ꓣꓳ ꓠꓬ ꓙꓲ_ ꓟ ꓚꓱ, ꓔꓯ ꓡꓰ ꓬꓰ ꓠ, ꓟ ꓐꓰ ꓔꓱ, ꓟ ꓠꓯꓼ ꓗꓪ ꓦꓲꓼ ꓞ, ꓓꓴ ꓬꓰ ꓡꓯ꓾
ꓙꓲ ꓢꓴ ꓢꓲ ꓤ ꓐꓴ ꓠꓯꓼ ꓗꓪ ꓐꓰ ꓙꓲ_ ꓟ ꓔꓯ ꓡꓰ ꓛꓳ ꓫꓱ ꓬꓰ ꓠ, ꓟ ꓥ ꓢꓲ ꓔꓱ, ꓟ ꓐꓱ ꓶ ꓦꓲꓼ ꓞ, ꓓꓴ ꓬꓰ ꓡꓯ꓾ ꓐꓰ ꓔꓲꓺ ꓒ ꓪ ꓔꓲ ꓡꓰꓳ (14) ꓡꓰ ꓦꓮꓔꓲꓚꓮꓠ ꓗꓪ ꓬꓰ_ ꓟ ꓠꓽ ꓛꓳꓼ ꓠꓬꓲ ꓙꓴ‐ꓐꓲ‐ꓡꓲ ꓙꓲ ꓢꓴ ꓢꓲ ꓤ ꓐꓴ ꓐꓰ ꓜꓲ ꓟ ꓗꓪ ꓐꓯ ꓔ ꓟ ꓥ ꓡꓳ꓾ ꓖꓳ ꓟ ꓡꓰ ꓐꓰ ꓬꓲ ꓠꓬ ꓪꓴ‐ꓢ ꓚꓳ ꓟ ꓥ ꓟ ꓓꓳꓣꓳꓔꓧꓬ ꓓꓮꓬ (1897‐1980) ꓚꓱ, ꓔꓯ ꓟ. ꓖꓶ_ ꓡꓳ꓿
ꓓꓳꓣꓳꓔꓧꓬ ꓓꓮꓬ ꓠꓬ ꓮꓟꓰꓣꓲꓚꓮꓠ ꓓꓳꓽ ꓫꓵꓽ ꓣꓴ ꓢꓴ ꓥ ꓢꓲ ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓗꓪ ꓒꓳ, ꓡ ꓢꓴ ꓥ ꓢꓲ ꓠꓬꓲ ꓶ ꓡꓯꓼ ꓐꓬ ꓡꓰ ꓟ ꓬꓲ ꓙꓵ, ꓘꓴꓽ ꓗꓪ ꓚꓮꓔꓧꓳꓡꓲꓚ ꓪꓳꓣꓗꓰꓣ ꓟꓬꓱꓽ ꓚꓱ, ꓔꓯ ꓫꓬ, ꓔꓴ ꓗꓷ ꓟ ꓥꓳ꓿
ꓫ. ꓔꓬ ꓢꓴ꓾ ꓚꓵ. ꓡꓰ ꓔꓬ ꓢꓴ ꓐꓴ ꓐꓰ ꓟꓬꓱꓽ ꓬꓰ ꓢꓴ ꓐꓴ ꓐꓱ ꓶ ꓬꓲ ꓡꓰ ꓢꓯꓼ ꓕꓵꓼ_ ꓟ ꓟꓬꓱꓽ ꓑꓶ ꓓꓴ ꓢꓷ. ꓢꓴ ꓟꓬ ꓡꓰ ꓟ ꓓꓳꓣꓳꓔꓧꓬ ꓓꓮꓬ ꓠꓬ ꓚꓺ ꓟꓲꓽ ꓗꓪ ꓟꓬꓱ ꓓꓳꓽ ꓖꓶ ꓟꓶ ꓢꓴ ꓥ ꓡꓳ꓿
ꓢꓲ ꓫꓬ ꓕꓳ ꓶ ꓗꓪ ꓢꓯꓼ ꓕꓵꓼ ꓠꓲ, ꓔꓯ ꓘꓳ, ꓣꓴ ꓢꓲ꓾ ꓠꓱ. ꓐꓯꓼ ꓢꓴ ꓔꓯ ꓬꓰ ꓙ ꓠ, ꓟ ꓓꓵꓽ ꓙ ꓞꓷ, ꓐ ꓡ ꓠ, ꓟ ꓐꓯ ꓔ ꓡꓳ꓾ ꓬꓲ ꓠꓬ ꓚꓲ ꓛꓬ ꓪ ꓟꓶ ꓔ ꓟ ꓣꓱ ꓛꓰ ꓔꓯ ꓢꓷ. ꓠ, ꓟ ꓐꓰ ꓢꓲ ꓫꓬ ꓕꓳ ꓶ ꓗꓪ ꓟ. ꓖꓶ_ ꓟ ꓠꓵꓻ ꓠꓲ, ꓔꓯ ꓔꓱ, ꓜꓳ ꓡꓰ ꓠ ꓟ. ꓖꓶ_ ꓟ ꓞꓳ ꓙꓳ ꓚꓱ, ꓜꓴ ꓕꓲ ꓜꓴ ꓔꓯ ꓪꓴ ꓟꓴ ꓡꓰ ꓝꓲ ꓠ, ꓟ ꓚꓲ ꓛꓬ ꓤꓶꓻ ꓗꓪ ꓮ ꓡꓰ ꓐꓰ ꓦꓲꓼ ꓞ, ꓠ, ꓟ ꓔꓯ ꓟ. ꓖꓶ ꓠ, ꓟ ꓐꓱ ꓶ ꓪꓴ‐ꓢ ꓠꓯꓼ ꓗꓪ ꓪꓽ ꓘꓴ ꓶꓽ ꓓꓰ ꓠ, ꓟ ꓢꓯꓼ ꓖꓶ ꓗꓷ ꓟ ꓥꓳ꓿
