ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪ.꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓢꓲꓺ ꓒꓽꓳ꓾ ꓢꓲꓺ ꓒꓽꓳ꓾ ꓐꓰ ꓘꓴ ꓢꓴ ꓥ ꓕ ꓑꓳꓸꓼ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓟꓽ ꓪ ꓓꓵꓽ ꓡꓰ꓿ ꓐ, ꓐ ꓠꓲ, ꓡꓶꓽ ꓛꓳ ꓢꓴˍ ꓡꓰꓽ ꓓꓵꓽ ꓡꓰ ꓪ ꓓ, ꓡꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓣꓳ ꓦ ꓢꓯꓼ ꓪ ꓣꓴ ꓓꓴ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ (ꓟ‐ꓕꓲ 7ꓽ21‐29) ꓥ ꓡꓳ꓿
ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓬꓲ ꓕꓲꓽ ꓟꓴꓽ ꓠꓬ ꓕꓱ ꓡꓱ ꓥꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓖꓶˍ ꓟ ꓠꓬ꓾ ꓢꓲꓺ ꓒꓽꓳ꓾ ꓢꓲꓺ ꓒꓽꓳ꓾ ꓐꓰ ꓘꓴ ꓢꓴ ꓥ ꓕ ꓑꓳꓸꓼ ꓠꓽ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓪ ꓓꓵꓽ ꓡꓰ꓿ ꓐ, ꓐ ꓠꓲ, ꓡꓶꓽ ꓛꓳ ꓢꓴˍ ꓡꓰꓽ ꓓꓵꓽ ꓡꓰ ꓪ ꓓ, ꓡꓳ꓿ ꓡꓳ, ꓬꓰˍ ꓕꓲꓽ ꓠꓬꓲ ꓕꓯ ꓠꓽ ꓥꓪ ꓔꓯ꓾ ꓢꓲꓺ ꓒꓽꓳ꓾ ꓢꓲꓺ ꓒꓽꓳ꓾ ꓥꓪ ꓠꓴꓻ ꓟꓬꓱ ꓠꓯꓸꓼ ꓗꓪ ꓥꓪ ꓟꓷꓽ ꓠꓷ, ꓝ. ꓗꓷꓳ꓿ ꓠꓲꓽˍ ꓟꓲ ꓮ ꓟꓬ, ꓖꓼ ꓓꓳ ꓗꓷꓳ꓿ ꓠꓴ ꓟꓬꓱ ꓗꓪ ꓐꓰ ꓥꓪ ꓪꓴꓽˍ ꓟ ꓟꓬꓱꓽ ꓓꓽ ꓟ ꓮ ꓟꓬ, ꓬꓰ ꓗꓷꓳ ꓐꓰ ꓥꓪ ꓔꓯ ꓐꓯ ꓖꓶ ꓡˍ ꓥꓳ꓿ ꓖꓳ ꓕꓯ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓥꓪ ꓠꓴ ꓔꓯ ꓟꓽ ꓢꓷ.꓿ ꓥꓪ ꓗꓪ ꓐꓰ ꓧ, ꓙꓰ꓿ ꓠꓴ ꓟꓽ ꓧ ꓟ ꓟꓽ ꓙꓲꓻ ꓟ ꓬꓰ ꓢꓴ ꓐꓰ ꓐꓯ ꓢꓲ ꓒꓳ, ꓖꓶˍ ꓥꓳ꓾ ꓐꓯˍ ꓟ ꓬꓲ ꓕꓲꓽ ꓟꓴꓽ ꓥꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓽ ꓣꓳ ꓪꓴ‐ꓢ ꓦ ꓡꓱ ꓢꓴ ꓬꓰ ꓔꓬ ꓢꓴ ꓔꓯ ꓔꓱ, ꓔꓱ, ꓚꓵ ꓚꓵ ꓐꓰ ꓬꓲ ꓙꓲꓻ ꓐꓰ ꓫꓪ. ꓠꓬꓲ ꓓꓴ ꓟ. ꓟꓲꓽ ꓝꓲ. ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓾ ꓢꓲꓺ ꓒꓽꓳ ꓢꓲꓺ ꓒꓽꓳ ꓐꓰ ꓘꓴ ꓢꓴ ꓥ ꓕ ꓑꓳꓸꓼ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓪ ꓓꓵꓽ ꓡꓰ꓿ ꓐ, ꓐ ꓠꓲ, ꓡꓶ ꓛꓳ ꓢꓴˍ ꓡꓰ ꓓꓵꓽ ꓡꓰ ꓪ ꓓ, ꓡꓳ꓾ ꓐꓰ ꓐꓯˍ ꓡꓳ꓿ ꓝꓮꓲ ꓢꓲ ꓒ ꓬꓰ‐ꓢꓴ ꓟꓬꓱ ꓠꓯꓸꓼ ꓗꓪ ꓟꓷꓽ ꓠꓷ, ꓝ. ꓢꓴ ꓐꓴ꓾ ꓢꓲ ꓒ ꓬꓰ‐ꓢꓴ ꓟꓬꓱ ꓗꓪ ꓐꓰ ꓠꓲꓽ ꓮ ꓟꓬ, ꓖꓼ ꓓꓳ ꓗꓷ ꓢꓴ꓾ ꓢꓲ ꓒ ꓬꓰ‐ꓢꓴ ꓟꓬꓱ ꓠꓯꓸꓼ ꓗꓪ ꓟꓬꓱꓽ ꓓꓽ ꓟ ꓮ ꓟꓬ, ꓬꓰ ꓟꓶ ꓗꓷ ꓢꓴ ꓐꓴ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓡꓳ, ꓬꓰˍ ꓕꓲꓽ ꓠꓬꓲ ꓕꓯ ꓠꓬ ꓥꓪ ꓠꓴꓻ ꓔꓯ ꓟꓽ ꓢꓷ.꓾ ꓠꓴ ꓟꓽ ꓙꓲꓻ ꓢꓴ ꓥꓪ ꓗꓪ ꓐꓰ ꓙꓰ ꓗꓷ ꓧ, ꓗꓷ ꓐꓰ ꓐꓯˍ ꓟ ꓐꓯ ꓘꓶ꓾ ꓕꓱ ꓟ ꓠꓬ ꓣꓳꓽ ꓫꓪ. ꓠꓬꓲ ꓓꓴ ꓥ ꓡꓳ꓾ ꓒꓰ. ꓩꓴ ꓓꓴˍ ꓟꓲ ꓥ ꓡꓳ꓿
ꓮ ꓫꓵꓽ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓕꓱ ꓡꓱ ꓐꓯˍ ꓡ꓿ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓣꓳ ꓪꓴ‐ꓢ ꓦ ꓡꓱ ꓢꓴ ꓮ ꓟꓬ, ꓠꓬ ꓢꓲꓺ ꓒꓽꓳ꓾ ꓢꓲꓺ ꓒꓽꓳ꓾ ꓐꓰ ꓐꓯ ꓢꓲ ꓪꓽ ꓮ ꓘꓶ. ꓘꓴˍ ꓡꓳ꓿ ꓪꓽ ꓘꓴ ꓦꓲ ꓗꓪ ꓮ ꓕꓯ ꓟꓲ ꓙꓰˍ ꓡꓳ꓿ ꓟꓷꓽ ꓠꓷ, ꓗꓪ ꓐꓰˍ ꓟꓲ꓾ ꓢꓲꓺ ꓒꓽꓳ꓾ ꓐꓰ ꓮ ꓕꓯ ꓟꓲ ꓐꓯˍ ꓡꓳ꓿ ꓪꓽ ꓘꓴˍ ꓡꓳ꓿ ꓓꓳ ꓟꓴˍ ꓡꓳ꓿ ꓟꓴꓽ ꓖꓪ ꓖꓪˍ ꓡꓳ꓿ ꓢꓲ ꓒ ꓬꓰ‐ꓢꓴ ꓟꓬꓱ ꓠꓯꓸꓼ ꓗꓪ ꓠꓲꓽ ꓖꓼ ꓓꓳˍ ꓡꓳ꓿ ꓪꓴꓽˍ ꓟ ꓟꓬꓱꓽ ꓓꓽ ꓟ ꓬꓰˍ ꓡꓳ꓿ ꓟꓷꓽ ꓠꓷ, ꓝ. ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓠꓴ ꓪ ꓕꓱ ꓟꓬ ꓙꓰꓽ ꓬꓰ ꓗꓷˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓟꓽ ꓥ ꓥ ꓐꓰ꓾ ꓚꓲ. ꓛꓬ ꓟꓬꓱ ꓓꓳꓽ ꓙꓳ ꓠ, ꓟ ꓐꓱ ꓶ ꓬꓰˍ ꓟ ꓑꓶ. ꓓꓴ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓟꓬꓱ ꓗꓪ ꓐꓰ ꓪꓴꓽˍ ꓟ ꓟꓬꓱꓽ ꓓꓽ ꓟ ꓬꓰˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓬꓰˍ ꓟ ꓟꓽ ꓥ꓿ ꓬꓲ ꓚꓲ. ꓛꓬ ꓪꓴꓽ ꓡ ꓟꓴ ꓡ ꓓꓴ ꓬꓰˍ ꓟ ꓑꓶ. ꓓꓴ ꓥ ꓡꓳ꓿
ꓝꓮꓲ ꓠꓬ ꓪꓽ ꓘꓴ ꓦꓲ ꓗꓪ ꓙꓰˍ ꓟ꓾ ꓟ. ꓟꓲꓽ ꓚˍ ꓟ꓾ ꓠꓲꓽ ꓔꓯ ꓖꓼ ꓓꓳ ꓗꓷˍ ꓟ꓾ ꓮ ꓫꓵꓽ ꓬꓰˍ ꓥ ꓟꓲ ꓪꓴ‐ꓢ ꓐꓱ ꓶ ꓐꓯ ꓢꓲ ꓬꓰˍ ꓥ ꓟꓲ꓾ ꓚꓲ. ꓛꓬ ꓐꓰ ꓶˍ ꓡꓰꓽ ꓬꓰˍ ꓟ ꓟꓬꓽˍ ꓡꓳ꓿ ꓖꓳ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓣꓳ ꓪꓴ‐ꓢ ꓦ ꓡꓱ ꓢꓴ ꓮ ꓙꓵꓽ꓾ ꓟ. ꓟꓲꓽ ꓕꓱ ꓟ ꓔꓯ ꓠ ꓠ, ꓔꓬ ꓢꓴ ꓮ ꓙꓵꓽ ꓐꓴꓳ꓾ ꓠꓬꓲ. ꓠꓬꓲ ꓣꓳꓽ ꓔꓱ, ꓔꓱ, ꓚꓵ ꓚꓵ ꓪꓴ‐ꓢ ꓟꓲꓽ ꓙꓬ ꓗꓪ ꓣꓳꓽ ꓛꓲ ꓬꓰˍ ꓕꓯ꓾ ꓕꓲ ꓚꓱ, ꓐꓯ ꓠꓬ꓾ ꓢꓲ ꓒ ꓬꓰ‐ꓢꓴ ꓟꓬꓱ ꓗꓪ ꓐꓰ ꓣꓳ ꓕꓱ ꓡꓱ ꓪꓴ‐ꓢ ꓟꓬꓱꓽ ꓬꓰ ꓗꓷˍ ꓕꓯ ꓠꓬ꓾ ꓪꓴ‐ꓢ ꓦ ꓡꓱ ꓢꓴ ꓕꓲꓽ ꓣꓳˍ ꓡꓰ ꓐꓰ ꓛꓳ ꓫꓱꓽ ꓔꓬ ꓕꓯ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓬꓰˍ ꓟ ꓐꓰ꓾ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓐꓱ ꓶ ꓬꓰ ꓖꓶˍ ꓟ ꓮ ꓡꓲ ꓟ ꓠꓬ ꓪ ꓜꓲ ꓜꓳꓽˍ ꓡ ꓐꓯ ꓟ ꓣꓳꓽ ꓠ ꓠꓬꓲ ꓓꓴ ꓥꓳ꓿ ꓣꓳ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠ ꓠꓬꓲ ꓓꓴ ꓥꓳ꓿
ꓣꓳ ꓗꓶ. ꓟꓽ ꓓꓻ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓪꓴ‐ꓢ ꓟꓲꓽ ꓙꓬ ꓗꓪ ꓮ ꓙꓵꓽ ꓡꓳ. ꓢꓷ.ˍ ꓟ ꓑꓶ. ꓓꓴ ꓥꓳ꓿ ꓕꓱ ꓟ ꓑꓶ. ꓓꓴ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓐꓯˍ ꓟ ꓕꓯꓽ ꓢꓲ ꓢꓲꓺ ꓒ ꓬꓰ‐ꓢꓴ ꓠꓬ ꓥꓪ ꓐꓱ ꓶ ꓮ ꓙꓵꓽ ꓬꓰ ꓖꓶ ꓗꓷ ꓟ ꓥꓳ꓿ ꓢꓲ ꓒ ꓬꓰ‐ꓢꓴ ꓕꓲꓽ ꓣꓳˍ ꓡꓰꓽ ꓥꓪ ꓐꓱ ꓶ꓾ ꓥꓪ ꓢꓲ ꓒ꓾ ꓥꓪ ꓢꓯꓼ ꓟꓬ ꓥꓳ ꓐꓰ ꓣꓳ ꓕꓱ ꓡꓱ ꓐꓯ ꓖꓶ ꓠ ꓗ, ꓟ ꓔꓯ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓥ ꓡꓳ꓿ ꓐ, ꓐ ꓠꓲ, ꓡꓶ ꓛꓳ ꓢꓴ ꓐꓯˍ ꓟ ꓥ ꓟꓲ ꓐ, ꓐ ꓠꓲ, ꓡꓶ ꓐꓯˍ ꓟ ꓠꓬ ꓬꓲ ꓝꓲ ꓩꓴ ꓗꓷ ꓟ ꓢꓲ ꓒ ꓬꓰ‐ꓢꓴ ꓔꓯ ꓕꓲ ꓖꓳ ꓓꓱꓽ ꓕꓲ ꓠꓲ, ꓟ ꓡꓱꓸꓼ ꓙꓵꓻ ꓢꓲ ꓠꓬꓲ ꓠꓲ, ꓠꓵ ꓠ, ꓟ ꓥꓳ꓿
