ꓟꓬ‐ꓟ ꓗꓴꓷꓼ ꓗꓪ ꓐꓰ ꓬꓲ. ꓪꓴ. ꓟ ꓔꓲꓺ ꓟ ꓕꓲꓽ ꓣꓳ ꓠꓢꓚ ꓔꓲꓺ ꓟ ꓜꓴꓻ ꓗꓪ ꓕꓲꓽ ꓞꓲꓼ ꓕꓲ ꓑ ꓪꓵꓼ ꓙꓱꓼ_ ꓟ꓾
2025 ꓘꓳꓼ 10 ꓦ ꓟ 26 ꓠꓬꓲ ꓠꓯꓼ 10 ꓙꓵ, ꓕꓯ ꓬ‐ꓖꓳꓥ ꓡꓳ ꓒꓱ ꓢꓔ. ꓑꓰꓔꓰꓣ ꓐꓰ ꓢꓔ. ꓑꓮꓴꓡ ꓪꓽ ꓘꓴ ꓦꓲꓻ ꓗꓪ ꓔꓲꓺ ꓟ Esther Ni Lar Shwe ꓠꓬ Sisters of Our Lady of Consolation(NSC) ꓔꓲꓺ ꓟ ꓜꓴꓻ ꓗꓪ ꓕꓲ ꓞꓲꓼ ꓕꓲ ꓑ ꓟ ꓪꓴ‐ꓢ ꓠꓯꓼ ꓗꓪ ꓡꓯꓼ ꓙꓱ ꓗꓷ ꓟ ꓥꓳ꓿ ꓔꓲꓺ ꓟ ꓠꓬ ꓠꓢꓚ ꓔꓲꓺ ꓟ ꓜꓴꓻ ꓗꓪ ꓕꓲ ꓞꓲꓼ ꓕꓲ ꓑ ꓪꓵꓼ ꓙꓱꓼ ꓗꓷ ꓟ ꓟꓬ‐ꓟ ꓗꓴꓷꓼ ꓗꓪ ꓐꓰ ꓬꓲ. ꓪꓴ. ꓕꓲꓽ ꓣꓳ ꓟ ꓥ ꓡꓳ꓿
ꓔꓲꓺ ꓒ ꓓꓽ Raymond Wai Lin Htun ꓡꓰ ꓟꓲ‐ꓢ ꓪꓽ ꓘꓴ ꓙꓵ, ꓔꓯ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓔꓲꓺ ꓒ ꓓꓽ Noel Saw Naw Aye ꓐꓰ ꓔꓲꓺ ꓒ 6 ꓣꓳ ꓐꓰ ꓟꓲ‐ꓢ ꓪꓽ ꓘꓴ ꓙꓵ, ꓔꓯ ꓬꓰ ꓓꓳ ꓡꓰ ꓟ ꓥꓳ꓿
ꓔꓲꓺ ꓒ ꓓꓽ Raymond ꓡꓰ ꓠꓲ, ꓡꓱ ꓗ, ꓛꓲ_ ꓟ ꓐꓰ ꓫꓱ. ꓖꓶ_ ꓡꓳ꓾ ꓐꓰ ꓐꓯ ꓔ ꓡꓳ꓿ ꓙꓵꓻ ꓠꓲ, ꓚꓱ, ꓢ‐ꓢꓲ‐ꓠ ꓟꓬꓱꓽ ꓤꓶꓻ ꓠꓬ “ꓟꓳ ꓓ_ ꓟ ꓥꓳ ꓡꓳ. ꓓꓴ ꓬꓲ ꓒꓬꓱ ꓐꓰ ꓪꓴ‐ꓢ ꓠꓵꓻ ꓠꓲ, ꓔꓯ ꓢꓯ. ꓔꓬ ꓢꓲ ꓢꓷ. ꓙ ꓟꓳ ꓙ ꓟ꓾” ꓥ ꓡꓳ ꓐꓰ ꓐꓯ ꓔ ꓡꓳ꓿
