ꓟꓲꓽ ꓟꓲ ꓓꓵꓽ ꓡꓰˍ ꓕꓯ ꓠꓴ ꓕꓽ ꓥꓴꓻ꓾ ꓟꓽ ꓥ ꓠꓬ ꓟꓬ ꓐꓲ ꓞꓰꓻ ꓔꓬ ꓟ ꓪꓴ. ꓠꓬꓲ ꓗꓴ ꓤ ꓐꓴ ꓔꓯ ꓟꓽ ꓟꓳꓻ ꓗꓷ ꓡꓰˍ ꓥꓳ꓾
ꓐꓯ ꓘꓶꓽ ꓕꓱ ꓟ ꓬꓲ. ꓬꓲ ꓢꓲ ꓮ ꓘꓶ. ꓙꓳˍ ꓟ ꓥ ꓡꓳ꓿ ꓣꓳ ꓤꓶꓻ ꓗꓪ ꓟꓲꓽ ꓟꓲ ꓓꓵꓽ ꓡꓰꓳ ꓐꓰ ꓓꓵꓽ ꓙꓽ ꓟꓶ ꓪˍ ꓟ ꓦꓬꓼ ꓠꓬꓲ ꓮ ꓟꓬ, ꓧꓪ, ꓣꓳ ꓔꓳ, ꓜꓳꓽ ꓠꓬꓲˍ ꓥꓳ꓿ ꓖꓳ ꓕꓯ ꓮ ꓟꓶ ꓠꓽ ꓟꓲꓽ ꓟꓲ ꓓꓵꓽ ꓡꓰꓳ꓾ ꓥꓪ ꓠꓬ ꓫꓴ ꓡꓰꓳ꓾ ꓕꓰ ꓡꓰꓺꓽ ꓥꓳ꓾ ꓐꓰ ꓓꓵꓽ ꓙꓽ ꓢꓲ ꓟꓬ ꓐꓲ ꓞꓰ ꓔꓬ ꓠꓬ ꓟꓬ ꓐꓲ ꓪꓴ. ꓠꓬꓲ ꓟꓲꓽ ꓟꓲꓽ ꓓꓵꓽ ꓡꓰˍ ꓕꓯ ꓓꓳ ꓡˍ ꓟ ꓗꓴ ꓤ ꓔꓯ ꓫꓱ.ˍ ꓟ꓾ ꓟꓽ ꓙꓲꓻ ꓟ ꓠꓯꓸꓼ ꓗꓪ ꓐꓰ ꓙꓲꓻˍ ꓟ ꓔꓯ ꓟꓽ ꓟꓳꓻ ꓟꓳꓻ ꓗꓷ ꓡꓰˍ ꓥꓳ꓾ ꓐꓰ ꓐꓯ ꓠꓲ, ꓫꓵˍ ꓟ ꓥ ꓡꓳ꓿
ꓳ꓾ ꓟꓽ ꓙꓲꓻ ꓟ ꓔꓳ, ꓜꓳꓽ ꓔꓬ ꓐꓯ ꓔꓬ ꓡꓲ. ꓠꓽ ꓮ ꓡꓲ ꓗꓪ ꓚꓳ. ꓙꓲꓻˍ ꓟ ꓙꓳ ꓡˍ ꓢꓰꓽ꓾ ꓐꓰ ꓓꓵꓽ ꓙꓽ ꓟꓶ ꓓꓴ ꓙꓳˍ ꓡꓳ꓿ ꓖꓳ ꓡꓱ ꓠꓽ ꓟꓽ ꓥ꓿ ꓚꓵ ꓚꓵ ꓣꓳ ꓤꓶꓻ ꓗꓪ ꓔꓳ, ꓜꓳꓽ ꓡˍ ꓕ ꓑꓳꓸꓼ ꓗꓪ ꓚꓳ. ꓣꓳ ꓣꓴ ꓗꓴ.ˍ ꓕꓯ ꓠꓽ ꓢꓴ ꓣꓳ ꓓꓴ ꓠꓽ ꓙꓳˍ ꓫꓵꓽ ꓡꓰꓽ ꓥ ꓡꓳ꓿
ꓙꓲꓻˍ ꓟ ꓔꓯ ꓟꓳꓻ ꓗꓴ.ˍ ꓟ ꓠꓲ, ꓟ ꓐꓯˍ ꓟ ꓔꓯ ꓑ ꓙꓽ ꓠꓬꓲˍ ꓥꓳ꓿ ꓣꓳ ꓠꓯꓸꓼ ꓗꓪ ꓟꓽ ꓙꓲꓻ ꓟ ꓔꓳ, ꓜꓳꓽ ꓡˍ ꓟ ꓠꓯꓸꓼ ꓗꓪ ꓐꓰ ꓙꓲꓻˍ ꓟ ꓔꓯ ꓟꓳꓻ ꓗꓴ.ˍ ꓐꓯˍ ꓟ ꓠꓽ ꓐꓯ ꓡꓰꓽ ꓐꓯ ꓢꓻˍ ꓡꓳ꓿ ꓚꓵ ꓚꓵ ꓛꓳ ꓫꓱꓽ ꓠ, ꓟ ꓫ.