7 ꓦ (28)ꓠꓬꓲ ꓗꓪ ꓐꓰ 8 ꓦ (3)ꓠꓬꓲ ꓗꓪ ꓛꓲ ꓬꓰˍ ꓟ ꓞꓳ ꓡꓱ ꓙꓴꓐꓲꓡꓰꓰ ꓑꓮꓲꓽ ꓐꓰ ꓗꓴ. ꓙꓲꓽ ꓙꓳ ꓢꓲ꓾ ꓶꓼ ꓓꓳꓽ ꓫꓱ, ꓓꓳꓽ ꓟꓬꓱꓽ ꓬꓰˍ ꓟ ꓔꓲꓺ ꓒ ꓪ ꓔꓲ. ꓬꓳ, ꓗꓪ ꓙꓵꓽ ꓪ ꓙꓳ ꓢꓴ ꓥ ꓟ ꓔꓲꓺ ꓒ ꓓꓽ Rino Fisichella ꓡꓰ꓾ ꓟꓵꓽ ꓗꓳ, ꓓꓵ ꓓꓵ ꓗꓪ ꓐꓰ ꓡꓲꓽ ꓒꓰꓼ ꓮ ꓙꓵꓽ ꓐꓰ ꓟꓽ ꓫꓱ. ꓡꓯ ꓘꓳ ꓟ ꓟꓳ. ꓖꓶ ꓓꓴ ꓐꓴ ꓠꓬ ꓙꓴꓐꓲꓡꓰꓰ ꓕꓱ ꓟ ꓔꓯ ꓪ ꓜꓲ ꓐꓲꓻ ꓡꓰ ꓝꓲˍ ꓥꓳ꓾ ꓐꓰ ꓐꓯˍ ꓡꓳ꓿

ꓟꓵꓽ ꓗꓳ, ꓓꓵ ꓓꓵ ꓗꓪ ꓟ ꓞꓳ ꓡꓱ ꓐꓴ ꓠꓬ ꓑꓮꓲꓽ ꓕꓱ ꓟ ꓗꓪ ꓛꓲ ꓡˍ ꓥꓳ꓿

(146) ꓗꓴꓷꓼ ꓗꓪ ꓟ ꓞꓳ ꓡꓱ ꓬꓲ ꓛꓲꓺ ꓐꓴ ꓑꓮꓲꓽ ꓕꓱ ꓟ ꓗꓪ ꓡ ꓓꓴ ꓥ ꓢꓲ ꓠꓬꓲ 78% ꓠꓬ ꓰꓴꓣꓳꓑꓰ ꓗꓴꓷꓼ ꓐꓴ ꓗꓪ ꓐꓰ ꓥ ꓢꓲ ꓠꓬꓲ꓾ 22% ꓠꓬ ꓠꓱ. ꓐꓯ ꓗꓴꓷꓼ ꓐꓴ ꓗꓪ ꓐꓰ ꓡˍ ꓟ ꓞꓳ ꓡꓱ ꓐꓴ ꓥ ꓡꓳ꓿ ꓗꓴꓷꓼ ꓟꓽ ꓢꓲ ꓡꓲ ꓟ ꓲꓣꓮQ꓾ ꓖꓴ ꓟꓶ. ꓢꓴ‐ꓓꓮꓠ ꓐꓰ ꓡꓰ‐ꓐꓯ‐ꓠꓷ ꓗꓴꓷꓼ ꓐꓴ ꓗꓪ ꓟ ꓞꓳ ꓡꓱ ꓐꓴ ꓥˍ ꓟꓲ ꓡ ꓓꓴ ꓥꓳ꓿

ꓑꓮꓲꓽ ꓕꓱ ꓟ ꓬꓰˍ ꓟ ꓗ, ꓛꓲꓽ ꓪˍ ꓟ ꓬꓲ ꓙꓵ, ꓠꓬ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓐꓰ ꓛꓲ ꓡˍ ꓟ ꓞꓳ ꓡꓱ ꓮ ꓙꓵꓽ ꓔꓯ ꓪꓳꓻ ꓫꓳ. ꓖꓶˍ ꓟ ꓔꓯ ꓖꓴ ꓟꓳ. ꓖꓶ ꓠ, ꓟ ꓔꓶ ꓙꓱꓼ ꓬꓰˍ ꓟ ꓥ ꓢꓲ ꓠꓬꓲ꓾ ꓢꓲ ꓡꓲ ꓟ ꓬꓲ ꓙꓵ, ꓔꓯ ꓫꓬ, ꓠ, ꓟ ꓐꓰ ꓟꓲ ꓠꓯ ꓢꓲ ꓡꓲ ꓟ ꓔꓯ ꓫꓬ, ꓜꓶˍ ꓟ ꓛꓲ ꓦꓽ ꓕꓲ ꓦꓲꓽ ꓔꓯ ꓔꓯꓺ ꓔ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓓꓽ Fisichella ꓡꓰ ꓐꓯ ꓗꓷꓳ꓿

