꓐꓲ ꓜꓲꓼ ꓡꓰˍ ꓐꓯˍ ꓠꓬ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓐꓲ ꓜꓲꓼ ꓡꓰˍ ꓡꓳ= ꓟ-ꓕꓲ ꓕꓳꓽ ꓶ 4ꓽ12-23 ꓗꓪ꓾ ꓢꓲ ꓒ ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓗꓪ ꓬꓲꓼ ꓙꓰ ꓢꓲ ꓠꓬꓲ ꓖꓳ ꓗꓪ ꓚꓳꓸ ꓪꓴ-ꓢ ꓟꓸ ꓟꓲꓽ ꓚ ꓪꓴꓸ ꓔꓴˍ ꓡꓳ= ꓘ-ꓒꓱ-ꓠꓴ ꓐꓯˍ ꓟ ꓠꓬ ꓮ ꓠꓱ ꓬꓲ-ꓢ-ꓬ ꓐꓯ ꓔ ꓟ ꓢꓲ-ꓑꓴ-ꓡꓶ ꓟꓵꓽ ꓐꓰ ꓠ-ꓩꓴ-ꓡꓲ ꓟꓵꓽ ꓒ ꓕꓲꓺ ꓗꓪ ꓓꓹ ꓡꓳ= ꓖꓳ ꓟ ꓥ ꓡꓳ= ꓖꓳ ꓡꓱ ꓠꓬꓲ “ꓞꓳ ꓫꓵꓽ ꓞꓳ ꓙꓰꓽ ꓐꓴ ꓠꓬ ꓠꓬꓲ ꓟꓳꓻ ꓓꓴ ꓓꓽ ꓟ ꓔꓯ ꓟꓳꓻ ꓡꓰꓳ” ꓐꓰ ꓐꓯˍ ꓟ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓖꓴ ꓢꓲ ꓠꓬꓲ ꓐꓯ ꓔ ꓟ ꓥ ꓡꓳ=
ꓢꓲ ꓒ ꓬꓰ-ꓢꓴ ꓟꓲ ꓠꓯ ꓗꓪ ꓟꓽ ꓒꓬꓱꓽ ꓟꓳꓻ ꓡ ꓢꓰꓽ ꓕꓯ 500 ꓘꓳꓼ ꓕꓯ ꓡꓰ ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓢ-ꓬ ꓠꓬ ꓕꓰ ꓡꓰ ꓐꓰ ꓟꓷꓽ ꓠꓷꓹ ꓝꓸ ꓔꓲꓸ ꓟ ꓥ ꓡꓳ= ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓠꓯꓸꓼ ꓗꓪ ꓐꓲ ꓜꓲꓼ ꓡꓺꓳ=
ꓣꓳ ꓢꓲ-ꓑꓴ-ꓡꓶ ꓐꓰ ꓠ-ꓩꓴ-ꓡꓲ ꓡꓳ ꓒꓱ ꓔꓯ ꓡꓳꓸ ꓠꓬꓲˍ ꓕꓯ ꓖꓳ ꓟ ꓠꓯꓸꓼ ꓗꓪ ꓬꓲ-ꓢꓷ-ꓡꓰ ꓡ ꓞꓳ ꓕꓲ ꓫꓵꓽˍ ꓡꓰ ꓔꓬꓹ ꓫꓵꓽ ꓟꓽ ꓥ= ꓠꓱꓸ ꓐꓯ ꓢꓴ ꓐꓶꓽ ꓛꓳ ꓐꓴ ꓮ ꓟꓬꓹ ꓔꓬꓹ ꓡ ꓢꓲ ꓠꓬꓲ ꓫꓵꓽ ꓑꓯꓼ ꓡꓰ ꓟ ꓬꓲ-ꓢꓷ-ꓡꓰ ꓮ ꓟꓬꓹ ꓔꓬ ꓡꓳ= ꓖꓳ ꓡꓱ ꓠꓬꓲ ꓙꓱ-ꓣꓴ-ꓢ-ꓡꓱ ꓕꓲ ꓛꓱꓽ ꓗꓪ ꓔꓬ ꓟ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓚꓵ ꓚꓵ ꓟ ꓠꓬ ꓖ-ꓡꓲ-ꓡꓲ ꓟꓵꓽ ꓗꓪ ꓔꓬ ꓟ ꓞꓳ ꓤ ꓔꓯ ꓡꓳꓸ ꓟꓽ ꓟꓵ ꓬꓰˍ ꓡꓳ= ꓠꓲꓹ ꓒꓳꓹˍ ꓡꓳ= ꓖꓳ ꓗꓪ ꓠꓬ ꓙꓲꓻˍ ꓫꓵꓽ ꓟꓽ ꓔꓬ ꓐꓰ ꓬꓲ ꓪ ꓐꓴ ꓘꓳ ꓣꓴˍ ꓡꓳ=
ꓖꓳ ꓡꓱ ꓐꓯ ꓥˍ ꓟꓲ ꓪꓴ-ꓢ ꓪꓵꓼ ꓘꓶꓽ ꓖꓶ ꓔ ꓟ ꓡꓰ ꓐꓰ ꓢꓲ-ꓑꓴ-ꓡꓶ ꓐꓰ ꓠ-ꓩꓴ-ꓡꓲ ꓡꓳ ꓒꓱ ꓗꓪ ꓔꓬ ꓟ ꓞꓳ ꓤ ꓐꓴ ꓠꓬ ꓪꓴꓽˍ ꓟ ꓠꓬꓲ ꓟꓳꓻ ꓓꓴ ꓟꓳꓻ ꓡꓰˍ ꓡꓳ꓾ ꓐꓰ ꓐꓯˍ ꓟ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓠꓬꓲ ꓟꓳꓻ ꓓꓴ ꓥ ꓟ ꓣꓳ ꓡꓳꓸ ꓟꓳˍ ꓡꓳ= ꓮ ꓠꓱ ꓟꓷꓽ ꓠꓷꓹ ꓝꓸ ꓢꓴ ꓐꓯ ꓔ ꓟ ꓡꓰ ꓢꓲ ꓒ ꓬꓰ-ꓢꓴ ꓠꓬ ꓚꓵ ꓚꓵ ꓒꓬꓱꓼ ꓡˍ ꓡꓳ=
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓸ ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓔꓬ ꓟ ꓠꓬ ꓣꓳ ꓠꓬ ꓕꓲ ꓖ ꓕꓲ ꓧꓪꓹ ꓠꓲꓹ ꓟ ꓙꓬ ꓡꓰ ꓓꓴ꓾ ꓠꓲꓹ ꓟ ꓫꓸ ꓡꓰ ꓓꓴ꓾ ꓪꓴꓽ ꓧꓶ ꓓꓴ ꓔꓳꓹ ꓜꓳꓽ ꓗꓴꓸˍ ꓡꓳ= ꓟꓸ ꓟꓲꓽ ꓑꓷꓠꓽ ꓘꓴꓽ ꓗꓪ ꓓꓯꓹ ꓟ ꓡꓰ ꓐꓰ ꓢꓲ-ꓑꓴ-ꓡꓶ ꓐꓰ ꓠ-ꓩꓴ-ꓡꓲ ꓡꓳ ꓒꓱ ꓗꓪ ꓔꓬꓹ ꓟ ꓞꓳ ꓤ ꓡꓰ ꓐꓰ ꓠꓱꓸ ꓐꓯ ꓫꓵꓽ ꓡꓰ ꓣꓳ ꓔꓯ ꓠꓬꓲꓸ ꓞꓹ ꓡ꓾ ꓠꓱꓸ ꓐꓯ ꓪꓴꓽˍ ꓟ ꓞꓳ ꓫꓵꓽ ꓐꓴ ꓡꓰ ꓣꓳ ꓣꓳꓸˍ ꓟ ꓞꓳ ꓫꓵꓽ ꓐꓴ ꓔꓯ ꓠꓬꓲꓸ ꓞꓹ ꓔꓬ ꓡ꓾ ꓝꓮꓲ ꓙꓵꓽ ꓪ ꓙꓳ ꓢꓴ ꓒꓴ ꓫꓵꓺ ꓙꓳ ꓢꓴ ꓐꓴ ꓡꓰ ꓣꓳ ꓔꓯ ꓠꓬꓲꓸ ꓞꓹ ꓔꓬ ꓡ꓾ ꓣꓳ ꓠꓬ ꓠꓯ ꓞꓲꓸ ꓟ ꓠꓯꓸꓼ ꓘꓴꓽ ꓗꓪ ꓢꓷꓸ ꓠꓲꓹ ꓟꓽ ꓢꓷꓸ ꓔꓬ ꓡ꓾ ꓖꓳ ꓡꓱ ꓟ ꓦꓬꓼ ꓠꓬꓲ ꓣꓳ ꓔꓳꓹ ꓜꓳꓽ ꓔꓬ ꓥꓳ ꓐꓯˍ ꓠꓬ ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓡꓯꓼ ꓙꓱ ꓗꓷ=
ꓮ ꓫꓵꓽ ꓑꓶꓸ ꓓꓴ ꓥ ꓡ ꓐꓯˍ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓠꓬꓲ ꓟꓳꓻ ꓓꓴ ꓥ ꓡꓳ= ꓠꓯ ꓞꓲꓹ ꓟ ꓠꓯꓸꓼ ꓘꓴꓽ ꓗꓪ ꓔꓬ ꓢꓴ ꓠꓬ ꓠꓬꓲ ꓟꓳꓻ ꓓꓴ ꓓꓽ ꓟ ꓟꓳꓻ ꓡꓰꓳ ꓐꓰ ꓐꓯ ꓔ ꓡꓳ=
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓯ ꓞꓲꓹ ꓟ ꓗꓪ ꓣꓳ ꓠꓬ ꓮ ꓡꓲ ꓥˍ ꓟꓲ ꓙ ꓖꓴ ꓫꓱꓽ ꓟꓽ ꓠ= ꓠꓯ ꓞꓲꓹ ꓟ ꓠꓯꓸꓼ ꓗꓪ ꓣꓳ ꓠꓬ ꓖꓪ ꓫꓱꓹ ꓠꓪ ꓫꓱꓹ ꓬꓰ ꓢꓲ ꓠꓬꓲ ꓮꓽ ꓤ ꓤ ꓙꓰ ꓠ ꓔˍ ꓡꓳ= ꓔꓷꓹ ꓟꓽ ꓠ꓾ ꓛꓲ ꓟꓽ ꓕꓲꓽ ꓕꓲꓽ ꓐꓰ ꓔꓷꓹ ꓟꓽ ꓠ= ꓖꓳ ꓡꓱ ꓐꓯˍ ꓥ ꓟꓲ ꓠꓬꓲ ꓟꓳꓻ ꓓꓴ ꓠꓯꓸꓼ ꓗꓪ ꓠꓬ ꓔꓷꓹ ꓠꓸ ꓡꓳ= ꓔꓷꓹ ꓠꓸ ꓟ ꓡꓰꓽ ꓟꓽ ꓞꓲ ꓮ ꓫꓵꓽ ꓔꓯ ꓥˍ ꓟꓲ ꓣꓳ ꓟꓳꓻ ꓓꓹ ꓡꓳ= ꓔꓲ ꓔꓲ ꓢꓲꓽ ꓢꓲꓽ ꓡꓰꓽ ꓣꓳ ꓟꓳꓻ ꓘꓴˍ ꓡꓳ=
ꓠꓬꓲꓸ ꓠꓬꓲ ꓪꓴ-ꓢ ꓶꓻ ꓥꓳꓽ ꓠꓯꓸꓼ ꓘꓴꓽ ꓗꓪ꓾ ꓢꓲ ꓒ ꓬꓰ-ꓢꓴ ꓬꓲ ꓠꓬꓲ ꓟꓳꓻ ꓓꓴ ꓛ ꓗꓴꓸ ꓠꓯꓸꓼ ꓘꓴꓽ ꓗꓪ ꓣꓳ ꓔꓬꓹ ꓙꓰˍ ꓕꓯ ꓣꓳ ꓠꓬ ꓙꓲꓻˍ ꓡ ꓟꓽ ꓙꓲꓻ ꓡ ꓐꓯˍ ꓟ ꓔꓯ ꓣꓳꓽ ꓢꓷꓸ ꓘꓴˍ ꓡꓳ= ꓮ ꓡꓲ ꓟ ꓠꓬ ꓔꓱꓹ ꓜꓳꓽˍ ꓡ ꓟꓽ ꓔꓱꓹ ꓜꓳꓽ ꓡ ꓐꓯˍ ꓟ ꓣꓳ ꓡꓳꓸ ꓗꓴꓸˍ ꓡꓳ=