ˍ ꓡꓳ꓿ ꓙꓲꓻˍ ꓟ ꓔꓯ ꓟꓳꓻ ꓗꓴ.ˍ ꓟ ꓠꓲ, ꓟ ꓐꓯˍ ꓟ ꓠꓬ ꓮ ꓡꓲ ꓫꓵꓽ ꓣꓳ ꓠꓯꓸꓼ ꓗꓪ ꓔꓳ, ꓜꓳꓽ ꓡˍ ꓥ ꓟꓲ ꓐꓽ ꓧꓷꓼ ꓧꓷꓼ ꓡꓰꓽ ꓬꓰ ꓔ ꓢꓲ ꓔꓬ ꓝꓲˍ ꓟ ꓟꓽ ꓥ꓿
ꓔꓳ, ꓜꓳꓽ ꓡˍ ꓟ ꓠꓯꓸꓼ ꓗꓪ ꓟꓬꓽ ꓠꓬꓲ ꓙꓲ ꓡꓰ ꓠ ꓙꓽ ꓖꓶ ꓢꓲ ꓞꓳ ꓙꓳ ꓔꓬˍ ꓟ ꓥ ꓡꓳ꓿ ꓔꓯ ꓥꓳꓽ꓾ ꓠꓴ ꓠꓬ ꓡꓯꓽ ꓒꓯ, ꓕꓲ ꓐꓽ ꓗꓪ ꓠꓻ ꓓꓴ ꓓꓴ ꓡꓰꓳ꓾ ꓐꓰ ꓐꓯ ꓛꓵ꓾ ꓠꓻ ꓓꓴ ꓓꓴ ꓡꓰˍ ꓟ ꓠꓬ ꓟꓽ ꓙꓲꓻ ꓟ ꓥ ꓡꓳ꓿ ꓖꓳ ꓡꓱ ꓥˍ ꓟꓲ ꓖꓳ ꓟ ꓠꓯꓸꓼ ꓗꓪ ꓐꓰ ꓡꓯꓽ ꓒꓯ, ꓠꓬꓲꓽ ꓐꓽ ꓡꓱꓸꓼ ꓗꓪ ꓠꓻ ꓓꓴ ꓟꓽ ꓓꓴꓻ ꓡꓰ꓾ ꓕꓲ ꓐꓽ ꓠꓽ ꓧꓺ ꓧꓺ ꓡꓰꓽ ꓓ, ꓢꓰꓽ ꓡꓳ ꓟꓽ ꓥ ꓡ꓿ ꓟꓽ ꓙꓲꓻ ꓗꓷ ꓡꓰ ꓟ ꓠꓯꓸꓼ ꓗꓪ ꓐꓰ ꓙꓲꓻˍ ꓟ ꓔꓯ ꓟꓳꓻ ꓗꓴ. ꓠ ꓡꓳ. ꓠꓬꓲ ꓐꓯˍ ꓟˍ ꓟꓲ ꓕꓱ ꓟˍ ꓡꓰ ꓐꓰ ꓥꓳ꓿
ꓟꓲꓽ ꓟꓲ ꓓꓵꓽ ꓡꓰˍ ꓕꓯ ꓕꓽ ꓥꓴꓻ꓾ ꓟꓬ ꓐꓲ ꓪꓴ. ꓠꓬꓲ ꓗꓴ ꓤ ꓐꓴ ꓔꓯ ꓟꓽ ꓟꓳꓻ ꓗꓷ ꓡꓰˍ ꓥꓳ꓾ ꓐꓯˍ ꓟˍ ꓟꓲ ꓕꓱ ꓟˍ ꓡꓰ ꓐꓰ ꓥꓳ꓿ ꓟꓲꓽ ꓟꓲꓽ ꓓꓵꓽ ꓡꓰ ꓢꓲ ꓠꓯ ꓞꓲ ꓡꓰˍ ꓥ ꓟꓲ ꓟꓶꓽ ꓘꓶꓽ ꓙꓵ, ꓕꓯ ꓓꓳ ꓡˍ ꓟ ꓗꓴ ꓤ ꓔꓯ ꓡꓳ. ꓟꓳꓻ ꓠ, ꓟ ꓐꓱ ꓶ ꓥꓴꓻ ꓔꓬ ꓓꓴ ꓠꓽ ꓟꓽ ꓜꓳꓽ ꓟꓽ ꓥ ꓡ꓿
