ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓣꓳ ꓐꓳ ꓶ ꓬꓲ ꓑꓰ, ꓥ ꓟ ꓮ ꓫꓵꓽ ꓥ ꓡ ꓐꓯˍ ꓟ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓕꓲ ꓛꓳˍ ꓠ ꓠ, ꓓꓴ ꓬꓰ ꓡꓯ꓿ ꓡꓴ‐ꓘ 12ꓽ13‐20 ꓗꓪ ꓛꓲ ꓵꓻ ꓟ. ꓖꓶˍ ꓥꓳ꓿
ꓞꓳ ꓜꓴꓻ ꓗꓪ ꓟ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ꓾ ꓟꓸ ꓒꓽꓳ꓾ ꓥꓪ ꓔꓯ ꓡꓯꓼ ꓪ ꓐꓱꓻ ꓖꓶ ꓡ ꓠꓹ ꓟ ꓥꓪ ꓮ ꓬꓲꓼ ꓔꓯ ꓐꓯ ꓖꓶ ꓙ꓾ ꓐꓯˍ ꓡꓳ꓿ꓬꓰ-ꓢꓴ ꓠꓬ ꓬꓲ ꓔꓯ꓾ ꓞꓳ ꓤꓽꓳ꓾ ꓮꓽ ꓟ ꓡꓰ ꓥꓪ ꓔꓯ ꓠꓴ ꓪꓽ ꓐꓯ ꓟꓴ ꓞꓷꓹ ꓢꓴ ꓢꓲꓽ ꓒˍ ꓐꓰ ꓡꓯꓼ ꓪ ꓐꓱ ꓖꓶꓽ ꓢꓴ ꓣꓱꓽ ꓝꓲˍ ꓡ?꓾ ꓐꓯ ꓖꓶˍ ꓡꓳ꓿ꓬꓰ-ꓢꓴ ꓠꓬ ꓬꓲ ꓪꓽ ꓔꓯ꓾ ꓠꓲꓹ ꓦꓯꓸˍ ꓟ ꓮꓽ ꓙꓵ ꓔꓯ ꓧꓪꓸ ꓛꓲꓽ ꓐꓰ ꓤ ꓟꓳ꓿ ꓮ ꓡꓲꓳ ꓐꓯ ꓠꓬ ꓞꓳ ꓤ ꓠꓽ ꓬꓲ ꓖꓴꓽ ꓙꓴ ꓮꓽ ꓟꓬꓹ ꓙꓳˍ ꓟ ꓗꓪ ꓐꓰ ꓢꓯꓸ ꓔꓬ ꓟꓶˍ ꓟ ꓟꓽ ꓥ꓾ ꓐꓯˍ ꓡꓳ꓿
ꓬꓲ ꓠꓬ ꓔꓯ ꓥꓳꓽ ꓕꓲ ꓟ ꓣꓱꓽ ꓢꓲ ꓬꓲ ꓪꓽ ꓔꓯ꓾ ꓞꓳ ꓐꓳ ꓕꓲ ꓣꓳ ꓠꓬ ꓬꓲ ꓦꓻ ꓟꓲ ꓗꓪ ꓜ ꓪꓳꓽ ꓡꓳ ꓪꓳꓽ ꓮꓽ ꓟꓬꓹ ꓫ ꓟꓶˍ ꓡꓳ꓿ꓖꓳ ꓡꓱ ꓠꓬ ꓬꓲ ꓠꓽ꓾ ꓥꓪ ꓜꓽ ꓫꓵꓽ ꓜꓽ ꓙꓰꓽ ꓗꓶ ꓖꓴ ꓟꓽ ꓡꓳꓼ ꓠꓬꓲ ꓮ ꓡꓲ ꓬꓰ ꓢꓰ꓾ ꓐꓰ ꓓꓵꓽ ꓙˍ ꓡꓳ꓿ꓝꓮꓲ ꓬꓲ ꓡꓰ꓾ ꓥꓪ ꓠꓽ ꓕꓱ ꓡꓱ ꓬꓰˍ ꓥꓳ꓾ ꓥꓪ ꓜ ꓗꓹ ꓕꓱ ꓟꓬ ꓟ ꓒꓬꓹ ꓗꓷ ꓢꓲ ꓪ ꓜꓲ ꓪꓴꓽˍ ꓟ ꓜ ꓗꓹ ꓫꓬꓹ ꓢꓲ ꓠꓬꓲ꓾ ꓖꓳ ꓗꓪ ꓥꓪ ꓜꓽ ꓫꓵ ꓜ ꓙꓰˍ ꓐꓰ ꓖꓴꓽ ꓙꓴ ꓫ ꓗꓶ ꓔꓸ ꓥꓳ꓿ ꓖꓳ ꓗꓸ ꓠꓯꓸ ꓥꓪ ꓠꓬ ꓥꓪ ꓶꓻ ꓟꓬ ꓔꓯ꓾ ꓶꓻ ꓟꓬꓺꓳ꓾ ꓠꓴ ꓐꓱ ꓶ ꓮꓽ ꓟꓬꓹ ꓘꓳꓼ ꓣꓱꓽ ꓓꓴ ꓮꓽ ꓟꓬꓹ ꓫ ꓗꓶ ꓔꓸꓳ꓿ ꓖꓳ ꓡꓱ ꓠꓬꓲ ꓠꓴ ꓠꓬ ꓜꓽ ꓠꓬꓲ ꓓꓳꓻ ꓠꓬꓲ ꓠꓲꓹ ꓒꓴ ꓒꓴ ꓐꓰ ꓙꓳꓻ ꓢꓻ ꓔꓬ꓾ ꓐꓯ ꓖꓶˍ ꓥꓳ꓾ ꓐꓯˍ ꓡꓳ꓿
ꓖꓳ ꓡꓱ ꓥ ꓟꓲ ꓪꓴ-ꓢ ꓠꓽ ꓬꓲ ꓔꓯ꓾ ꓞꓳ ꓙꓲꓽꓳ꓾ ꓠꓬꓲꓸ ꓟꓶꓼ ꓘꓶꓼ ꓠꓴ ꓶꓻ ꓟꓬ ꓔꓯ ꓥꓪ ꓧꓪ ꓡ ꓥꓳ꓿ ꓖꓳ ꓡꓱ ꓠꓬ ꓠꓴ ꓡꓰ ꓙꓽ ꓖꓶ ꓔ ꓟ꓾ ꓮꓽ ꓟ ꓔꓯ ꓟ ꓗꓷ ꓡꓰˍ ꓥꓳ ꓪ?꓾ ꓐꓰ ꓐꓯ ꓖꓶˍ ꓡꓳ꓿ ꓚꓲꓸ ꓛꓬ ꓐꓱ ꓶˍ ꓡꓰꓽ ꓒꓵꓽ ꓶꓽ ꓫ ꓗꓶ ꓔꓸ ꓢꓲ꓾ ꓪꓴ-ꓢ ꓔꓯ ꓟꓳꓸ ꓟꓽ ꓐꓳ ꓟ ꓡꓽ ꓞꓳ ꓠꓬ ꓬꓲ ꓕꓱ ꓡꓱ ꓗꓹ ꓡꓳ꓾ ꓐꓯˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓚꓵ ꓚꓵ ꓣꓳ ꓐꓳ ꓶ ꓐꓯ ꓟ ꓮ ꓫꓵꓽ ꓥ ꓡ ꓐꓯ ꓟ ꓢꓲ ꓒ ꓬꓰ‐ꓢꓴ ꓫꓬꓽ ꓫꓬꓽ ꓡꓰꓽ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿ ꓢꓳꓚꓲꓮꓡ ꓟꓰꓓꓲꓮ ꓐꓰ ꓐꓯˍ ꓟ ꓟꓲ ꓠꓯ ꓕꓱ ꓟ ꓗꓪ ꓐꓰ ꓟꓳ. ꓖꓶ ꓡˍ ꓟ꓾ ꓲꓠꓔꓰꓣꓠꓰꓔ ꓗꓪ ꓐꓰ ꓣꓳ ꓔꓯ ꓟꓳ. ꓖꓶ ꓡˍ ꓟ ꓠꓬ ꓣꓳ ꓖꓴꓽ ꓙꓴꓽ ꓠꓬ ꓒꓴ ꓤ ꓫꓵ ꓤ ꓥ ꓡꓳ꓿ ꓠꓴ ꓒꓴ ꓮ ꓡꓲ ꓟꓬ ꓙꓳˍ ꓡ꓾ ꓠꓴ ꓫꓵꓺ ꓮ ꓡꓲ ꓟꓬ ꓙꓳˍ ꓡ꓾ ꓠꓴ ꓔꓯ ꓟꓵꓽ ꓮ ꓡꓲ ꓟꓬ ꓙꓳˍ ꓡ꓾ ꓠꓴ ꓠꓬ ꓟꓬꓱ ꓓꓳꓽ ꓮ ꓡꓲ ꓙꓳˍ ꓡ꓾ ꓠꓴ ꓠꓬ ꓢꓷ. ꓠꓲ, ꓮ ꓡꓲ ꓟꓬ ꓙꓳˍ ꓡ ꓐꓯ ꓟ ꓔꓯ ꓡꓰꓽ ꓖꓴꓽ ꓙꓴꓽ ꓥ꓿ ꓣꓳ ꓧꓪ ꓠ ꓗ, ꓡꓳ꓾ ꓣꓳ ꓢꓯꓼ ꓕꓵꓼ ꓠ ꓗ, ꓡꓳ ꓐꓯˍ ꓟ ꓣꓳ ꓔꓯ ꓟꓳ. ꓖꓶ ꓡˍ ꓡꓳ꓿
ꓕꓱ ꓟˍ ꓡꓰ ꓐꓰ ꓣꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓫ. ꓕꓱ ꓡꓯ ꓘꓳˍ ꓟ ꓗꓪ ꓥˍ ꓟꓲ ꓖꓳ ꓕꓲ ꓣꓳ ꓟ ꓠꓬ ꓒꓴ ꓫꓵ ꓙꓳ ꓢꓴ ꓥ ꓡꓳ꓿ ꓖꓳ ꓕꓲ ꓣꓳ ꓟ ꓠꓬ ꓟꓬꓱ ꓓꓳꓽ ꓙꓳ ꓢꓴ ꓥ ꓡꓳ꓾ ꓐꓯ ꓢꓲ ꓠꓬꓲ ꓖꓳ ꓡꓱ ꓫꓵꓽ ꓞꓳ ꓤ ꓔꓯ ꓡꓰꓽ ꓟꓳꓻˍ ꓠꓬ ꓣꓳ ꓠꓬ ꓬꓲ ꓪ ꓔꓯ ꓮ ꓟꓴ. ꓟꓴ ꓗꓪ ꓚꓬ, ꓔ ꓖꓶˍ ꓟ꓾ ꓡꓳ. ꓟꓳˍ ꓟ ꓕꓱ ꓡꓱ ꓫꓵꓽ ꓥˍ ꓟꓲ ꓙꓳˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲ ꓒꓴ ꓤ ꓫꓵꓺ ꓤ꓾ ꓟꓬꓱ ꓓꓳꓽ ꓕꓱ ꓟ ꓠꓬ ꓞꓳ ꓤ ꓐꓱ ꓶ ꓮ ꓘꓶ. ꓬꓳ. ꓚꓰꓽˍ ꓟ ꓡꓰ ꓐꓰ ꓗ, ꓡꓳ꓿ ꓖꓳ ꓡꓱ ꓠꓬꓲ ꓞꓳ ꓤ ꓠꓬ ꓮꓽ ꓟ ꓥˍ ꓟꓲ ꓖꓳ ꓟ ꓔꓯ ꓢꓯꓼ ꓕꓵꓼˍ ꓡꓳ꓿ ꓕꓲ ꓠꓬꓲ ꓕꓲ ꓠꓬꓲ ꓢꓯꓼ ꓕꓵꓼ꓾ ꓟꓳꓼ ꓡꓳ ꓢ ꓘꓪ ꓢꓯꓼ ꓕꓵꓼ ꓖꓳ ꓡꓱ ꓢꓯꓼ ꓕꓵꓼˍ ꓟ ꓑꓶ. ꓓꓴ ꓞꓳ ꓤ ꓠꓬ ꓮ ꓘꓶ. ꓪꓴꓽ ꓧꓶꓻˍ ꓟ ꓗꓷ ꓡꓰ ꓗꓴ.ˍ ꓡꓳ꓿
