ꓢꓲ ꓒ ꓠꓯꓸꓼ ꓗꓪ ꓧꓪ. ꓧꓪꓸꓼ꓾ ꓕꓱ ꓕꓲ ꓠ ꓡꓲꓽ ꓒꓰꓼ ꓐꓰ ꓫꓸ ꓕꓱˍ ꓟ ꓐꓰ꓾ ꓫꓸ ꓕꓱˍ ꓟ ꓗꓪ ꓠꓬ ꓡꓲꓽ ꓒꓰꓼ ꓐꓯˍ ꓟ ꓮ ꓫꓵꓽ ꓥ ꓡ꓾ꓐꓰ ꓣꓳ ꓓꓵ ꓙ ꓠꓬꓲˍ ꓕꓯ ꓢꓷꓸ ꓠꓲꓹ ꓙꓳ ꓒ ꓐꓴ ꓐꓯ ꓔ ꓟ ꓡꓰ ꓐꓰ ꓡꓲꓽ ꓒꓰꓼ ꓐꓯˍ ꓟ ꓠꓬ ꓞꓳ ꓫꓵ: ꓕꓲ ꓫꓵ: ꓟ ꓬꓲ ꓓꓵꓽ ꓙ ꓚꓱꓹ꓾ ꓬꓲ ꓞꓳ ꓙꓳ ꓚꓱꓹ ꓮ ꓙꓵꓽ ꓔꓯ ꓟꓳꓸ ꓖꓶˍ ꓟ ꓥ ꓡꓳ꓾ ꓐꓰ ꓐꓯ ꓡꓳ= ꓠꓬꓲꓸ ꓠꓬꓲ ꓣꓳ ꓠ ꓠꓹ ꓓꓴ ꓠꓬ ꓓꓵꓽ ꓙ ꓚꓱꓹ ꓟ ꓮ ꓡꓲ ꓥ ꓡ ꓐꓯˍ ꓟ ꓣꓳ ꓕꓲ ꓛꓳˍ ꓡꓳꓸ ꓠꓬꓲ ꓓꓴ ꓬꓰ ꓡꓯ=
ꓣꓳ ꓞꓳ ꓫꓵꓽ ꓕꓲ ꓫꓵꓽ ꓥꓳ ꓐꓯ ꓕꓯ ꓬꓲꓸ ꓠꓬ ꓠꓱꓸ ꓐꓯꓼ ꓔꓯ ꓟꓽ ꓪ꓾ ꓬꓲꓸ ꓚꓲ ꓛꓬ ꓬꓲ ꓐꓰ ꓬꓲꓸ ꓞꓳ ꓫꓵꓽ ꓔꓯ ꓡꓰꓽ ꓪꓽˍ ꓟ ꓣꓳꓽ ꓡꓳꓸ ꓟꓳ ꓡꓳ= ꓖꓪˍ ꓟ ꓫꓱ. ꓡꓯꓼ ꓘꓳꓹ ꓕꓯ꓾ ꓫ. ꓕꓱˍ ꓟ ꓫꓱ. ꓡꓯꓼ ꓘꓳꓹ ꓕꓯ ꓖꓳ ꓟ ꓠꓬ ꓞꓳ ꓫꓵꓽ ꓕꓲ ꓫꓵꓽ ꓐꓰ ꓖꓳ ꓡꓱ ꓐꓯ ꓡꓳ=
ꓖꓳ ꓡꓰ ꓠꓬꓲ ꓬꓲꓸ ꓪ ꓐꓴ ꓖꓪꓽˍ ꓟ ꓖꓪꓽ ꓫꓵꓽ꓾ ꓕꓱˍ ꓟ ꓫꓸ ꓕꓱ ꓘꓶ꓾ ꓬꓲꓸ ꓪ ꓠꓲꓹ ꓟ ꓠꓯ.ꓼ ꓗꓪ ꓓꓵꓽ ꓙ ꓚꓱꓹ ꓥ ꓟꓲ ꓪꓽˍ ꓟ ꓪꓴꓸ ꓠꓬꓲ ꓥ ꓡꓳ= ꓓꓵꓽ ꓙ ꓚꓱꓹ ꓖꓳ ꓟ ꓮ ꓡꓲ ꓐꓰ ꓪꓽˍ ꓐꓯˍ ꓟ ꓟꓳꓸ ꓖꓶ ꓡ ꓓꓴ ꓠꓬ ꓬꓲꓸ ꓕꓯꓽ ꓢꓲ ꓗꓪ ꓓꓳꓸꓸ ꓡ ꓟ ꓥꓳꓽ ꓫꓵꓽ ꓐꓰ ꓶ ꓖꓪꓽ꓾ ꓜꓽ ꓫꓵꓽ ꓜꓽ ꓙꓰ ꓕꓱ ꓡꓱ ꓐꓰ ꓪꓽˍ ꓟ ꓑꓶꓸ ꓓꓴ ꓠꓬꓲ ꓥ ꓡꓳ=
ꓔꓯ ꓥꓳꓽ ꓐꓯ ꓠꓬ꓾ ꓢꓲ ꓒ ꓬꓰ-ꓢꓴ ꓠꓬ ꓬꓴ-ꓔ ꓡꓲꓽ ꓒꓰꓼ ꓘꓴꓽ ꓠꓯꓸꓼˍ ꓗꓪ ꓦꓵꓸꓹ ꓡˍ ꓡꓳ= ꓢꓲ ꓒ ꓬꓰ-ꓢꓴ ꓬꓴ-ꓔ ꓡꓲꓽ ꓒꓰꓼ ꓘꓴꓽ ꓗꓪ ꓦꓵꓸꓹ ꓡ ꓟ ꓑꓶꓸ ꓓꓴ ꓬꓴ-ꓔ ꓕꓲ ꓣꓳ ꓡꓰ ꓐꓰ ꓬꓴ-ꓔ ꓡꓲꓽ ꓒꓰꓼ ꓔꓯ ꓖꓼ ꓛꓳꓻ ꓢꓲ ꓠꓬꓲ꓾ ꓕꓱ ꓡꓱ ꓐꓰ ꓬꓲꓸ ꓠꓬ ꓞꓳ ꓙꓳ ꓗꓳ. ꓙꓰˍ ꓡꓳ=
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓙꓰ ꓚꓱꓹ ꓓꓵꓽ ꓙ ꓚꓱꓹ ꓥ ꓟꓲ ꓬꓳ. ꓚꓵˍ ꓡꓳ꓾ ꓐꓯ ꓟ ꓣꓳ ꓔꓯ ꓟꓳꓸ ꓖꓶ ꓡ ꓡꓳ= ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓠꓬ ꓮ ꓡꓲ ꓫꓵꓽ ꓞꓳ ꓫꓵꓽ ꓵꓸꓹˍ ꓠꓬ ꓬꓲꓸ ꓪ ꓡꓲꓽ ꓒꓰꓼ ꓗꓪ ꓐꓰ ꓠ ꓠꓹ ꓙꓰˍ ꓟ ꓑꓶꓸ ꓓꓴ ꓡꓲꓽ ꓒꓰꓼ ꓠꓬ ꓬꓳ. ꓚꓵˍ ꓡꓳ= ꓣꓳ ꓡꓲꓽ ꓒꓰꓼ ꓔꓯ ꓒꓵꓽ ꓗ ꓚꓰ ꓠꓹ ꓟ ꓟ ꓢꓯꓼ ꓕꓵꓼ ꓡꓯ=