7 ꓦ (28)ꓠꓬꓲ ꓗꓪ ꓞꓳ ꓡꓱ 5 ꓫꓬ, ꓛꓲ ꓛꓲ ꓡ ꓠ, ꓟ ꓥꓳ ꓡꓳ. ꓔ ꓟ꓾ ꓙꓴꓐꓲꓡꓰꓰ ꓑꓮꓲꓽ ꓗꓪ ꓡˍ ꓟ ꓞꓳ ꓡꓱ ꓬꓲ ꓜꓴ ꓬꓲ ꓟꓯꓼ ꓐꓱ ꓶ ꓡꓳ ꓒꓱ ꓘꓴꓽ ꓗꓪ ꓙꓳˍ ꓟ ꓪꓽ ꓘꓴ ꓦꓲꓻ 320 ꓦꓲꓻ꓾ ꓢꓷ. ꓠꓲ, ꓕꓳꓽ ꓶ ꓢꓳ ꓦꓲ 400 ꓐꓰ ꓖꓬꓟꓢ꓾ ꓞꓳ ꓦꓲꓻ ꓕꓲ ꓐꓱ ꓥˍ ꓟꓲ ꓞꓳ ꓡꓱ ꓐꓴ ꓐꓱ ꓶ ꓔꓬ ꓖꓴ ꓖꓶꓽ ꓓꓴ ꓥꓳ꓿

ꓑꓮꓲꓽ ꓔꓯ ꓙꓽ ꓖꓶ ꓔꓬ ꓟ ꓗꓪ ꓙꓵꓽ ꓢꓴ ꓟꓴ ꓢꓴ ꓐꓴ ꓥˍ ꓟꓲ ꓞꓳ ꓡꓱ ꓐꓴ ꓐꓱ ꓶ ꓔꓬ ꓖꓴ ꓠꓽ ꓖꓴ ꓖꓶ ꓠ, ꓟ ꓐꓰ ꓜꓽ ꓓꓴ ꓓꓳꓻ ꓓꓴ ꓐꓱ ꓶ ꓙꓽ ꓖꓶ ꓔꓬ ꓟ꓾ ꓡꓳ ꓒꓱ ꓘꓴꓽ ꓗꓪ ꓜꓽ ꓓꓴ ꓐꓱꓻ ꓖꓶ ꓔꓶ. 20 ꓟ꓾ ꓞꓳ ꓡꓱ ꓐꓴ ꓐꓱ ꓶ ꓟꓳꓼ ꓡꓳ ꓜꓻ ꓐꓰ ꓟꓶꓽ ꓘꓶꓽ ꓜꓻ ꓐꓱ ꓶ ꓞꓳ ꓤ ꓟꓬꓱ ꓖꓶ ꓐ ꓡ ꓠ, ꓟ꓾ ꓗ ꓧꓳ. ꓪꓴꓽ ꓖꓴ (ꓙꓴ. ꓔꓲ ꓦꓲꓻ) ꓐꓰ ꓔ, ꓢꓲ ꓬꓲ ꓖꓻ 3500 ꓖꓻ ꓙꓽ ꓖꓶ ꓔ ꓟ꓾ ꓠꓯꓼ ꓠꓯꓼ ꓜꓻ ꓔꓯ ꓠꓬ ꓚꓲ. ꓛꓬ ꓔꓬ ꓟ ꓦꓲꓻ ꓗꓪ ꓔꓯ, ꓖꓶ ꓓꓴ ꓥꓳ꓾ ꓐꓰ ꓐꓯˍ ꓟ꓾

