ꓢꓲ ꓒ ꓠꓯꓸꓼ ꓗꓪ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓠꓬ 25 ꓠꓽ ꓟ ꓢꓲ ꓒ ꓦꓬꓼ ꓠꓬꓲ ꓥ ꓡꓳ꓿ (ꓡꓴ‐ꓘ 16:1-13) ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓤ ꓬꓲ ꓠꓱ ꓐꓴ ꓔꓯ ꓪꓴ‐ꓢ ꓔꓯˍ ꓡꓰꓽ ꓣꓱꓽ ꓙ ꓠ, ꓟ ꓕꓵꓼ ꓪ ꓖꓶ ꓔˍ ꓡꓳ꓿ ꓚꓳ ꓑ. ꓠꓬꓲꓽ ꓣꓳ ꓠꓬ ꓢꓲꓽ ꓒ ꓠꓬꓲꓽ ꓣꓳ ꓔꓯ ꓣꓱꓽ ꓙ ꓟꓽ ꓐ ꓡ꓾ ꓐꓰ ꓐꓯ ꓔ ꓡꓳ꓿ ꓠꓴ ꓠꓬ ꓒꓴ ꓫꓵ ꓔꓯ ꓟꓬ ꓠꓯ.ˍ ꓕꓯ ꓒꓴ ꓫꓵ ꓔꓯˍ ꓡꓰꓽ ꓣꓱꓽ ꓙˍ ꓥꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓣꓱꓽ ꓙ ꓟꓽ ꓐ ꓡ꓿ ꓢꓲ ꓒ ꓬꓰ‐ꓢꓴ ꓔꓯ ꓠꓲ, ꓟ ꓗꓪ ꓗꓶ ꓟꓽ ꓐ ꓡ꓾ ꓐꓯˍ ꓟ ꓢꓲ ꓒ ꓬꓰ‐ꓢꓴ ꓐꓯ ꓟꓳ. ꓖꓶ ꓔꓬ ꓟ ꓥ ꓡꓳ꓿
ꓣꓳ ꓟꓲ ꓠꓯ ꓕꓱ ꓟ ꓗꓪ ꓮ ꓫꓵꓽ ꓥˍ ꓟꓲ ꓕꓲ ꓙꓰꓽ ꓖꓶ ꓢꓲ ꓠꓬꓲ ꓕꓲ ꓙꓰꓽ ꓟꓶˍ ꓟ ꓬꓲ ꓡꓲꓽ ꓙꓳˍ ꓡꓳ꓿ ꓮ ꓫꓵꓽ ꓥˍ ꓟꓲ ꓮꓽ ꓔꓳ ꓟꓽ ꓟꓶ꓿ ꓮ ꓡꓲ ꓫꓵꓽ ꓕꓲ ꓫꓵꓽ ꓥˍ ꓟꓲ ꓒꓵꓽ ꓶ ꓕꓲ ꓙꓰꓽ ꓠꓽ ꓖꓶ ꓠ ꓔ ꓡꓳ꓿ ꓣꓳ ꓟꓶ ꓙꓲꓽ ꓙꓳˍ ꓟ ꓖꓳ ꓟ ꓪꓴꓽˍ ꓠꓬ ꓪꓴꓽˍ ꓡꓰ ꓣꓳ ꓠꓬ ꓢꓯꓼ ꓕꓵꓼ ꓠ ꓗ, ꓡꓳ꓿ ꓕꓱ ꓟ ꓠꓬ ꓬꓲ ꓡꓲꓽ ꓓꓽ ꓟ ꓒꓬꓱꓼ ꓔꓬ ꓡꓳ꓿ ꓮ ꓫꓵꓽ ꓥˍ ꓟꓲ ꓚꓲ. ꓛꓬ ꓢꓯꓼ ꓪ ꓚꓲ. ꓛꓬ ꓢꓷ. ꓠꓲ, ꓡꓰ ꓑ ꓣꓴ ꓠ ꓔˍ ꓡꓳ꓿ ꓚꓲ. ꓛꓬ ꓒꓴ ꓚꓲ. ꓛꓬ ꓶꓽ ꓕꓲ ꓫꓵꓽ ꓫꓵꓽ ꓗꓪ ꓐꓰ ꓣꓳ ꓠꓲ, ꓫꓵˍ ꓟ ꓖꓳ ꓟ ꓑ ꓣꓴ ꓠ ꓔˍ ꓟ ꓬꓲ ꓡꓲꓽ ꓙꓳˍ ꓡꓳ꓿
ꓖꓳ ꓡꓱ ꓠꓬꓲ ꓣꓳ ꓟꓲ ꓠꓯ ꓕꓱ ꓟ ꓗꓪ ꓒꓬꓱꓽ ꓟꓳꓻ ꓡˍ ꓟ ꓗꓪ ꓐꓰ ꓬꓲ ꓡꓲꓽ ꓖꓳ ꓟ ꓔꓯ ꓛꓳꓻ ꓔꓬ ꓡꓳ꓿ ꓡꓲꓽ ꓒꓰꓼ ꓖꓳ ꓟ ꓔꓯ ꓪꓳ ꓫꓳ. ꓔꓬ ꓡꓳ꓿ ꓮ ꓫꓵꓽ ꓬꓰˍ ꓥˍ ꓟꓲ ꓕꓱ ꓟ ꓗꓪ ꓐꓰ ꓥꓪ ꓮ ꓫꓵꓽ ꓟꓶˍ ꓡ꓾ ꓕꓱ ꓟ ꓔꓯˍ ꓡꓰꓽ ꓣꓳ ꓡꓳ. ꓔꓬ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓧꓪꓽ ꓖꓳ ꓓꓱꓽ ꓕꓱ ꓟ ꓠꓬ ꓢꓯ. ꓓꓻ ꓠ, ꓟ ꓐꓱ ꓶ꓾ ꓣꓳ ꓠꓲ, ꓟ ꓕꓱ ꓟ ꓐꓲ ꓡ ꓠ, ꓟ ꓐꓱ ꓶ ꓚꓵ. ꓬꓲꓻ ꓓꓳ ꓢꓲ ꓠꓬꓲ ꓢꓯꓼ ꓕꓵꓼ ꓔꓬ ꓡꓳ꓿ ꓚꓲ. ꓛꓬ ꓐꓱ ꓶˍ ꓡꓰꓽ ꓟꓽ ꓞꓲ꓾ ꓚꓲ. ꓛꓬ ꓦꓲꓻ ꓢꓲ ꓒ ꓦꓲꓻ ꓢꓲ ꓟ ꓐꓴ꓾ ꓚꓲ. ꓛꓬ ꓤ ꓫꓵ. ꓕ ꓠꓱ ꓐꓴ ꓚꓲ. ꓛꓬ ꓮꓽ ꓐ ꓮ ꓟ ꓐꓴ ꓐꓱ ꓶ ꓣꓳ ꓠꓬ ꓚꓵ. ꓬꓲ ꓓꓳ ꓢꓲ ꓠꓬꓲ ꓢꓯꓼ ꓕꓵꓼˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓞꓳ ꓤ ꓐꓯˍ ꓟ ꓠꓬ ꓟꓲ ꓠꓯ ꓕꓱ ꓟ ꓗꓪ ꓡꓰꓽ ꓟꓽ ꓡꓳ, ꓬꓰ ꓐꓷ꓾ ꓞꓳ ꓤ ꓐꓯˍ ꓟ ꓠꓬ ꓟꓲ ꓠꓯ ꓕꓱ ꓟ ꓗꓪ ꓕꓲ ꓑ, ꓤ ꓥ ꓐꓷ ꓐꓯˍ ꓟ ꓣꓳ ꓢꓷ. ꓡꓰ ꓕꓯ꓾ ꓙꓵꓻ ꓠꓲ, ꓕꓱ ꓟ ꓣꓳ ꓪ ꓡꓰ ꓕꓯ ꓕꓱ ꓕꓲ ꓤꓶꓻ ꓐꓱ ꓶˍ ꓡꓰꓽ ꓣꓳ ꓢꓯꓼ ꓕꓵꓼˍ ꓟ ꓟꓽ ꓥꓺꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓣꓳ ꓠꓬ ꓮ ꓘꓶ. ꓤꓶꓻ ꓫꓵꓺˍ ꓐꓯˍ ꓥ ꓟꓲ 90 ꓘꓳꓼ ꓟꓽ ꓞꓲ꓾ ꓟꓬꓽ ꓠꓬꓲ 70 ꓘꓳꓼ ꓟꓽ ꓞꓲˍ ꓡꓰꓽ ꓣꓳ ꓔꓬ ꓪˍ ꓡꓳ꓿ ꓕꓲ ꓑ, ꓤ ꓡꓰꓽ ꓟꓶ ꓔꓬ ꓟ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓳ ꓠꓬ ꓬꓲ ꓙꓲ ꓢꓯꓼ ꓕꓵꓼˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓕꓲ ꓞꓲꓼ ꓫꓵꓻ ꓟꓽ ꓗꓴ. ꓟ꓾ ꓕꓲ ꓞꓲꓼ ꓢꓯ. ꓔꓬ ꓟ ꓦꓻ ꓐꓱ ꓶ ꓣꓳ ꓟꓽ ꓢꓯꓼ ꓕꓵꓼ ꓠꓬ ꓟꓽ ꓓꓻꓳ꓾ ꓐꓰ ꓐꓯˍ ꓟ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓐꓯ ꓟꓳ. ꓖꓶ ꓔꓲ. ꓬꓰˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓾ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ ꓕꓲ ꓠꓬꓲ ꓕꓲ ꓠꓬꓲ ꓢꓯꓼ ꓕꓵꓼ ꓔꓬ ꓠꓬ ꓟꓽ ꓜꓳꓽ꓿ ꓕꓲ ꓞꓲꓼ ꓢꓯꓼ ꓟꓬ ꓟꓶ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓠ ꓗ, ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓐꓯ ꓖꓶ ꓡˍ ꓡꓳ꓿
