ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓕꓲ ꓠꓽ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓘꓳ ꓣꓴˍ ꓟ ꓟ‐ꓕ ꓐꓰ ꓟ‐ꓡꓲ ꓚꓱ, ꓔꓯ ꓠ ꓠ, ꓓꓴ ꓬꓰ ꓡꓯ꓿ ꓬꓲ ꓪ ꓠꓬꓲꓽ ꓫꓵ. ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓮ ꓡꓲ ꓐꓰ ꓘꓳ ꓣꓴ ꓢꓲ ꓠꓬꓲ ꓬꓲ ꓪ ꓘꓴꓽ ꓠꓯꓸꓼ ꓗꓪ ꓮ ꓡꓲ ꓐꓰ ꓞꓳ ꓙꓳ ꓔꓬ ꓡ꓾ ꓣꓳ ꓠ ꓠ, ꓓꓴ ꓬꓰ ꓡꓯ꓿ ꓟ. ꓟꓲꓽ ꓔꓯ ꓣꓳꓽ ꓠ ꓠ, ꓓꓴ ꓬꓰ ꓡꓯ꓿
Lꓴ‐ꓘ 10ꓽ38‐42 ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓘꓹ ꓕꓲ ꓘꓹ ꓗꓪ ꓫꓱꓽ ꓛꓲ ꓬꓰˍ ꓡꓳ꓿ ꓖꓳ ꓗꓪ꓾ ꓟ-ꓕ ꓟꓬꓱ ꓔ ꓟ ꓤ ꓟꓶ ꓤ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ ꓬꓲ ꓦꓲ ꓗꓪ ꓘꓳꓻ ꓣꓴˍ ꓡꓳ꓿ꓟ-ꓕ ꓬꓲ ꓠꓬꓲ ꓟ꓾ ꓟ-ꓡꓲ꓾ ꓟꓬꓱ ꓔ ꓢꓴ ꓕꓲ ꓣꓳ ꓠꓬ ꓬꓰ-ꓢꓴ ꓟꓲꓽ ꓙꓬ ꓢꓲ ꓗꓪ ꓠꓬꓲꓸ ꓠꓸ ꓢꓲ ꓬꓲ ꓐꓯ ꓘꓶꓽ ꓔꓯ ꓠ ꓠꓹ ꓡꓳ꓿ꓖꓳ ꓡꓱ ꓥ ꓟꓲ ꓟ-ꓕ ꓠꓽ ꓟꓬꓱꓽ ꓟꓬꓽˍ ꓟ ꓗꓪ ꓐꓰ ꓠꓲꓹ ꓟ ꓢꓴꓺ ꓔꓴ ꓡ ꓠꓬꓲ ꓬꓰ-ꓢꓴ ꓔꓯ ꓡ ꓢꓲ꓾ ꓢꓲ ꓒꓽꓳ꓾ ꓥꓪ ꓠꓬꓲ ꓟ ꓠꓬ ꓥꓪ ꓕꓲ ꓣꓳ ꓔꓯˍ ꓡꓰ ꓣꓱꓽ ꓙ ꓟꓬꓱꓽ ꓣꓱꓽ ꓔꓬ ꓝꓲˍ ꓟ꓾ ꓠꓴꓻ ꓥꓪ ꓔꓯ ꓟꓽ ꓫꓱꓸ ꓤˍ ꓡ? ꓬꓲ ꓥꓪ ꓔꓯ ꓬꓰ ꓙ ꓡ ꓠꓹ ꓟ ꓐꓯ ꓖꓶ꓾ ꓐꓯˍ ꓡꓳ꓿ꓢꓲ ꓒꓽ ꓠꓽ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓟ-ꓕꓺꓳ꓾ ꓟ-ꓕꓺꓳ꓾ ꓠꓴ ꓠꓬ ꓟꓬꓱꓽ ꓮꓽ ꓟꓬꓹ ꓫꓵꓽ ꓟ ꓪꓴꓸ ꓠꓬꓲ ꓙꓽ ꓫꓸ ꓔꓬ ꓐꓷ꓿ꓖꓳ ꓡꓱ ꓥ ꓟꓲ ꓟꓽ ꓙꓳ ꓟꓽ ꓓ ꓟ ꓠꓽ ꓕꓲ ꓫꓵꓽˍ ꓡꓰ ꓙꓳˍ ꓡꓳ꓿ ꓟ-ꓡꓲ ꓠꓬ ꓟꓬꓽ ꓠꓬꓲ ꓙꓲˍ ꓟ ꓖꓳ ꓕꓲ ꓐꓱꓻ ꓔꓯ ꓢꓲ ꓣꓴ ꓗꓷ ꓠꓬꓲ꓾ ꓬꓲ ꓔꓯˍ ꓐꓰ ꓣꓴ ꓔꓯꓹ ꓙꓰ ꓟꓽ ꓓ꓾ ꓐꓯ ꓖꓶˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓐꓰ ꓬꓲ ꓛꓳꓽ ꓒꓯ, ꓐꓴ ꓔꓯ ꓟ‐ꓕ ꓠꓬ ꓘꓳ ꓣꓴˍ ꓡꓳ꓾ ꓐꓰ ꓐꓳ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓔꓯ ꓘꓳ ꓣꓴ ꓢꓴ꓾ ꓬꓲ ꓔꓯ ꓛꓵ ꓢꓴ ꓮ ꓙꓵꓽ ꓔꓯ ꓠꓬ ꓬꓲ ꓪꓴ ꓓꓵꓽ ꓬꓰˍ ꓡꓳ꓿ ꓬꓲ ꓚꓲ. ꓛꓬ ꓖꓳ ꓗꓪ ꓛꓲ ꓬꓰˍ ꓡꓳ꓿ ꓟ‐ꓕ ꓠꓬ ꓬꓲ ꓔꓯ ꓘꓳ ꓣꓴˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓕꓲ ꓟꓵꓽ ꓕꓲ ꓟꓵꓽ ꓙꓰ ꓢꓲ ꓠꓬꓲ ꓟ. ꓟꓲꓽ ꓚ ꓖꓶˍ ꓡꓳ꓿ ꓠꓻ ꓫꓬ, ꓖꓶˍ ꓡꓳ꓿ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓖꓶˍ ꓡꓳ꓿ ꓣꓱꓽ ꓛꓰꓽ ꓖꓶˍ ꓡꓳ꓿
ꓖꓳ ꓡꓱ ꓠꓬꓲ ꓟ. ꓟꓲꓽ ꓬꓲ ꓪꓴ. ꓕꓲ ꓔꓳ. ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓚꓵ ꓚꓵ ꓘꓳ ꓣꓴ ꓢꓴ ꓠꓬ꓾ ꓢꓲ ꓒ ꓬꓰ‐ꓢꓴ ꓬꓲ ꓑꓰ, ꓬꓲ ꓪ ꓐꓰ ꓔꓬ ꓡˍ ꓡꓳ꓾ ꓐꓯ ꓟ ꓣꓳ ꓢꓷ. ꓪˍ ꓡꓳ꓿ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓥ ꓟꓲ ꓣꓳ ꓢꓲ ꓒ ꓬꓰ‐ꓢꓴ ꓔꓯ ꓘꓳ ꓣꓴˍ ꓕꓯ ꓣꓳ ꓬꓲ ꓔꓯ ꓮ ꓟꓲ. ꓡꓯ ꓐꓰ ꓘꓴˍ ꓕꓯ ꓬꓲ ꓠꓬ ꓓꓽ ꓔꓳ, ꓡꓳ꓿ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓓꓵꓽ ꓡꓯ꓾ ꓣꓳ ꓦꓲ ꓘꓴꓽ ꓗꓪ ꓓꓵꓽ ꓡꓯ꓾ ꓣꓳ ꓪꓴ. ꓓꓵ ꓣꓱꓽ ꓡꓯ꓾ ꓦꓲ ꓘꓴꓽ ꓠꓯꓸꓼ ꓗꓪ ꓠꓴ ꓡꓰ ꓠꓬꓲ ꓙ ꓡꓳ. ꓙ ꓡꓯ ꓐꓰ ꓬꓲ ꓔꓯ ꓘꓴˍ ꓠꓬ ꓬꓲ ꓠꓬ ꓬꓲ ꓑꓰ, ꓡˍ ꓥꓳ꓾ ꓐꓰ ꓣꓳ ꓔꓯ ꓢꓷ. ꓝꓲˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓟ‐ꓕ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓘꓳ ꓣꓴ ꓗꓷ ꓗ ꓠꓯ. ꓬꓲ ꓠꓬ ꓟꓬꓱꓽ ꓟꓬꓽ ꓔꓬ ꓡꓳ꓿ ꓪꓰ ꓤ ꓔꓯ ꓡꓳ ꓔ ꓢꓲ ꓠꓬꓲ ꓬꓲ ꓠꓬ ꓟꓬꓱꓽ ꓟꓬꓽ ꓔꓬ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓬꓲ ꓔꓯ ꓐꓯ ꓟꓳ. ꓖꓶˍ ꓟ ꓢꓲꓽ ꓫꓬ ꓕꓳꓽ ꓶ ꓣꓳ ꓑ ꓙꓽˍ ꓡꓳ꓿ ꓕꓲ ꓖ ꓕꓲ ꓧꓪ, ꓣꓳ ꓠꓬ ꓣꓳ ꓦꓲꓻ ꓘꓴꓽ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓘꓴꓻ ꓧꓳꓽ ꓔ ꓥˍ ꓟꓲ꓾ ꓣꓳ ꓦꓲꓻ ꓘꓴꓽ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓮ ꓟꓲ. ꓡꓯ ꓐꓰ ꓐꓯ ꓔ ꓥˍ ꓟꓲ ꓣꓳ ꓠꓬ ꓪꓰ ꓤ ꓥ ꓟ ꓢꓲ ꓒ ꓬꓰ‐ꓢꓴ ꓔꓯ ꓡꓳ ꓔ ꓢꓲ ꓠꓬꓲ ꓬꓲ ꓐꓰ ꓟꓽ ꓫ. ꓕꓱ ꓕꓱ ꓣꓳ ꓠꓬ ꓟꓬꓱꓽ ꓟꓬꓽ ꓔꓬ ꓡꓳ꓿
ꓕꓲ ꓠꓬꓲ ꓕꓲ ꓠꓬꓲ ꓣꓳ ꓢꓲ ꓒ ꓔꓯ ꓠꓲ, ꓠꓵˍ ꓡꓳ꓾ ꓬꓲ ꓔꓯ ꓙꓵꓻˍ ꓡꓳ꓾ ꓣꓳ ꓦꓲꓻ ꓠꓯꓸꓼ ꓘꓴꓽ ꓗꓪ ꓣꓳ ꓠꓲ, ꓟ ꓠꓯꓸꓼ ꓗꓪ ꓬꓲ ꓔꓬ ꓡꓳ ꓐꓰ ꓣꓳ ꓐꓯˍ ꓥ ꓟꓲ ꓬꓲ ꓔꓯ ꓘꓴꓻ ꓔ ꓥˍ ꓟꓲ ꓣꓳꓽ ꓠꓬ꓾ ꓣꓳ ꓬꓰ ꓙꓲꓽ ꓙꓳˍ ꓟ ꓟꓬꓱꓽ ꓔꓯ ꓣꓳ ꓬꓰ꓾ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓙꓳꓺ ꓓꓴ ꓛꓱꓽ ꓓꓴ ꓕꓱ ꓟ ꓔꓯ ꓡꓰꓽ ꓣꓳ ꓟꓬꓱꓽ ꓟꓬꓽ ꓔꓬ ꓕꓯ ꓠꓬ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ꓿ ꓟ‐ꓕꓺꓳ꓾ ꓟ‐ꓕꓺꓳ꓾ ꓐꓰ ꓐꓯˍ ꓟ ꓡꓰ ꓐꓰ ꓠꓴ ꓐꓰ ꓥꓪ ꓔꓯ ꓬꓲ ꓟꓬꓱ ꓘꓴꓻ ꓢꓲ ꓠꓬꓲ꓾ ꓠꓴ ꓠꓬ ꓖꓴꓽ ꓙꓴ ꓕꓱ ꓟ ꓔꓯ ꓪ ꓜꓲ ꓠꓲ, ꓟ ꓪꓴꓽ ꓔꓬ ꓡꓳ꓾ ꓐꓰ ꓐꓯ ꓖꓶ ꓡ ꓔꓬ ꓟ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓥ ꓡꓳ꓿
ꓖꓳ ꓡꓱ ꓠꓬꓲ ꓣꓳ ꓠꓬ ꓮ ꓡꓲ ꓬꓰ ꓠ ꓔ ꓡ꓿ ꓥ ꓡꓳ꓿ ꓟ‐ꓕ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓐꓰ ꓬꓲ ꓛꓳꓽ ꓒꓯ, ꓐꓴ ꓜꓽ ꓓꓴ ꓓꓳꓻ ꓓꓴ ꓬꓲ ꓢꓯꓼ ꓕꓵꓼ ꓔꓬ ꓡꓳ꓾ ꓚꓵ. ꓬꓲꓻ ꓓꓳ ꓔꓬ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓟ‐ꓡꓲ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓛꓲ ꓔꓲ ꓗꓪ ꓠꓬꓲ ꓠ. ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓠ ꓠ, ꓔꓬ ꓡꓳ꓿ ꓚꓵ ꓚꓵ ꓐꓯ ꓠꓬ ꓟ‐ꓡꓲ ꓥˍ ꓟꓲ ꓬꓲ ꓟꓬꓱꓽ ꓬꓰ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓐ ꓡˍ ꓡꓳ꓿ ꓔꓯ ꓥꓳꓽ ꓐꓯˍ ꓠꓬ ꓟ‐ꓡꓲ ꓠ ꓠ, ꓔꓬ ꓟ ꓔꓯ ꓬꓲ ꓥˍ ꓟꓲ ꓕꓲ ꓑꓶ. ꓕꓲ ꓡꓯꓼ ꓗꓪ ꓐꓰ ꓠ ꓠ, ꓢꓲ ꓠꓬꓲ ꓟꓬꓱꓽ ꓬꓰ ꓙꓲˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲꓺ ꓬꓲ ꓟꓬꓱꓽ ꓬꓰˍ ꓟ ꓔꓯ ꓕꓲ ꓝꓲ. ꓤ ꓠꓽ ꓔ ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓐꓰ ꓫ. ꓕꓱ ꓢꓲ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓠ ꓠ, ꓢꓲ ꓠꓬꓲ꓾ ꓪꓴ‐ꓢ ꓐꓯ ꓘꓶꓽ ꓧꓶ. ꓕꓯ ꓠ ꓠ, ꓓꓳ ꓡꓰ ꓗ ꓠꓯ. ꓕꓯ ꓡꓰꓽ ꓟꓬꓱꓽ ꓬꓰˍ ꓠꓬ ꓪ ꓜꓲ ꓙꓲˍ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓕꓱ ꓟ ꓔꓯ ꓠꓲ, ꓫꓵˍ ꓡꓳ꓿
ꓖꓳ ꓡꓱ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬˍ ꓟ ꓠꓬ ꓣꓳ ꓮ ꓫꓵꓽ ꓬꓰˍ ꓥ ꓟꓲ ꓪꓴ‐ꓢ ꓐꓯ ꓘꓶꓽ ꓧꓶ. ꓕꓯ ꓠ ꓠ,꓿ ꓪꓴ‐ꓢ ꓔꓯ ꓧꓶ. ꓕꓯ ꓙꓵꓻ꓿ ꓮ ꓫꓵꓽ ꓬꓰˍ ꓥ ꓟꓲ ꓪꓴ‐ꓢ ꓔꓯ ꓬꓲ ꓪꓴ. ꓓꓵ ꓗꓷ ꓢꓲ ꓬꓰˍ ꓥꓳ ꓐꓯˍ ꓠꓬ ꓙꓲꓻˍ ꓥꓳ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ꓿ ꓣꓳ ꓤꓶꓻ ꓗꓪ ꓟ‐ꓕˍ ꓡꓰ ꓐꓰ ꓟꓬꓱꓽ ꓬꓰ ꓙꓵ, ꓥˍ ꓟꓲ ꓙꓳˍ ꓡꓳ꓿ ꓟ‐ꓡꓲˍ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓛꓲ ꓔꓲ ꓗꓪ ꓠ ꓠ, ꓢꓲ ꓠꓬꓲ ꓪꓴ‐ꓢ ꓟꓷꓽ ꓠꓷ, ꓘꓶꓽ ꓗꓪ ꓐꓰ ꓓꓳ ꓡˍ ꓟ ꓐꓯ ꓘꓶꓽ ꓔꓯ ꓠ ꓠ, ꓪˍ ꓟ ꓬꓲ ꓝꓲ. ꓥˍ ꓟꓲ ꓙꓳ ꓡˍ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓮ ꓡꓲ ꓕꓲ ꓛꓱꓽ ꓗꓪ ꓥ ꓟꓲ ꓕꓲ ꓛꓱꓽ ꓤ ꓟꓽ ꓗꓷ ꓡꓰ ꓡꓰ ꓐꓰ꓾ prayer and work ꓐꓯˍ ꓟ ꓪꓽ ꓘꓴˍ ꓟ ꓐꓰ ꓟꓬꓱꓽ ꓬꓰˍ ꓟ꓾ ꓕꓲ ꓑꓶ. ꓕꓲ ꓡꓯꓼ ꓪꓽˍ ꓟꓲ ꓘꓴ ꓟꓬꓱꓽˍ ꓟꓲ ꓬꓰ꓾ ꓕꓱ ꓡꓱ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓟ ꓥ ꓡꓳ꓿ ꓠꓬ, ꓤ ꓠꓬ ꓓꓵꓻ ꓡꓯꓼ ꓠꓬꓲꓽ ꓟ ꓡꓰ ꓟꓴꓽ ꓗꓪ ꓗꓪ ꓐꓬꓱ ꓓꓯ ꓙꓰˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓪꓽ ꓘꓴˍ ꓟ ꓐꓰ ꓟꓬꓱꓽ ꓬꓰˍ ꓟ ꓕꓱ ꓠꓬꓲꓽ ꓫꓵꓽ ꓗꓪ ꓐꓰ ꓐꓲ ꓜꓲꓼˍ ꓟ ꓞꓳ ꓤ ꓒꓬꓱꓼ ꓡˍ ꓡꓳ꓿ ꓙꓵꓻ ꓠꓲ, ꓗꓪ ꓐꓰ ꓣꓳ ꓛꓳ ꓫꓱꓽˍ ꓕꓯ ꓪꓴ‐ꓢ ꓠꓯꓸꓼ ꓗꓪ ꓐꓰ ꓣꓳ ꓞꓳ ꓙꓳ ꓐ ꓡˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓘꓳ ꓣꓴ ꓗꓷ ꓗ ꓠꓯ.꓾ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓠꓲ, ꓟ ꓠꓯꓸꓼ ꓗꓪ ꓓꓵꓽ ꓡꓯ ꓐꓰ ꓣꓳ ꓐꓯ ꓗꓷ ꓗ ꓠꓯ. ꓬꓲ ꓐꓰ ꓫ. ꓕꓱˍ ꓟ꓾ ꓬꓲ ꓔꓯ ꓬꓲ ꓙꓵ, ꓖꓶˍ ꓟ ꓣꓳ ꓬꓰ ꓡꓯ꓿ ꓖꓳ ꓡꓱ ꓬꓰˍ ꓠꓬ ꓪꓴ‐ꓢ ꓣꓳ ꓔꓯ ꓶꓼ ꓥꓳꓽ ꓙꓱꓽ ꓖꓶ ꓡˍ ꓥꓳ꓿ ꓢꓲ ꓒ ꓬꓰ‐ꓢꓴ ꓐꓯ ꓔ ꓟ ꓡꓰ ꓐꓰ ꓟꓴꓽ ꓗꓪ ꓗꓴꓷꓼ ꓐꓰ ꓬꓲ ꓔꓱ, ꓜꓳꓽˍ ꓟ ꓧꓶ. ꓕꓯ ꓧꓪ꓾ ꓠꓱ. ꓐꓯ ꓤꓰ ꓞ, ꓟ ꓖꓶ ꓡˍ ꓥꓳ ꓐꓰ ꓬꓲ ꓐꓯ ꓔ ꓟ ꓡꓰ ꓐꓰ꓾ ꓣꓳ ꓤꓶꓻ ꓗꓪ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓢꓲ ꓠꓬꓲ ꓞꓳ ꓙꓳ ꓟ ꓦꓬꓼ ꓠꓬꓲ ꓗꓪ ꓢꓯꓼ ꓪ ꓪꓴ‐ꓢ ꓗꓪ ꓐꓰ ꓓꓰꓽ ꓢꓲ ꓠꓬꓲ ꓞꓳ ꓙꓳ ꓡꓯ꓿ ꓮ ꓙꓵꓽ ꓢꓴ ꓔꓯ ꓫ. ꓟꓳ꓿