ꓕꓲ ꓫꓵꓽ ꓠꓽ ꓟꓶ ꓫꓵˍ ꓟ ꓙꓴꓐꓲꓡꓰꓰ ꓑꓮꓲꓽ ꓗꓪ ꓡꓳ ꓒꓱ ꓘꓴꓽ ꓗꓪ ꓚꓳꓻ ꓙꓰ ꓢꓲ ꓢꓳ ꓣꓴˍ ꓟ ꓐꓰ꓾ ꓞꓳ ꓡꓱ ꓐꓴ ꓬꓰˍ ꓟ ꓬꓲ ꓙꓵ, (70) ꓟ ꓐꓱ ꓶ (3) ꓠꓬꓲ ꓣꓳ‐ꓟ ꓡꓳ ꓒꓱ ꓗꓪ ꓬꓰ ꓓꓴ ꓥꓳ꓿

ꓡꓳ, ꓬꓰˍ ꓟ ꓕꓲ ꓠꓬꓲ ꓗꓪ ꓐꓰ ꓞꓳ ꓡꓱ ꓐꓴ ꓔꓯ ꓘꓳ ꓣꓴˍ ꓟ ꓟꓲ‐ꓢ ꓔꓯ ꓦꓮꓔꓲꓚꓮꓠ St. Peter Square ꓗꓪ ꓟꓶꓽ ꓘꓶꓽ 7ꓽ00 ꓙꓵ, ꓕꓯ ꓬꓰ ꓓꓴ ꓥ ꓢꓲ ꓠꓬꓲ꓾ 8 ꓦ 1 ꓠꓬꓲ ꓠꓽ‐ꓥꓪꓽ‐ꓠꓬꓲ ꓕꓯ ꓠꓬ ꓞꓳ ꓡꓱ ꓐꓴ ꓝꓴꓲ. ꓣꓷꓠ. ꓟꓶ ꓠ, ꓟ ꓐꓱ ꓶ ꓔꓲꓺ ꓒ 200 ꓣꓳ ꓐꓴ ꓥˍ ꓟꓲ ꓬꓰ ꓙ ꓓꓴ ꓥ ꓢꓲ꓾ 8 ꓦ 2 ꓠꓬꓲ ꓞꓳ ꓡꓱ ꓐꓴ ꓑꓮꓲꓽ ꓓꓽ ꓟ ꓔꓯ 2000 ꓘꓳꓼ ꓕꓯ ꓞꓳ ꓡꓱ ꓑꓮꓲꓽ ꓬꓰ ꓗꓷ ꓟ Tor Vergata ꓗꓪ ꓑꓮꓲꓽ ꓬꓰ ꓓꓴ ꓥ ꓡꓳ꓿ ꓑꓮꓲꓽ ꓖꓳ ꓟ ꓗꓪ ꓔꓲꓺ ꓒ ꓪ ꓔꓲ. ꓡꓰꓳ(14) ꓬꓲ ꓚꓲ. ꓛꓬ ꓡꓰ ꓞꓳ ꓡꓱ ꓬꓲ ꓜꓴ ꓬꓲ ꓟꓯꓼ ꓐꓰ ꓕꓲꓽ ꓪˍ ꓪꓽ ꓘꓴˍ ꓟ ꓗꓪ ꓐ ꓓꓴ ꓥ ꓢꓲ ꓟꓮꓫꓲꓚꓳ꓾ ꓴꓢ ꓐꓰ ꓲ‐ꓔ‐ꓡꓲ ꓗꓴꓷꓼ ꓐꓴ ꓗꓪ ꓟ ꓞꓳ ꓡꓱ 3 ꓣꓳ ꓗꓪ ꓐꓰ ꓔꓲꓺ ꓒ ꓪ ꓔꓲ. ꓔꓯ ꓠꓺ ꓠꓬꓲ ꓘꓶꓽ ꓠꓺ ꓠꓬꓲ ꓓꓴ ꓥꓳ꓿

ꓞꓳ ꓡꓱ ꓙꓴꓐꓲꓡꓰꓰ ꓡꓳ, ꓬꓰˍ ꓟ ꓟꓲ‐ꓢ ꓔꓯ ꓔꓲꓺ ꓒ ꓪ ꓔꓲ. ꓡꓰꓳ (14) ꓡꓰ 8 ꓦ 3 ꓠꓬꓲ ꓕꓯ ꓧꓳꓽ ꓪꓴ. ꓟꓳ ꓢꓲ ꓟꓲ‐ꓢ ꓪꓽ ꓘꓴˍ ꓥꓳ꓾ ꓐꓰ ꓦꓮꓔꓲꓚꓮꓠ ꓓꓳꓽ ꓐꓯ ꓒꓬꓱ ꓔꓶ. ꓗꓪ ꓐꓯ ꓔ ꓡꓳ꓿

News – Vatican News