ꓖꓳ ꓟ ꓑꓶ. ꓓꓴ ꓠꓬꓲ. ꓠꓬꓲ ꓣꓳ ꓪꓴ‐ꓢ ꓦ ꓡꓱ ꓢꓴ꓾ ꓪꓴ‐ꓢ ꓟꓬꓱꓽ ꓬꓰ ꓔꓬ ꓢꓴ ꓮ ꓙꓵꓽ ꓠꓬ ꓣꓳ ꓚꓲ. ꓛꓬ ꓐꓱ ꓶˍ ꓡꓰꓽ ꓬꓰ ꓔꓬ ꓡ꓿ ꓕꓱ ꓡꓱ ꓥꓳ ꓐꓯ ꓠꓬ ꓡꓳ, ꓬꓰˍ ꓕꓲꓽ ꓠꓬꓲ ꓕꓯ ꓠꓽ ꓢꓲ ꓒ ꓬꓰ‐ꓢꓴ ꓠꓬ꓾ ꓥꓪ ꓠꓴ ꓔꓯ ꓟꓽ ꓢꓷ.꓾ ꓠꓴ ꓥꓪ ꓐꓱ ꓶ ꓮ ꓫꓵꓽˍ ꓟꓲ ꓟꓽ ꓬꓰ ꓗꓷ ꓔ꓿ ꓠꓴ ꓚꓲ. ꓛꓬ ꓐꓱ ꓶ ꓬꓰ ꓔ꓾ ꓐꓯ ꓟ ꓐꓯ ꓘꓶꓽ ꓟꓶˍ ꓥꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓬꓲ ꓡꓳ, ꓬꓰˍ ꓟ ꓐꓯ ꓘꓶꓽ ꓕꓲꓽ ꓘꓶꓽ ꓠꓬ꓾ ꓥꓪ ꓐꓯ ꓘꓶꓽ ꓔꓯ ꓛꓳ ꓒꓵꓽ ꓢꓴ ꓠꓬ ꓕꓶ ꓞ, ꓟ ꓭ. ꓛꓲ ꓕꓯꓽ ꓢꓲ ꓗꓪ ꓫꓬ, ꓔ ꓟ ꓦꓲˍ ꓡꓰ ꓐꓰ ꓗ, ꓥꓳ꓿ ꓥꓪ ꓐꓯ ꓘꓶꓽ ꓔꓯ ꓑ ꓙꓽ ꓢꓲ ꓠꓬꓲ ꓟꓽ ꓛꓳ ꓒꓵꓽ ꓢꓴ ꓠꓬ ꓧꓶꓽ ꓚꓲ ꓕꓯꓽ ꓢꓲ ꓫꓬ, ꓔ ꓟ ꓦꓲ ꓔꓯ ꓫꓱ.ˍ ꓥꓳ꓿ ꓟꓲꓽ ꓦꓲ ꓕꓳꓽ ꓥꓳꓽ ꓡˍ ꓕꓯ ꓦꓲꓻ ꓖꓳ ꓟ ꓗꓪ ꓐꓬ ꓡꓰ ꓛꓵꓽ ꓡꓰˍ ꓥꓳ꓿ ꓐꓯ ꓠꓲ, ꓫꓵˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓪꓴ‐ꓢ꓾ ꓣꓳ ꓚꓬꓴ. ꓢꓲ ꓒ꓾ ꓣꓳ ꓤꓶꓻ ꓐꓱ ꓶ꓾ ꓕꓲ ꓞꓲꓼ ꓕꓲ ꓑ ꓐꓱ ꓶ ꓢꓲ ꓒ ꓬꓰ‐ꓢꓴ ꓥꓳ ꓐꓰ ꓙꓵꓻ ꓔꓬ ꓢꓴ꓾ ꓕꓱ ꓡꓱ ꓐ ꓡꓱ ꓐꓳ ꓔꓬ ꓢꓴ ꓠꓬ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼ ꓡˍ ꓥ ꓟꓲ ꓟꓽ ꓐꓱꓽ ꓡꓰ꓿ ꓖꓳ ꓡꓱ ꓥ ꓟꓲ ꓣꓳ ꓚꓲ. ꓛꓬ ꓐꓱ ꓶˍ ꓡꓰꓽ ꓪꓴꓽ ꓡ ꓟꓴ ꓡ ꓓꓴ ꓬꓰˍ ꓥꓳ ꓐꓯ ꓠꓬ ꓕꓲꓽ ꓠꓬꓲ ꓙꓳˍ ꓠꓬ ꓣꓳ ꓠꓬ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼ ꓡˍ ꓕꓯ ꓐꓬ ꓡꓰ ꓛꓵꓽ ꓡꓰˍ ꓥꓳ꓿