ꓖꓳ ꓡꓱ ꓠꓬꓲ ꓣꓳ ꓒꓵꓽ ꓶ ꓚꓵ ꓠꓬ ꓮ ꓫꓵꓽ ꓥ ꓡ ꓐꓯˍ ꓟ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓟꓳ. ꓖꓶ ꓡˍ ꓡꓳ꓿ ꓕꓱ ꓟ ꓠꓬ ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓣꓳ ꓵꓻ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓥ ꓡꓳ꓿ ꓣꓳ ꓐꓳ ꓶ ꓚꓵ ꓣꓳ ꓫꓵꓻˍ ꓕꓯ ꓣꓳ ꓐꓰ ꓕꓲ ꓡꓰ, ꓙꓰˍ ꓟ ꓠꓬ ꓣꓳ ꓟꓬ ꓢꓶꓽ ꓗꓪ ꓐꓰ ꓟꓳꓻ ꓟꓽ ꓓꓻ ꓟ ꓥ ꓡꓳ꓿ ꓣꓳ ꓟꓬ ꓢꓶꓽ ꓗꓪ ꓐꓰ ꓟꓳꓻ ꓓ, ꓟ ꓣꓳ ꓢꓯꓼ ꓩꓴ ꓔ ꓟ ꓢꓯꓼ ꓕꓵꓼ ꓔ ꓟ ꓠꓬ ꓕꓲ ꓠꓬꓲ ꓙꓳˍ ꓠꓬ ꓡꓳ ꓔ ꓠ ꓗ, ꓓꓴ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓬꓰ ꓔ ꓟ ꓢꓯꓼ ꓕꓵꓼ ꓔ ꓟ ꓙꓵꓻ ꓠꓲ, ꓠꓯꓸꓼ ꓘꓴꓽ ꓗꓪ ꓠꓵꓻ ꓠꓲ, ꓠꓯꓸꓼ ꓘꓴꓽ ꓗꓪ ꓢꓯꓼ ꓕꓵꓼ ꓔ ꓟ ꓠꓬ ꓣꓳ ꓡꓯꓼ ꓪꓻ ꓥ ꓡꓳ꓿
ꓖꓳ ꓡꓱ ꓠꓬꓲ ꓟꓽ ꓙꓵꓻ ꓢꓴ ꓐꓴ ꓠꓬ ꓞꓳ ꓤ ꓕꓲ ꓣꓳ ꓫꓵꓻ ꓕꓯ꓾ ꓬꓲ ꓗ ꓠꓯ. ꓢꓲ ꓗꓪ ꓮ ꓫꓵꓽ ꓗꓶ ꓔꓲ. ꓬꓰ ꓡ꓾ ꓒꓴ ꓫꓵ ꓮ ꓡꓲ ꓟꓬ ꓗꓶ ꓔꓲ. ꓬꓰ ꓡ ꓐꓯ ꓟ ꓔꓯ ꓡꓰꓽ ꓡꓳ. ꓠꓬꓲˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓙꓵꓻ ꓢꓴ ꓠꓬ ꓖꓳ ꓡꓱ ꓟꓽ ꓡꓳ. ꓠꓬꓲ꓿ ꓬꓲ ꓫꓵꓻˍ ꓕꓯ ꓬꓲ ꓐꓰ ꓮ ꓫꓵꓽ ꓔꓯ, ꓙꓰ ꓡ꓾ ꓬꓲ ꓠꓬ ꓟꓲ ꓠꓯ ꓕꓱ ꓟ ꓗꓪ ꓔꓬ ꓕꓯ ꓮ ꓡꓲ ꓫꓵꓽ ꓫꓱ. ꓤ ꓟꓬꓱꓽ ꓬꓰ ꓗꓷ ꓡ꓾ ꓬꓲ ꓔꓯ, ꓙꓰˍ ꓟ ꓠꓬ ꓮ ꓫꓵꓽ ꓥ ꓡ ꓐꓯˍ ꓟ ꓔꓯ ꓡꓰꓽ ꓣꓳ ꓡꓳ. ꓠꓬꓲ ꓠ ꓗ, ꓡꓳ꓿ ꓟꓽ ꓙꓵꓻ ꓢꓴ ꓡꓰ ꓐꓰ ꓗ ꓠꓯ. ꓢꓲ ꓗꓪ ꓖꓳ ꓟ ꓗꓶ ꓔꓲ. ꓕꓱ ꓟ ꓗꓶ ꓔꓲ. ꓬꓰˍ ꓟ ꓔꓯ ꓟꓽ ꓡꓳ. ꓠꓬꓲ ꓠꓬꓲ ꓐꓰ꓾ ꓬꓲ ꓫꓵꓻˍ ꓕꓯ ꓬꓲ ꓐꓰ ꓕꓲ ꓛꓳˍ ꓔꓯ, ꓙꓰ ꓟ ꓫꓱ. ꓤ ꓓꓴ ꓟꓬꓱꓽ꓾ ꓙꓵꓻ ꓠꓲ, ꓟꓬꓱꓽ ꓕꓱ ꓟ ꓔꓯˍ ꓡꓰꓽ ꓣꓳ ꓠꓬ ꓐꓳꓻ ꓶ ꓥ ꓐꓰ ꓐꓯ ꓠ ꓔ ꓡꓳ꓿
ꓖꓳ ꓡꓱ ꓠꓬꓲ ꓠꓴ ꓐꓳꓻ ꓶ ꓚꓵ ꓠꓬ ꓮ ꓫꓵꓽ ꓥ ꓡ ꓐꓰ ꓣꓳ ꓢꓷ. ꓠꓲ, ꓫꓵˍ ꓠꓬ ꓒꓴ ꓗꓪ ꓐꓰ ꓪꓴꓻ ꓪ ꓟꓽ ꓓꓻ ꓟ ꓔꓯ ꓠꓴ ꓵꓻ ꓠꓬꓲ꓿ ꓠꓴ ꓮ ꓡꓲ ꓘꓶ ꓛꓲ ꓐꓳˍ ꓡ ꓐꓯˍ ꓟ ꓔꓯ ꓠꓴ ꓢꓷ. ꓡˍ ꓥꓳ꓿ ꓠꓴ ꓤꓶꓻ ꓗꓪ ꓒꓴ ꓚꓳ. ꓪꓴꓻ ꓟꓶ ꓟꓽ ꓓꓻ ꓟ ꓐꓳꓻ ꓶ ꓮ ꓫꓵꓽ ꓙꓳˍ ꓡ ꓐꓯˍ ꓟ ꓠꓴ ꓫꓪ. ꓠꓬꓲ꓾ ꓠꓴ ꓓꓵꓽ ꓙꓽ ꓠꓬꓲ꓿ ꓖꓳ ꓡꓱ ꓠꓬ ꓠꓴ ꓐꓳꓻ ꓶ ꓮ ꓡꓲ ꓟꓬ ꓙꓳˍ ꓠꓴ ꓖꓴꓽ ꓙꓴꓽ ꓮ ꓡꓲ ꓟꓬ ꓙꓳˍ ꓐꓯˍ ꓟ ꓠꓴ ꓢꓷ. ꓡˍ ꓥꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓕꓯ ꓒꓴ ꓫꓵ ꓐꓯˍ ꓟ ꓠꓬ ꓣꓳ ꓢꓯꓼ ꓪ ꓐꓱ ꓶ ꓣꓱꓽ ꓞ, ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓒꓴ ꓫꓵꓺ ꓐꓱ ꓶ ꓣꓳ ꓠꓬ ꓚꓰꓼ ꓔ ꓟꓶˍ ꓟ ꓟꓽ ꓥ꓿ ꓜꓽ ꓓꓴ ꓖꓪꓽ ꓓꓴ ꓠꓬ ꓣꓳ ꓤꓶꓻ ꓐꓱ ꓶ ꓣꓱꓽ ꓞ, ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓕꓱ ꓟ ꓐꓱ ꓶ ꓣꓳ ꓠꓬ ꓚꓰꓼ ꓔ ꓟꓶˍ ꓟ ꓟꓽ ꓥ꓿ ꓣꓳ ꓠꓬ ꓟꓲ ꓠꓯ ꓕꓱ ꓟ ꓗꓪ ꓕꓲ ꓑ, ꓤ ꓔꓬ ꓟ ꓑꓶ. ꓓꓴ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓪꓴ‐ꓢ ꓔꓯ ꓥꓳ ꓡꓳ. ꓢꓲ ꓠꓬꓲ ꓞꓳ ꓙꓳ ꓡꓯ꓿ ꓟꓬꓽ ꓠꓬ ꓒꓴ ꓫꓵꓺ ꓔꓯ ꓡꓰꓽ ꓥꓳ ꓡꓳ. ꓢꓲ ꓠꓬꓲ ꓕꓽ ꓞꓳ ꓙꓳ꓿ ꓖꓳ ꓡꓱ ꓞꓳ ꓙꓳˍ ꓕꓯ ꓠꓬ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓐꓯˍ ꓟ ꓡꓰ ꓐꓰ ꓣꓳ ꓧꓪ ꓔ ꓟ ꓠꓬ ꓮꓽ ꓟ ꓐꓱ ꓶ ꓥ ꓡ ꓐꓰ ꓢꓲ ꓒ ꓬꓰ‐ꓢꓴ ꓐꓯˍ ꓟ ꓡꓰ ꓐꓰ ꓗꓷ ꓡꓰˍ ꓥꓳ꓿
ꓖꓳ ꓡꓱ ꓠꓬꓲ ꓫꓵꓻˍ ꓕꓯ ꓣꓳ ꓐꓰ ꓕꓲ ꓡꓰ, ꓔꓯ, ꓙꓰ ꓐ ꓡˍ ꓟ ꓙꓵꓻ ꓠꓲ, ꓟꓬꓱꓽ ꓠꓵꓻ ꓠꓲ, ꓟꓬꓱꓽ ꓣꓳ ꓢꓯꓼ ꓕꓵꓼ ꓙꓰ ꓡꓯ꓿ ꓫꓵꓻˍ ꓐꓯ ꓟ ꓠꓬ ꓠꓱ. ꓐꓯ ꓟꓽ ꓥ꓿ ꓣꓳ ꓧꓪ ꓔ ꓟ ꓢꓯꓼ ꓕꓵꓼ ꓔ ꓟ ꓖꓴꓽ ꓙꓴꓽ ꓔꓯ ꓡꓳ ꓒꓰ, ꓗꓷ ꓢꓲ ꓠꓬꓲ ꓣꓳ ꓖꓶ ꓔ ꓟ ꓡꓯꓼ ꓫꓴ ꓔꓯ ꓝꓮꓲ ꓕꓲ ꓧꓪ, ꓘꓳ ꓣꓴˍ ꓟ ꓦꓬꓼ ꓠꓬꓲ ꓥ ꓡꓳ꓿ ꓣꓳ ꓣꓴ ꓔ ꓟ ꓔꓯ ꓡꓳ ꓒꓰ, ꓗꓷ ꓣꓳ ꓖꓶ ꓔ ꓟ ꓔꓯ ꓔꓯ, ꓙꓰˍ ꓟ ꓦꓬꓼ ꓠꓬꓲ ꓥ ꓡꓳ꓿ ꓣꓳ ꓣꓴ ꓔ ꓟ ꓔꓯ ꓡꓳ ꓒꓰ, ꓗꓷ꓾ ꓣꓳ ꓖꓶ ꓔ ꓟ ꓔꓯ ꓔꓯ, ꓙꓰˍ ꓟ ꓦꓬꓼ ꓠꓬꓲ ꓠꓬ ꓫꓵꓻˍ ꓟ ꓦꓬꓼ ꓠꓬꓲ ꓥ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓯ. ꓓ, ꓟ ꓦꓬꓼ ꓠꓬꓲ ꓗꓪ ꓟꓬꓽ ꓠꓬꓲ ꓠꓵꓻ ꓠꓲ, ꓖꓶ ꓢꓲ ꓠꓬꓲ ꓪꓴ‐ꓢ ꓠꓯꓸꓼ ꓘꓴꓽ ꓗꓪ ꓞꓳ ꓙꓳ ꓡꓯ ꓐꓰ ꓮ ꓙꓵꓽ ꓢꓴ ꓔꓯ ꓬꓲꓼ ꓠꓬꓲ. ꓖꓶ ꓠꓲ, ꓫꓵˍ ꓡꓳ꓿