ꓓꓳꓣꓳꓔꓧꓬ ꓓꓮꓬ ꓠꓬ ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓐꓱ ꓶ ꓔꓯꓺ ꓢꓳ ꓓꓴ ꓥ ꓢꓲ ꓠꓬꓲ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓢꓯ. ꓔꓬ ꓢꓴ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓐꓯ ꓔ ꓡꓳ꓿
“ꓗꓴꓷꓼ ꓪꓴꓽ ꓟꓴ ꓡ ꓟ ꓚꓱ, ꓠꓬ ꓡ ꓞꓳ ꓮ ꓙꓵ ꓐꓱ ꓶ ꓫꓱꓽ_ ꓟ ꓬꓲ ꓚꓱ, ꓔꓯ ꓖꓶ ꓟꓽ ꓐ ꓡ ꓐꓰ ꓬꓲ ꓡꓰ ꓡꓳ. ꓟꓳ ꓪ ꓟ ꓥꓳ꓾” ꓬꓲ ꓠꓬ ꓙ ꓜꓲꓼ ꓠꓲ, ꓙꓳ_ ꓡꓳ꓾ ꓓꓳꓣꓳꓔꓧꓬ ꓓꓮꓬ ꓠꓬ ꓖꓳ ꓟ ꓣꓱ ꓛꓰ ꓐꓰ ꓦꓲꓼ ꓞ, ꓔꓬ ꓟ ꓥꓳ꓾ ꓬꓲ ꓠꓬ “ꓞꓳ ꓤ ꓮ ꓟꓬ, ꓐꓱ ꓶ ꓡ ꓠ, ꓟ ꓤꓶꓻ ꓳꓼ ꓟꓬ ꓠꓬ ꓙꓳꓺ ꓡꓰ ꓓꓴ ꓥ ꓢꓲ ꓠꓬꓲ ꓙꓲ ꓢꓴ ꓢꓲ ꓤ ꓕꓲ ꓣꓳ ꓗꓪ ꓐꓰ ꓤꓶꓻ ꓐꓬ ꓡꓰ ꓝꓲ_ ꓟ ꓶ ꓡꓯꓼ ꓟꓬꓱꓽ ꓚꓱ, ꓔꓳ, ꓜꓳ ꓔꓬ ꓢꓴ꓾ ꓚꓵ. ꓡꓰ ꓔꓬ ꓢꓴ ꓟꓬꓱꓽ ꓬꓰ ꓢꓴ ꓐꓴ ꓐꓰ ꓕꓲ ꓪ ꓪ ꓠ, ꓟ ꓢꓷ. ꓔ ꓟ ꓥꓳ꓾” ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿
ꓓꓳꓣꓳꓔꓧꓬ ꓓꓮꓬ ꓠꓬ ꓬꓲ ꓠꓲ, ꓟ꓾ ꓬꓲ ꓢꓯꓼ ꓪ ꓐꓰ ꓬꓲ ꓡꓯ ꓒꓯ, ꓐꓰ ꓮ ꓟꓬ ꓛꓲ ꓐꓲ ꓞ, ꓠ ꓗꓪ ꓛꓲ ꓟꓬꓱꓽ ꓬꓰ ꓡꓳ, ꓬꓰ ꓟ ꓔꓯ ꓫꓱ. ꓖꓶ_ ꓡꓳ꓾ ꓬꓲ ꓠꓬ ꓬꓲ ꓠꓲ, ꓥꓶ_ ꓟ ꓚꓱ, ꓔꓯ ꓕꓲ ꓪ ꓢꓯꓼ ꓕꓵꓼ ꓠ, ꓟ ꓔꓯ ꓒꓳ, ꓡꓶ. ꓗꓷ ꓟ ꓔꓯ ꓥ ꓟꓲ ꓔꓲꓺ ꓒ ꓪ ꓔꓲ ꓡꓰ ꓫꓱ. ꓖꓶ_ ꓡꓳ꓿
“ꓥꓳ ꓡꓳ. ꓓꓴ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓐꓰ ꓕꓲ ꓪ ꓦꓲꓼ ꓞ, ꓟ ꓥ ꓡꓳ꓾” “ꓢꓲ ꓒ ꓬꓰ‐ꓢꓴ ꓠꓵꓻ ꓠꓲ, ꓮ. ꓔꓳ. ꓠꓬ ꓣꓳ ꓮ. ꓔꓳ. ꓥ ꓡꓳ꓾ ꓐꓰ ꓐꓯ ꓔ ꓡꓳ꓿ ꓖꓳ ꓟ ꓑꓶ ꓓꓴ ꓕꓱ ꓥꓳ ꓡꓳ. ꓓꓴ ꓙꓴ‐ꓐꓲ‐ꓡꓲ ꓑꓮꓲ ꓔꓯ ꓣꓳ ꓠꓯꓼ ꓗꓪ ꓐꓰ ꓘꓴ ꓜꓲꓼ ꓞꓳ ꓕꓲꓽ ꓟ ꓡꓱꓼ ꓔꓯ ꓕꓱ ꓮ ꓔꓳ. ꓔꓯ ꓝꓮꓲ ꓕꓲ ꓧꓪ, ꓐꓬ ꓡꓰ ꓝꓲ꓾” ꓐꓰ ꓪꓽ ꓘꓴ ꓖꓶ ꓢꓲ ꓬꓲ ꓟꓶꓽ ꓢꓰꓼ ꓗꓷ ꓟ ꓥꓳ꓿