“ꓞꓳ ꓤ ꓮ ꓟꓬ, ꓗꓪ ꓐꓰ ꓙꓵꓻ ꓠꓲ, ꓚꓱ, ꓛꓳ ꓫꓱꓽ ꓢꓴ ꓠꓬ ꓪꓴ‐ꓢ ꓠꓬ ꓣꓳ ꓐꓱ ꓶ ꓐꓲ ꓜꓲꓼ_ ꓡꓳ꓾” ꓐꓰ ꓐꓯ ꓔ ꓡꓳ꓿”ꓔꓱ, ꓟ ꓗ, ꓛꓲ ꓓꓴ ꓐꓰ ꓠꓲ, ꓡꓱ ꓗ, ꓛꓲ_ ꓟ ꓠꓬ ꓪꓴ‐ꓢ ꓠꓯꓼ ꓗꓪ ꓐꓰ ꓡ ꓟ ꓔꓯ ꓟ. ꓖꓶ_ ꓡꓳ꓾” ꓠꓢꓚ ꓔꓲꓺ ꓟ ꓜꓴꓻ ꓐꓴ ꓔꓯ ꓫꓱ. ꓖꓶ ꓢꓲ ꓠꓬꓲ ꓔꓲꓺ ꓟ Esther ꓬꓲ ꓢꓲ ꓚꓰ. ꓗꓷ ꓟ ꓚꓱ, ꓔꓯ “ ꓮ ꓘꓶ. ꓒꓵ ꓢꓲ ꓟꓬꓱꓺ ꓓꓳ ꓙꓳ ꓟ꓾” ꓔꓯ ꓐꓯ ꓔ ꓡꓳ꓾ ꓬꓲ ꓤꓶꓻ ꓠꓬ꓾ “ꓔꓬ ꓖꓴ ꓣꓱ ꓬꓯꓼ ꓔꓬ ꓟ ꓞꓳ ꓤ ꓮ ꓙꓵ ꓐꓱ ꓶ ꓐꓲ ꓜꓲꓼ ꓟ ꓬꓲ. ꓔꓶ. ꓗꓷ ꓡꓰ ꓝꓲ꓾” ꓐꓰ ꓶꓼ ꓓꓰ ꓖꓶ_ ꓡꓳ꓿
ꓔꓲꓺ ꓟ Esther ꓠꓬ ꓑꓬꓮꓬ ꓔꓲꓺ ꓒ ꓓ ꓢ‐ꓢꓲ‐ꓠ ꓗꓪ ꓔꓬ ꓟ ꓬꓰꓓꓲꓠ ꓞꓳ ꓘ, ꓗꓪ ꓦꓵꓻ ꓢꓲ ꓠꓬꓲ 33 ꓘꓳꓼ ꓡꓳꓼ ꓡꓰ ꓟ ꓥꓳ꓿ ꓬꓲꓼ ꓠꓬꓲ ꓤ 8 ꓣꓳ ꓗꓪ ꓐꓰ ꓟꓽ ꓓꓽ ꓣꓳꓺ ꓢꓴ ꓥ ꓡꓳ꓿ ꓬꓲ ꓠꓬ 2012 ꓘꓳꓼ 5 ꓦ ꓕꓯ ꓔꓲꓺ ꓟ ꓜꓴꓻ ꓗꓪ ꓓꓵꓽ ꓡꓰ ꓟ ꓥꓳ꓿ 2017 ꓘꓳꓼ ꓕꓯ ꓑꓧꓲꓡꓲꓑꓑꓲꓠꓰꓢ ꓗꓴꓷꓼ ꓟꓮꓠꓲꓡꓮ ꓗꓪ ꓬꓲ. ꓪꓴ. ꓟ ꓔꓲꓺ ꓟ ꓜꓴꓻ ꓗꓪ ꓪꓵꓼ ꓙꓱꓼ ꓗꓷ ꓟ ꓥꓳ꓿