ꓐꓯ ꓠꓲ, ꓫꓵˍ ꓟ ꓠꓬ ꓡ ꓞꓳ ꓟꓬꓽ ꓠꓬꓲ ꓠꓬ ꓠꓲ, ꓟ ꓫ. ꓓꓴ꓾ ꓠꓲ, ꓟ ꓙꓬ ꓓꓴ ꓔꓳ, ꓜꓳꓽ ꓡˍ ꓕꓯ ꓖꓳ ꓟ ꓠꓯꓸꓼ ꓗꓪ ꓡꓰꓽ ꓮʼ ꓚꓳ ꓔꓬ ꓡꓳ꓿ ꓖꓳ ꓟ ꓠꓯꓸꓼ ꓗꓪ ꓐꓰ ꓟꓽ ꓡꓲ, ꓓꓳ ꓙꓰ꓿ ꓥꓴꓻ ꓟꓽ ꓓꓻ꓾ ꓠꓲ, ꓟ ꓫ. ꓟꓽ ꓓꓻ ꓐꓰ ꓐꓯˍ ꓟ ꓠꓽ ꓟꓽ ꓥ꓿ ꓣꓳ ꓠꓬ ꓫꓵꓽ ꓧꓪꓽ ꓙꓳˍ ꓟ ꓞꓳ ꓤ ꓥ ꓟ ꓑꓶ. ꓓꓴ ꓥꓴꓻ ꓛꓵˍ ꓡꓳ꓾ ꓠꓲ, ꓟ ꓫ. ꓛꓵˍ ꓡꓳ꓾ ꓠꓲ, ꓟ ꓙꓬ ꓛꓵˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓕꓱ ꓗꓪ ꓞꓼ ꓡꓰꓽ ꓕꓽ ꓠꓽ ꓗꓷ꓿ ꓬꓲ ꓙꓵ, ꓛꓲ ꓡˍ ꓕꓯ ꓗ, ꓛꓲꓽ ꓗꓴ. ꓠ, ꓟ ꓢꓯꓼ ꓕꓵꓼ꓿
ꓚꓲ. ꓛꓬ ꓖꓳ ꓓꓱꓽ ꓡꓰ ꓔꓴ ꓠꓲ, ꓟꓽ ꓫꓵ ꓫꓵ ꓓꓳꓽ ꓓ, ꓢꓴ ꓔꓯ ꓮ ꓡꓲ ꓕꓲ ꓣꓳˍ ꓟꓲ ꓖꓳ ꓔꓴ ꓖꓶ ꓟꓽ ꓐ ꓡ꓿ ꓚꓲ. ꓛꓬ ꓡꓰ ꓖꓳ ꓙꓱ ꓓꓯ ꓠꓲ, ꓟꓽ ꓫꓵ ꓢꓴ ꓔꓯ ꓮꓽ ꓟˍ ꓟꓲ ꓮ ꓟꓴ. ꓟꓴ ꓗꓪ ꓛꓲ ꓬꓰ ꓠ ꓚꓰ, ꓖꓶ ꓟꓽ ꓐ ꓡ꓿ ꓖꓳ ꓟ ꓑꓶ. ꓓꓴ ꓟꓲꓽ ꓟꓲꓽ ꓓꓵꓽ ꓡꓰꓳ ꓐꓯ ꓢꓲ ꓟꓽ ꓠꓽ ꓠꓽ ꓥꓴꓻ ꓔꓬ ꓕꓯ ꓠꓽ ꓟꓶꓽ ꓘꓶꓽ ꓕꓯ ꓡꓰꓽ ꓓꓳ ꓡˍ ꓟ ꓗꓴ ꓤ ꓔꓯ ꓟꓽ ꓟꓶ ꓟꓳꓻꓳ꓿ ꓖꓳ ꓟ ꓑꓶ. ꓓꓴ ꓤꓶꓻ ꓠꓯꓸꓼ ꓗꓪ ꓟꓲꓽ ꓟꓲ ꓓꓵꓽ ꓡꓰˍ ꓟ ꓡꓰ ꓫꓴꓻ ꓡꓰˍ ꓟ ꓙꓵ, ꓔꓯ ꓔꓳ, ꓜꓳꓽ ꓡˍ ꓕꓯ ꓠꓲ, ꓟ ꓫ. ꓚꓳˍ ꓟ ꓫ. ꓦꓯ ꓗꓷ꓿ ꓖꓳ ꓡꓱ ꓥˍ ꓟꓲ ꓫꓴꓻ ꓡꓰˍ ꓟ ꓗꓪ ꓡꓰꓽ ꓕꓽ ꓠꓽ ꓗꓷ꓿ ꓔꓳ, ꓜꓳꓽ ꓔꓬ ꓟ ꓠꓯꓸꓼ ꓗꓪ ꓢꓳ ꓣꓴ ꓢꓲ ꓠꓬꓲ ꓝꓮꓲ ꓕꓲ ꓧꓪ, ꓢꓯꓼ ꓕꓵꓼ꓿ ꓖꓳ ꓕꓯ ꓝꓮꓲ ꓕꓲ ꓧꓪ, ꓣꓳ ꓠꓬ ꓧꓪ. ꓡꓰˍ ꓟ ꓟꓶ ꓐ ꓡˍ ꓥꓳ꓿