ꓔꓲꓺ ꓟ ꓬꓲ ꓢ‐ꓢꓲ‐ꓠ ꓟꓬꓱꓽ ꓔꓯ 2018 ꓘꓳꓼ ꓗꓪ ꓐꓰ 2023 ꓘꓳꓼ ꓗꓪ ꓛꓲ ꓟꓬ‐ꓟ ꓗꓴꓷꓼ ꓗꓪ ꓟꓬꓱꓽ ꓬꓰ ꓡꓳ, ꓬꓰ ꓢꓲ ꓠꓬꓲ ꓑꓰꓣꓴ ꓗꓴꓷꓼ ꓗꓪ ꓝꓮꓲ ꓢꓷ. ꓠꓲ, ꓢꓳꓺ ꓜꓲꓼ ꓢꓲ꓾ ꓢꓑꓮꓲꓠ ꓗꓪ ꓝꓮꓲ ꓙꓻ ꓖꓶ ꓡꓳ, ꓬꓰ ꓢꓲ ꓑꓧꓲꓡꓲꓑꓑꓲꓠꓰꓢ ꓗꓪ ꓡ ꓡ ꓢꓲ ꓠꓬꓲ ꓟꓬꓱꓽ ꓬꓰ ꓡꓳ, ꓬꓰ ꓟ ꓥꓳ꓿ ꓬꓲ ꓠꓬ ꓮ ꓟꓶ ꓟꓬ‐ꓟ ꓗꓪ ꓢ‐ꓢꓲ‐ꓠ ꓟꓬꓱꓽ ꓟꓯ ꓔꓬ ꓟ ꓥ ꓡꓳ꓿
ꓖꓳ ꓟ ꓡꓰ ꓐꓰ ꓔꓲꓺ ꓟ ꓚꓮꓣꓟꓰꓠ ꓦꓲꓡꓡꓮꓡꓳꓠ ꓡꓰꓔꓰꓡꓲꓰꓣ ꓡꓰ ꓜꓲꓼ ꓡ ꓢꓴ ꓔꓲꓺ ꓒ ꓓꓽ꓾ ꓔꓲꓺ ꓒ ꓐꓴ꓾ ꓔꓲꓺ ꓟ ꓐꓰ ꓮ ꓙꓵ ꓔꓯ ꓫ. ꓟꓳ ꓘꓶꓽ ꓫ. ꓕꓱ ꓗꓷ ꓟ ꓥꓳ꓿ ꓬꓲ ꓡꓰ ꓔꓲꓺ ꓟ ꓰꓢꓔꓧꓰꓣ ꓠꓯꓼ ꓗꓪ ꓬꓰ ꓙ ꓡ ꓢꓴ ꓐꓴ ꓮ ꓙꓵ ꓔꓯ ꓥ ꓟꓲ ꓫ ꓟꓳ ꓘꓶꓽ ꓫ. ꓕꓱ ꓗꓷ ꓟ ꓥꓳ꓿
ꓔꓲꓺ ꓟ ꓰꓢꓔꓧꓰꓣ ꓡꓰ ꓰꓠꓖꓡꓲꓢꓧ ꓐꓰ ꓢꓑꓮꓲꓠ ꓘꓶꓽ ꓐꓰ ꓬꓲ ꓔꓯ ꓙ ꓖꓴ ꓧꓳꓽ ꓟꓳ. ꓢꓴ ꓐꓰ ꓪꓽ ꓘꓴ ꓙ ꓖꓶ ꓔꓬ ꓢꓴ ꓐꓴ ꓮ ꓙꓵ ꓔꓯ ꓫ ꓟꓳ ꓘꓶꓽ ꓫ ꓕꓱ ꓗꓷ ꓟ ꓥꓳ꓾
1857 ꓘꓳꓼ ꓕꓯ ꓢꓔ. ꓟꓮꓣꓲꓮ ꓣꓳꓢꓮ ꓟꓳꓡꓮꓢ ꓡꓰ ꓢꓑꓮꓲꓠ ꓗꓴꓷꓼ ꓗꓪ ꓫꓬ, ꓔꓶꓻ ꓔ ꓟ ꓥ ꓢꓲ ꓠꓬꓲ ꓔꓧꓰ ꓢꓲꓢꓔꓰꓣꓢ ꓳꓝ ꓳꓴꓣ ꓡꓮꓓꓬ ꓳꓝ ꓚꓳꓠꓢꓳꓡꓮꓔꓲꓳꓠ ꓠꓬ ꓮ ꓟꓶ ꓗꓴꓷꓼ 21 ꓗꓴꓷꓼ ꓗꓪ ꓢ‐ꓢꓲ‐ꓠ ꓟꓬꓱꓽ ꓔꓯ ꓬꓰ ꓔꓬ ꓟ ꓥꓳ꓿ 2010 ꓘꓳꓼ 5 ꓦ ꓟ 8 ꓠꓬꓲ ꓕꓯ ꓟꓬ‐ꓟ ꓗꓴꓷꓼ ꓗꓪ ꓬꓲ. ꓪꓴ. ꓫꓬ, ꓔꓶꓻ ꓡ ꓟ ꓥ ꓡꓳ꓿ ꓮ ꓟꓶ ꓔꓲꓺ ꓟ ꓜꓴꓻ ꓗꓪ ꓟꓬ‐ꓟ ꓗꓴꓷꓼ ꓗꓪ ꓐꓰ 10 ꓣꓳ ꓪꓵꓼ ꓙꓱꓼ ꓔ ꓟ ꓥ ꓡꓳ꓿
